རྒྱ་དཀར་ནག་བར་ནས་བོད་ཀྱི་རྣམ་འགྱུར།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༣༩ སྟེང་གི་རྩོམ་སྒྲིག་པའི་གཏམ།

རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནང་གཟིགས་སྐོར་ཐོག་མ་གནང་། རྒྱ་གར་གྱི་སྲིད་བློན་མུ་དྷེ་ཡིས་ཀྱང་རྒྱ་ནག་གི་སྲིད་འཛིན་ལ་གཞུང་འབྲེལ་ཐུག་འཕྲད་དང་པོ་བྱས། ད་རེབ་རྒྱ་དཀར་ནག་གི་མགོ་ཁྲིད་བར་སླར་ཡང་ཨ་སྒོར་ཐེར་འབུམ་འགའ་ཡི་ཚོང་དོན་གྲོས་ཆོད་བཞག་སོང་། རྒྱ་གར་གཞུང་གིས་འདས་པའི་ལོ་ངོ་བཅུ་གྲངས་ནང་རྒྱ་ནག་དང་ཚོང་འབྲེལ་བྱས་པའི་གྱོང་གུད་ཀྱི་བུ་ལོན་སྒྲུབ་འཇལ་མ་ཐུབ་པར་ལྷག་ཡོད་པའི་སྟེང་། ད་རེས་སླར་ཡང་རིན་སྤྲད་དེ་རྒྱ་ནག་གི་ལག་ནས་གྱོང་ཆེན་ཞིག་ཉོ་རྒྱུར་མིང་རྟགས་བཀོད་སོང་།

དྷ་རམ་ས་ལའི་བོད་མི་མང་སྤྱི་འཐུས་གྲོས་རྭའི་ནང་ཉིན་ཧྲིལ་བོ་ཞིག་ལ་གནས་ཚུལ་དེའི་སྐོར་ལ་བགྲོ་གླེང་གནང་སོང་། དེ་ནི་རྣམ་འགྱུར་བསྟན་པ་ཡིན་ཞེས་ཚོགས་གཙོས་གསུངས་སོང་ལ། གྲོས་ཚོགས་འཐུས་མི་ཚོས་ཀྱང་ཡང་དང་བསྐྱར་དུ་སྐྱོར་སོང་། ཆབ་སྲིད་ངོས་ཐད་ནས་བལྟས་ན་རྣམ་འགྱུར་བསྟན་པ་དེར་གནད་འགག་རེ་ཡོད་སྲིད་མོད། སྒང་ནས་རྣམ་འགྱུར་སྟོན་རོགས་ཞེས་འབོད་སྐུལ་ཞུས་པ་དང་། འོག་ནས་ཀྱང་རྣམ་འགྱུར་བསྟན་པ་ཡིན་ཞེས་བཙན་གྱིས་བཙིར་ཏེ། གནོན་བཙིར་བར་གྱི་རྣམ་འགྱུར་དེ་དག་གིས་ཕན་ཡོད་དམ། རང་གི་ནང་ཁོག་ཕྱི་ལ་བསྟན་ཏེ་ཕ་རོལ་བོར་གདེང་སྤོབས་སྤྲད་ཡོད།

ཞི་ཅིན་ཕིན་སྲིད་བློན་མུ་དྷེ་ཡི་སྐྱེས་སྐར་ཐོག་ཕེབས་པ་དང་། མགོ་ཁྲིད་རྣམ་གཉིས་མེ་ཏོག་ལྡུམ་རྭའི་ནང་བག་ཡངས་སྤྲོ་འཆམ་བྱས་པ་སོགས་ཀྱང་ཆབ་སྲིད་ཀྱི་རྣམ་འགྱུར་རེད། རྣམ་འགྱུར་དེ་བརྒྱུད་ནས་རྒྱ་དཀར་ནག་བར་གྱི་ལེའུ་གསར་པ་ཞིག་མཚོན་ཅི་ཐབས་བྱེད་ཀྱི་ཡོད་མོད། ཁ་ཞེ་གཉིས་མེད་ཀྱི་རྣམ་འགྱུར་རིན་ཐང་ཆེ་ཤོས་དེ། བདག་ཉིད་ཆེན་པོ་གྷན་དྷི་ཡི་བདེན་པའི་ཨུ་ཚུགས་དབུ་འཛུགས་སྐབས། མ་བརྟེན་པའི་ལས་འགུལ་སྤེལ་ཏེ་འཐག་ལས་བྱེད་སྟངས་ཞི་ཅིན་ཕིན་ལ་སྦྱན་འབུལ་ཞུས་པ་དེ་རེད། འདིས་རྒྱ་གར་གྱི་རང་བཙན་ལོ་རྒྱུས་མཚོན་པ་མ་ཟད། མི་རིགས་དང་རིག་གཞུང་། དམངས་གཙོ་དང་རང་དབང་། བདེན་པ་རྣམ་པར་རྒྱལ་བའི་མཐའ་སོགས་མཚོན་གྱི་ཡོད།

དེ་སྔོན་རྒྱ་གར་གྱི་སྲིད་བློན་རིམ་བྱོན་རྒྱ་ནག་པེ་ཅིན་ལ་ཕེབས་ཐེངས་རེར་བོད་དོན་སྐོར་གྱི་ཚིག་བརྗོད་འགའ་རེ་ལག་སྐྱེས་སུ་བསྣམས་ཡོད་ལ། རྒྱ་ནག་གིས་ཀྱང་རྒྱ་གར་ལ་རྣམ་འགྱུར་ཡག་པོ་སྟོན་མིན་བོད་དོན་ཛ་དྲག་མིན་ལ་ཐུག་ཡོད། འཛམ་གླིང་ཐོག་བོད་དོན་རྩ་མེད་ཆགས་པའི་ཉིན་མོར། རྒྱ་དཀར་ནག་གི་མགོ་ཁྲིད་ཡང་ཐུག་བསྐྱར་ཐུག་དང་གྲོས་མོལ་རིམ་བརྩེག་གི་ལས་རིམ་དེ་དག་ཀྱང་མེད་པ་ཆགས་ཏེ། རྒྱ་ནག་གིས་རྒྱ་གར་ལ་གདམ་ཀ་གཉིས་ལས་སྤྲོད་མི་སྲིད། གདམ་ཀ་གཅིག་སྤྱི་ལེ་ཁྲི་ཕྲག་མང་པོའི་ས་ཁུལ་དེ་དག་དང་བླངས་ཀྱིས་རྩིས་སྤྲོད་དགོས་པ་དེ་རེད་ལ། གདམ་ཀ་གཞན་དེ་ནི་རྒྱལ་ཁབ་གཉིས་ཀྱིས་དྲུག་ཅུ་རེ་གྲངས་ལ་བསྐྱར་དུ་དྲན་གསོ་བྱེད་དགོས་པ་དེ་རེད།

ད་རེས་རྒྱ་དཀར་ནག་གི་ས་མཚམས་སྐོར་ལ་གསལ་ལ་མི་གསལ་བའི་མག་མོག་གི་སྐད་ཆ་མང་པོ་ཞིག་བཤད་སོང་མོད། རྒྱ་གར་གཞུང་གིས་ཐིག་ཚད་འཛིན་དགོས་ས་དེ། སྐབས་དེར་མམ་བྷེ་རུ་གསར་འགོད་པའི་དྲི་བའི་ལན་དུ་༧གོང་ས་མཆོག་གིས། བོད་ཀྱི་དཀའ་ངལ་དེ་རྒྱ་གར་གྱི་དཀའ་ངལ་ཡང་ཡིན། རྒྱ་དཀར་ནག་གཉིས་བར་ཡུན་རིང་ས་མཚམས་རྩོད་རྙོག་ཡོད་པ་དེ་དག་ངེས་པར་དུ་སེལ་ཐབས་བྱེད་དགོས། འོན་ཀྱང་ཐབས་ལམ་འཚེ་བའི་ལམ་ལ་མ་བརྟེན་པར་ཞི་བའི་ཐབས་ལ་བརྟེན་ཏེ་དཀའ་རྙོག་སེལ་དགོས་པ་ཧ་ཅང་གལ་ཆེན་ཡིན། ༡༩༥༠ གོང་ལ་རྒྱ་གར་བྱང་ཕྱོགས་ས་མཚམས་སུ་དམག་མི་གཅིག་ཀྱང་མེད་པར་ཞི་བདེ་ལྷིང་འཇགས་ཡིན། སྔ་ཕྱི་མ་གཏོགས་རྒྱ་དཀར་ནག་གཉིས་ཀྱི་ས་མཚམས་ཀྱི་རྩོད་རྙོག་སེལ་དགོས་པ་ཆགས་ཡོད། ཅེས་གསུངས་པ་འདི་དག་རེད།