ཆོས་ལུཊ་ཕན་ཚུན་གྱི་མཐུན་ལམ་གལ་ཆེན་ཆཊ་ཡོད།

༧གོང་ས་མཆོག་གིས་རྒྱལ་ས་ལྡི་ལིར་ཚོགས་པའི་ཆོས་ལུགས་འདྲ་མིན་གྱི་ལྷན་ཚོགས་ཐོག འཛམ་གླིང་ནང་ཆོས་ལུགས་ཕན་ཚུན་གྱི་མཐུན་ལམ་གལ་ཆེན་ཆགས་ཡོད་སྟབས། ཆོས་ལུགས་དབུ་ཁྲིད་ཚོས་དམིགས་ཡུལ་ངེས་ཅན་ཞིག་གི་ཐོག་འགྲོ་ཐུབ་པའི་གོ་བསྡུར་གནང་དགོས་སྐོར་གསུང་འདུག

ཟླ་འདིའི་ཚེས་ ༡༩ ཉིན་༧གོང་ས་མཆོག་གིས་རྒྱ་གར་གྱི་གྲོང་ཁྱེར་མུམ་བྷེ་ཁུལ་གྱི་མཛད་འཕྲིན་ལེགས་པར་གྲུབ་ཏེ་རྒྱལ་ས་ལྡི་ལིར་ཞབས་སོར་འཁོད་ཡོད་པ་དང་། ཚེས་ ༢༠ དང་ ༢༡ བཅས་ཉིན་གཉིས་རིང་ཧ་ཡྰ་ཌེ་ (Hyatt) མགྲོན་ཁང་དུ་རྒྱ་གར་ནང་གི་ཆོས་ལུགས་འདྲ་མིན་གྱི་ལྷན་ཚོགས་ (A Meeting of Diverse Spiritual Traditions in India) ཐོག་ཆིབས་སྒྱུར་དབུ་བཞུགས་གནང་ཡོད་པ་མ་ཟད། དེར་ཡོད་ཆོས་ལུགས་ཁག་གི་དབུ་ཁྲིད་རྣམ་པར་སྐུའི་མཛད་འགན་གསུམ་ངོ་སྤྲོད་དང་འབྲེལ། འཛམ་གླིང་ཞི་བདེ་དང་ད་ལྟའི་འཛམ་གླིང་ནང་གི་དཀའ་རྙོག་གནས་སྟངས། ཆོས་ལུགས་ཕན་ཚུན་གྱི་མཐུན་ལམ་བཅས་ཀྱི་སྐོར་ནས་བཀའ་སློབ་གནང་ཡོད་འདུག འཛམ་གླིང་ཞི་བདེའི་སྐོར་ལ་བཀའ་སློབ་གནང་སྐབས་༧གོང་ས་མཆོག་གིས། ང་ཚོས་གསོལ་བ་སྨོན་ལམ་རྐྱང་བརྒྱབ་ཏེ་འཛམ་གླིང་ཞི་བདེར་བསྐྲུན་མི་ཐུབ། འཛམ་གླིང་ནང་གི་དྲག་སྤྱོད་ཀྱི་རིགས་དང་གཏོར་བརླག་གི་གནས་ཚུལ་ཚང་མ་འགྲོ་བ་མི་རང་གིས་བཟོས་པ་ཡིན་སྟབས། གནད་དོན་འདིའི་རིགས་ཐག་གཅོད་གནང་བར་ང་རང་ཚོ་རང་ཉིད་ཀྱིས་འབད་བརྩོན་གནང་དགོས་པ་ཆགས་ཡོད་ལ། དཀའ་རྙོག་དང་གནད་དོན་དག་གི་སེལ་རྒྱུའི་ཐབས་ལམ་གཙོ་བོ་ཕན་ཚུན་ཞི་མོལ་གྱི་ལམ་ནས་སེལ་རྒྱུ་ཧ་ཅང་གལ་ཆེན་ཡིན་སྐོར་སོགས་གསུངས་འདུག

ཆོས་ལུགས་ཕན་ཚུན་གྱི་མཐུན་ལམ་སྐོར་ལ་༧གོང་ས་མཆོག་གིས། འཛམ་གླིང་གི་ཆོས་ལུགས་ཚང་མས་དད་ཡུལ་མི་འདྲ་བ་དང་ཆོས་ལུགས་སྒེར་གྱི་གནད་དོན་དེ་དག་གལ་ཆེན་མིན་པར། ཆོགས་ལུགས་ཁག་གི་ལས་འགན་གཙོ་བོ་འཛམ་གླིང་མི་མང་ཁྲོད་བྱམས་པ་དང་སྙིང་རྗེ་ཁྱབ་སྤེལ་གཏོང་རྒྱུ་དེ་ཆགས་ཡོད་པ་དང་། ཆོས་ལུགས་མཐུན་སྒྲིལ་གྱི་ཐད་ནས་རྒྱ་གར་ནང་ཆོས་ལུགས་ཕན་ཚུན་བར་གནས་ཚུལ་ཆུང་ཚགས་རེ་འབྱུང་གི་ཡོད་ཀྱང་། སྤྱི་ཡོངས་ཀྱི་ཆ་ནས་འཛམ་གླིང་གི་མིག་དཔེ་ལྟ་ས་ཆགས་ཡོད་ཚུལ་གསུངས་ཡོད་པ་མ་ཟད། ད་ལྟའི་དུས་འདིར་འཛམ་གླིང་ནང་ཆོས་ལུགས་ཕན་ཚུན་གྱི་མཐུན་ལམ་དེ་ཧ་ཅང་གལ་ཆེན་ཆགས་ཡོད་པ་དང་། དམིགས་ཡུལ་ངེས་ཅན་ཞིག་གི་ཐོག་འགྲོ་ཐུབ་པར་ཆོས་ལུགས་ཁག་གི་དབུ་ཁྲིད་ཚང་མས་བགྲོ་གླེང་གོ་བསྡུར་གནང་རྒྱུ་ཧ་ཅང་གལ་ཆེན་ཆགས་ཡོད་སྐོར་སོགས་གསུངས་ཡོད་འདུག

དེ་རིང་སྔ་དྲོ་༧གོང་ས་མཆོག་གིས་རྒྱལ་ས་ལྡི་ལི་ཁུལ་དུ་ཡོད་པའི་ཕྱི་རྒྱལ་གྱི་གཞུང་ཚབ་མི་སྣ་ཁག་ཅིག་དང་རྒྱ་གར་གྲོས་ཚོགས་ཀྱི་འཐུས་མི་ཁག་ཅིག་ལ་མཇལ་འཕྲད་གནང་གི་ཡོད་པ་དང་། ཉིན་རྒྱབ་ཕྱིར་བཞུགས་སྒར་དྷ་རམ་ས་ལར་ཆིབས་བསྒྱུར་གནང་རྒྱུ་ཡིན་འདུག

ཚེས་ ༡༨ ཉིན་༧གོང་ས་མཆོག་མུམ་བྷེར་རྟེན་གཞི་བྱས་པའི་རྒྱ་གར་ཚོང་ལས་སྒྲིག་འཛུགས་དང་དེའི་ཡན་ལག་བུད་མེད་ཚོང་ལས་སྒྲིག་འཛུགས་བཙུགས་ནས་ལོ་ ༡༠༨ འཁོར་བའི་དུས་དྲན་མཛད་སྒོར་ཆིབས་སྒྱུར་གནང་ཡོད་པ་མ་ཟད། ཆོས་ལུགས་ལ་མ་བརྟེན་པའི་བཟང་སྤྱོད་ (Secular Ethics) ཞེས་པའི་བརྗོད་གཞིའི་ཐོག་བཀའ་སློབ་དང་དྲི་བ་ལན་འདེབས་བཅས་གནང་འདུག ཉིན་དེར་བཀའ་སློབ་གནང་༧གོང་ས་མཆོག་གིས། ངོས་རང་ནམ་རྒྱུན་མི་སུ་འདྲ་ཞིག་དང་ཐུག་ཀྱང་འགྲོ་བ་མི་གཅིག་པ་ཡིན་བསམ་པའི་འདུ་ཤེས་ཡོང་བཞིན་འདུག ང་ཚོར་འཕྲད་བཞིན་པའི་དཀའ་ངལ་མང་དག་ཅིག་མིས་བཟོས་པ་ཆགས་ཡོད། རྒྱུ་མཚན་གང་ཡིན་བརྗོད་ན། ང་ཚོ་ཚང་མ་འགྲོ་བ་མིའི་ཁྱིམ་ཚང་གཅིག་ཡིན་བསམ་པའི་འདུ་ཤེས་འཛིན་རྒྱུའི་ཚབ་ཏུ་ང་ཚོ་ཕན་ཚུན་དབར་ཐོབ་གོ་ས་དང་དབུལ་ཕྱུག མི་རིགས། ཆོས་ལུགས་སོགས་ཕྲན་བུའི་ཁྱད་པར་ཡོད་པ་དེ་དག་གནད་དོན་གཙོ་བོ་ལྟ་བུ་བརྩིས་སྟབས། རྙོག་གྲ་འབྱུང་བཞིན་ཡོད། འགྲོ་བ་མི་ཚང་མར་གཅིག་གྱུར་གྱི་འདུ་ཤེས་འཛིན་ཐུབ་ཚེ་རྙོག་གྲ་ཡོང་གཞི་གང་ཡང་མེད། ཁོར་ཡུག་གི་འགྱུར་ལྡོག་ལ་མཚོན་ནའང་། འགྲོ་བ་མི་སྤྱི་ཡོངས་ལ་འབྲེལ་བ་ཆགས་ཡོད། དེང་སྐབས་གོ་ལའི་དཔལ་འབྱོར་གྱི་གནས་སྟངས་རྒྱལ་མཚམས་དང་ཆོས་ལུགས་ཀྱི་ས་མཚམས་ལས་བརྒལ་ཏེ་དར་ཁྱབ་འགྲོ་བཞིན་ཡོད། ཕྱོགས་མཚུངས་འཛམ་གླིང་ནང་མི་འབོར་མུ་མཐུད་ཇེ་མང་དུ་འགྲོ་བཞིན་ཡོད། དབུལ་ཕོངས་ཇེ་མང་དུ་ཕྱིན་ནས་དབུལ་ཕྱུག་གི་བར་ཁྱད་ཆེ་རུ་འགྲོ་བཞིན་ཡོད། འདི་ནི་བཟང་སྤྱོད་དང་ཡོངས་སུ་འགལ་བ་ཞིག་ཡིན་སྟབས། དབུལ་ཕྱུག་བར་ཁྱད་པར་བྱུང་ཚེ་དཀའ་ངལ་འཕྲད་རྒྱུ་རེད། དཀའ་ངལ་དེ་དག་སེལ་བར་འགྲོ་བ་མི་རིགས་གཅིག་གྱུར་གྱི་འདུ་ཤེས་འཛིན་རྒྱུ་ཧ་ཅང་གལ་ཆེན་ཆགས་ཡོད། དེ་ལྟར་ཡོང་བར་ཕན་ཚུན་ཡིད་ཆེས་དགོས་པ་དང་། ཡིད་ཆེས་ཡོང་བར་ཕན་ཚུན་གཅིག་གྱུར་གྱི་འདུ་ཤེས་འཛིན་དགོས། ཞེས་གསུངས་འདུག

དྲི་བ་དྲིས་ལན་སྐབས་ཚོགས་བཅར་བ་ཞིག་གིས་རྒྱ་ནག་གི་སྲིད་འཛིན་རྒྱ་གར་ནང་འཚམས་གཟིགས་སུ་ཕེབས་ཡོད་པ་དེར་དགོངས་ཚུལ་གང་ཡོད་ཀྱི་ལན་དུ་༧གོང་ས་མཆོག་གིས། འདི་ཆབ་སྲིད་ཀྱི་གནད་དོན་ཞིག་ཡིན། ངོས་ཀྱིས་ཕྱི་ལོ་ ༢༠༡༡ ལོར་བོད་མིའི་ཆབ་སྲིད་ཀྱི་ལས་འགན་ཡོངས་རྫོགས་མང་གཙོའི་ལམ་ནས་འོས་འདེམས་ བྱུང་བའི་བཀའ་བློན་ཁྲིད་པར་རྩིས་སྤྲོད་ཟིན་པར་བརྟེན་ད་ཆ་ངོས་རང་རྒན་ཡོལ་ཆ་ཚང་ཞུས་ཟིན། སྤྱིར་རྒྱ་དཀར་ནག་གཉིས་ཀྱི་འབྲེལ་བ་འདི་ཕན་ཚུན་ཡིད་ཆེས་གཞི་རྩར་བཞག་པའི་ཐོག་ནས་གོང་འཕེལ་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད། ངོས་ཀྱི་རེ་བར་ཐེངས་འདིར་རྒྱ་ནག་གི་སྲིད་འཛིན་མཆོག་རྒྱ་གར་ནང་སྐད་ཡིག་དང་རིག་གཞུང་། ཆོས་ལུགས་སོགས་འདྲ་མིན་མང་པོ་ཡོད་པ་དེ་དག་གིས་རྒྱ་གར་ཁ་བྲལ་ནམ་ཡང་འགྲོ་གི་མེད་པ་མ་ཟད། རྒྱལ་ཁབ་ཡར་རྒྱས་ཕྱོགས་སུ་གོམ་སྟབས་སྤོ་ཐུབ་རྒྱུར་མཐུན་པའི་རྐྱེན་དུ་འགྲོ་བཞིན་ཡོད་པ་འདི་གསལ་པོ་གཟིགས་ཐུབ་པའི་རེ་བ་བྱེད་བཞིན་ཡོད། རྒྱ་ནག་འགོ་ཁྲིད་ཚོས་འཆམ་མཐུན་གྱི་སྤྱི་ཚོགས་བསྐྲུན་རྒྱུར་ཡིད་སྨོན་བྱེད་བཞིན་ཡོད། སྤྱི་ཚོགས་ནང་འཆམ་མཐུན་དགོས་ན་ཕན་ཚུན་ཡིད་ཆེས་དགོས། དྲག་པོའི་སྟོབས་ཤུགས་ལ་བརྟེན་ནས་སྤྱི་ཚོགས་འཆམ་མཐུན་ཞིག་སྐྲུན་ཐབས་མེད། ལར་ནས་འཛམ་གླིང་ནང་ཕྱིའི་བདེ་འཇགས་ཀྱི་འགྲོ་སོང་ལས་རྒྱལ་ནང་གི་བདེ་འཇགས་ཀྱི་འགྲོ་སོང་ཆེ་བ་གཏོང་མཁན་རྒྱ་ནག་གཅིག་པུ་ཆགས་ཡོད། ཅེས་གསུངས་ཡོད་འདུག

དེ་བཞིན། ༧གོང་ས་མཆོག་གིས་ཞི་ཅིན་ཕིན་གྱིས་དེང་སྐབས་རྒྱ་ནག་ནང་ལྐོག་ཟའི་དཀའ་ངལ་སེལ་ཐབས་སུ་འབད་བརྩོན་གནང་བཞིན་པར་བསྔགས་བརྗོད་དང་། ཉེ་ལམ་ཧྥ་རན་སིའི་རྒྱལ་སར་རྒྱ་ནག་སྤྱི་ཚོགས་ནང་རིག་གཞུང་ཉམས་གསོ་ཡོང་རྒྱུར་ནང་ཆོས་ཀྱིས་ཕན་ཐོགས་ཆེན་པོ་བསྒྲུབ་ཐུབ་རྒྱུ་ཡིན་སྐོར་གསུངས་ཡོད་པ་དེར་བསྔགས་བརྗོད་མཛད་པ་མ་ཟད། རྒྱ་ནག་འགོ་ཁྲིད་མཁྲེགས་འཛིན་པ་ཚོས་དཀའ་ངལ་ལ་བསམ་ཤེས་གང་ཡང་མི་བྱེད་པར་མགོ་ལྕག་གཞུ་རྒྱུའི་ཐབས་ལམ་ལག་བསྟར་བྱེད་བཞིན་པ་དག་དང་བསྡུར་བ་ཡིན་ན། ཁོང་དངོས་ཐོག་བདེན་འཚོལ་གནང་མཁན་ཞིག་ཡིན་པའི་ཐུགས་སྣང་བྱུང་ཡོད་སྐོར་སོགས་གསུངས་འདུག

གསར་འགོད་པ། དོན་གོ