རྒྱ་གཞུང་གིས་མི་རིགས་ས་ཁུལ་དུ་གྲོང་བརྡལ་ཅན་འཛུགས་སྐྲུན་བྱེད་པར་ངེས་པར་དུ་ཕ་མེས་ནས་བརྒྱུད་པའི་ས་ཆ་བདག་སྲུང་གི་འདུ་ཤེས་འདོར་དགོས་པ་སོགས་འདོར་དགོས་པའི་འདུ་ཤེས་བཞི་དང་གཡོལ་དགོས་པའི་བྱེད་ཐབས་བཞི་སོཊ་ཀྱི་བཀའ་རྒྱ་བཏང་འདུག
དེ་རིང་ཀྲུང་གོའི་བོད་ལྗོངས་དྲ་བ་ཞེས་པའི་ནང་གནས་ཚུལ་སྤེལ་བ་ལྟར་ན། རྒྱ་གཞུང་གིས་བོད་སོགས་གྲངས་ཉུང་མི་རིགས་ས་ཁུལ་ཁག་ཏུ། གྲོང་བརྡལ་ཅན་འཛུགས་སྐྲུན་བྱེད་པ་དེ་རྒྱལ་ཡོངས་གྲོང་བརྡལ་ཅན་འཛུགས་སྐྲུན་གྱི་གྲུབ་ཆ་གལ་ཆེན་ཞིག་ཡིན་ཞིང་། འཛུགས་སྐྲུན་མྱུར་ཚད་དང་སྤུས་ཀ་དེ་རྒྱལ་ཡོངས་ཀྱི་གྲོང་བརྡལ་ཅན་འཛུགས་སྐྲུན་གྱི་རྒྱལ་ཕམ་དང་འབྲེལ་ཡོད་སྟབས། དབུས་གཞུང་གིས་གང་མགྱོགས་སྒོས་གྲོང་བརྡལ་ཅན་འཛུགས་བསྐྲུན་གྱི་འཐབ་ཕྱོགས་ཇུས་འགོད་ལ་གདོང་གཏུག་སྟེ། རྒྱལ་ཁབ་ཀྱིས་མ་དངུལ་གཏོང་ཚད་ཇེ་མཐོར་གཏོང་བ་དང་བསྟུན་ཏེ། མི་རིགས་ཁག་གི་མི་མང་གིས་འདུ་ཤེས་བཞི་དང་གཡོལ་དགོས་པའི་བྱེད་ཐབས་བཞི། དེ་བཞིན་ཤུགས་སྣོན་དགོས་པའི་འདུ་ཤེས་བཞི་བཅས་གནད་དོན་གསུམ་ངེས་པར་དུ་ཐག་གཅོད་དགོས་པའི་བཀའ་རྒྱ་བཏང་ཡོད་འདུག
དེ་ཡང་བཀའ་རྒྱའི་ནང་དུ། འདུ་ཤེས་བཞི་འདོར་དགོས་པའི་གཅིག་ནི་གནས་སྲུང་འདུ་ཤེས་ཏེ། མཐའ་འཁོབ་ས་ཁུལ་ཁ་ཤས་སུ་ཕ་མེས་ནས་བརྒྱུད་པའི་སྡོད་ཁང་དང་། ཞིང་ས། རྩྭ་ས་བཅས་ལ་སྔར་བཞིན་ཞེ་ཆགས་པ་དང་། རང་གི་རྔུལ་ཁྲག་གིས་བསྐྲུན་པའི་ཁྱིམ་གཞིས་དང་ཁ་བྲལ་ཏེ་གྲོང་བརྡལ་ཅན་གསར་པའི་ལམ་དུ་ཞུགས་འདོད་མེད་པ་རེད། གཉིས་ནི་ལས་རིགས་སྲུང་པའི་འདུ་ཤེས། སྲོལ་རྒྱུན་གྱི་ཐོན་སྐྱེད་ཚོང་ལས་གཉེར་ཐབས་དང་ཕྱུག་འགྱུར་གྱི་ལམ་ཁ་དམ་པོར་སྲུང་ཕྱིར། ཞིང་པ་ཁ་ཤས་ལ་རྒྱུ་རྐྱེན་ཅི་རིགས་ཀྱིས་བཀག་རྒྱ་དང་ཤུགས་རྐྱེན་ཐེབས་ནས། ཚན་རྩལ་གསར་པ་དང་། ཤེས་བྱ་གསར་པ་བསྡུ་ལེན་བྱེད་འདོད་མེད་པར་ཆགས་འདུག བཞི་ནི་ལུགས་སྲོལ་བརྩི་སྲུང་གི་འདུ་ཤེས། ལག་ལེན་གྱིས་ར་སྤྲོད་བྱུང་པར། ཞིང་ལས་ལ་སྐུལ་འདེད་ཀྱིས་མི་གྲངས་གྲོང་བརྡལ་ཅན་ལ་བསྒྱུར་པ་ནི་ཞིང་པ་དག་དེང་རབས་ གྲོང་ཁྱེར་གྱི་ཤེས་དཔལ་དང་འདྲེས་བའི་ཐབས་ལམ་གཙོ་བོ་རེད་མོད། ས་གནས་ཁ་ཤས་ཀྱི་ཞིང་པས་བྱ་དངོས་གསར་པ་འདི་དག་བསྡུ་ལེན་བྱེད་འདོད་མེད་པ་མ་ཟད། ཐ་ན་གཞི་རིམ་ལས་བྱེད་པས་ཀྱང་སྣེ་ཁྲིད་བྱེད་འདོད་མེད་ཅིང་ལུགས་སྲོལ་རྙིང་པ་གཏོར་འདོད་མེད་པར་གྱུར་འདུག བཞི་ནི་གོམས་སྲོལ་སྲུང་པའི་འདུ་ཤེས། མི་གཙོ་བོར་འཛིན་པ་རྒྱུན་འཁྱོངས་བྱས་ཏེ་མི་རིགས་རིག་གནས་ལ་བསྟུན་པ་བརྒྱུད། སྐྱེ་ཁམས་དཔལ་ཡོན་དང་། ཤེས་རིག་དར་སྤེལ་ནི་མི་རིགས་ས་ཁུལ་དུ་གྲོང་བརྡལ་ཅན་གསར་པ་འཛུགས་སྐྲུན་བྱེད་པའི་རྟགས་མཚན་གཙོ་བོར་གྱུར་འདུག་མོད། དེ་ལྟར་ནའང་། དོན་དངོས་ཁྲོད་དབུལ་ཕོངས་ས་ཁུལ་ཁ་ཤས་སུ་ཞིང་པས་ལག་རྩལ་དང་། དོ་དམ། ཤེས་བྱ་བཅས་སློབ་སྦྱོང་ཐད་འགྲོ་གྲོན་གཏོང་པར་གྲོན་ཆུང་བྱས་པ་ལས། དེ་ལས་གཞན་པའི་དགོས་མེད་ཀྱི་འགྲོ་སོང་ཆེ་ཆེར་བཏང་འདུག ཅེས་དང་།
ཡང་མི་རིགས་ས་ཁུལ་དུ་གྲོང་བརྡལ་ཅན་འཛུགས་སྐྲུན་གྱི་བྱེད་ཐབས་བཞིར་གཡོལ་དགོས་པའི་སྐོར་ལ། བྱེད་ཐབས་བཞི་ལ་གཡོལ་ཐབས་བྱེད་དགོས་པ་གཅིག་ལད་མོའི་རང་བཞིན་གྱི་བྱེད་ཐབས། ལོ་རྒྱུས་ཀྱི་དབང་གིས་གྲོང་བརྡལ་ཅན་འཛུགས་སྐྲུན་ཐད་མི་རིགས་ས་ཁུལ་ནི་དར་རྒྱས་ས་ཁུལ་དང་བསྡུར་ན་བར་ཁྱད་ཆེན་པོ་ཡོད་དེ། ས་ཁུལ་ཁ་ཤས་ཀྱིས་ས་གནས་རང་གི་དཔལ་འབྱོར་འཕེལ་རྒྱས་དང་ཐོན་ཁུངས་དགེ་མཚན་ལ་མི་དམིགས་པར། མུན་འཐོམས་རང་བཞིན་གྱི་རྗེས་སུ་འབྲངས་ནས་དར་རྒྱས་ས་ཁུལ་གྱི་བྱེད་སྟངས་ལ་ལད་མོ་བྱེད་པ་རེད། རྣམ་གྲངས་བསྐྲུན་པ་དང་། གནས་སྤོར་ཆེན་པོ་བྱས་པ་དེར་ཚད་ཡོད་ཀྱི་རྒྱུ་ཤུགས་དང་དངོས་ཤུགས་ཀྱིས་ནུས་པ་ཆེན་པོ་ཐོབ་མེད་པ་མ་ཟད། དེ་ལས་ལྡོག་ཏེ་ཆུད་ཟོས་སུ་བཏང་འདུག དོན་དངོས་ཀྱིས་ར་སྤྲོད་བྱས་པར། གྲོང་བརྡལ་ཅན་གསར་པ་འཛུགས་སྐྲུན་གྱི་གོ་རིམ་ཁྲོད་དར་རྒྱས་ཆེ་བའི་ས་ཁུལ་གྱི་སྔོན་ཐོན་ཉམས་མྱོང་ལ་སློབ་སྦྱོང་བྱེད་རྒྱུ་དེ་ཤིན་ཏུ་གལ་ཆེ་མོད། ཡིན་ནའང་ཞིབ་ཕྲའི་འཕེལ་རྒྱས་འབྱུང་ཐབས་ལ་ངེས་པར་དུ་མི་རིགས་ས་ཁུལ་གྱི་དོན་དངོས་ནས་འགོ་རྩོམ་པ་ལས་ཡོད་ཚད་ལད་མོ་བྱེད་མི་རུང་ངོ་། གཉིས་ནི་འབོད་ཚིག་རང་བཞིན་གྱི་བྱེད་ཐབས། གྲོང་བརྡལ་ཅན་གསར་པ་འཛུགས་སྐྲུན་བྱེད་རྒྱུ་ནི་རང་རྒྱལ་གྱི་འབྱུང་འགྱུར་དུས་ཡུན་ངེས་ཅན་རིང་གི་དོན་ཆེན་རེད། དཀའ་ཚེགས་ཆེ་ལ་རྙོག་འཛིང་ལྡན་པའི་ལས་གཞི་འདི་སྤེལ་ཕྱིར། འོས་འཚམ་གྱི་འབོད་ཚིག་ཁ་ཤས་བསྒྲགས་ན་ལས་བྱེད་མང་ཚོགས་ཀྱི་སྤོབས་སེམས་ལ་སྐུལ་འདེད་བྱེད་ཐུབ་པ་མ་ཟད། འབྲེལ་ཡོད་སྡེ་ཚན་གྱིས་ལས་དོན་སྤེལ་པར་ཡང་སྐུལ་འདེད་བྱེད་ཐུབ། དེ་ལྟར་ནའང་། ས་གནས་ཁ་ཤས་ཀྱིས་ཡུལ་ལུང་གི་དོན་དངོས་དང་མཐུན་པའི་ལས་དོན་གྱི་འབོད་སྐུལ་སྒྲོག་ཙམ་མིན་པར། དོན་དངོས་ལས་རིང་དུ་བྲལ་པའི”ཨང་དང་པོ་བརྩོན་ལེན”དང”མྱུར་ཚད་འགྲན་པའི”བྱེད་ཕྱོགས་བཏོན་ཙང་། འབོད་སྐུལ་དེ་ཉིད་ཀྱང་”འབོད་ཚིག་ལས་དོན”ཞིག་ཏུ་གྱུར་འདུག དོན་དངོས་ཅི་རིགས་ཀྱིས་ང་ཚོར་གྲོང་བརྡལ་ཅན་གསར་པ་འཛུགས་བསྐྲུན་གྱི་གོམ་འགྲོས་དོན་ཐོག་ཏུ་མགྱོགས་པོ་ཡོང་དགོས་ན། ངེས་པར་དུ་དཀའ་སྤྱད་བརྩོན་ལེན་དང་། ཏན་ཏན་ཏིག་ཏིག་སྒོས་ལས་དོན་སྒྲུབ་པ་ལས་འབོད་ཚིག་སྒྲོག་པ་ཙམ་གྱིས་མངོན་འགྱུར་བྱེད་མི་ཐུབ་པ་གསལ་པོར་བསྟན་ཡོད་དོ།
གསུམ་ནི”འགྱུར་ལྡོག་མང་པའི”བྱེད་ཐབས། གྲོང་བརྡལ་ཅན་གསར་པ་འཛུགས་སྐྲུན་ཐད་འགོ་ཁྲིད་གཅིག་གིས་འཆར་འགོད་གཅིག་བཟོ་བར་གཡོལ་དགོས་ཏེ། འཕེལ་རྒྱས་འཆར་འགོད་དེ་འགོ་ཁྲིད་བརྗེ་གསོར་དང་བསྟུན་འགྱུར་བ་གཏོང་མི་རུང་པར། ངེས་པར་དུ་འཆར་འགོད་གཅིག་གཏན་ཁེལ་གྱིས་ཡུན་རིང་གི་འཛུགས་སྐྲུན་ཚད་ལྡན་དུ་གཏོང་དགོས་པ་སྟེ། སྒྲིག་སྲོལ་ཆ་ཚང་གིས་དོ་དམ་བྱེད་རྒྱུ་དང་། ཁྲིམས་ལྟར་ནན་ཏན་སྒོས་རིམ་པ་རེ་རེས་རྒྱུན་མཐུད་ནས་ལས་དོན་སྒྲུབ་དགོས། བཞི་ནི་མྱུར་ཚད་རང་བཞིན་གྱི་བྱེད་ཐབས། གྲོང་བརྡལ་ཅན་གསར་པ་འཛུགས་སྐྲུན་ནི་མིག་སྔའི་དགོངས་དོན་དང་བསྟུན་ནས་གོ་སྐབས་བརྩོན་ལེན་བྱེད་རྒྱུ་དང་། གོམ་འགྲོས་ཇེ་མགྱོགས་སུ་གཏོང་དགོས་པ་མ་ཟད། འབད་བརྩོན་རྨང་གཞི་བྱས་ནས་གཏིང་ཤུགས་བསྡུ་ལེན་བྱེད་དགོས། དེ་ཡང་གྲོང་བརྡལ་ཅན་གསར་པ་འཛུགས་སྐྲུན་གྱི་གྲུབ་འབྲས་ལ་ཞིབ་བཤེར་བྱེད་པར་རྣམ་གྲངས་ཇི་ཙམ་བསྐྲུན་པ་དང་། སྡོད་ཁང་ག་ཚོད་གནས་སྤོ་བྱས་པ། མ་དངུལ་ཇི་ཙམ་བཏང་པས་ཚད་འཇལ་མི་རུང་པ་མ་ཟད། མཇུག་འབྲས་མེད་པའམ་མཇུག་འབྲས་ཉུང་ངུ་ལས་མངོན་མེད་པའི་བྱེད་ཐབས་ལ་གཞོལ་ཏེ། ངེས་པར་དུ་མྱུར་ཚད་དང་ཕན་འབྲས་གཅིག་གྱུར་ཡོང་པ། མྱུར་ཚད་དང་ཞིང་པའི་ཡོང་འབབ་གཅིག་གྱུར་ཡོང་པ། མྱུར་ཚད་དང་འཕེལ་རྒྱས་ལ་ཤུགས་སྣོན་བྱེད་པའི་གཏིང་ཤུགས་གཅིག་གྱུར་ཡོང་པ་རྒྱུན་འཁྱོངས་བྱེད་དགོས། ཞེས་བཀོད་འདུག
མཇུག་ཏུ་འཛུགས་སྐྲུན་གྱི་འདུ་ཤེས་བཞི་ལ་ཤུགས་སྣོན་དགོས་པའི་ཐད། གཅིག་ནི་གསར་གཏོད་ཀྱི་འདུ་ཤེས་ཏེ། མི་རིགས་ས་ཁུལ་གྱི་གྲོང་བརྡལ་ཅན་འཛུགས་སྐྲུན་གྱི་གཙོ་གནད་ནི་ལྟེ་བའི་ནང་དོན་དང་། གཞི་རྩའི་བླང་བྱ། རྩ་བའི་བྱེད་ཐབས་བཅས་ཐད་ནུས་ཤུགས་ཡོད་རྒུས་གསར་གཏོད་བྱེད་དགོས་པ་དེ་རེད། སྔོན་ཆད་ཀྱི་དབང་ཆ་དང་མ་དངུལ་རྐྱང་པར་བརྟེན་ནས་འཛུགས་བསྐྲུན་བྱེད་པའི་བསམ་ཕྱོགས་ལས་བརྒལ་པར་བྱེད་དགོས་ཤིང་། འཛུགས་བསྐྲུན་གྱི་གོ་རིམ་ཁྲོད་སྲོལ་རྒྱུན་གྱི་འཛུགས་བསྐྲུན་བྱེད་ཐབས་གཏོར་དགོས་ཏེ། ཚོང་རའི་རྨང་གཞིའི་རང་བཞིན་གྱི་ཐོན་ཁུངས་སྙོམས་སྒྲིག་གི་ནུས་པ་ཁྱོན་ཡོངས་ ནས་འདོན་དགོས་པ་དང་། ལྷག་པར་དུ་ཚན་རྩལ་སྔོན་དུ་བསྐྱོད་ཐུབ་པ་བྱ་དགོས། གྲོང་བརྡལ་ཅན་གསར་པར་ཐོན་སྐྱེད་ནུས་ཤུགས་མཆོངས་བསྐྱོད་རང་བཞིན་གྱི་འཕེལ་རྒྱས་མངོན་འགྱུར་འབྱུང་པར། ཚན་རྩལ་ནི་སྒུལ་ཤུགས་ཡིན་ཏེ། ངེས་པར་དུ་ཚན་རྩལ་དེ་མགོ་མཇུག་ཀུན་ལ་ཁྱབ་པར་བྱེད་དགོས་པ་དང་། མིག་སྔའི་ལས་དོན་སྒྲུབ་རྒྱུ་དང་ཡུན་རིང་ལ་བསམ་གཞིགས་གཏོང་པ། འབྱུང་འགྱུར་ལ་འཆར་འགོད་བྱེད་དགོས། གཉིས་ནི་འཇོན་མིའི་འདུ་ཤེས། ཨ་རིའི་དཔལ་འབྱོར་རིག་པའི་མཁས་ཆེན་སུའུ་ཨར་ཙི་ཡིས”དབུལ་ པོའི་ཁེ་ཕན་ལེགས་བཅོས་བྱེད་པའི་གཏན་ཁེལ་རང་བཞིན་གྱི་ཐོན་སྐྱེད་ཆ་རྐྱེན་ནི་ མི་གྲངས་ཀྱི་སྤུས་ཚད་བཅོས་སྒྱུར་དང་ཤེས་བྱ་ཇེ་མཐོར་དུ་གཏོང་རྒྱུ་དེ་རེད་འདོད།”མི་ རིགས་ས་ཁུལ་གྱི་འཇོན་མིའི་ཐོན་ཁུངས་ཀྱི་གྲངས་ཀ་དང་ལྷག་པར་དུ་སྤུས་ཀས་གྲོང་བརྡལ་ཅན་གསར་པ་འཛུགས་སྐྲུན་གྱི་གོམ་འགྲོས་ཇེ་མགྱོགས་དང་གེགས་མེད་ངང་འཕེལ་རྒྱས་འབྱུང་ཐུབ་མིན་གཏན་ཁེལ་བྱས་ཡོད་པས། ངེས་པར་དུ་འཇོན་མིའི་ལྟ་བ་གསར་པ་ཆགས་དགོས་ཤིང་། གང་ལ་འཇོན་མི་ལྡན་པ་དེ་ཉིད་མགྱོགས་མྱུར་གྱིས་འཕེལ་རྒྱས་འབྱུང་པའི་གལ་ཆེན་རང་བཞིན་ངེས་པར་བྱེད་དགོས། འཇོན་མི་སྐྱེད་སྲིང་དང་། འཇོན་མི་ནང་འདྲེན། འཇོན་མི་བེད་སྤྱོད་ལེགས་པོ་གཏོང་རྒྱུ་དེ་ལས་འགན་གཙོ་བོར་བཟུང་ནས་སྒྲུབ་དགོས།
གསུམ་ནི་མ་རྩའི་འདུ་ཤེས། མ་རྩ་ནི་དཔལ་འབྱོར་གྱི་མ་རྩ་ཙམ་མིན་པར་སྲིད་འཛིན་གྱི་མ་རྩ་དང་། འཇོན་མིའི་མ་རྩ། སྤྱི་ཚོགས་ཕན་འབྲས་ཀྱི་མ་རྩ་བཅས་ཀྱང་འདུ། མི་རིགས་ས་ཁུལ་གྱི་གྲོང་བརྡལ་ཅན་གསར་བ་འཛུགས་སྐྲུན་བྱེད་པར་ངེས་པར་དུ་མ་རྩའི་འདུ་ཤེས་གཙིགས་མཐོང་བྱས་པ་བརྒྱུད་མ་རྩའི་འདུ་ཤེས་ལ་ཤུགས་སྣོན་བྱེད་དགོས། ཕྱོགས་ཅི་རིགས་ཀྱི་རྒྱུ་རྐྱེན་གྱི་དབང་གིས་མི་རིགས་ས་ཁུལ་གྱི་མ་རྩའི་འདུ་ཤེས་དེ་ཉིད་དར་རྒྱས་ཆེ་བའི་ས་ཁུལ་ལ་མཚོན་ན་འཁོས་ཞན་ཡིན་པས། གྲོང་བརྡལ་ཅན་གསར་པ་འཛུགས་སྐྲུན་གྱི་གོ་རིམ་ཁྲོད་མ་རྩའི་འདུ་ཤེས་ཐད་དེ་ལས་ཤུགས་སྣོན་བྱས་ནས། གཤིབ་བསྡུར་གྱིས་དབྱེ་ཞིབ་བྱེད་ཐབས་དང་། རིགས་དགར་ནས་ལག་བསྟར་བྱེད་པ། སློབ་སྦྱོང་དང་ཉམས་མྱོང་བསྡུ་ལེན་གྱི་བྱེད་ཐབས་སྤྱོད་དགོས། དེ་ལྟར་བྱས་ན་ད་གཟོད་ཚོད་ལྟའི་མ་རྩ་གྲོན་ཆུང་དང་ཇེ་ཉུང་དུ་གཏོང་ཐུབ། བཞི་ནི་འཁྲབ་མཁན་གྱི་འདུ་ཤེས། “འཁྲབ་མཁན་གྱི་འདུ་ཤེས”ཞེས་པ་ནི་དོན་དུ་ནམ་རྒྱུན་རང་གིས་ལས་ཅི་ཞིག་སྒྲུབ་པ་དང་། རང་གིས་སྒྲུབ་ཀྱིན་པའི་ལས་དེས་རང་སྟེང་ལ་སྤྱི་ཚོགས་དང་སྤྱོད་ལམ་གྱི་བླང་བྱ་ག་འདྲ་ཞིག་དགོས་པ། གྲོང་བརྡལ་ཅན་གསར་པ་འཛུགས་སྐྲུན་གྱི་གོ་སྐབས་ལ་གདོང་གཏད་དུས། རིམ་པ་སོ་སོ་དང་སྡེ་ཁག་སོ་སོའི་ལས་བྱེད་པ་དང་། ལྷག་པར་དུ་འགོ་ཁྲིད་ལས་བྱེད་པར་འཁྲབ་མཁན་གྱི་འདུ་ཤེས་འདི་འདྲ་ལྡན་དགོས། དཔལ་འབྱོར་རིག་པའི་ཆེད་མཁས་ཞིག་གིས་རང་རྒྱལ་གྱི་ཤར་རྒྱུད་ས་ཁུལ་དང་ནུབ་རྒྱུད་ས་ཁུལ་དུ་རྟོག་ཞིབ་བྱེད་དུས། ཤར་རྒྱུད་ས་ཁུལ་གྱི་མི་དང་མི་འབྲེལ་འདྲིས་བྱེད་དུས་ཕན་ཁེ་དང་ཕན་འབྲས་ལ་མཐོང་ཆེན་བྱེད་པ་མང་ཞིང་། ནུབ་རྒྱུད་ས་ཁུལ་གྱིས་དཔོན་གནས་དང་སྒེར་འབྲེལ་བྱེད་རྒྱུ་མང་པ་མཐོང་། འདིས་ཀྱང་ཕྱོགས་གཞན་ཞིག་ནས་འཁྲབ་མཁན་འདུ་ཤེས་ཀྱི་གལ་ཆེན་རང་བཞིན་མཚོན་པར་བྱས་ཡོད། སྤྱི་ཚོགས་ལ་གཞི་ཚུགས་དུས། འཁྲབ་མཁན་གྱི་འདུ་ཤེས་འདི་འདྲ་ཞིག་མེད་ན་རང་སྒེར་གྱི་ལས་དོན་སྒྲུབ་མི་ཐུབ་པས། མི་རིགས་ས་ཁུལ་གྱི་གྲོང་བརྡལ་ཅན་གསར་པའི་འཛུགས་སྐྲུན་གོ་རིམ་ཁྲོད་ཀྱང་དེ་ལྟར་སྣང་ངོ་། ཞེས་བཀོད་འདུག
གསར་འགོད་པ། པདྨ་མཚོ།
