འཛམ་གླིང་དངུལ་ཁང་གིས་ཉིས་སྟོང་བཅོ་ལྔ་ལོའི་ཚོང་ལས་གཉེར་ས་ཡག་ཤོས་ཀྱི་རྒྱལ་ཁབ་ཁག་གི་མིང་གཞུང་ཕྱིར་བསྒྲགས་བྱས་པའི་ནང་རྒྱ་ནག་ཨང་རིམ་ ༩༠ པ་དེ་ཆགས་འདུག
ཉེ་སྔོན་འཛམ་གླིང་དངུལ་ཁང་གིས་ཉིས་སྟོང་བཅོ་ལྔ་ལོའི་༼འཛམ་གླིང་ཚོང་ལས་ཁོར་ཡུག༽ ཅེས་པའི་དཔྱད་ཞིབ་སྙན་ཐོ་ཞིག་བཏོན་ཡོད་པ་དང་། སྙན་ཐོ་དེའི་ནང་འཛམ་གླིང་གི་རྒྱལ་ཁབ་ ༡༨༩ ཡི་གྲོང་ཁྱེར་ཁག་གི་ནང་ཁེ་ལས་གསར་འཛུགས་དང་བཟོ་སྐྲུན་ཆོག་མཆན། ས་ཁང་དང་དངུལ་དངོས་ཀྱི་བདག་དབང་ཐོ་འགོད། ཚོང་ལས་ཀྱི་གན་རྒྱ་ལག་བསྟར་བྱེད་ཕྱོགས་སོགས་ཚོང་ལས་ལ་ཐད་ཀར་ཤུགས་རྐྱེན་ཐེབས་པའི་སྒྲིག་ཁྲིམས་ ༡༠ ཡི་ཐོག་དཔྱད་ཞིབ་བྱས་ཏེ། ཉིས་སྟོང་བཅོ་ལྔ་ལོའི་འཛམ་གླིང་ཐོག་གི་ཚོང་ལས་གཉེར་ས་ཆེས་ཡག་ཤོས་ཀྱི་རྒྱལ་ཁབ་ ༡༠ ཡི་མིང་ཐོ་ཕྱིར་བསྒྲགས་བྱས་འདུག
སྙན་ཐོའི་ནང་ཉིས་སྟོང་བཅོ་ལྔ་ལོའི་ཚོང་ལས་གཉེར་ས་ཡག་ཤོས་ཀྱི་རྒྱལ་ཁབ་ ༡༠ ནི་སིང་གྷ་པོར་དང་ནེའུ་ཛི་ལན་ཌི། ཧོང་ཀོང་། འབར་མ། ལྷོ་ཀོ་རི་ཡ། ནོར་ཝེ། ཨ་རི། དབྱིན་ཇི། ཧྥེན་ལན་ཌི། ཨོ་སི་ཊོ་ལི་ཡ་བཅས་ཡིན་པ་དང་། རྒྱ་ནག་ཨང་རིམ་ ༩༠ པ་དེ་ཡིན་ལ། ན་ནིང་ལོའི་ཨང་རིམ་ ༩༣ པ་དང་བསྡུར་ན་ཅུང་ཡག་ཏུ་ཕྱིན་ཡོད་འདུག
འཆར་ལོའི་ཚོང་ལས་གཉེར་ས་ཡག་ཤོས་ཨང་དང་པོ་སིང་གྷ་པོར་ཡིན་པ་དང་། འདས་པའི་ལོ་ ༩ ནང་བསྟུན་མར་འཛམ་གླིང་ཐོག་ཚོང་ལས་གཉེར་ས་ཡག་ཤོས་ཨང་དང་པོ་ཆགས་ཡོད་པ་དང་། ད་སྐབས་ཧོང་ཀོང་ནང་རྒྱལ་སྤྱིའི་ཚོང་གཉེར་ཁང་ཁྲི་ ༢།༦ ཙམ་ཡོད་པ་མ་ཟད། འཛམ་གླིང་གི་ཚོང་གཉེར་ཁང་ཆེ་གྲས་མང་པོས་རྒྱལ་ཁབ་དེ་ཨེ་ཤ་ཡའི་ནང་གི་ཚོང་གཉེར་ལྟེ་བ་ཞིག་ཏུ་ངོས་འཛིན་བྱེད་ཀྱི་ཡོད་འདུག རྒྱལ་ཁབ་དེའི་ནང་ཁེ་ལས་འཛུགས་པར་ཁྱོན་ཉིན་ ༢ དང་ཕྱེད་ཀ་ལས་འགོར་གྱི་མེད་པ་དང་། ད་རེས་ཀྱི་རྒྱལ་ཁབ་ ༡༨༩ ཡི་དཔྱད་ཞིབ་མིང་ཐོའི་ཨང་རིམ་མཐའ་མ་དེ། ཨ་ཧྥེ་རི་ཁའི་རྒྱལ་ཁབ་ཨེ་རི་ཊི་(Eritrea)ནང་ཁེ་ལས་ཤིག་འཛུགས་པར་ཉིན་གྲངས་ ༨༤ དགོས་ཀྱི་ཡོད་འདུག
ཨང་རིམ་གཉིས་པ་ནེའུ་ཛི་ལན་ཌིའི་ནང་རྒྱལ་ཕྱི་ནང་གི་ཁེ་ལས་བ་ཚང་མར་འདྲ་མཉམ་གྱི་ངོས་འཛིན་ལྟར། ཁྲལ་དང་དངུལ་བུན་སོགས་ཀྱི་ཐོག་དབྱེ་འབྱེད་མེད་པའི་སྲིད་བྱུས་ལག་བསྟར་བྱེད་ཀྱི་ཡོད་པ་མ་ཟད། སྲིད་གཞུང་གིས་རྒྱལ་ནང་གི་ཚོང་ལས་སྒྲིག་གཞི་ལེགས་བཅོས་དང་ཚོད་འཛིན་རང་བཞིན་ཉུང་དུ་བཏང་སྟེ། བརྟན་བརླིང་ངང་དཔལ་འབྱོར་འཕེལ་རྒྱས་འགྲོ་བར་སྐུལ་འདེད་བྱེད་བཞིན་ཡོད་པ་དང་། དེ་དང་ཆབས་ཅིག་རྒྱལ་སྤྱིའི་ཐོག་ཚོང་འབྲེལ་འཛུགས་པ་དང་མ་རྐང་གཏོང་འཇོག་ཐད་ཡར་སྐུལ་བྱས་ཏེ། རྒྱལ་ནང་གི་ཁེ་ལས་བ་ཚོའི་ནུས་པ་མཐོར་འདེགས་སུ་གཏོང་བཞིན་ཡོད་འདུག
ཨང་རིམ་གསུམ་པ་ཧོང་ཀོང་ནང་ཁེ་ལས་འཛུགས་པར་དབུལ་ཕྱུག་གི་ཁྱད་པར་མེད་པར་ཁྲིམས་མཐུན་གྱི་འགྲོ་ལུགས་ཡོངས་རྫོགས་བསྒྲུབ་པར་ཉིན་ ༦ ཙམ་ལས་འགོར་གྱི་མེད་ལ། ཁེ་ལས་འཛུགས་པར་མ་རྩའི་ཚད་གཞི་དམའ་ཞིང་དཔྱ་ཁྲལ་ཆུང་བ་མ་ཟད། རྒྱལ་ཕྱི་ནང་དུ་ཁེ་ལས་གསར་འཛུགས་དང་མ་རྐང་གཏོང་འཇོག་བྱེད་པར་རང་དབང་ཆེན་པོ་ཡོད་འདུག
གསར་འགོད་པ། པདྨ་མཚོ།
སྤྱིར་རྒྱ་ནག་ཨང་རིམ་༩༠ ལས་བརླ་འདུག་པ་དེ་དངོས་ཡོད་མེད་མོད། གནས་ཚུལ་འདི་ལྟ་བུ་རྒྱང་གིས་བཙན་བྱོལ་བོ་མི་རྣམས་དང་མཛད་གཙོ་རྣམ་པས་རྒྱ་ནག་ལ་དོ་སྣང་ཆུང་ངུ་འགྲོ་བ་དང་སྣང་མེད་བྱེད་པའི་བསམ་བློར་སྔར་བས་ཤུགས་རྐྱེན་ངན་པ་འགྲོ་རྒྱུ་དང་། དེ་དང་བསྟུན་ནས་བོད་ནང་གི་བོད་མིའི་བསམ་བློར་ཡང་རྒྱ་ནག་ལ་སྣང་ཆུང་དང་ལྟ་སྟངས་ཞན་པའི་ཤུགས་རྐྱེན་ཏན་ཏན་སྤྲད་དང་སྤྲོད་བཞིན་སྤྲད་པར་འགྱུར་ངེས་སྙམ། བོད་ཕྱི་ནང་གཉིས་ནས་བོད་མི་ཚོས་རྒྱ་ནག་པ་ཆབ་སྲིད་ཀྱི་ལྟ་སྟངས་ཤིག་བཟུང་ནས་མི་དགའ་བ་དང་དོ་སྣང་མེད་པ། བསམ་གཟས་ནས་སྣང་མེད་ངང་བསྐྱུར་བ་དེས་གྱོང་ཁ་བོད་མི་རང་ལ་སྤྲད་པར་སྙམ།
བོད་མི་ཚོས་ད་དུང་འདི་ལྟར་བསམ་བློའི་ནང་དུ་རྒྱ་ནག་ནི་ཅང་མི་འཇོན་པ་དང་མི་བཟང་བ། འཛམ་གླིང་གི་རྒྱལ་ཁབ་གྲལ་རིམ་ནང་ཨང་ལོན་གི་མེད་པའི་གནས་ཚུལ་དག་བཙལ་འཚོལ་གྱིས་བརྒྱུད་སྒྲོག་བྱས་བསྡད་པ་བོད་མིས་རྒྱ་ནག་ལ་ལྟ་སྟངས་ཡང་དེ་མཚུངས་ཞན་པ་ནས་ནུས་མེད་དང་། མདོར་ན་རྒྱ་ནག་གི་སྐོར་ནས་ཅི་ཡང་མི་འཇོན་པ་དང་ཅི་ཡང་མེད་པ། ལྟ་སྲོལ་མེད་པ་ལྟ་བུ་ཞིག་ལས། རྒྱ་ནག་གི་ཡར་རྒྱས་དང་བོད་མི་རང་ཉིད་ནི་རྒུད་པ་ནས་རྒུད་པར་གྱུར་དང་འགྱུར་བཞིན་པའི་གནས་སྟངས་ལ་ཡར་རྒྱས་སྐུལ་འདེད་མེད་ཁར། བླུན་པ་ནས་བླུན་པོར་འགྱུར་རྒྱུར་ཅང་མི་འགོར་བར་སྙམ། ངས་བསམ་ན། ང་ཚོས་རྒྱ་ནག་གི་ཕྱོགས་ནས་ངན་ཕྱོགས་ཁོ་ན་འཚོལ་སྒྲུབ་ཀྱིས་བརྒྱུད་སྒྲོག་བྱེད་པ་ལས་རྒྱ་ནག་གི་ཡར་རྒྱས་དང་འབད་བརྩོན་སོགས་ལ་ཁ་ལྟ་མིག་དཔེར་ལེན་ཨེ་ཐུབ་ཀྱི་སློབ་གསོ་སྤྲོད་པ་དང་དེའི་ཕྱོགས་ནས་རང་ཉིད་ཡར་རྒྱས་གཏོང་ཐབས་ཤིག་འཚོལ་ཐབས་བྱས་ན་ལེགས་སྙམ།
བསམ་ཚུལ་ལ་འཁྲུལ་གཞི་མང་པ་ཡོད་ན་བཟོད་པར་གསོལ་ལོ།།