ད་རེབ་རྒྱ་དཀར་ནག་གི་མགོ་ཁྲིད་ཐུག་འཕྲད་དང་བསྟུན་ཏེ་རྒྱལ་ཁབ་གཉིས་བར་ཚོང་ལས་མཉམ་འབྲེལ་དང་། ས་མཚམས་སྣ་ཐོད་ལ་ནས་གངས་རིན་པོ་ཆེ་བར་གཞུང་ལམ་བཟོ་རྒྱུ་སོགས་ཐག་གཅོད་བྱས་ཡོད་འདུག
ཁ་སང་རྒྱ་གར་རྒྱལ་ས་ལྡི་ལིར་རྒྱ་ནག་གི་སྲིད་འཛིན་ཞི་ཅིན་ཕིན་དང་རྒྱ་གར་སྲིད་བློན་ནཱ་རེན་ཌ་མུ་དྷེ་ཐུག་འཕྲད་གནང་སྟེ། རྒྱལ་ཁབ་གཉིས་ཀྱི་ས་མཚམས་རྩོད་རྙོག་དང་། རྒྱ་ནག་གིས་རྒྱབ་སྐྱོར་བྱས་ཏེ་རྒྱ་གར་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཁོངས་སུ་ཚུད་ཐབས། རྒྱ་དཀར་ནག་གཉིས་ཀྱི་ཚོང་འབྲེལ་ཐོག་རྒྱ་གར་ལ་ཨ་སྒོར་ཐེར་འབུམ་ ༣༥ ལྷག་གི་གྱོང་རག་གི་ཡོད་པ་ཉུང་དུ་གཏོང་ཐབས། རྒྱ་ནག་གིས་སྣ་ཐོད་ལ་ (Nathula) བརྒྱུད་རྒྱ་གར་བ་ཚོས་གནས་ཆེན་བརྩི་ཡུལ་གྱི་གངས་རིན་པོ་ཆེ་བར་གཞུང་ལམ་སྒོ་ཕྱེ་རྒྱུ། རྒྱ་ནག་གིས་རྒྱ་གར་ནང་མྱུར་ཚད་ལྡན་པའི་མེ་འཁོར་དང་ལྕགས་ལམ་བཟོ་སྐྲུན་སོགས་ཚོང་དོན་ཁག་ ༡༦ ལ་མིང་རྟགས་བཀོད་དེ། ལོ་ལྔའི་ནང་རྒྱལ་ཁབ་གཉིས་བར་ཨ་སྒོར་དུང་ཕྱུར་ ༢༠༠ ཡི་ཚོང་འབྲེལ་བྱ་རྒྱུའི་ཐག་གཅོད་བྱས་ཡོད་འདུག
འདིའི་ཐད་རྒྱ་གར་སྲིད་བློན་གྱིས། “རྒྱལ་ཁབ་གཉིས་བར་གྱི་ས་མཚམས་རྩོད་རྙོག་ཞི་འགྲིག་ཡོང་རྒྱུ་ནི་འབྲེལ་ལམ་ཡག་ པོ་ཡོང་ཐབས་ཀྱི་རྩ་བ་ལྟ་བུ་ཆགས་ཡོད་སྟབས། མ་འོངས་པར་རྒྱལ་ཁབ་གཉིས་ཀྱི་ས་མཚམས་ཁུལ་དུ་ཞི་བདེ་བརྟན་ལྷིང་བྱུང་ཚེ། རྒྱལ་སྤྱིའི་ཐོག་རྒྱ་དཀར་ནག་གཉིས་མཐུན་གྲོགས་རྒྱལ་ཁབ་ཡག་ཤོས་ཤིག་ཏུ་འགྱུར་རྒྱུ་རེད” ཅེས་བརྗོད་འདུག
རྒྱ་ནག་སྲིད་འཛིན་ཞི་ཅིན་ཕིན་གིས། “ཁྱིམ་མཚེས་རྒྱལ་ཁབ་གཉིས་ཀྱིས་འབྲེལ་ལམ་དམ་ཟབ་ཡོད་ཀྱང་། ད་དུང་གནད་དོན་མང་པོ་ཞིག་ལ་ཕན་ཚུན་རྒྱུས་ལོན་བྱ་དགོས་པ་ཆགས་ཡོད་སྟབས། ད་རེབ་འཚམས་འདྲི་འདི་བརྒྱུད་རྒྱལ་ཁབ་གཉིས་བར་ཐབས་ཇུས་དང་ཚོང་དོན་སོགས་ཀྱི་ཐད་སྔར་ལྷག་མཉམ་ལས་རྒྱ་ཆེ་རུ་གཏོང་ཐུབ་པའི་རེ་བ་འཆང་བཞིན་ཡོད། རྒྱ་གར་དང་རྒྱ་ནག་གི་ས་མཚམས་རྩོད་རྙོག་འདི་དག་ནི་ལོ་རྒྱུས་ཐོག་གི་དཀའ་ངལ་ཞིག་ཆགས་ཡོད་སྟབས། ས་མཚམས་ཁུལ་དུ་དོན་རྐྱེན་བྱུང་བར་བརྟེན་ནས་འབྲེལ་ལམ་ལ་དོ་ཕོག་འགྲོ་བ་མ་རེད” ཅེས་བརྗོད་འདུག
རྒྱལ་ཁབ་གཉིས་ཀྱི་མགོ་ཁྲིད་རྣམ་གཉིས་ཀྱིས་ཐུན་མོང་གསར་འགོད་གསལ་བསྒྲགས་ཤིག་སྤེལ་བ་ཞིག་གི་ནང་། “ཁྱིམ་མཚེས་རྒྱལ་ཁབ་གཉིས་བར་ས་མཚམས་དང་ཚོང་དོན་གནད་དོན་ཐད་དཀའ་རྙོག་གང་འཚམ་འཕྲད་བཞིན་ཡོད་ཀྱང་། ད་རེབ་འབྲེལ་མོལ་འདི་བརྒྱུད་རྒྱལ་ཁབ་གཉིས་ཀྱི་དཀའ་རྙོག་མང་པོ་ཞིག་ལ་གོ་བསྡུར་གནང་ཡོད་སྟབས། མ་འོངས་པར་རྒྱལ་ཁབ་གཉིས་བར་ཚོང་དོན་དང་རྒྱལ་སྤྱིའི་གནད་དོན་མང་པོ་ཞིག་ལ་མཉམ་ལས་བྱས་ཏེ། འབྲེལ་ལམ་ལ་བཟང་ཕྱོགས་ཀྱི་འགྱུར་བ་ཞིག་འཐོན་ཐུབ་པ་བྱ་རྒྱུ་ཡིན” ཞེས་སོགས་བརྗོད་འདུག
ད་ལོ་རྒྱ་ནག་དམག་མིས་རྒྱ་གར་ས་མཚམས་ཁུལ་དུ་སིམ་འཛུལ་ཐེངས་ ༤༢༣ ལྷག་བྱས་ཡོད་པ་དང་། ལྷག་པར་དུ་རྒྱ་ནག་སྲིད་འཛིན་ཞི་ཅིན་ཕིན་རྒྱ་གར་བསྐྱོད་འཆར་ཡོད་པ་དང་བསྟུན་ཏེ། རྒྱ་ནག་གི་ས་མཚམས་དམག་མིས་ལ་དྭགས་ས་མཚམས་ཀྱི་ཆུ་དམར་དང་སྡེམ་ཆོག་ཁུལ་དུ་གཞུང་ལམ་དང་ཆུ་རགས་གསར་རྒྱག་མགོ་འཛུགས་བྱས་ཡོད་ཀྱང་། ད་རེབ་རྒྱ་དཀར་ནག་གི་མགོ་ཁྲིད་ཐུག་འཕྲད་གནང་བར་བརྟེན་ཏེ། ཁ་སང་ཉིན་རྒྱབ་རྒྱལ་ཁབ་གཉིས་ཀྱི་ས་མཚམས་དམག་དཔོན་ཐུག་འཕྲད་བྱས་ཏེ་ས་མཚམས་ སྐོར་ལ་གྲོས་བསྡུར་བྱས་ཡོད་འདུག
ཁ་སང་རྒྱ་ནག་སྲིད་འཛིན་ཞི་ཅིན་ཕིན་རྒྱ་གར་རྒྱལ་ས་ལྡི་ལིར་འབྱོར་སྐབས། བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ། ས་གནས་བོད་མི་བཅས་ཀྱི་ངོ་རྒོལ་སྐད་འབོད་བྱས་སྟབས། རྒྱ་གར་ཉེན་རྟོག་པས་ལྡི་ལི་བོད་སྒར་བསམ་ཡས་གླིང་དང་། བོད་ཁྱིམ་སྡོད་ཁང་སོགས་སུ་དམ་དྲག་དང་བོད་མི་ལས་འགུལ་བ་ ༩༣ ཙམ་འཇུ་བཟུང་བཀག་བསྐྱིལ་བྱས་ཡོད་ཀྱང་། བོད་མི་ཚོས་ཞི་ཅིན་ཕིན་སྡོད་ཡུལ་མགྲོན་ཁང་ ( Taj Hotel) གི་གཡས་གཡོན་དུ་ལག་ཏུ་འཕྲེད་དར་འདྲ་མིན་འཁྱེར་ཏེ། ངོ་རྒོལ་སྐད་འབོད་ཤུགས་ཆེན་བྱས་ཡོད་པ་མ་ཟད། དེ་རིང་བོད་མི་ལས་འགུལ་བ་ཞིག་གིས་རྒྱབ་ཏུ་བོད་ཀྱི་རྒྱལ་དར་འཁྱེར་ནས་ལྡི་ལི་དྷུ་ལཱ་ཁུན་ (Dhaula Kuan) ཉེ་འཁྲིས་ཀྱི་བརྙན་འཕྲིན་ལྕོག་མཁར་ (TV Tower) སྟེང་འཛེགས་ཏེ། ཞི་ཅིན་ཕིན་ལ་ངོ་རྒོལ་སྐད་འབོད་བྱས་ཡོད་པ་དང་། དེ་བཞིན། ཟླ་འདིའི་ཚེས་ ༡༦ ཉིན་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་སྲིད་འཛིན་ཞི་ཅིན་ཕིན་ཕེབས་ཡུལ་ཨ་མེ་ཌ་བྷ་ཌ་གྲོང་ཁྱེར་གྱི་གྷན་དྷི་བཞུགས་གནས་ (Sabarmati Ashram) ནང་ཡིབ་ནས་སྡོད་སྐབས། ཟླ་འདིའི་ཚེས་ ༡༧ ཞོགས་པ་རྒྱ་གར་གསང་བའི་ལས་ཁུངས་ཀྱིས་ཤེས་རྟོགས་བྱུང་སྟེ་འཛིན་བཟུང་བྱས་ཡོད་འདུག
རྒྱ་གར་གྱི་(First post)ཞེས་པའི་ཐོག་གནས་ཚུལ་ཐོན་པར། ཞི་ཅིན་ཕིན་གྱི་རྒྱ་གར་ནང་གཟིགས་སྐོར་ལམ་ལྷོང་དང་གྲུབ་འབྲས་ལྡན་པ་ཞིག་ཡོང་ཆེད། ནཱ་རེན་ཌ་མུ་དྷེའི་གཞུང་གིས་དེ་རིང་ཚེས་ ༡༩ ཉིན་༧གོང་ས་ཏཱ་ལའི་བླ་མ་མཆོག་ལ་ལྡི་ལིའི་ནང་གི་མཛད་འཆར་ཁག་ཅིག་ཡོད་པ་ཕྱིར་འགྱངས་ཡོང་བའི་འབོད་སྐུལ་ཞུས་ཡོད་སྐོར་འཁོད་འདུག གཞན། ལྡི་ལི་ཁུལ་གྱི་ས་ཕྱོགས་གང་སར་ཉེན་རྟོག་པ་ ༦༠༠༠ ལྷག་དང་གསང་བའི་ལས་བྱེད་༢༥༠ ལྷག་འགྲེམ་འཇོག་གིས་བོད་མི་དང་བོད་སྒར་ཚོའི་བྱ་སྤྱོད་ལ་ལྟ་སྲུང་ནན་པོ་བྱེད་ཀྱིན་ཡོད་འདུག
ཁ་སང་༧གོང་ས་མཆོག་མོམ་བྷེ་ནང་རྒྱ་གར་ཚོང་པའི་ལྷན་ཚོགས་དབུ་བརྙེས་ཏེ་ལོ་ ༡༠༨ འཁོར་བའི་དུས་དྲན་མཛད་སྒོར་ཕེབས་སྐབས་གསར་འགོད་པས་རྒྱ་དཀར་ནག་གཉིས་ཀྱི་འབྲེལ་ལམ་དང་བོད་དོན་གནད་དོན་སྐོར་ལ་བཀའ་འདྲི་ཞུས་པའི་ལན་དུ། “རྒྱ་དཀར་ནག་གཉིས་ཀྱི་འབྲེལ་ལམ་དེ་བཞིན་གཅིག་གིས་གཅིག་ལ་ཡིད་ཆེས་ཡོད་པའི་ཐོག་ནས་བྱུང་བ་ཡིན་ཚེ། ཨ་ཤེ་ཡ་ཙམ་མ་ཟད་འཛམ་གླིང་སྤྱི་ལ་ཕན་ཐོགས་ཡོང་རྒྱུ་རེད། ཞི་བདེ་དང་འཆམ་མཐུན་གྱི་སྤྱི་ཚོགས་ཞེས་པ་ནི་གཅིག་གིས་གཅིག་ལ་ཡིད་ཆེས་ཡོད་པའི་ཐོག་ནས་བྱུང་བ་ཞིག་ཡིན་སྟབས། རྒྱ་དཀར་ནག་གི་འབྲེལ་ལམ་ཡག་པོ་ཡོང་དགོས་ན་ཕན་ཚུན་ཡིད་ཆེས་དགོས་རྒྱུ་གལ་ཆེན་པོ་ཡིན” ཞེས་གསུངས་འདུག
༧གོང་ས་མཆོག་ལ་ད་ལྟའི་རྒྱ་ནག་གི་མགོ་ཁྲིད་ཚོར་ཡིད་ཆེས་གང་འདྲ་ཡོད་མེད་དྲིས་པའི་ལན་དུ། “ངོས་ཀྱིས་རྒྱ་ནག་གི་མགོ་ཁྲིད་གསར་པར་ཡིད་ཆེས་ཡོད། ཁོང་ནི་བློ་རྒྱ་ཆེ་ལ་དོན་དངོས་དང་བསྟུན་ཤེས་མཁན་ཞིག་ཡིན་པ་ཙམ་མ་ཟད། ཕྱག་ལས་ག་རེ་གནང་ཡང་ཐད་ཀར་ལག་བསྟར་གནང་མཁན་གྱི་མགོ་ཁྲིད་ཅིག་ཡིན། རྒྱ་གར་ནི་མི་འབོར་མང་ལ་སྐད་རིགས་འདྲ་མིན་སྤྱོད་ཡུལ་གྱི་རྒྱལ་ཁབ་ཅིག་ཡིན་ཡང་མི་རིགས་ཕན་ཚུན་བར་རྒྱ་གར་བ་གཅིག་གི་འདུ་ཤེས་བཟུང་སྟེ་མཛའ་མཐུན་མཉམ་གནས་བྱེད་བཞིན་ཡོད་པ་མ་ཟད། སྨྲ་བརྗོད་རང་དབང་ཤུགས་ཆེ་ཡོད་པའི་དམངས་གཙོའི་རྒྱལ་ཁབ་ཅིག་ཡིན་སྟབས། རྒྱ་ནག་སྲིད་འཛིན་ཞི་ཅིན་ཕིན་གྱིས་རྒྱ་གར་གྱི་རིན་བྲལ་རིན་ཐང་འདི་དག་ལ་སློབ་སྦྱོང་གནང་དགོས་པ་ཆགས་ཀྱི་ཡོད” ཅེས་གསུངས་འདུག
རྒྱ་དཀར་ནག་གི་འབྲེལ་ལམ་ཐད་བོད་དོན་གལ་འགངས་ག་ཚོད་ཡོད་མེད་ཐད། “བོད་ཀྱི་དཀའ་རྙོག་འདི་ནི་རྒྱ་གར་གྱི་དཀའ་རྙོག་ཞིག་ཀྱང་ཆགས་ཡོད། ༡༩༥༠ སྔོན་ལ་རྒྱ་གར་ནུབ་ཁུལ་གྱི་ས་མཚམས་སུ་དམག་མི་གཅིག་ཀྱང་མེད་སྟབས། རྒྱལ་ཁབ་གཉིས་བར་ཞི་བདེ་དང་བརྟན་ལྷིང་ཡོད་ཀྱང་། ད་ལྟ་ས་མཚམས་ཁུལ་དུ་དཀའ་རྙོག་མང་དག་ཅིག་བྱུང་བཞིན་ཡོད་པར་བརྟེན། དཀའ་ངལ་དེ་དག་ཐོག་ཕྱོགས་གཉིས་བར་དྲག་ཤུགས་མ་སྤྱད་པར་བསམ་ཞིབ་དང་གྲོས་མོལ་བརྒྱུད་ནས་སེལ་ཐབས་བྱེད་དགོས” ཞེས་སོགས་གསུངས་འདུག
གསར་འགོད་པ། དོན་གྲུབ།
གནས་ཚང་ལགས། སྐབས་འདིར་སྐད་ཆ་འདྲི་ས་༧གོང་ས་མཆོག་རེད། དེ་བས་༧གོང་ས་མཆོག་གིས་ལན་གནངས་བ་རེད། འདི་ཙམ་ཡང་མི་ཤེས་སམ། ཨ་ཡ།
བོད་ལྗོངས་ནི་རྒྱ་གར་གྱི་དཔོན་པོ་ཚོས་རྒྱ་ནག་ལ་ངོ་དགའ་སྦྲེད་སླད་ཁྲབ་བྱེད་དང་བྱ་དགའ་ལག་རྟག་སྤྲོད་ཡོད་ན་མེད་ན་དེ་ཡིན་པ་ད་ལམ་ཡང་མུ་སྡི་ཡི་ཡང་སྐར་ཞིས་ལ་སྤྲད་ཡོད་འདུག་མོད་ཀྱང་རྒྱ་ནག་གི་རྒྱ་གར་ལ་དགོས་དེ་ཚོ་སྤྲོད་མྱོང་པ་དང།་ད་ལམ་ཞིས་ཀྱི་ག་ནས་སྤྲོད་།ཁོ་གཉིས་ཐག་ཐག་ས་ལྟད་མོ་བལྟས་འདུག་
བོད་ལྗོངས་ནི་རྒྱ་གར་གྱི་དཔོན་པོ་ཚོས་རྒྱ་ནག་ལ་ངོ་དགའ་སྦྲེད་སླད་ཁྲབ་བྱེད་དང་བྱ་དགའ་ལག་རྟག་སྤྲོད་ཡོད་ན་མེད་ན་དེ་ཡིན་པ་ད་ལམ་ཡང་མུ་སྡི་ཡི་ཡང་སྐར་ཞིས་ལ་སྤྲད་ཡོད་འདུག་མོད་ཀྱང་རྒྱ་ནག་གི་རྒྱ་གར་ལ་དགོས་དེ་ཚོ་སྤྲོད་མྱོང་པ་དང།་ད་ལམ་ཞིས་ཀྱི་ག་ནས་སྤྲོད་།ཁོ་གཉིས་ཐག་ཐག་ས་ལྟད་མོ་བལྟས་འདུག་
ད་ག་རེ་མ་འགྲིག་པ་རེད་དམ། སྐབས་འདིར་སྐད་ཆ་བཤད་མཁན་སྲིད་སྐྱོང་དང་། གོང་ས་མཆོག་བར་གནས་ལྟ་བུར་སྡོད་དགོས་པ་མ་རེད་དམ། ཐམས་ཅད་མཁྱེན་པ་ཚང་མ་ནི་ཐམས་ཅད་མཁྱེན་པ་རང་རེད།