ཁ་སང་བོད་རང་སྐྱོང་ལྗོངས་ཀྱི་མགོ་ཁྲིད་ཀྱིས་༧གོང་ས་མཆོག་ལ་དད་གུས་ཞུ་མཁན་གྱི་བོད་རིགས་ལས་བྱེད་ཚོར་ཉེས་ཆད་ལྕི་མོ་གཅོག་རྒྱུ་ཡིན་སྐོར་བསྒྲགས་འདུག
ཟླ་འདིའི་ཚེས་ ༥ ཉིན་རྒྱ་ནག་གི་གཞུང་འབྲེལ་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་ཁྲིད་ཡེ་ཏུང་སུང་ (Ye Dongsong) གིས་གཞུང་འབྲེལ་བརྒྱུད་ལམ་ཁག་ཏུ་བོད་རང་སྐྱོང་ལྗོངས་ཀྱི་མགོ་ཁྲིད་ངོས་ནས་བོད་ཀྱི་བརྟན་ལྷིང་སྲུང་སྐྱོབ་དང་བོད་རྒྱ་ནག་ནས་ཁ་བྲལ་གཏོང་མཁན་ལ་རྒོལ་རྡུང་གཏོང་དགོས་སྐོར་བརྗོད་ཡོད་དང་། ཁ་སང་བོད་རང་སྐྱོང་ལྗོངས་ཀྱི་མགོ་ཁྲིད་ཁྲེན་ཆོན་གོ་ཡིས་༧གོང་ས་མཆོག་དང་བཙན་བྱོལ་བོད་མིའི་སྒྲིག་འཛུགས་ལ་དད་གུས་རྒྱབ་སྐྱོར་ཞུ་མཁན་གྱི་བོད་རིགས་ལས་བྱེད་དག་ལ་ཉེས་ཆད་ལྕི་མོ་གཅོད་རྒྱུ་ཡིན་སྐོར་བསྒྲགས་འདུག
རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་ཁྲིད་ཡེ་ཡུང་སུང་གིས་གཞུང་འབྲེལ་བརྒྱུད་ལམ་གོ་ལའི་དུས་བབ་ (Global Times) ཐོག་བརྗོད་དོན། “བོད་ནང་གི་ལས་བྱེད་མང་པོ་ཞིག་ལ་ལངས་ཕྱོགས་བརྟན་པོ་མེད་པ་མ་ཟད། གཞི་རིམ་ལས་བྱེད་མང་པོ་ཞིག་གིས་ལྐོག་ཟ་རུལ་སུངས་ཕོན་ཆེན་བྱས་ཡོད་སྟབས། འབྲེལ་ཡོད་མགོ་ཁྲིད་ཀྱིས་བོད་རྒྱ་ནག་ནས་ཁ་བྲལ་གཏོང་མཁན་ལ་རྡུང་རྡེག་དང་། ལྐོག་ཟ་རུལ་སུངས་རྩ་མེད་བཏང་སྟེ། བོད་ནང་བརྟན་ལྷིང་དང་དཔལ་འབྱོར་འཕེལ་རྒྱས་ཡོང་བ་བྱ་དགོས།” ཞེས་བརྗོད་འདུག
ཁ་སང་བོད་རང་སྐྱོང་ལྗོངས་ཀྱི་མགོ་ཁྲིད་ཁྲེན་ཆོན་གོ་ཡིས་བོད་ལྗོངས་ཉིན་རེའི་ཚགས་པར་སྟེང་། “ང་ཚོས་ལྐོག་ཟ་རུལ་སུངས་རྩ་མེད་བཟོ་རྒྱུར་སྔར་ལྷག་ཤུགས་སྣོན་རྒྱག་རྒྱུ་ཙམ་མ་ཟད། ཏཱ་ལའི་བླ་མ་སྐུ་ཕྲེང་ ༡༤ པ་དང་ཏཱ་ལའི་རུ་ཁག་ལ་རྒྱབ་སྐྱོར་བྱས་ཏེ་བོད་རྒྱ་ནག་ནས་ཁ་བྲལ་ལས་འགུལ་དང་བྱ་སྤྱོད་སྤེལ་མཁན་དག་ལ་ཁྲིམས་ལྟར་རྡུང་རྡེག་ཚ་ནན་གཏོང་རྒྱུ་ཡིན།” ཞེས་ལན་འདེབས་བྱས་འདུག
རྒྱ་གཞུང་གི་ལས་བྱེད་མང་པོ་ཞིག་གིས་ཆོས་ལུགས་ལ་དད་ཞེན་ཆེན་པོ་བྱེད་བཞིན་ཡོད་སྟབས། ཉེ་ལམ་རྒྱ་གཞུང་གིས་ཆོས་ལུགས་ལ་དད་པ་བྱེད་མི་ཆོག་པའི་བཀའ་རྒྱ་བཏང་ཡོད་པ་མ་ཟད། བོད་དང་ཤིན་ཅང་ཁུལ་དུ་དམ་དྲག་ཆེ་རུ་བཏང་སྟེ། འདི་ལོའི་ཟླ་ ༧ ཚེས་ ༡༣ ཉིན་ནས་བཟུང་རྒྱ་ནག་དབུས་སྒྲིག་ཁྲིམས་ལྷན་ཁང་གིས་ཞིབ་འཇུག་ཚོགས་ཆུང་ཞིག་ཆེད་གཏོང་བྱས་ཏེ། ལྐོག་ཟ་རུལ་སུངས་ལ་རྡུང་རྡེག་གཏོང་རྒྱུའི་སྲིད་ཇུས་ལག་བསྟར་དང་། རྒྱ་གཞུང་གི་ལས་བྱེད་ནང་ནས་ཆོས་ལུགས་བྱེ་བྲག་པར་དད་མོས་བྱེད་མཁན་ཚོར་སྟངས་འཛིན་བྱེད་ཆེད། བོད་དང་སི་ཁྲོན། ཅང་སུ། ཀྲེ་ཅང་། ཤིན་ཅང་སོགས་ས་ཁུལ་ཁག་ ༡༠ ནང་རྟོག་ཞིབ་ཚོགས་ཆུང་བཏང་ཡོད་པ་མ་ཟད། ཁ་སང་བོད་རང་སྐྱོང་ལྗོངས་ཀྱི་མགོ་ཁྲིད་ཀྱིས་༧གོང་ས་མཆོག་ལ་དད་གུས་རྒྱབ་སྐྱོར་བྱེད་མཁན་གྱི་བོད་རིགས་ལས་བྱེད་དག་ལ་ཉེས་ཆད་ལྕི་མོ་གཅོད་རྒྱུ་ཡིན་སྐོར་ཕྱིར་བསྒྲགས་བྱས་ཏེ། མ་འོངས་པར་བོད་ནང་ཆོས་དད་རང་དབང་ཐད་དམ་དྲག་ཆེ་རུ་གཏོང་རྒྱུ་ཡིན་པའི་ཉེན་བརྡ་བཏང་ཡོད་འདུག
རྒྱ་ནག་མི་རིགས་སློབ་གྲྭ་ཆེན་མོའི་དགེ་རྒན་ཞུང་ཀྲུང་ཤིན་ (Xiong Kunxin) གྱིས། “བོད་ནང་གི་ལས་བྱེད་མི་ཉུང་བ་ཞིག་གིས་ཏཱ་ལའི་བླ་མར་དད་གུས་རྒྱབ་སྐྱོར་བྱེད་ཀྱི་ཡོད་པ་དག་ནི་ཆོས་ལུགས་དབང་གི་ཡིན་སྟབས། གལ་ཏེ་ཁོ་ཚོས་མུ་མཐུད་ཆོས་ལུགས་རྗེས་སུ་འབྲང་ཚེ་ཧན་མི་རིགས་ཚོ་བོད་ནས་ཕྱིར་འཕུད་གཏང་སྲིད་སྟབས། ང་ཚོ་དང་གཞུང་ངོས་ནས་ཏཱ་ལའི་བླ་མར་དད་གུས་བྱེད་མཁན་གྱི་བོད་རིགས་ལས་བྱེད་ཚོར་བཟོད་སྒོམ་བྱ་ཐབས་མེད།” ཅེས་བརྗོད་འདུག
༡༩༥༩ ལོར་རྒྱ་གཞུང་གིས་བོད་ས་ཡོངས་རྗོགས་བཙན་བཟུང་བྱས་རྗེས། བོད་ནང་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། ཆོས་དད་རང་དབང་སོགས་ལ་དམ་དྲག་ཤུགས་ཆེ་བྱས་དང་བྱེད་མུས་ཡིན་སྟབས། གཞིས་ལུས་རྒྱ་ཆེའི་མི་མང་ཚོ་རྒྱ་གཞུང་འོག་སྡོད་ཐབས་བྲལ་ཏེ། ༡༩༨༧ དང་ ༡༩༨༨ ལོ་དང་། ༢༠༠༨ ལོ་བཅས་ནང་རྒྱ་གཞུང་གིས་བོད་ཐོག་འཛིན་པའི་སྲིད་ཇུས་ལ་ངོ་རྒོལ་ལས་འགུལ་སྤེལ་ཡོད་སྟབས། ༢༠༠༨ ལོའི་རྗེས་རྒྱ་གཞུང་གིས་བོད་ནང་དམ་དྲག་ཆེ་རུ་བཏང་སྟེ། བོད་མི་ཚོས་ ༧གོང་ས་མཆོག་གི་སྐུ་པར་སྒྲིག་གཤོམ་བྱེད་མི་ཆོག་པ་བཟོས་ཡོད་པ་མ་ཟད། དགོན་པ་ཁག་ལ་དགེ་བཙུན་གྱི་གྲངས་འབོར་གཏན་འབེབས་དང་། བོད་ནང་བོད་ཡིག་བཀོལ་སྤྱོད་ཀྱི་སྡིངས་ཆ་ཇེ་ཉུང་དུ་བཏང་བ་སོགས་བྱས་ཏེ་བོད་མི་ཚོར་ཁོང་ཁྲོ་ཆེན་པོ་བསླངས་ཡོད་སྟབས། ༢༠༠༩ ལོ་ནས་བཟུང་ད་བར་བོད་མི་ ༡༣༢ ལྷག་གིས་རང་ལུས་མེར་སྲེག་གནང་སྟེ། རྒྱ་གཞུང་གིས་འཛིན་པའི་བོད་ཐོག་སྲིད་ཇུས་ལ་ངོ་རྒོལ་བྱས་ཡོད།
འགྲོ་བ་མིའི་ཐོབ་ཐང་རྩོད་ལེན་པ་ཚོས། རྒྱ་གཞུང་གིས་བོད་ནང་ཆོས་དད་རང་དབང་ལ་དམ་དྲག་ཆེ་རུ་བཏང་སྟེ། བོད་ནང་༧གོང་ས་མཆོག་གི་སྐུ་པར་སྒྲིག་གཤོམ་བྱེད་མི་ཆོག་པ་བཟོས་པ་མ་ཟད། ད་ལྟ་བོད་རིགས་ལས་བྱེད་ཚོར་ཞིབ་བཤེར་བྱེད་བཞིན་ཡོད་སྟབས། མ་འོངས་པར་བོད་ནང་ཆོས་དད་རང་དབང་དང་རིག་གཞུང་སྲུང་སྐྱོབ་ཐད་སྔར་ལྷག་དམ་དྲག་ཆེ་རུ་འགྲོ་སྲིད་པའི་ཚོད་དཔག་བྱེད་ཀྱིན་ཡོད་འདུག
གསར་འགོད་པ། དོན་གྲུབ།
ཡང་རྒྱ་དམར་གྱིས་ཏཱ་ལ་བླར་དད་ཚུལ་ལ་ཁག་ཀྲིས་ཀྱིས་བོད་ནང་གི་བོད་པ་ཁག་ཅིག་་པསྡུག་གསོད་ཀྱི་འཕྲོ་བརླག་་གཏོང་པ་ཐད་ཆོད།
།
བཙན་བྱོལ་བ་མང་པོས་ཞི་ཅིན་ཕིན་ལ་རེ་བ་བརྒྱབ་་་་
བོད་རེ་བས་ཕོངས་ཟེར་པ་་་་་་བདེན་པ་ལས་ཀྱང་བདེན་ནོ་
གུང་ཇག་གི་ལས་སྟངས་འདིར་བལྟས་ན་སྦོམ་འདོག་ཤོར་བའི་གནས་ཚུལ་ཞིག་དང་། དམ་ཚིག་ལ་རྒྱ་གཅིག་ཏུ་སྒྲིལ་བའི་ཁ་བ་གངས་ཅན་གྱི་མི་རྣམས་རྒྱ་ནག་གཞུང་གི་གདུག་རྩུབ་དྲག་མནོན་དང་བསླུ་བྲིད་གང་གིས་ཀྱང་བསྒྱུར་བཅོས་མ་ཐེབས་པར་གནས་པ་འདི་ལས་ལྷག་པའི་རྒྱལ་ཁ་ཞིག་གང་ན་ཡོད། ཁྱི་སྨྱོན་ལྟ་བུའི་གུང་ཇག་གིས་གང་སར་རྨུག་ཀྱང་རང་རེའི་བོད་གངས་ཅན་པ་རྣམས་ཀྱིས་འཛམ་གླིང་ཞི་བདེའི་དེད་དཔོན་༧གོང་ས་རྒྱལ་བའི་དབང་བོ་ཐམས་ཅད་མཁྱེན་པ་མཆོག་གིས་ཐུགས་རེ་འཚེ་མེད་ཞི་བའི་ལྟ་གྲུབ་དང་རྒྱ་བོད་གཉིས་སྨན་དབུ་མའི་ལམ་ལ་ཤར་བསྐྱོད་ཀྱིས་གངས་ཅན་བོད་མིའི་གཅེས་ནོར་ཆོས་རིག་ཡུལ་སྲོལ་ཡུན་གནས་ཡོང་བའི་འབད་བརྩོན་གྱིས་གཞིས་བྱེས་ལྷན་འཛོམས་ཡོང་བར་ཤུགས་སྣོན་རྒྱག་རྒྱུ་གལ་ཆེ་ཞིང་། དེ་ལྟ་བུའི་གཅེས་ནོར་བདག་གཅེས་བྱེད་པ་ལ་རང་རེའི་སྐད་དང་ཡི་གེ་གཉིས་འབད་འབུངས་བླ་ལྷག་ཏུ་བྱ་དགོས་པའི་དྲན་སྐུལ་དུ་སྨྲས་པ་སྤུན
ཟླ་ཕོ་མོ་ཚང་མའི་ཐུགས་ལ་འཛིན་རྒྱུ་རེ་བ་ཡིན།
གུང་ཇག་གི་ལས་སྟངས་འདིར་བལྟས་ན་སྦོམ་འདོག་ཤོར་བའི་གནས་ཚུལ་ཞིག་དང་། དམ་ཚིག་ལ་རྒྱ་གཅིག་ཏུ་སྒྲིལ་བའི་ཁ་བ་གངས་ཅན་གྱི་མི་རྣམས་རྒྱ་ནག་གཞུང་གི་གདུག་རྩུབ་དྲག་མནོན་དང་བསླུ་བྲིད་གང་གིས་ཀྱང་བསྒྱུར་བཅོས་མ་ཐེབས་པར་གནས་པ་འདི་ལས་ལྷག་པའི་རྒྱལ་ཁ་ཞིག་གང་ན་ཡོད། ཁྱི་སྨྱོན་ལྟ་བུའི་གུང་ཇག་གིས་གང་སར་རྨུག་ཀྱང་རང་རེའི་བོད་གངས་ཅན་པ་རྣམས་ཀྱིས་འཛམ་གླིང་ཞི་བདེའི་དེད་དཔོན་༧གོང་ས་རྒྱལ་བའི་དབང་བོ་ཐམས་ཅད་མཁྱེན་པ་མཆོག་གིས་ཐུགས་རེ་འཚེ་མེད་ཞི་བའི་ལྟ་གྲུབ་དང་རྒྱ་བོད་གཉིས་སྨན་དབུ་མའི་ལམ་ལ་ཤར་བསྐྱོད་ཀྱིས་གངས་ཅན་བོད་མིའི་གཅེས་ནོར་ཆོས་རིག་ཡུལ་སྲོལ་ཡུན་གནས་ཡོང་བའི་འབད་བརྩོན་གྱིས་གཞིས་བྱེས་ལྷན་འཛོམས་ཡོང་བར་ཤུགས་སྣོན་རྒྱག་རྒྱུ་གལ་ཆེ་ཞིང་། དེ་ལྟ་བུའི་གཅེས་ནོར་བདག་གཅེས་བྱེད་པ་ལ་རང་རེའི་སྐད་དང་ཡི་གེ་གཉིས་འབད་འབུངས་བླ་ལྷག་ཏུ་བྱ་དགོས་པའི་དྲན་སྐུལ་དུ་སྨྲས་པ་སྤུན
ཟླ་ཕོ་མོ་ཚང་མའི་ཐུགས་ལ་འཛིན་རྒྱུ་རེ་བ་ཡིན།
བོད་པ་ཚོས་ཞིས་ལ་དད་བྱེད་སོང་ཀྱང་ཕན་ཐོག་མེད་