རྒྱ་གར་སྲིད་བློན་ཨ་རིར་བསྐྱོད་འཆར་ལས་རིམ།

ཟླ་འདིའི་ཟླ་མཇུག་ཏུ་རྒྱ་གར་སྲིད་བློན་ཨ་རིར་སྐོར་སྐྱོད་གནང་སྟེ་ཨ་རིའི་སྲིད་འཛིན་དང་ལྷན་དུ་རྒྱལ་ཁབ་གཉིས་བར་མཉམ་ལས་བྱེད་ཕྱོགས་གཙོས་རྒྱལ་སྤྱིའི་དཀའ་རྙོག་ཁག་ཅིག་ལ་གོ་བསྡུར་གནང་རྒྱུ་ཡིན་འདུག

རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཚེས་ ༢༧ ནས་ ༣༠ ཉིན་བར་རྒྱ་གར་སྲིད་བློན་ནཱ་རེན་ཌ་མུ་དྷེ་སྲིད་བློན་ཆགས་རྗེས་ཀྱི་ཨ་རིར་སྐོར་སྐྱོད་ཐོག་མ་གནང་འཆར་ཡོད་པ་དང་། ཚེས་ ༢༧ ཉིན་ནེའུ་ཡོག་གྲོང་ཁྱེར་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ཚོགས་འདུར་ཕེབས་ཏེ་གཏམ་བཤད་དང་། ཚེས་ ༢༨ ཉིན་མཱ་ཌེ་སན་རྩེད་ཐང་དུ་ (Madison Square Garden) ཨ་རིའི་མི་སེར་ཡིན་པའི་རྒྱ་གར་གྱི་མི་རིགས་དག་ལ་ཐུག་འཕྲད་ཀྱིས་བགྲོ་གླེང་། ཚེས་ ༢༩ ཉིན་གྱི་སྔ་དྲོར་ཨ་རིའི་ཕྱི་འབྲེལ་ཉམས་ཞིབ་ཁང་ཞིག་ཏུ་ཕེབས་ཏེ་ཕྱི་སྲིད་དང་འབྲེལ་བའི་གཏམ་བཤད་གནང་རྒྱུའི་ལས་འཆར་སྒྲིག་ཡོད་འདུག

ཚེས་ ༢༩ དང་ ༣༠ ཉིན་ཨ་རིའི་སྲིད་འཛིན་ཨོ་བྷ་མ་ཐུག་འཕྲད་གནང་སྟེ། དེ་སྔོན་རྒྱལ་ཁབ་གཉིས་བར་སྲུང་སྐྱོབ་དང་ཐབས་ཇུས་ཐོག་གྲོས་མཐུན་བཞག་པ་ཁག་ལག་བསྟར་གནང་ཕྱོགས་ཐོག་གྲོས་མོལ་དང་གྲོས་མཐུན་གསར་པ་སྣོན་འཇོག རྒྱ་གར་དང་ཨ་རིའི་བར་ཚོང་འབྲེལ་དང་དམག་དོན་ཐད་མཉམ་ལས་བྱེད་ཤུགས་ཆེ་རུ་གཏོང་ཐབས་དང་། ཨབ་གྷན་དང་ཨི་རག དཀྱིལ་ཤར་ཡུལ་གྲུའི་དྲག་སྤྱོད་ཤོག་ཁག་ ( ISIS) གི་དཀའ་རྙོག་དག་ལ་གྲོས་མོལ་གནང་རྒྱུ་ཡིན་འདུག ད་ཐེངས་རྒྱ་གར་སྲིད་བློན་ཨ་རིར་སྐོར་སྐྱོད་གནང་སྐབས་སྲིད་འཛིན་ཨོ་བྷ་མས་ཕོ་བྲང་དཀར་པོའི་ནང་ཁོང་ལ་ཆེ་བསྟོད་དགོང་ཚིགས་ཤིག་དང་། སྲིད་འཛིན་གཞོན་པ་ཇའོ་བྷེ་ཌིན་གྱིས་ཀྱང་གུང་ཚིགས་ཤིག་འདེགས་འབུལ་ཞུ་འཆར་ཡོད་འདུག

འདིའི་ཐད་ཨ་རིའི་ཕོ་བྲང་དཀར་པོས་གསལ་བསྒྲགས་སྤེལ་བའི་ནང་། “རྒྱལ་ཁབ་གཉིས་ཀྱི་དབུ་ཁྲིད་རྣམ་གཉིས་མཇལ་འཕྲད་གནང་སྐབས། མ་འོངས་པར་རྒྱ་གར་དང་ཨ་རིའི་བར་ཐབས་ཇུས་དང་དཔལ་འབྱོར། སྲུང་སྐྱོབ། ཚོང་འབྲེལ་བཅས་ཀྱི་མཉམ་ལས་བྱེད་ཤུགས་ཆེ་རུ་གཏོང་ཐབས་གཙོས། ཨབ་གྷན་དང་ཨི་རག སི་རི་ཡའི་དཀའ་རྙོག་སེལ་ཐབས་ཐད་གྲོས་མོལ་གནང་རྒྱུ་རེད”€ ཅེས་བརྗོད་འདུག

རྒྱ་གར་རྒྱལ་ས་ལྡི་ལིའི་ཨ་རིའི་གཞུང་ཚབ་ཆེན་མོ་ལྕམ་ཁཱ་ཋ་ལེན་ (Kathleen Stephens) ལགས་ཀྱིས། “ཨ་རིའི་སྒེར་གཉེར་ཁེ་ནས་ཚོས་རྒྱ་གར་ནང་མ་འཛུགས་དང་། རྒྱ་གར་གྱི་ཁེ་ལས་ཚོས་ཨ་རིའི་ཁེ་ལས་ཁག་དང་མཉམ་ལས་བྱས་ཏེ། རྒྱལ་ཁབ་གཉིས་ཀྱི་ཚོང་དོན་འབྲེལ་ལམ་གོང་མཐོར་བཏང་སྟེ་དཔལ་འབྱོར་འཕེལ་རྒྱས་ཡོང་བ་བྱ་དགོས། ད་ལོ་སྔར་ལོ་དང་མི་འདྲ་བར་ཨ་རིས་རྒྱ་གར་དང་འབྲེལ་ལམ་ཡག་ཏུ་གཏོང་ཆེད། རྒྱ་གར་གྱི་སློབ་མ་མང་པོ་ཞིག་ལ་ཨ་རིར་སློབ་སྦྱོང་བྱེད་ཆོག་པའི་མཐོང་མཆན་སྤྲད་ཡོད་པ་མ་ཟད། རྒྱ་གར་སྲིད་བློན་མཆོག་ཨ་རིར་མགྲོན་འབོད་གནང་ཡོད་སྟབས། མ་འོངས་པར་རྒྱལ་ཁབ་གཉིས་བར་ཨ་སྒོར་ཐེར་འབུམ་ ༡༠༠ ནས་ ༥༠༠ ལྷག་གི་ཚོང་འབྲེལ་བྱེད་ཐུབ་པའི་རེ་བ་བྱེད་བཞིན་ཡོད”€ ཅེས་བརྗོད་འདུག

རྒྱ་གར་གྱི་ཕྱི་སྲིད་བློན་ཆེན་ལྕམ་སུ་ཤི་མཱ་ (Sushma Swara) ལགས་ཀྱིས། “ཨ་རིའི་གཞུང་གིས་རྒྱ་གར་གྱི་སྲིད་བློན་མཆོག་ལ་ཆེ་མཐོང་ཞུས་ཏེ་ཨ་རིར་མགྲོན་འབོད་གནང་བ་མ་ཟད། ཁོང་ལ་སྲིད་འཛིན་དང་སྲིད་འཛིན་གཞོན་པ་རྣམ་གཉིས་ཀྱིས་གསོལ་སྟོན་ཡང་འདེགས་འབུལ་ཞུ་འཆར་ཡོད་པ་སོགས་ད་ལྟའི་རྒྱ་གར་གཞུང་དང་འབྲེལ་ལམ་གསར་འཛུགས་གནང་གི་ཡོད་སྟབས། མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་བཟང་དུ་འགྲོ་ངེས་རེད”€ཅེས་བརྗོད་འདུག

༢༠༡༣ ལོའི་ཕྱི་ཟླ་ ༡༢ ཚེས་ ༡༢ ཉིན་ཨ་རིའི་ནེའུ་ཡོག་གྲོང་ཁྱེར་ཉེན་རྟོག་པས་ནེའུ་ཡོག་ཏུ་ཡོད་པའི་རྒྱ་གར་གཞུང་ཚབ་ཡན་ལག་ཁང་གི་སྐུ་ཚབ་གཞོན་པ་ལྕམ་ལྡེ་བེ་ཡཱ་ནེ་ཡིས་ཨ་རིའི་ཐོངས་མཆན་དང་ཡིག་ཆ་རྫུན་བཟོ་བྱས་པའི་ཉེས་མིང་འོག་འཛིན་བཟུང་འདྲི་གཅོད་བྱས་པར་བརྟེན་ཏེ། རྒྱ་གར་གཞུང་གིས་ལྡི་ལིའི་ཨ་རིའི་གཞུང་ཚབ་ཁང་ལ་རྣམ་འགྱུར་མི་ལེགས་པ་བསྟན་ཡོད་ཀྱང་། ནཱ་རེན་ཌ་མུ་དྷེ་ལ་རྒྱ་གར་སྲིད་བློན་རྒྱལ་ཁ་ཐོབ་པ་མ་ཐག ཨ་རིའི་སྲིད་འཛིན་ཨོ་བྷ་མས་འཚམས་འདྲི་དང་འབྲེལ་དེ་སྔོན་ནཱ་རེན་མུ་དྷེ་ཨ་རིར་ཐོངས་མཆན་སྤྲོད་མི་མཆོག་པའི་ཁྲིམས་ཡིག་རྩིས་མེད་དུ་བཏང་ཡོད།

ད་ལོའི་ཕྱི་ཟླ་ ༦ པར་ཨ་རིའི་གྲོས་ཚོགས་འོག་མའི་ཕྱི་སྲིད་ལྷན་ཚོགས་ཀྱི་ཚོགས་གཙོ་སྐུ་ཞབས་ཨེ་ཌི་ (Ed Royce) ཡིས་གྲོས་ཚོགས་ཀྱི་ཚོགས་གཙོར་ཕྱག་ཡིག་ཅིག་ཕུལ་ཏེ། རྒྱ་གར་གྱི་སྲིད་བློན་ཨ་རིར་ཕེབས་སྐབས་ཁོང་གྲོས་ཚོགས་ནང་གདན་ཞུ་གནང་སྟེ་གྲོས་ཚོགས་གོང་འོག་གཉིས་ཀྱི་བཞུགས་མོལ་ཚོགས་འདུའི་སྔོན་འགྲོའི་གཏམ་བཤད་སྤེལ་འཇུག་དགོས་སྐོར་བརྗོད་ཡོད་ལ། ཨ་རིའི་ཕྱི་སྲིད་དྲུང་ཆེ་ཇོན་ཀེ་རེ་ཡིས་རྒྱལ་ས་ཝ་ཤིན་ཌོན་དུ་རྒྱ་གར་དང་ཨ་རི་བར་གྱི་ཐུན་མོང་མཉམ་ལས་བྱེད་ཕྱོགས་ཀྱི་བགྲོ་གླེང་ཞིག་གི་སྟེང་། དུས་རབས་ཉེར་གཅིག་ནང་ཨ་རི་དང་རྒྱ་གར་གྱི་མཉམ་ལས་ནི་གལ་འགངས་ཆེ་ཤོས་ཤིག་ཆགས་ཡོད་སྐོར་གཏམ་བཤད་སྤེལ་ཞིང་། དེའི་རྗེས་ཁོང་རྒྱ་གར་ནང་སྐོར་སྐྱོད་གནང་སྟེ་རྒྱལ་ཁབ་གཉིས་བར་དོན་ཚན་ལྔའི་ཐོག་མཉམ་ལས་གྲོས་མཐུན་བཞག་སྟེ་ཨ་རི་དང་རྒྱ་གར་གྱི་འབྲེལ་ལམ་བསྐྱར་འཛུགས་བྱས་ཡོད།

གསར་འགོད་པ། དོན་གྲུབ།