དེ་རིང་སྔ་དྲོར་སྤྱི་ཁྱབ་རྩིས་ཞིབ་འགན་འཛིན་ཟུར་པ་བཀའ་བརྒྱུད་དོན་འགྲུབ་མཆོག་གིས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་ལས་འཁུར་དམ་འབུལ་གནང་སོང་།
དེ་རིང་སྔ་དྲོའི་ཆུ་ཚོད་ ༩།༣༠ སྟེང་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོགས་ཁང་དུ། ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གི་དབུས་སྲིད་སྐྱོང་མཆོག་གི་སྲིད་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་གི་གཙོས་བཀའ་བློན་ཕྱག་རོགས་རྣམ་པ། དེ་བཞིན། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག གཞན་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ་དང་སྤྱི་འཐུས་རྒྱུན་ལས་རྣམ་པ་བཅས་མཉམ་འཛོམས་ཐོག ཟླ་སྔོན་མའི་ཚེས་ ༡༣ ཉིན་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་སྐབས་བདམས་ཐོན་བྱུང་བའི་ཁྲིམས་ཞིབ་པ་ཆེ་བ་བཀའ་བརྒྱུད་དོན་འགྲུབ་མཆོག་དང་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་རྣམ་གཉིས་ཀྱིས། ༧གོང་ས་མཆོག་གི་སྐུ་པར་ལ་མཎྜལ་རྟེན་གསུམ་འདེགས་འབུལ་གནང་བ་དང་འབྲེལ། གསར་འདེམས་བྱུང་བའི་ཁྲིམས་ཞིབ་པ་ཆེ་བ་མཆོག་གིས་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གི་མདུན་དུ་ལས་འཁུར་དམ་བཅའ་ཕུལ་སོང་།
བཀའ་བརྒྱུད་དོན་འགྲུབ་ལགས་ནི། ༡༩༥༧ ལོར་སྟོད་མངའ་རིས་སུ་ཕ་ཚེ་བརྟན་དོན་འགྲུབ་ལགས་དང་མ་བསོད་ནམས་མཚོ་མོ་གཉིས་ཀྱི་བུར་སྐྱེས་ཤིང་། ༡༩༥༩ ལོར་ཕ་མ་སྤུན་མཆེད་དང་ལྷན་བཙན་བྱོལ་དུ་འབྱོར་ཡོད་པ་དང་། ༡༩༦༥ ལོར་སིམ་ལ་གཏན་སློབ་ཏུ་འཛིན་རིམ་ ༦ པ་བར་སློབ་སྦྱོང་གནང་རྗེས། རྒྱ་གར་ལྷོ་ཕྱོགས་མོན་གྷོར་གཞིས་ཆགས་སློབ་གྲྭར་འཛིན་གྲྭ་ ༩ པ་དང་། མ་སུ་རི་གཏན་སློབ་ཏུ་འཛིན་གྲྭ་ ༡༠ པ་དང་། ༡༩༧༦ ལོར་རྡོར་གླིང་གཏན་སློབ་ནས་འཛིན་གྲྭ་ ༡༡ ཐོན་རྗེས། ༡༩༧༦ལོ་ནས་ལོ་གསུམ་རིང་སི་རི་མཐོ་སློབ་ཏུ་སློབ་སྦྱོང་གནང་སྟེ་བསླབ་པ་མཐར་ཕྱིན་ཡོད་འདུག
ཕྱི་ལོ་ ༡༩༨༠ ལོར་གཞུང་ཞབས་ནང་ཚུད་དེ་ཕྱི་ལོ་ ༡༩༨༡ ་ཟླ་ ༦ པ་བར་སྤྱི་ཁྱབ་རྩིས་ཞིབ་ལས་ཁུངས་ཀྱི་གཞོན་དྲུང་གནང་ཡོད་པ་དང་། དེ་རྗེས་བྷང་ལོར་དུ་ལོ་ ༣ རིང་ (K. V Hariharan & Company Charter Accountant )ཆེས་མཐོའི་རྩིས་ཞིབ་པའི་ཉམས་གསོའི་སྦྱོང་བརྡར་གནང་རྗེས། རྩིས་ཞིབ་ལས་ཁུངས་ཀྱི་རྒན་དྲུང་དང་དྲུང་གཞོན། ཟུང་དྲུང་། དྲུང་འཕར། དྲུང་ཆེ་བཅས་སུ་རིམ་བཞིན་གནས་འཕར་ཡོད་པ་དང་། དེའི་རྗེས་ལོ་གཅིག་རིང་ཨ་རིའི་རོ་ཆི་སུ་ཊིར་གཙུག་ལག་མཐོ་སློབ་ (The University of Rochester) ཏུ་རྩིས་དང་དཔལ་འབྱོར་རིག་པར་སློབ་སྦྱོང་གནང་འདུག ༢༠༠༢ ནས་ ༢༠༠༤ ལོའི་བར་རྩིས་ཞིབ་ཁང་གི་དྲུང་ཆེའི་འགན་འཁུར་བ་དང་། ༢༠༠༤ ལོའི་ཟླ་ ༩ པ་ནས་ ༢༠༡༤ ལོའི་ཟླ་ ༩ པའི་བར་སྤྱི་ཁྱབ་རྩིས་ཞིབ་ཀྱི་འགན་འཛིན་གྱི་ཕྱག་ལས་གནང་ཡོད་འདུག
གསར་འགོད་པ། ལྷ་སྐྱབས་རྒྱལ།
