དྷ་སའི་རི་སྒང་གི་དཀའ་ངལ་གསུམ་གང་མགྱོགས་སེལ་ཐུབ་རྒྱུ་རེད།

དྷ་ས་ས་གནས་མགོ་འཛིན་གྱིས་བརྗོད་པ་ལྟར་ན་ད་ལོའི་ཕྱི་ཟླ་ ༡༢ པའི་བར་མེག་གྷན་ནས་དྷ་ཤོད་བར་གྱི་གཞུང་ལམ་བསྐྱར་བཟོ་ཚར་རྒྱུ་ཡིན་པ་དང་། དྷ་སའི་ཤིང་ནགས་ས་ཆའི་རྙོག་གླེང་འོག་གི་བོད་པའི་ཁང་བ་དག་ཁྲིམས་མཐུན་ཆགས་རྒྱུ། དེ་བཞིན་མེག་ལོར་གཞུང་ལམ་གཡས་གཡོན་གྱི་ཁྲོམ་ས་དག་གི་གནད་དོན་ད་ལྟ་འགྲོ་མུས་ཡིན་སྐོར་སོགས་ངོ་སྤྲོད་གནང་སོང་།

དྷ་རམ་ས་ལའི་ཁོར་ཡུག་དང་འབྲེལ་བའི་ཐོག་དཀའ་ངལ་ཆེ་ཤོས་ཁག་ཅིག་ཡོད་པ་ནི། མེག་གྷན་ནས་དྷ་ཤོད་བར་གྱི་ལམ་ཁ་ཡག་པོ་མེད་པ་དང་། དྷ་སའི་བྷག་སུ་དང་ཟློས་གར་ལམ་གྱི་བོད་པའི་ཁང་པ་མང་པོ་ཞིག་རྒྱ་གར་ཤིང་ནགས་ས་ཆར་ཁེལ་ཏེ་རྙོག་གྲ་ཡོད་པ། དེ་བཞིན་དྷ་སའི་གཞུང་ལམ་གཡས་གཡོན་གྱི་ཁྲོམ་ས་དག་ལ་རྒྱ་གར་འགྲིམ་འགྲུལ་ལས་ཁུངས་ཀྱིས་དཀའ་ངལ་བཟོ་བཞིན་ཡོད་པ་སོགས་ཡིན། ད་ལོའི་༧གོང་ས་མཆོག་གི་སྐུའི་འཁྲུངས་སྐར་ཉིན། ཧི་མ་ཅལ་མངའ་སྡེའི་འགྲིམ་འགྲུལ་བློན་ཆེན་གྱིས་མངའ་སྡེ་གཞུང་གིས་ཧིན་སྒོར་འབུམ་ ༢༠༠ ལྷག་གི་འགྲོ་གྲོན་བཏང་སྟེ། དྷ་ས་མེག་གྷན་ནས་དྷ་ཤོད་བར་གྱི་གཞུང་ལམ་བསྐྱར་བཟོ་བྱ་རྒྱུ་ཞལ་བཞེས་གནང་བ་དང་། ཟླ་སྔོན་མའི་ནང་མེག་གྷན་ཁྲོམ་གཞུང་གི་གཡས་ཕྱོགས་ཀྱི་ལམ་ཁ་བཟོ་མགོ་བཙུགས་ཡོད་སྟབས། དེ་རིང་འདི་གའི་གསར་འགོད་པ་ཆེད་དུ་དྷ་ས་ས་གནས་མགོ་འཛིན་སར་བཅར་ཏེ་ལས་དོན་དེ་དག་ད་ལྟ་གནས་སྟངས་གང་འདྲ་ཆགས་ཡོད་མེད་བཅར་འདྲི་ཞུས་ཡོད།

དྷ་ས་ས་གནས་མགོ་འཛིན་བསོད་ནམས་རྡོ་རྗེ་ལགས་ཀྱིས་དྷ་སའི་གཞུང་ལམ་སྐོར་གསར་འགོད་པར་ངོ་སྤྲོད་གནང་དོན། དྷ་ས་མེག་གྷན་ཁྲོམ་གཞུང་རླངས་འཁོར་འབབ་ཚིགས་ནས་གཙུག་ལག་ཁང་བར་གྱི་ལམ་ཁ་དེ་བཟོ་མགོ་བཙུགས་ནས་ཟླ་གཅིག་ཙམ་འགྲོ་བཞིན་ཡོད། དེ་གཉིས་བར་རྡོ་གཅལ་སྒྲིག་ནས་ལམ་ཁ་སྤུས་དག་པོ་ཞིག་བཟོ་རྒྱུ་རེད། དེ་ཚར་རྗེས་གཙུག་ལག་ཁང་ནས་དྷ་ཤོད་བར་ཨར་འདམ་མཐུག་པོ་བླུགས་ནས་ལམ་ཁ་བཟོ་རྒྱུ་རེད། ཁ་སང་ང་ཚོ་གཞུང་ལམ་བཟོ་མཁན་ལ་ཐུག་སྐབས། ཁོ་རང་གིས་དཀའ་ངལ་ཁ་ཤས་བཤད་སོང་། གཅིག་གཞུང་ལམ་འོག་ཆུ་སྦུག་མང་པོ་ཡོད་པ་དེ་དང་། གཉིས་པ་འགྲིམ་འགྲུལ་ཉེན་རྟོག་པས་མཐུན་སྦྱོར་ཡག་པོ་གནང་གི་མི་འདུག་ཟེར། གང་ཡིན་ཟེར་ན། ཉིན་འདི་གར་དྷ་རམ་ས་ལར་དབྱུག་རྩེལ་སྤོ་ལོ་འགྲན་བསྡུར་ཡོད་པ་དང་། རྒྱ་གར་གྱི་དྷི་སེ་ར་དུས་ཆེན་ (Dussehra Festival)སོགས་ལ་འཁེལ་གྱི་ཡོད་སྟབས། ཡུལ་སྐོར་སྤྲོ་འཆམ་པ་མང་པོ་ཡོང་གི་ཡོད་པས་གཞུང་ལམ་བཟོ་བཅོས་བྱས་ན་བརྡབ་གསིག་ཐེབས་རྒྱུའི་ཉེན་ཁ་འདུག་གསུང་གི་འདུག ཅེས་བརྗོད་བྱུང་།

གསར་འགོད་པས་ལམ་ཁ་བཟོ་བཅོས་དེ་ག་དུས་ཚར་མིན་དྲིས་པར། ཁོང་གིས། ང་ཚོས་བཀའ་མོལ་ཡང་ཡང་གནང་བ་ལ་བརྟེན་ཏེ། ད་ལོའི་ཕྱི་ཟླ་ ༡༢ ཚེས་ ༡ ཉིན་བར་༧གོང་ས་མཆོག་གི་ཕེབས་ལམ་ཆ་ཚང་བསྐྱར་བཟོ་ཚར་ཐུབ་པ་བྱ་རྒྱུ་ཡིན་པ་གསལ་བོ་རེད། གང་ཡིན་ཟེར་ན། ཕྱི་ཟླ་ ༡༢ ཚེས་ ༡༠ ཉིན་ཧི་མ་ལ་ཡའི་དུས་ཆེན་སྐབས་མངའ་སྡེ་བློན་ཆེན་ཕེབས་འཆར་ཡོད་པ་རེད། གང་ལྟར་ཟླ་དྲུག་རིང་མེག་གྷན་ནས་དྷ་སྟེང་བོད་ཁྱིམ་བཟོ་གྲྭ་བར་དང་། མེག་གྷན་ནས་ཡེ་ཤུ་ལྷ་ཁང་ཕྱོགས་ཀྱི་དུར་ཁྲོད་བར། དྷ་ས་མེག་གྷན་ནས་བྷག་སུ་ཕྱོགས་སུ་སྨི་ཊིར་ ༢༠༠ ཙམ་བར། གཙུག་ལག་ཁང་ནས་མར་དྷ་ཤོད་བཅས་ཀྱི་གཞུང་ལམ་ནང་ཨར་འདམ་དང་རྡོ་ཧྲུག་མཉམ་བསྲེས་ཀྱིས་གཞུང་ལམ་སྤུས་དག་ཤོས་དེ་བཟོ་རྒྱུ་ཡིན་པའི་ཐག་གཅོད་གནང་ཚར་ཡོད་པ་རེད། ཅེས་བརྗོད་བྱུང་།

ཁོང་གིས་མུ་མཐུད་དུ། ལམ་ཁ་འདི་བཟོ་མགོ་བཙུགས་སྐབས། ཐོག་མ་དྷ་སྟེང་བོད་ཁྱིམ་ཕྱོགས་སུ་བཟོས་པ་དེར་གླེང་སློང་ཕྲན་བུ་བྱུང་བ་རེད། ལམ་ཁ་དེར་འགྲོ་སོང་ཆེན་པོ་བཏང་སྟེ་གཙུག་ལག་ཁང་ནས་དྷ་ཤོད་བར་གྱི་༧གོང་ས་མཆོག་གི་ཕེབས་ལམ་བཟོ་སྐབས་དངུལ་རྫོགས་རྒྱུའི་ཉེན་ཁ་འདུག་གསུངས་པ་རེད། ཁ་སང་ང་ཚོ་སིམ་ལར་འགྲོ་སྐབས་དེའི་སྐོར་ཞུས་པ་ཡིན་ཡང་ལན་གསལ་བོ་ཞིག་འབྱོར་མ་སོང་། ཁོང་ཚོས་དྷ་སྟེང་བོད་ཁྱིམ་ཕྱོགས་ཀྱི་གཞུང་ལམ་བཟོ་མགོ་བཙུགས་ཚར་ཡོད་སྟབས་མཇུག་མ་སྐྱེལ་ག་མེད་ཆགས་ཡོད། ཡིན་ནའང་དངུལ་རྫོགས་ཏེ་ལམ་ཁ་བཟོ་མ་ཐུབ་པའི་གནས་སྟངས་དེ་འདྲ་ཡོང་གི་མ་རེད་གསུངས་སོང་། ཞེས་བརྗོད་སོང་།

ཡང་གསར་འགོད་པས་དྷ་ས་མེག་གྷན་གྱི་བོད་མིའི་ཁང་པ་མང་པོ་ཞིག་རྒྱ་གར་ཤིང་ནགས་ཀྱི་ས་ཆའི་ནང་ཚུད་ཡོད་པའི་རྙོག་གྲ་དེ་ད་ལྟ་གང་འདྲ་ཆགས་ཡོད་མེད་དྲིས་པར། ཁོང་གིས། དྷ་ས་བྷག་སུ་དང་ཟློས་གར་ལམ་གྱི་གཞུང་ལམ་གཡས་གཡོན་དུ་ཁང་པ་ ༢༡༨ ཙམ་རྒྱ་གར་ཤིང་ནགས་ས་ཆའི་ནང་ཚུད་པའི་རྙོག་གྲ་ཞིག་ཡོད་པ་རེད། ས་ཆ་དེ་དག་རྒྱ་གར་གཞུང་གི་མ་དེབ་ནང་བལྟས་ཡོང་ན་ཤིང་ནགས་ས་ཆ་ཆགས་བསྡད་ཡོད་ཀྱང་། ང་ཚོས་ལོ་ངོ་ ༥༠ ཡི་སྔོན་ལ་ང་ཚོ་འདིར་བསླེབས་ཏེ་གཞིས་ཆགས་སྐབས། ས་ཆ་དེ་དག་ཤིང་ནགས་ས་ཆ་མ་རེད། དེ་དུས་དྷ་སར་ཤིང་ནགས་ལས་ཁུངས་ཟེར་བའང་ཧ་ལམ་མི་འདུག་ཟེར་ནས་མངའ་སྡེའི་གཞུང་དང་རྒྱ་གར་དབུས་གཞུང་ལ་ཞུ་གཏུག་བརྒྱབ་སྟེ། མཐའ་མར་རྒྱ་གར་དབུས་གཞུང་གིས་བོད་པའི་ཁང་པ་དེ་དག་རྩ་བ་ཉིད་ནས་གཏོར་ཆོག་གི་མེད་ཅེས་མངའ་སྡེའི་གཞུང་ལ་བཀའ་བཏང་འདུག རྒྱུ་མཚན་ག་རེ་རེད་ཟེར་ན། བོད་པའི་ཁང་པ་དག་གཏོར་བ་དང་མེད་པ་བཟོས་པ་ཡིན་ན། རྒྱལ་སྤྱིའི་ཐོག་རྒྱ་གར་གཞུང་ངོ་ཚ་བོ་ཆགས་ཡོང་གི་ཡོད་སྟབས། ད་ལྟ་ཁང་པ་གཏོར་མ་དགོས་པར་འགྲིག་ཚར་ཡོད་པ་རེད། ཡིན་ནའང་སྐབས་དེར་ཁང་པ་དེ་དག་ཁྲིམས་མཐུན་ཇི་ལྟར་བཟོ་དགོས་མིན་ཐག་གཅོད་གསལ་བོ་མི་འདུག མཐའ་མ་ཤིང་ནགས་ལས་ཁུངས་ཀྱིས་ས་ཆ་དེ་ཤིང་ནགས་མ་ཡིན་པའི་ས་ཆ་ ( Forest Clearance) བཟོ་རྒྱུ་ལས་ཐབས་གཞན་མི་འདུག་ཟེར་ནས་མངའ་སྡེ་གཞུང་ལ་ཡི་གེ་ཞིག་སྤྲད་པ་དང་། ཤིང་ནགས་ས་ཆ་ཤིང་ནགས་མ་ཡིན་པ་བཟོ་རྒྱུའི་དབང་ཚད་མངའ་སྡེ་གཞུང་ལ་མེད་སྟབས། མངའ་སྡེ་གཞུང་གིས་དབུས་གཞུང་ལ་ཡི་གེ་བཏང་འདུག ང་རང་གིས་ཚོད་དཔག་བྱས་ན་རྒྱ་གར་དབུས་གཞུང་གིས་ས་ཆ་དེ་ཤིང་ནགས་ས་ཆ་མ་ཡིན་པ་བཟོ་རྒྱུའི་ཆོག་མཆན་འཐོབ་རྒྱུ་ཡིན་པ་ཧ་ལམ་བརྒྱ་ཆ་བརྒྱ་རེད། ཅེས་བརྗོད་བྱུང་།

མཇུག་ཏུ་དྷ་ས་མེག་གྷན་གཞུང་ལམ་གཡས་གཡོན་གྱི་ཁྲོམ་ས་དག་གི་དཀའ་ངལ་གང་འདྲ་ཆགས་ཡོད་མེད་དྲིས་པར། ཁོང་གིས། བོད་མིའི་སྒྲིག་འཛུགས་དང་དྷ་ས་ས་གནས་མགོ་འཛིན་གཉིས་ལ་ཁྲོམ་སྟོན་མཁན་ཚོའི་ཆེད་དུ་ཚོང་ཁང་ཟུར་དུ་བཟོ་རྒྱུའི་འཆར་གཞི་ཞིག་ཡོད་པ་རེད། དེ་ལ་མངའ་སྡེའི་གཞུང་དང་ས་གནས་རྫོང་དཔོན་ལས་ཁུངས་གཉིས་ཀྱིས་མོས་མཐུན་བྱེད་ཀྱིན་ཡོད་ཀྱང་། ད་ལྟའི་ཆར་ང་ཚོས་ས་ཆ་གཉིས་འཇུས་བསྡད་ཡོད། ས་ཆ་གཅིག་རྫོང་དཔོན་ལས་ཁུངས་ཀྱིས་ཨོཾ་ཟ་ཁང་འོག་ནས་ཤིང་ནགས་བརྒྱུད་ནས་གཙུག་ལག་ཁང་གི་རླངས་འཁོར་འཇོག་སའི་བར་འགྲོ་ལམ་ཡོད་པའི་ཚོང་ཁང་སྤུས་དག་པོ་བཟོ་རྒྱུ་དེ་རེད། དེ་ལ་རྫོང་དཔོན་ལས་ཁུངས་ཀྱིས་གྲོང་སྡེ་ལས་ཁུངས་ལ་ཞིབ་འཇུག་ཐག་གཅོད་གནང་དགོས་པའི་བཀའ་བཏང་འདུག ཡིན་ནའང་ཚོང་ར་བོད་མིའི་སྐྱབས་བཅོལ་པའི་མིང་ཐོག་ཏུ་བཟོ་བཞིན་ཡོད་ཀྱང་དེའི་ནང་རྒྱ་གར་བ་ཚོ་ཡང་ཚུད་ཀྱི་ཡོད་པ་རེད། ཅེས་བརྗོད་བྱུང་།

བསོད་ནམས་རྡོ་རྗེ་ལགས་ཀྱིས་མུ་མཐུད་དུ་བརྗོད་དོན། བོད་མིའི་སྒྲིག་འཛུགས་དང་ས་གནས་མགོ་འཛིན་གཉིས་ལ་སེམས་ཁྲལ་ག་རེ་ཡོད་ཟེར་ན། དེ་འདྲའི་ཚོང་ཁང་ཞིག་བཟོས་ན་དེར་བོད་མི་ཚོ་འགྲོ་ཡི་ཡོད་མེད་དང་། ཡང་ཚོང་ཡག་པོ་མི་འདུག་ཟེར་ནས་ལོག་ཡོང་རྒྱུའི་ཉེན་ཁ་ཡོད་སྟབས། ང་ཚོས་འཆར་གཞི་གཞན་ཞིག་སྒྲིག་གི་ཡོད་པ་དེ་མེག་གྷན་གྱི་ (HDFC)དངུལ་ཁང་ནས་གཙུག་ལག་ཁང་བར་སྨི་ཌིར་ ༢༠༠ ཙམ་ཡོད་པའི་ལམ་ཁའི་ཤིང་ནགས་ཕྱོགས་སུ་ཕར་བརྐྱངས་ཏེ། ལམ་འོག་ནས་རྡོ་བརྩིགས་ཀ་བ་བཙུགས་ཏེ་དེའི་འོག་ཏུ་བོད་པ་ཚོའི་ཆེད་ཚོང་ཁང་ཆུང་ཆུང་ ༡༢༠ ཙམ་རྒྱག་པའི་འཆར་གཞི་ཡོད། འཆར་གཞི་དེར་མངའ་སྡེའི་གཞུང་དང་རྫོང་དཔོན་ལས་ཁུངས་གཉིས་ནས་མོས་མཐུན་བྱས་པ་ཡིན་ན། འགྲོ་གྲོན་ཆ་ཚང་བོད་མིའི་སྒྲིག་འཛུགས་ཀྱིས་གཏོང་གི་ཡིན་ཟེར་བའི་སྐད་ཆ་ཞིག་ཡོད་ཀྱང་། ད་ལྟའི་ཆར་རྫོང་དཔོན་ལས་ཁུངས་ཀྱིས་ཆོག་མཆན་སྤྲོད་པར་དཀའ་ངལ་ཏོག་ཙམ་ཡོད་པ་འདྲ། ཡིན་ནའང་མངའ་སྡེའི་གཞུང་གིས་ས་ཆའི་གནས་སྟངས་ལ་བལྟ་རྒྱུ་བསྡད་ཡོད་པ་རེད། འདི་གཉིས་འགྲུབ་ཐུབ་མིན་ཟླ་དྲུག་ནང་ཚུད་དུ་གསལ་བོ་ཆགས་ཡོང་གི་རེད། ཅེས་བརྗོད་བྱུང་།

གསར་འགོད་པ། ལྷ་སྐྱབས་རྒྱལ།