བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༡ སྟེང་གི་རྩོམ་སྒྲིག་པའི་གཏམ།
ལས་ཀ་ཞིག་གི་ཆེད་དུ་གངས་ཅན་སྐྱིད་གཤོངས་ལ་སྐོར་བ་ཞིག་བརྒྱབ། ཞོར་དུ་ཕྱི་དྲིལ་སྒོ་ཁའི་དེབ་དང་ཡིག་ཆ་རིན་མེད་དག་ལ་མིག་བཤེར་ཞིག་བྱས་པ་ཡིན། རྒྱ་ཡིག་བོད་ཡིག་དབྱིན་ཡིག་གསུམ་ཀའི་དེབ་དང་ཚགས་པར། ཡིག་ཆ་སོགས་མང་པོ་ཞིག་སྒྲིག་འདུག ཕར་བལྟས་ཚོད་ཀྱིས་གྲ་འགྲིག་པོ་དང་སྤུས་དག་པོ་ཞིག་སྒྲིག་འདུག དེ་དག་རེ་རེ་ལ་ཞིབ་ལྟ་བྱས་སྐབས། མང་པོ་ཞིག་ལོ་བཅུ་གྲངས་གོང་གི་ཡིག་ཆ་རྙིང་པ་ཁག་རེད། བཀའ་ཤག་སྐབས་བཅུ་གཉིས་བཅུ་གསུམ་གྱི་དབུ་མའི་ལམ་གྱི་ངོ་སྤྲོད་དེབ་དམར་པོ་དང་སེར་པོ་སོགས་རེད།
དེ་དག་ཁྲོད་བཀའ་ཤག་སྐབས་བཅུ་བཞི་པའི་དབུ་མའི་ལམ་གྱི་དྲིལ་བསྒྲགས་ཡིག་ཆ་སྣ་གཅིག་ཀྱང་མཐོང་རྒྱུ་མི་འདུག སྔོན་ཆད་ཅིག་ལ་མེག་མོར་ཁྲོམ་གཞུང་གི་དྲིལ་བསྒྲགས་དེབ་ཁང་ནས་ཀྱང་ཚོར་བ་དེ་སྤྲད་མྱོང་ཡོད་ལ། ས་གནས་གཞན་དུ་འདི་ལྟ་བུའི་དྲིལ་བསྒྲགས་ཁང་ཡོད་མེད་མི་ཤེས་མོད། གལ་སྲིད་ཡོད་ན་དེ་དག་ནང་ལོ་ཉི་ཤུ་སུམ་ཅུའི་ཡར་སྔོན་གྱི་དྲིལ་བསྒྲགས་ཡིག་ཆ་སྤུངས་ཡོད་སྲིད་པའི་སེམས་ཚོར་དང་སེམས་འཚབ་ཀྱང་ལྷན་དུ་སྐྱེས་སོང་།
དབུ་མའི་ལམ་གྱི་རྩ་བའི་སྒྲོམ་གཞིར་འགྱུར་བ་ཆེན་པོ་ཕྱིན་མེད་ཀྱང་། ནང་དོན་སྲིད་བྱུས་ཁག་ལ་འགྱུར་བ་མང་པོ་ཕྱིན་ཡོད། ཐོག་མ་བརྒྱད་ཅུ་གྱ་གྲངས་ནང་ང་ཚོས་ཆེས་མཐོའི་རང་སྲིད་རང་སྐྱོང་ཟེར་བའི་ཚིག་ཅིག་བེད་སྤྱོད་བཏང་ཡོད། ཨ་རིའི་གྲོས་ཚོགས་དང་ཡུ་རོབ་གྲོས་ཚོགས་ནང་བོད་ཆོལ་གསུམ་གཅིག་ཏུ་སྒྲིལ་བའི་ཁྲིམས་ལུགས་དབང་འཛིན་དང་ཁྲིམས་བཟོ་ལྷན་ཚོགས། འཛིན་སྐྱོང་བཅས་དམངས་གཙོའི་ཀ་བ་གསུམ་ལྡན་གྱི་རང་སྲིད་རང་སྐྱོང་གླེང་ཡོད།
དགུ་བཅུ་གོ་གྲངས་ནས་བཟུང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་རིགས་ས་གནས་རང་སྐྱོང་བཅའ་ཁྲིམས་འོག་བོད་དོན་སེལ་ཐུབ་ལ་འབད་བརྩོན་བྱེད་རྒྱུ་བརྗོདཡོད། ཉིས་སྟོང་བདུན་བརྒྱད་ནས་བཟུང་སྔོན་ཆད་ཀྱི་དམངས་གཙོའི་དགོས་འདུན་ཁག་དོར་ཏེ། ཀྲུང་གོ་གུང་ཁྲན་ཏང་གི་མགོ་འཁྲིད་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་སྲོལ་སོགས་ངོས་ལེན་བྱས་ཏེ། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་དང་དེའི་འགྲེལ་བཤད་གཉིས་ནི་དབུ་མའི་ལམ་གྱི་འགྲེལ་བཤད་གསར་ཤོས་དེ་ཡིན།
བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དུས་རྒྱུན་མང་ཚོགས་ལ་དབུ་མའི་ལམ་ལ་གོ་རྟོགས་ཞན་པོ་འདུག་ཅེས་སྐད་ཤོར་གྱིན་ཡོད། བཀའ་ཤག་བཅུ་བཞི་པའི་སྲིད་སྐྱོང་མཆོག་ནས་ཀྱང་བར་ལམ་ཞིག་ནས་གློ་བུར་དུ་དབུ་མའི་ལམ་གྱི་གོ་རྟོགས་ལས་འགུལ་ཚ་ཚ་འུར་འུར་དུ་སྤེལ་མགོ་བརྩམས་སོང་། བཀའ་ཤག་གིས་ལས་འཆར་སྒྲིག་སྐབས་དང་ལས་བསྡོམས་བསྒྲགས་སྐབས་དབུ་མའི་ལམ་ལ་ཐུག་ཡོང་དུས་མགོ་བོ་མཐོ་ཙམ་དང་སྐད་ཤུགས་ཆེ་ཙམ་ཡོད། དེ་ཡིན་དང་ཡིན་༧གོང་ས་མཆོག་གི་ཐུགས་རེ་དང་ད་ལྟའི་བོད་གཞུང་མང་གཉིས་ཀྱི་བཞེངས་ཕྱོགས་རེད།
སྔར་ལོ་སྲིད་སྐྱོང་མཆོག་གིས་ཨ་རི་ནས་མ་འོངས་བོད་པར་དམངས་གཙོ་དགོས་མིན་གྱི་བཀའ་མོལ་ཞིག་གནང་བ་དེ་འུར་སྒྲ་ཆེན་པོ་ཆགས་སོང་། བཀའ་མོལ་དེར་ཕྱི་རྒྱལ་བ་ཚོ་ཨ་ཅང་ཅང་། བོད་པའི་ཆབ་སྲིད་པ་ཚོས་ཀྱང་བེད་སྤྱོད་མང་པོ་བཏང་སོང་། བསམ་གཟས་ནས་མ་ཤེས་ཁུལ་བྱས་པ་ཡིན་ནམ། དོན་དངོས་གནས་མཐོང་རྒྱ་ཆུང་སོང་བས་ཡིན་གང་ལྟར་ཡང་། བོད་མིའི་སྒྲིག་འཛུགས་ཀྱི་ཡིག་ཆ་ཁག་ནང་དབུ་མའི་ལམ་གྱི་འགྱུར་འགྲོས་དེ་དག་ས་རིས་ཐང་གསལ་ཡིན་ལ། ཟམ་གདོང་རིན་པོ་ཆེའི་ཞལ་དྲོན་མོ་ནས་ཀྱང་ “ནམ་ཞིག་བོད་རྒྱ་གཉིས་ཅོག་ཙེ་གཅིག་གི་སྟེང་དུ་སྐད་ཆ་བཤད་རྒྱུ་བྱུང་བའི་ཉིན་མོར། ང་ཚོས་མི་ལོ་ལྔ་བཅུའི་རིང་རྩ་ཆེན་པོར་བརྩིས་ཏེ་འཕེལ་རྒྱས་བཏང་བའི་དམངས་གཙོའི་ལམ་སྲོལ་དེ་ཡང་བློས་གཏོང་བྱེད་དགོས་སྲིད་པ་རེད” ཅེས་རྒྱ་ཁྱབ་ཏུ་བསྒྲགས་ཡོད།
འཐུས་ཤོར་དེ་དག་གཤམ་འོག་གི་ལས་བྱེད་ཡོངས་རྫོཊ་མིན་པར། སྒང་གི་དབང་ལྡན་འགན་འཛིན་དང་འོག་གི་ཐད་ཀར་འབྲེལ་ཡོད་ཚོར་ཐུག་ཡོད། བཀའ་ཤག་གསར་པའི་དབུ་མའི་ལམ་དྲིལ་བསྒྲགས་གནང་རྒྱུ་ཡིན་ན། འདས་པའི་ཡིག་ཆ་དེ་དག་བྱུང་རབས་ལོ་རྒྱུས་ནང་གནས་དགོས་པ་གལ་ཆེན་ཡིན་ཡང་། མང་ཚོགས་ནང་ཁྱབ་བསྒྲགས་གནང་སྐབས་གོ་ལོག་མགོ་ཉོག་མི་ཐེབས་ཆེད། ཚོར་བ་དང་འགན་འཁྲི་ཡོད་པའི་ཐོག་ནས། དབུ་མའི་ལམ་གྱི་ངོ་བོ་དང་བྱུང་རིམ། འགྱུར་འགྲོས་དང་དམིགས་འབེན་སོཊ་ལ་སློབ་སྦྱོང་དང་ཞིབ་འཇུག་མཐིལ་ཕྱིན་བྱས་ཏེ། ཁ་གསལ་ཁུངས་དག་རྒྱ་བོད་སུ་ཡང་ཡིད་ཆེས་འཕེར་ངེས་ཀྱི་དྲིལ་བསྒྲཊ་གནང་རྒྱུ་ཧ་ཅང་གལ་ཆེའོ།།