ཉིན་གཉིས་གོང་ཨུ་རུ་སུའི་གསང་བའི་གནམ་གྲུ་ཞིག་ཨེ་སི་ཌོབ་ནི་ཡའི་བར་སྣང་བརྒལ་ནས་འཕུར་སྐྱོད་བྱས་པར་ནུབ་ཕྱོགས་མཉམ་འབྲེལ་དམག་དཔུང་གི་གནམ་དམག་གིས་རྗེས་འདེད་བཏང་ཡོད་འདུག
དེ་རིང་ཡུ་རོབ་ཤར་ཕྱོགས་ནང་རྟེན་གཞི་བྱས་པའི་ནུབ་ཕྱོགས་མཉམ་འབྲེལ་དམག་དཔུང་ (NATO) གིས། ཟླ་འདིའི་ཚེས་ ༢༡ ཉིན་ཨུ་སུ་རུའི་གསང་བའི་གནམ་གྲུ་(Ilyushin IL-20)ཞིག་ནུབ་ཕྱོགས་མཉམ་འབྲེལ་དམག་དཔུང་གི་འཐུས་མིའི་རྒྱལ་ཁབ་ཨེ་སི་ཌོབ་ནེ་ཡ་ (Estonia)ཡི་བར་སྣང་ནང་ནས་ཚུར་སྨི་ ༦༠༠ ལྷག་བརྒལ་ནས་འཕུར་སྐྱོད་བྱེད་སྐབས། ཌེན་མག་གི་འཐབ་འཁྲུག་གནམ་གྲུ་ (F-16) ཡིས་མཁའ་ལམ་བཀག་འགོག་གིས་རྗེས་འདེད་བྱས་ཏེ་ཡུ་རོབ་བྱང་ཕྱོགས་སུ་འཕུར་ཡོད་ཅིང་། དེ་ནས་སི་ཝེ་ཌིན་ (Sweden) གྱི་མཁའ་དམག་གིས་ཀྱང་རྗེས་འདེད་བཏང་སྟེ། ཆུ་ཚོད་བཞིའི་རྗེས་གསང་བའི་གནམ་གྲུ་དེ་ཡང་བསྐྱར་ཨེ་སི་ཌོབ་ནེ་ཡའི་བར་སྣང་ནས་ཚུར་ལོག་སྐབས་ཕོར་ཇུ་གྷལ་གནམ་གྲུས་རྗེས་འདེད་བཏང་སྟེ་ཕྱིར་སྐྲོད་བྱས་ཡོད་འདུག
གནས་ཚུལ་དེ་བྱུང་མ་ཐག་ཨེ་སི་ཌོབ་ནེ་ཡའི་གཞུང་གིས་ཨེ་སི་ཌོབ་ནེ་ཡའི་ནང་ཡོད་པའི་ཨུ་རུ་སུའི་གཞུང་ཚབ་ཆེན་མོ་སྐད་བཏང་སྟེ་གནད་དོན་དེའི་སྐོར་གླེང་སློང་བྱས་ཡོད་ཀྱང་། ཨུ་རུ་སུའི་ཕྱོགས་ནས་གནམ་གྲུ་དེ་གསང་བའི་གནམ་གྲུ་ཡིན་པར་ཁས་ལེན་བྱས་མེད་པ་མ་ཟད། ཨུ་རུ་སུའི་མཁའ་དམག་གིས་གནམ་གྲུ་འཕུར་སྐྱོད་ཀྱི་སྦྱོང་བརྡར་བྱེད་ཀྱི་ཡོད་པ་དེ་དག་གིས་ཨེ་སི་ཌོབ་ནེ་ཡའི་བར་སྣང་བརྒལ་མེད་ཚུལ་བརྗོད་ཡོད་འདུག
ཨུ་རུ་སུའི་བདེ་སྲུང་ལས་ཁུངས་ཀྱི་མགྲིན་ཚབ་པས་ཨུ་རུ་སུའི་གཞུང་འབྲེལ་མ་ཡིན་པའི་གསར་ཁང་ (Interfax News) གི་གསར་འགོད་པར། ཨུ་སུ་རུའི་གནམ་གྲུ་དེ་ (Ilyushin) ཨུ་རུ་སུའི་བྷེལ་ཌེ་ཁུ་ (Baltic) མཚོ་ཁུལ་གྱི་ཁཱ་ར་བུ་རོབ་བོ་ (Khrabrovo)གནམ་ཐང་ནས་འཕུར་ཏེ། རྒྱལ་ཁབ་སུ་ལའང་བདག་མེད་པའི་བྷེལ་ཌེ་ཁུ་མཚོ་ངོས་ཀྱི་བར་སྣང་ནས་འཕུར་སྐྱོད་བྱས་ཡོད་པས་རྒྱལ་སྤྱིའི་བར་སྣང་དབྱེ་མཚམས་ལས་བརྒལ་མེད་ཅེས་བརྗོད་ཡོད་འདུག
ཉེ་བའི་ཟླ་བདུན་རིང་ཡུའུ་ཁུ་རེན་ནང་དཀའ་རྙོག་བྱུང་བ་ནས་བཟུང་ཨུ་རུ་སུས་ཡུའུ་ཁུ་རེན་གྱི་རང་སྐྱོང་མངའ་སྡེ་ཁུ་རེ་མཱ་བཙན་བཟུང་བྱས་པ་དང་། སྣང་མེད་ཀྱི་རྣམ་པའི་ཐོག་ནས་ཡུའུ་ཁུ་རེན་གྱི་ས་མཚམས་ནང་ཡང་ཡང་བརྒལ་ཡོད་པ་དང་། ཐེངས་འདིའི་གནས་ཚུལ་དེར་ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་སྐྱོན་བརྗོད་བྱས་མེད་ཀྱང་། གནད་དོན་དབྱེ་ཞིབ་པ་ཚོས། ཨི་རག་དང་སེ་རི་ཡའི་ནང་ཡོད་པའི་ཁ་ཆེ་འཇིགས་སྐུལ་དྲག་སྤྱོད་ཚོགས་པ་རྩ་མེད་གཏོང་བར་ཨུ་རུ་སུ་དང་ཨ་རི་གཉིས་ཀྱིས་མཉམ་འབྲེལ་བྱེད་པར་མོས་མཐུན་བྱུང་ཡོད་སྟབས། ཐེངས་འདིར་སྐྱོན་བརྗོད་མ་བྱས་པ་ཡིན་པར་ཚོད་དཔག་བྱེད་ཀྱིན་འདུག
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
རྒྱལ་སྤྱིའི་གནས་ཚུལ་འགོད་སྟངས་འདི་རིགས་ཤིན་ཏུ་གལ་ཆེ་གི དེ་མིན་བོད་པའི་སྤྱི་ཚོགས་ནང་བོད་ཡིག་མ་གཏོགས་མི་ཤེས་མཁན་ཚོས། རྒྱལ་སྤྱིའི་གནས་ཚུལ་མཁྱེན་རྟོགས་མེད་ལ། དེ་ལས་ཀྱང་ཆབ་སྲིད་གནས་བབ་སོགས་ལ་གོ་རྟོགས་ཅུང་མེད་པས། གནས་དོན་འདིས་བོད་པའི་སྤྱི་ཚོགས་ཀྱི་གོ་རྟོགས་དང་གནད་དོན་དག་ལ་ཐད་གར་ཤུགས་རྐྱེན་ཡོང་གི་འདུག