ཟླ་སྔོན་མའི་ཚེས་ ༡༧ ཉིན་རྒྱ་ནག་གི་སྲིད་འཛིན་རྒྱ་གར་ནང་སྐོར་སྐྱོད་བྱས་པ་དང་བསྟུན་ཏེ། མགོ་ལོག་དགའ་བདེ་རྫོང་གི་བོད་མི་རང་ལོ་ ༤༢ ཅན་ཞིག་གིས་ས་གནས་ཉེ་རྟོག་ཁང་གི་སྒོ་ཁར་རང་ལུས་མེར་བསྲེགས་གནང་སྟེ་རྒྱ་གཞུང་ལ་ངོ་རྒོལ་བྱས་ཡོད་པའི་ཐད། དེ་རིང་བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་ནག་གཞུང་ལ་གསར་འགོད་བསྒྲགས་གཏམ་སྤེལ་འདུག
ཕྱི་ཟླ་ ༩ ཚེས་ ༡༧ ཉིན་མཚོ་སྔོན་ཞིང་ཆེན་མགོ་ལོག་ཁུལ་དགའ་བདེ་རྫོང་གཙང་སྐོར་ཞོལ་མ་དམེ་སྐོར་སྡེ་བའི་བོད་མི་དཀོན་མཆོག་ཞུ་བ་ཞིག་གིས། ས་གནས་ཉེན་རྟོག་ཁང་གི་སྒོ་འགྲམ་དུ་རང་ལུས་མེར་བསྲེགས་གནང་ཡོད་པ་དང་། སྐབས་དེར་ཡུལ་དངོས་སུ་ཡོད་པའི་བོད་མི་ཚོས་འཕྲལ་དུ་ཁོང་གི་ལུས་སྟེང་གི་མེ་བསད་ནས་མགོ་ལོག་ཁུལ་ཐོག་གི་སྨན་ཁང་ཞིག་ཏུ་བསྐྱལ་སྐབས། ལམ་བར་དུ་ཉེན་རྟོག་པས་བཀག་འགོག་བྱས་སྟབས་མགོ་ལོག་ཁུལ་ཐོག་སྐྱེལ་མ་ཐུབ་པར་མཚན་མོ་དེར་ལམ་ཁ་གཞན་ཞིག་བརྒྱུད་དེ་ཟི་ལིང་གི་སྨན་ཁང་ཞིག་ཏུ་བསྐྱལ་ཡོད་ཀྱང་། ད་ལྟའི་ཆར་ཁོང་གི་ཤི་གསོན་གྱི་གནས་ཚུལ་གང་ཡང་ཤེས་རྟོགས་མ་ཐུབ་པར་ལྷག་ཡོད་འདུག
སྨན་ཁང་དུ་ཁོང་དང་མཉམ་དུ་ཡོད་པའི་བོད་མི་ཞིག་གིས། དཀོན་མཆོག་ལགས་ལ་གསོན་རེ་ཆེན་པོ་མེད་པ་དང་། སྨན་ཁང་དུ་མཚམས་རེར་དྲན་པ་སོས་སྐབས་མིག་ནས་མཆི་མ་འདོན་བཞིན་དུ་ངས་དོན་དག་འགྲུབ་མ་སོང་ཞེས་ཡང་ཡང་རྗོད་ཀྱིན་ཡོད་ལུགས་དང་། ད་ལྟ་སྨན་ཁང་དེས་ཁོང་ལ་གསང་བའི་ཐོག་ནས་སྨན་བཅོས་བྱེད་བཞིན་ཡོད་པ་དང་། ཁོང་གི་ནང་མི་ཚོས་གལ་སྲིད་རྒྱ་གཞུང་གིས་ཁོང་སྨན་ཁང་གང་དུ་ཡོད་པ་ཤེས་ཚེ། རྒྱ་གཞུང་ཉེན་རྟོག་པས་ཁོང་བཙན་འཁྱེར་བྱེད་སྲིད་པའི་སེམས་ཁྲལ་དང་འཇིགས་སྣང་ཆེན་པོ་བྱེད་བཞིན་ཡོད་སྐོར་བརྗོད་འདུག
ཡང་གནས་ཚུལ་ཡོང་ཁུངས་གཞན་ཞིག་གིས། ད་ལྟའི་ཆར་དམེ་སྐོར་སྡེ་བའི་ནང་རྒྱ་གཞུང་གིས་དམག་མི་མང་པོ་འགྲེམས་འཇོག་གིས་ལྟ་སྲུང་དང་དམ་དྲག་ཆེན་པོ་བྱེད་བཞིན་ཡོད་སྟབས། གལ་སྲིད་ས་གནས་ཀྱི་གནས་ཚུལ་མཁོ་སྤྲོད་བྱས་པ་རྒྱ་གཞུང་གིས་ཤེས་རྟོགས་བྱུང་ཚེ། དགོན་གྲོང་གཉིས་དང་དོ་བདག་ལ་ཆག་སྒོ་ཆེན་པོ་འབྱུང་རྒྱུ་ཡིན་སྟབས། ས་གནས་སུ་བྱུང་བའི་གནས་ཚུལ་རྣམས་བཤད་ཕོད་ཀྱི་མེད་ལུགས་སོགས་བརྗོད་ཡོད་འདུག
རྒྱལ་གཅེས་དཔའ་བོ་དཀོན་མཆོག་ལགས་ནི། དེང་སྐབས་རྒྱ་གཞུང་གིས་བཅད་བཟུང་ས་ བགོས་ལྟར་གྱི་མཚོ་སྔོན་ཞིང་ཆེན། མགོ་ལོག་བོད་རིགས་རང་སྐྱོང་ཁུལ། དགའ་བདེ་རྫོང་། གཙང་སྐོར་ཡུལ་ཚོ། (གཙང་སྐོར་ཞོལ་མ) དམེ་སྐོར་སྡེ་བ་ནས་ཡིན་ཞིང་། ད་ལྟ་རང་ལོ་ ༤༢ ཡིན་པ་དང་། ཕ་དམེ་ཚེ་དང་མ་ཁྲ་རིལ་མ་གཉིས་ཀྱི་བུ་ཡིན་འདུག་པ་དང་། ཁོང་གི་བཟའ་ཟླའི་མིང་ལ་ཀླུ་པ་ཟེར་ཞིང་བུ་ཞིག་གྲྭ་བ་ཡིན་ཞིང་། བུ་མོ་ཞིག་བཙུན་མ་ཡིན་འདུག
བསྒྲགས་གཏམ་ནང་འཁོད་དོན། ད་ལྟའི་བར་དུ་རྒྱ་གཞུང་གིས་བོད་ཡུལ་སྟོད་སྨད་བར་གསུམ་གྱི་ཞིང་འབྲོག་དང་དགོན་སྡེ། སློབ་གྲྭ་བཅས་ཀྱི་བོད་མི་རྒན་དར་གཞོན་གསུམ་གྱིས་ཞི་བའི་སྐད་འབོད་བྱེད་པ་དང་། དམིགས་བསལ་རང་ལུས་མེར་བསྲེགས་གནང་མཁན་རྣམས་ལ་དམའ་འབེབས་དང་སྡིགས་ར་སྐུལ་བ། ཁོ་ཚོ་ནི་རིག་འཚོ་མ་ཟིན་པ་དང་། བཟའ་ཚང་མ་འཆམ་པ། གཞན་གྱིས་བརྒྱུད་སྐུལ་དང་བཙན་སྐུལ་བྱས་པ་རེད་ཟེར་བ་སོགས་ཁུངས་ལུང་མེད་པ་དང་གནས་ལུགས་ལ་རྒྱབ་འགལ་དུ་འགྲོ་བའི་རྒྱགས་གཏམ་འབའ་ཞིག་གིས་བསྙོན་དཀྲི་བཙན་འགེལ་བྱེད་པ་ལས། ཁོང་རྣམས་ཀྱིས་གཞན་ལ་འཚེ་བ་མེད་པའི་ཐོག་ནས་རང་ཉིད་ཀྱི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་དགོས་པའི་འཕྲལ་ཕུགས་ཀྱི་རྒྱུ་རྐྱེན་ངོ་མ་སྟེ། མངོན་འདོད་དང་རེ་བ་ཇི་ཡིན་ལ་རྟོག་ཞིབ་ཀྱིས་གནད་དོན་དངོས་ཐག་གཅོད་ཀྱི་འགན་ཁུར་གང་ཡང་མེད་པའི་ཁར། རྒྱལ་ཁབ་ཁ་བྲལ་ཟེར་བའི་ཉེས་མིང་ཞིག་བཀལ་བ་ཙམ་གྱིས་རྒྱལ་སྤྱིའི་འགྲོ་བ་མིའི་ཐོབ་ཐང་དང་། དམངས་གཙོ། རང་དབང༌། དྲང་བདེན་བཅས་པ་རྒྱང་དུ་དོར་ཆོག་ཆོག་དང་། ཞི་བདེ་དང་དྲང་བདེན་དམངས་གཙོ་བཅས་ལ་དགའ་བའི་རྒྱལ་ཁབ་ཁག་གི་གཞུང་དང་། གྲོས་ཚོགས། རྒྱལ་སྤྱིའི་གནད་ཡོད་དབུ་འཁྲིད་རྣམ་པ། གཞུང་སྒེར་ཚོགས་སྡེ་སོགས་ཀྱིས་བོད་མིའི་དཀའ་ངལ་སེལ་ཐབས་སུ་གྲོས་ཆོད་རིམ་འཇོག་དང་འབོད་སྐུལ་ཇི་གནང་བཅས་ཚང་མར་བརྩི་མེད་ཀྱིས་རྒྱ་གཞུང་གིས་རང་འདོད་ཁོ་ན་ལག་བསྟར་བྱས་དང་བྱེད་བཞིན་པའི་མཇུག་འབྲས་མཐའ་དག་རྒྱ་ནག་གཞུང་ཕྱོགས་ཀྱི་སྐབས་འབྲེལ་མགོ་ཁྲིད་རྣམས་ཀྱིས་འགན་ཆ་ཚང་འཁུར་དགོས། ཞེས་སོགས་འཁོད་འདུག
གསར་འགོད་པ། པདྨ་མཚོ།
ཁོ་རེ བསྟན་འཛིན། ཟི་ལིང་དུ་སྨན་ཁང་བརྒྱ་བརྒྱ་སྟོང་སྟོང་རེད། གསར་འགོད་པས་སྨན་ཁང་ཞིག་ཏུ་ཟེར་དུས་གསང་བ་བྱས་ཚར་རེད་དཱ།
ཅི་ཟེར་གྱི་ཡོད་རེད་ཁོང་གསང་བའི་ཐོག་ནས་སྨན་ཁང་ནང་སྨན་བཅོས་གནང་ཡོད་ཟེར། ཡང་ཁོང་ད་ལྟ་ཟི་ལིང་གི་སྨན་ཁང་ཞིག་ཏུ་བསྐྱལ་ཡོད་ཟེར་རྒྱ་ནག་ལ་རྩིས་སྤྲོད་གནང་མཁན་རང་རེད།