ཞིབ་འཇུག་ཚོགས་ཆུང་གཏོང་རྒྱུ་ཡིན་ཟེར།

ཁ་སང་རྒྱལ་ཚོགས་སྤྱི་ཁྱབ་དྲུང་ཆེ་མཆོག་གིས་གྷ་ཛ་ལུང་གཤོང་གི་དམག་འཐབ་ཐད་རང་དབང་གི་ཞིབ་འཇུག་ཚོགས་ཆུང་ཞིག་ཆེད་གཏོང་བྱ་རྒྱུ་ཡིན་སྐོར་བསྒྲགས་འདུག

ཁ་སང་མཉམ་འབྲེལ་རྒྱལ་ཚོགས་སྤྱི་ཁྱབ་དྲུང་ཆེ་བྷན་ཁེ་མོན་མཆོག་གིས་རྒྱལ་ཚོགས་བདེ་འཇགས་ལྷན་ཁང་གི་ཚོགས་མིའི་རྒྱལ་ཁབ་ཁག་གི་ལྷན་ཚོགས་སྟེང་། དཀའ་ངལ་ནང་ལྷུང་ཡོད་པའི་གྷ་ཛ་ལུང་གཤོང་གི་མང་ཚོགས་ཚོར་ཛ་དྲག་སྐྱོབ་གསོ་སྤྲོད་དགོས་སྐོར་བརྗོད་ཡོད་པ་མ་ཟད། ཉེ་ལམ་ཨི་ཛི་རལ་དམག་དཔུང་གིས་གྷ་ཛ་ལུང་གཤོང་གི་ཇ་བྷ་ལི་ཡ་ (Jabalia) གྲོང་ཚོར་ཡོད་པའི་མཉམ་འབྲེལ་རྒྱལ་ཚོགས་ཀྱི་སློབ་གྲྭ་དང་སྐྱབས་བཅོལ་ཁང་ཁག་ཅིག་ལ་གཏོར་སྐྱོན་དང་ཉེས་མེད་མི་སེར་མང་པོ་བསད་རྨས་བཏང་བ་དེར་རང་དབང་གི་ཞིབ་འཇུག་ཚོགས་ཚུང་ཞིག་བསྐོ་བཞག་གིས་ཞིབ་འཇུག་བྱ་རྒྱུ་ཡིན་སྐོར་སོགས་གསུངས་འདུག   

བྷན་ཁེ་མོན་མཆོག་གིས། “ད་བར་གྷ་ཛ་ལུང་གཤོང་གི་དམག་འཁྲུག་འདིའི་རྐྱེན་པས་ཡུལ་མི་འབུམ་གཅིག་ལྷག་ལ་སྡོད་ཁང་མེད་པ་ཆགས་པ་མ་ཟད། ཡུལ་མི་ལྔ་ཁྲི་ཙམ་ཞིག་མཉམ་འབྲེལ་རྒྱལ་ཚོགས་ཀྱིས་གསར་འཛུགས་བྱས་པའི་སློབ་གྲྭའི་སྡོད་ཁང་ཁག་ནང་སྡོད་བཞིན་ཡོད་སྟབས། ད་ལྟ་ང་ཚོས་ཁོང་ཚོར་ཨ་སྒོར་ས་ཡ་ ༤༡༤ ཡི་ཛ་དྲག་སྐྱོབ་གསོ་སྤྲོད་དགོས་པ་མ་ཟད། ཨ་སྒོར་ས་ཡ་ ༡།༢ ཀྱི་སྨན་བཅོས་མྱུར་སྐྱོབ་རོགས་དངུལ་དང་། ཨ་སྒོར་ས་ཡ་ ༢།༤ ཡི་སྡོད་ཁང་གསར་རྒྱག་འཛུགས་སྐྲུན་རོགས་དངུལ་སྤྲོད་དགོས་པའི་གནས་སྟངས་ཆགས་ཡོད།”ཅེས་གསུངས་འདུག 

ཁོང་གིས་ཨི་ཛི་རལ་མཁའ་དམག་གིས་གྷ་ཛ་ལུང་གཤོང་ནང་གི་རྒྱལ་ཚོགས་ཀྱི་སློབ་གྲྭར་གོ་མཚོན་འཕངས་པའི་གནས་ཚུལ་སྐོར་ལ། “ཕྲན་གྱིས་ཨི་ཛི་རལ་ལ་ཧ་མ་སི་དྲག་སྤྱོད་ཤོག་ཁག་གིས་མཁའ་ཐོག་དང་ས་འོག་ཕུག་ལམ་བརྒྱུད་ཉེན་ཁ་བཟོ་བཞིན་ཡོད་པ་ཤེས་ཀྱི་ཡོད་ཀྱང་། གྷ་ཛ་ལུང་གཤོང་གི་གནད་དོན་ཁ་ཤས་ཐོག་འགན་ཁུར་དང་འདྲ་མཚུངས་ཀྱི་ལངས་ཕྱོགས་ཤིག་འཛིན་དགོས་སྟབས། ཉེ་ལམ་ཨི་ཛི་རལ་དམག་དཔུང་གིས་རྒྱལ་ཚོགས་ཀྱི་སློབ་གྲྭ་དང་སྐྱབས་བཅོལ་ཁང་ཁག་ཅིག་ལ་གོ་མཚོན་འཕངས་ཏེ་ཉེས་མེད་མི་སེར་བསད་པ་དེར་ཨི་ཛི་རལ་དམག་ཁུལ་ཁང་གིས་ཞིབ་འཇུག་བྱེད་དགོས་པ་མ་ཟད། མཉམ་འབྲེལ་རྒྱལ་ཚོགས་ངོས་ནས་ཀྱང་རང་དབང་ཅན་གྱི་ཞིབ་འཇུག་ཚོགས་ཆུང་བཙུགས་ཏེ། གྷ་ཛ་ལུང་གཤོང་ནང་ཡོད་པའི་རྒྱལ་ཚོགས་ཀྱི་ས་ཁང་ཁོར་ཡུག་ནང་གོ་མཚོན་གསར་རྙེད་བྱུང་བ་དེ་ལའང་ཞིབ་འཇུག་བྱས་ཏེ་ཐག་གཅོད་ཐུབ་པ་བྱ་རྒྱུ་ཡིན།”ཞེས་གསུངས་འདུག

ཟླ་ ༧ ཚེས་ ༨ ཉིན་པ་ལི་སི་ཐན་ཧ་མ་སི་དྲག་སྤྱོད་ཤོག་ཁག་གིས་གྷ་ཛ་ལུང་གཤོང་ནས་ཨི་ཛི་རལ་ལ་མེ་ཤུགས་འཕུར་མདེལ་ ༡༠༠ ལྷག་འཕངས་ཏེ་གཏོར་རྒོལ་བྱེད་མགོ་བཙུགས་ཡོད་པ་ལྟར། ཨི་ཛི་རལ་གྱི་དམག་དཔུང་གིས་གནམ་ས་གཉིས་ནས་ཧ་མ་སི་དྲག་སྤྱོད་ཤོག་ཁག་གི་རྟེན་གཞི་ཁག་ལ་རྒོལ་ལན་སློག་སྟེ། པ་ལི་སི་ཐན་གྱི་མི་ ༢༣༠ ལྷག་བསད་པ་དང་མི་བརྒྱ་ཕྲག་མང་པོར་རྨས་སྐྱོན་བཟོས་པ་མ་ཟད། མང་ཚོགས་ཀྱི་སྡོད་ཁང་གཏོར་བཤིག་བཏང་བ་དང་། ཟླ་ ༧ ཚེས་ ༡༧ ཉིན་ཨི་ཛི་རལ་མཁའ་དམག་གིས་ཧ་མ་སི་དྲག་སྤྱོད་ཤོག་ཁག་གི་རྟེན་གཞི་ ༣༧ ལ་གཏོར་རྒོལ་དང་། ཧ་མ་སི་ཤོག་ཁག་གིས་ཨི་ཛི་རལ་ཕྱོགས་སུ་མེ་ཤུགས་འཕུར་མདེལ་ ༡༥ ཙམ་འཕངས་ཏེ་གཏོར་རྒོལ་ཤུགས་ཆེན་བྱས་ཡོད་སྟབས། ཨི་ཛི་རལ་གྱི་རྐང་དམག་དང་ལྕགས་འཁྲབ་འཁོར་ལོ། མེ་སྒྱོགས་དཔུང་སྡེ་བཅས་ཀྱིས་ས་ཐོག་ནས་པ་ལི་སི་ཐན་གྱི་རང་སྐྱོང་ས་ཁུལ་གྷ་ཛ་ལུང་གཤོང་ནང་དྲག་རྒོལ་བྱས་ཏེ། ཟླ་ ༧ ཚེས་ ༡༨ ཉིན་པ་ལི་སི་ཐན་པ་ ༢༣ དང་ཨི་ཛི་རལ་དམག་མི་ ༡ བཅས་རྐྱེན་ལམ་དུ་བཏང་ཡོད།

ཟླ་ ༨ ཚེས་ ༢༦ ཉིན་ཧ་མ་སི་དྲག་སྤྱོད་ཤོག་ཁག་དང་ཨི་ཛི་རལ་བར་གནས་སྐབས་རིང་དམག་མཚམས་འཇོག་ རྒྱུའི་གྲོས་མཐུན་བཞག་པའི་རྗེས་ལ་བསྐྱར་དུ་དམག་འཐབ་མགོ་འཛུགས་བྱས་པ་ནས་བཟུང་ད་བར་པ་ལི་སི་ཐན་གྱི་མི་སེར་ ༢༡༠༠ ལྷག་དང་། ཨི་ཛ་རལ་གྱི་ཡུལ་མི་ ༧༡ ལྷག་བསད་ཡོད་པ་མ་ཟད། དཀྱིལ་ཤར་ཡུལ་གྲུའི་དམག་འཁྲུག་འདི་མགོ་བཙུགས་པ་ནས་ད་བར་ཁྱོན་པ་ལི་སི་ཐན་གྱི་མི་ ༥༨༩༡ དང་། ཨི་ཛ་རལ་གྱི་ཡུལ་མི་ ༥༦༩ ལྷག་བསད་ཡོད་པ་མ་ཟད། ཡུལ་མི་འབུམ་ ༣ ལྷག་སྐྱབས་བཅོལ་འགྲོ་དགོས་བྱུང་ཞིང་། གཞན་ཡུལ་མི་ ༢༠༠༠ ལྷག་ལ་རྨས་སྐྱོན་ཕོག་ཡོད་འདུག

པ་ལི་སི་ཐན་མི་རིགས་ཀྱིས་ཨི་ཛི་རལ་གྱི་མངའ་འོག་ཏུ་ཡོད་པའི་ཇི་རུ་ས་ལམ་ (Jerusalem) གྱི་ཤར་ཕྱོགས་མངའ་ཁུལ་ (West Bank) དང་གྷ་ཛ་ལུང་གཤོང་གི་ས་ཁུལ་ཁག་ཅིག་བདག་བཟུང་བྱ་ཆེད་ཨི་ཛི་རལ་ལ་དམག་འཐབ་བྱས་ཡོད་པ་མ་ཟད། ༡༩༦༧ ལོ་ནས་བཟུང་པ་ལི་སི་ཐན་མི་རིགས་ཀྱིས་ཨི་ཛི་རལ་མངའ་འོག་གི་ཇི་རུ་ས་ལམ་ (Jerusalem)གྲོང་ཁྱེར་དེ་པ་ལི་སི་ཐན་གྱི་ཡིན་སྐོར་རྩོད་ལེན་དང་། ཨི་ཛི་རལ་གྱི་མི་རིགས་དག་ཕྱིར་འཐེན་བྱ་དགོས་པའི་དམག་འཐབ་བསྟུད་མར་བརྒྱབ་རྗེས། ༢༠༡༣ ལོར་མཉམ་འབྲེལ་རྒྱལ་ཚོགས་ཀྱིས་པ་ལི་སི་ཐན་རྒྱལ་ཚོགས་ཀྱི་ཚོགས་མིའི་རྒྱལ་ཁབ་ཨང་ ༡༣༤ པར་ངོས་འཛིན་བྱས་ཡོད། ཉེ་ལམ་གྷ་ཛ་ལུང་གཤོང་ནང་དམག་འཐབ་བྱེད་བཞིན་ཡོད་པ་དང་བསྟུན་ཏེ། ཁ་སང་པ་ལི་སི་ཐན་གྱི་རྒྱལ་ཚོགས་སྐུ་ཚབ་མན་སུར་ (Riyad Mansour) གྱིས་རྒྱལ་ཚོགས་ཀྱི་བདེ་འཇགས་ལྷན་ཚོགས་ཐོག་དེ་སྔོན་རྒྱལ་ཚོགས་ཀྱིས་པ་ལི་སི་ཐན་དང་ཨི་ཛ་རལ་བར་གྱི་དཀའ་རྙོག་དེ་ལོ་གཉིས་ནང་སེལ་རྒྱུའི་གྲོས་ཆོད་བཞག་ཡོད་ཀྱང་། ད་བར་རྒྱལ་ཚོགས་ཀྱིས་ཐག་གཅོད་དེ་ག་དུས་བྱེད་མིན་གསལ་བཤད་གང་ཡང་བྱས་མེད་སྐོར་བརྗོད་འདུག

གསར་འགོད་པ། དོན་གྲུབ།