ལྐོག་ཟ་རུལ་སུངས་ལ་དམ་དྲག་དེ་དམར་གཞུང་ལ་ཡིད་ཆེས་འགུག་ཐབས་ཙམ་རེད།

དེ་རིང་དྷ་སར་བོད་ཀྱི་གཞོན་ནུ་ལྷན་ཚོགས་དབུ་བརྙེས་པའི་མཛད་སྒོའི་སྟེང་གཞོན་ལྷན་གྱིས་བསྒྲགས་གཏམ་སྤེལ་ཏེ། རྒྱ་གཞུང་གི་བསླུ་བྲིད་གཡོ་རྒྱུའི་འོག་དོལ་རྒྱལ་རྗེས་འབྲང་པ་ཁག་ཅིག་གིས་༧གོང་ས་མཆོག་ལ་མཚན་སྨད་དང་། བོད་པའི་སྤྱི་ཚོགས་དབྱེན་སྦྱོར། རྡོ་རྗེ་ཤུགས་ལྡན་བོད་ཀྱི་གཞོན་ནུ་ལྷན་ཚོགས་ཟེར་བ་སོགས་གཞོན་ནུའི་མཚན་བྱང་བེད་སྤྱོད་ལོག་པར་གཏོང་བ་སོགས་ཀྱི་བྱ་སྤྱོད་འདི་དག་ལ་བོད་མི་ཡོངས་ཀྱིས་གཟབ་ནན་བྱེད་དགོས་སྐོར་སོགས་བརྗོད་སོང་།

དེ་རིང་ཕྱི་དྲོའི་ཆུ་ཚོད་ ༣།༠༠ པའི་སྟེང་དྷ་ས་མེག་གྷན་བོད་ཀྱི་ཟློས་གར་རྩེད་ཐང་དུ། དྷ་ས་ས་གནས་གཞོན་ནུའི་གོ་སྒྲིག་འོག་བོད་ཀྱི་གཞོན་ནུ་ལྷན་ཚོགས་དབུ་བརྙེས་ཏེ་ལོ་ ༤༥ འཁོར་བའི་དུས་དྲན་མཛད་སྒོ་ཚོགས་སོང་ལ། མཛད་སྒོའི་སྐུ་མགྲོན་གཙོ་བོར་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེད་སིན་ (Ajay Singh Mankotia) ལགས་གཙོས་གཞོན་ནུའི་དབུས་རྒྱུན་ཟུར་བ་ཁག་ཅིག་དང་རང་བཙན་འཐབ་རྩོད་པ་ལྷ་བཟང་ཚེ་རིང་ལགས། སྤྱི་འཐུས་རྒྱུན་ལས་ཀརྨ་ཆོས་འཕེལ་ལགས་དང་བློ་བཟང་ཡེ་ཤེས་ལགས། ཀརྨ་ཡེ་ཤེས་ལགས། བདེ་ལེགས་སྨན་ཁང་གི་འགན་འཛིན་སྤྱི་འཐུས་ཟླ་བ་ཕུན་སྐྱིད་ལགས། ཀརྨ་འཕྲིན་ལས་འཕྲིན། དྷ་ས་ཁུལ་གྱི་གཞུང་འབྲེལ་མིན་པའི་ཚོགས་པ་ཁག་ཅིག་གི་སྐུ་ཚབ་བཅས་མི་མང་ ༢༠༠ ཡས་མས་ལྷན་འཛོམས་གནང་སོང་།

མཛད་སྒོའི་ཐོག་མར་བོད་ཁྱིམ་སུ་ཇ་སློབ་གྲྭ་དང་གྷོལ་པ་པུར་སློབ་གྲྭ ཤེས་རབ་དགའ་ཚལ་གླིང་བཅས་ཀྱི་སློབ་མ་སྐོར་ཞིག་དང་། དྷ་ས་ཁུལ་གྱི་གཞོན་སྐྱེས་བོད་རིགས་དང་ཕྱི་རྒྱལ་པ་བཅས་མི་ ༥༥ ཙམ་གྱིས་བོད་དོན་དྲིལ་བསྒྲགས་ཀྱི་རྒྱང་རྒྱུགས་འགྲན་བསྡུར་ཞིག་གནང་སྟེ། བྱ་དགའ་ཐོབ་མཁན་བུ་ ༥ དང་བུ་མོ་  ༥ བཅས་སོ་སོའི་ནང་ཨང་རིམ་དང་པོར་ཧིན་སྒོར་ ༡༠༠༠༠ དང་ཨང་གཉིས་པར་ཧིན་སྒོར་ ༥༠༠༠། ཨང་གསུམ་པར་སྒོར་ ༣༠༠༠ ། ཨང་བཞི་པར་སྒོར་ ༢༠༠༠ ། ཨང་ལྔ་པར་སྒོར་ ༡༠༠༠ བཅས་གནང་སོང་།

མཛད་སྒོའི་ཐོག་མར་ཚང་མ་སྐུ་བཞེངས་ཐོག་བོད་དོན་ཆེད་ཚེ་སྲོག་ཤོར་བ་དག་ལ་མྱ་ངན་གུས་འདུད་དང་རྒྱལ་གླུ་སོགས་བཏང་རྗེས། གཞོན་ནུ་ཚོགས་པའི་ཚོགས་གཞོན་རྟ་མགྲིན་སྲིད་གཅོད་ལགས་ཀྱིས་དབུས་བོད་ཀྱི་གཞོན་ནུ་ལྷན་ཚོགས་ཀྱི་བསྒྲགས་གཏམ་སྒྲོགས་སྦྱང་གནང་དོན། ༡༩༧༠ ལོའི་ཟླ་ ༡༠ ཚེས་ ༧ ཉིན་རིགས་ཞེན་དང་ལ་རྒྱའི་གསོན་ཤུགས་ལྡན་པའི་བྱེས་གྱར་བོད་རིགས་གཞོན་སྐྱེས་རྣམས་ཀྱིས་རྒྱ་དམར་གྱི་ཧམ་བཟུང་བྱས་པའི་བོད་མི་རིགས་ཀྱི་ཕ་ས་དང་ཕ་གཞིས་དེའི་ཆེད་དུ་གཞིས་བྱེས་རྒྱ་ཆེའི་མི་མང་ནས་བོད་རང་བཙན་གྱི་ཆེད་དུ་དགྲ་བོ་རྒྱ་དམར་ལ་རྒོལ་འཛིང་དང་གདོང་ལེན་གྱི་ལས་འགུལ་སྤེལ་བཞིན་པ་དེ་དག་གི་བསམ་འདུན་སྒྲུབ་ཆེད་དུ་དཀའ་ངལ་ཐ་དག་ལ་གདོང་ལེན་གྱིས་རང་སྲོག་ཚུན་ལའང་ལྟོས་མེད་ཀྱིས་མདུན་སྐྱོད་བྱ་རྒྱུ་ཡིན་ཅེས་པའི་འགྱུར་མེད་ཀྱི་དམ་བཅའ་ཞིག་སྙིང་ཁོངས་སུ་བཅུག་ནས་བོད་ཀྱི་གཞོན་ནུ་ལྷན་ཚོགས་འདི་བཞིན་དངོས་སུ་དབུ་འཛུགས་གནང་བ་མ་ཟད། རང་ཅག་གི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༧གོང་ས་མཆོག་ཀྱང་ཚོགས་ཆེན་ཐོག་སྔ་རྗེས་སུ་ཐེངས་གསུམ་ལ་ཞབས་གསོར་འཁོད་ནས་ཚོགས་བཅར་བ་བོད་རིགས་གཞོན་སྐྱེས་རྣམས་ལ་༼ དཀའ་ངལ་གང་འདྲ་ཞིག་འཕྲད་ཀྱང་ལྷག་བསམ་དེ་རི་བཙུགས་པ་ནང་བཞིན་འགྱུར་བ་མེད་པའི་ཐོག་ལ་མདུན་ནས་མདུན་དུ་འགྲོ་ཐུབ་པ་ཞིག་དགོས། ༽ཅེས་འཐབ་རྩོད་ཀྱི་བླ་སྲོག་ལྟ་བུའི་བཀའ་སློབ་ཟབ་མོ་ཕེབས་དོན་ལྟར་ད་བར་ལོ་ངོ་ ༤༥ ཡི་རིང་བོད་རྒྱལ་ཁབ་ཀྱི་བདག་དབང་སླར་གསོ་དང་། བོད་མི་རིགས་ཀྱི་ངོ་བོ་གསོན་གནས་ཐུབ་ཐབས། དེ་བཞིན་བོད་ཀྱི་ཐུན་མིན་སྐད་ཡིག་རིག་གཞུང་དང་བཅས་པ་སྲུང་སྐྱོབ་སོགས་ཆེད་རྒྱལ་སྤྱིའི་ཁྱོན་ཡོངས་སུ་བོད་དོན་ལས་འགུལ་སྣ་མང་སྤེལ་ཐུབ་པ་བྱུང་ཡོད། ཅེས་བརྗོད་སོང་།

ཟླ་སྔོན་མའི་ནང་རྒྱ་གཞུང་གིས་ལྷ་སར་ཀྲུང་གོའི་བོད་ལྗོངས་གླེང་སྟེགས་ཚོགས་འདུ་ཟེར་བ་བསྐོངས་པའི་སྐོར་ལ། ཉེ་ཆར་སྤྱི་ལོ་ ༢༠༡༤ ཟླ་བ་ ༨ ཚེས་ ༡༢ དང་ ༡༣ ཉིན་གཉིས་རིང་རྒྱ་ནག་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་དང་། བོད་རང་སྐྱོང་ལྗོངས་མི་དམངས་སྲིད་གཞུང་གིས་ཐུན་མོང་ཐོག་ཀྲུང་གོའི་བོད་ལྗོངས་གོང་འཕེལ་གླེང་སྟེགས་ཞེས་པའི་ཚོགས་འདུ་ཞིག་ལྷ་སར་ཚོགས་པ་དང་། ཚོགས་ཐོག་ཏུ་རྒྱལ་ཁབ་ ༣༠ ལྷག་གི་མི་གྲངས་ ༡༠༠ ལྷག་བསྡུ་འགུག་གིས་བོད་ཀྱི་གོང་འཕེལ་དང་། བོད་ཀྱི་རིག་གནས་རྒྱུན་འཛིན་དང་སྲུང་སྐྱོབ། བོད་ཀྱི་ཁོར་ཡུག་སྲུང་སྐྱོབ་བཅས་ཀྱི་ཐོག་དོན་དངོས་དང་འགལ་བའི་དྲིལ་བསྒྲགས་བྱས་ཏེ། ཕྱི་རྒྱལ་གྱི་མི་མང་ཁག་ལ་བོད་ནང་དཔལ་འབྱོར་དང་། སློབ་གསོ། འཕྲོད་བསྟེན་བཅས་ལ་ཡར་རྒྱས་ཆེན་པོ་ཕྱིན་ཡོད་པ་དང་། བོད་ཀྱི་རང་བྱུང་འཁོར་ཡུག་གསོན་གནས་ཐོག་བོད་མི་རྣམས་བདེ་སྐྱིད་ཀྱི་འཚོ་བ་ལ་རོལ་བཞིན་ཡོད་པ་སོགས་ཀྱི་ངོས་འཛིན་དང་སྣང་སྙན་ཞིག་སྐྲུན་ཐབས་བྱས་ཡོད། དོན་དངོས་ཐོག་འཛམ་གླིང་གི་ཡང་རྩེར་གྲགས་པའི་ཆོས་ལྡན་ཁ་བ་ཅན་དུ་རྒྱ་དམར་གྱིས་དབང་བསྒྱུར་བྱས་པ་ནས་བཟུང་ད་བར་མི་ལོ་ ༥༥ ལྷག་སོང་བའི་རིང་གཞིས་ལུས་བོད་མིའི་ཛ་དྲག་གི་གནས་སྟངས་ལ་བཟང་ཕྱོགས་ཀྱི་འགྱུར་བ་རྩ་བ་ནས་ཕྱིན་མེད་པ་མ་ཟད། རྒྱ་དམར་གཞུང་གིས་བོད་ཀྱི་ཆོས་དང་རིག་གཞུང་། སྐད་ཡིག་དང་ཡུལ་སྲོལ་གོམས་གཤིས་སོགས་བོད་མི་རིགས་ཀྱི་ངོ་བོ་རྩ་བརླགས་སུ་གཏོང་ཆེད་མི་སེར་སྤེལ་བའི་ཕུག་ངན་སྲིད་ཇུས་ཀྱི་འོག་གཞིས་ལུས་སྤུན་ཟླ་ཚོའི་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་ཀྱིས་ཆོས་དད་རང་དབང་དང་། སྨྲ་བརྗོད་རང་དབང་། རྩོམ་འབྲིའི་རང་དབང་། ཐ་ན་འགྲོ་འདུག་གི་རང་དབང་སོགས་ཀྱང་མེད་པར་དམ་དྲག་ཤུགས་ཆེན་བྱེད་བཞིན་ཡོད་པ་མ་ཟད། གཏེར་ཁ་སྔོག་འདོན་དང་ཤིང་ནགས་གཅོད་འབྲེག་སོགས་ཀྱིས་མཚོན་པའི་བོད་ཀྱི་རང་བྱུང་ཁོར་ཡུག་ལ་ཡང་གཏོར་བརླག་ཚབ་ཆེན་གཏོང་བཞིན་ཡོད་པ་རྒྱལ་སྤྱིའི་འཁོར་ཡུག་དང་འགྲོ་བ་མིའི་ཐོབ་ཐང་གི་སྙན་ཐོར་ཞིབ་པར་གསལ་ཡོད་ཅེས་བརྗོད་སོང་།

རྒྱ་ནག་གི་སྲིད་འཛིན་ཞི་ཅིན་ཕིན་གྱིས་བོད་ཐོག་འཛིན་པའི་སྲིད་བྱུས་ལ་སྐྱོན་བརྗོད་གནང་དོན། ༢༠༡༣ ལོའི་ཟླ་ ༣ ནང་ཞི་ཅིན་ཕིན་རྒྱ་ནག་གི་སྲིད་འཛིན་དུ་བསྐོ་བཞག་བྱས་རྗེས་ཀྱི་ལོ་ངོ་གཅིག་ལྷག་གི་རིང་རྒྱ་གཞུང་གིས་ལྐོག་ཟ་རུལ་སུངས་ཐོག་རྒོལ་རྡུང་གཏོང་བའི་རྣམ་པའི་བྱ་འགུལ་ཞིག་སྤེལ་བཞིན་པ་ནི་རྒྱ་ནག་ནང་འགྲོ་བ་མིའི་ཐོབ་ཐང་དང་དམངས་གཙོ། རང་དབང་སོགས་ཡར་རྒྱས་གཏོང་རྒྱུའི་འཆར་གཞི་ཞིག་མ་ཡིན་པར། དོན་དངོས་ཐོག་བྱ་འགུལ་དེ་ནི་འགྱེད་ལ་ཉེ་བའི་རྒྱ་ནག་དམར་ཤོག་གི་སྒྲིག་འཛུགས་སྲ་བརྟན་དང་དབང་ཆ་རྒྱུན་སྐྱོང་ཡོང་ཐབས་ཆེད་རྒྱ་ནག་མི་མང་གིས་དམར་ཤོག་སྲིད་གཞུང་ལ་རེ་བ་དང་ཡིད་ཆེས་གསར་པ་ཞིག་ཡོང་ཆེད་ཀྱི་ཕྱིའི་རྣམ་པ་ཙམ་གྱི་བྱ་འགུལ་ཞིག་ཡིན། དེ་ནི་ཞི་ཅིན་ཕིན་སྲིད་སྟེགས་སུ་བསྐོ་བཞག་བྱས་ཏེ་ད་བར་སྤྱིར་རྒྱ་ནག་ཡོངས་དང་ལྷག་པར་བོད་ཀྱི་འགྲོ་བ་མིའི་ཐོབ་ཐང་གནས་བབ་ལ་ཡར་རྒྱས་རྩ་བ་ནས་ཕྱིན་མེད་པ་མ་ཟད། དམ་དྲག་ཤུགས་ཇེ་ཆེར་འགྲོ་བཞིན་པའི་གནས་སྟངས་འདིས་ར་སྤྲོད་བྱས་ཡོད། ཅེས་བརྗོད་སོང་།

དོལ་རྒྱལ་ཚོགས་པའི་བྱ་སྤྱོད་སྐོར་ལ་ཁོང་གིས། རྒྱ་གཞུང་གིས་བོད་མིའི་སྤྱི་ཚོགས་ནང་སིམ་འཛུལ་དང་། བོད་རིགས་བསམ་མེད་རེ་ཟུང་རྒྱུ་ནོར་གྱི་སླུ་བྲིད་འོག་བེད་སྤྱོད་ཀྱིས་བོད་རིགས་ནང་ཁུལ་གྱི་མཛའ་མཐུན་དང་ཆིག་སྒྲིལ་གཏོར་བཤིག་གཏོང་བའི་བྱ་ངན་སྒོ་གང་ས་ནས་རྩོམ་བཞིན་ཡོད། དེ་ཡང་སྤྱི་ནོར་༧གོང་ས་མཆོག་ཕྱི་རྒྱལ་ཁག་ལ་ཆིབས་བསྒྱུར་སྐྱོང་སྐབས་དོལ་རྒྱལ་རྗེས་འབྲང་པ་ཉུང་ཤས་ཤིག་གིས་གཞི་རྩ་གང་ཡང་མེད་པར་༧གོང་ས་མཆོག་ལ་མཚན་སྨད་ཞུ་བའི་ལས་ངན་ཇི་སྙེད་ཅིག་རྩོམ་བཞིན་ཡོད་པ་དང་། དེ་བཞིན་རྡོ་རྗེ་ཤུགས་ལྡན་བོད་ཀྱི་གཞོན་ནུ་ལྷན་ཚོགས་ཟེར་བ་སོགས་བོད་ཀྱི་གཞོན་ནུ་ལྷན་ཚོགས་ཀྱི་མཚན་བྱང་བེད་སྤྱོད་ལོག་པར་གཏོང་བའི་གནས་ཚུལ་འབྱུང་བཞིན་པ་སོགས་ནི་རྒྱ་དམར་གཞུང་གིས་སྒོ་གང་ས་ནས་བོད་མིའི་སྤྱི་ཚོགས་ནང་དབྱེན་སྦྱོར་དང་དཀྲུགས་ཤིང་གིས་བོད་རིགས་ནང་ཁུལ་གྱི་མཛའ་མཐུན་དང་ཆིག་སྒྲིལ་མེད་པར་བཟོ་ཐབས་དང་། བོད་ཀྱི་བདེན་དོན་འཐབ་རྩོད་ཀྱི་ནུས་པ་ཉམས་དམས་སུ་གཏོང་རྒྱུའི་གོ་རིམ་དང་འཆར་གཞི་ལྡན་པའི་ལས་ངན་སྤེལ་བཞིན་ཡོད་པ་རང་རིགས་སེར་སྐྱ་རྒན་གཞོན་བར་གསུམ་གྱིས་ངེས་ཤེས་བརྙེད་པའི་ཐོག་ནས་དུས་དང་རྣམ་པ་ཀུན་ཏུ་གཟབ་ནན་བྱེད་དགོས་པའི་ནན་སྐུལ་ཤུགས་ཆེ་ཞུ་རྒྱུ་ཡིན།ཅེས་བརྗོད་སོང་སོགས་བརྗོད་སོང་།

དྷ་ས་ས་གནས་གཞོན་ནུའི་ཤེས་རིག་འགན་འཛིན་བསྟན་འཛིན་བརྩོན་འགྲུས་ལགས་ཀྱིས། དྷ་ས་ས་གནས་འདི་དབུས་རྒྱུན་དབུ་འཛུགས་གནང་ནས་ལོ་ ༤༥ འཁོར་ཡོད། ས་གནས་སུ་ཚོགས་མི་ ༦༥༠ ལྷག་ཡོད་པས་ཚོགས་མི་མང་ཤོས་དང་རྙིང་ཤོས་ཤིག་ཆགས་ཡོད། ཁོང་གིས་“སྔོན་མ་དྷ་ས་ས་གནས་སུ་རྒྱུན་ལས་ ༡༠ ཡོད་པའི་སྟེང་། དང་བླངས་བ་མང་པོ་ཞིག་ཡོང་གི་ཡོད་ཀྱང་། དེང་སྐབས་ང་ཚོ་ཚང་མས་ཤེས་གསལ་ལྟར་སྤྱི་ཚོགས་ནང་ལྟ་བ་ལངས་ཕྱོགས་ལ་དབྱེ་ འབྱེད་ཅིག་ཡོང་གི་ཡོད་སྟབས་ད་ལྟ་ང་ཚོར་རྒྱུན་ལས་བཞི་ལས་མེད།”ཅེས་སོགས་བརྗོད་སོང་།

དེའི་རྗེས་སྐུ་མགྲོན་གཙོ་བོ་ཨ་ཇེད་སིན་ལགས་ཀྱིས་རྒྱུག་འགྲན་ཁྲོད་བྱ་དགའ་ཐོབ་མཁན་དག་ལ་བྱ་དགའ་སྤྲོད་པ་དང་འབྲེལ་ཏེ། ང་ཚོ་རྒྱ་གར་གྲོགས་པོ་ཚོ་ལོ་མང་རིང་ཁྱེད་རང་ཚོ་མཉམ་དུ་ལངས་ཡོད། ང་ཚོས་ཁྱེད་ཚོའི་དམིགས་ཡུལ་དང་། སྔོན་ནས་ད་བར་དཀའ་ངལ་མྱོང་བཞིན་པའང་ཤེས་ཀྱི་ཡོད། ༢༠༡༤ ལོར་རྒྱ་གར་དབུས་གཞུང་གི་མགོ་ཁྲིད་གསར་པས་བོད་ཀྱི་གནད་དོན་ཐོག་ག་རེ་བྱེད་དགོས་མིན་དང་ཇི་ལྟར་བྱེད་དགོས་མིན་ཤེས་ཀྱི་ཡོད་པའི་རེ་བ་ཡོད། དེ་བཞིན་ང་ཚོས་མཉམ་དུ་ཁྱེད་ཚོའི་དམིགས་ཡུལ་འགྲུབ་པའི་ཕྱོགས་སུ་ལས་ཀ་གང་འཚམ་བྱེད་ཐུབ་ཀྱི་རེད་བསམ་གྱི་འདུག དྷ་རམ་ས་ལ་འདི་ལ་མཚོན་ན། ༧གོང་ས་ཏཱ་ལའི་བླ་མ་མཆོག་བཞུགས་ས་ཡིན་པ་དང་། ནམ་རྒྱུན་འཛམ་གླིང་གི་མི་རླབས་ཆེན་མང་པོ་ཞིག་ཕེབས་ཀྱི་ཡོད་པ། ལྷག་པར་དུ་ཉེ་ལམ་འཛམ་གླིང་ནོ་བྷེལ་ཞི་བདེ་གཟེངས་རྟགས་ཐོབ་མཁན་མང་པོ་ཞིག་འདིར་ཕེབས་པ་ཚང་མས་མཁྱེན་གསལ་རེད། མ་འོངས་པར་ང་ཚོས་མཉམ་རུབ་ཐོག་གཙུག་ལག་ཁང་གི་མཐའ་འཁོར་དང་དྷ་རམ་ས་ལའི་གཡས་གཡོན་ཁོར་ཡུག་གཙང་མ་བཟོ་དགོས་པ་ཧ་ཅང་གལ་ཆེན་པོ་རེད། ཅེས་སོགས་བརྗོད་སོང་།

གསར་འགོད་པ། ལྷ་སྐྱབས་རྒྱལ།