ཁ་སང་ཝཱར་ཎ་མཐོ་སློབ་ཏུ་ཁྲི་ཟུར་ཟམ་གདོང་རིན་པོ་ཆེ་མཆོག་གི་འཁྲུངས་སྐར་སྲུང་གཙི་གནང་བའི་ཐོག་༧གོང་ས་མཆོག་གིས་གསུང་འཕྲིན་ཕེབས་པའི་ནང་། རིན་པོ་ཆེ་མཆོག་གིས་བཙན་བྱོལ་བོད་མིའི་ཤེས་ཡོན་དང་ཆབ་སྲིད་སྤྱི་ཚོགས་གང་ཐད་དུ་སྐུ་ངལ་མང་པོ་བསྐྱོད་ཡོད་པ་དང་། མི་ལོ་ལྔ་བཅུ་བརྒལ་བའི་རིང་འདོད་ཆུང་ཆོག་ཤེས་ལྷག་བསམ་རྣམ་དག་ངང་གཉན་འཕྲང་གི་དུས་སྐབས་འདིར་བྱས་རྗེས་ཆེན་པོ་བྱུང་ཡོད་ཅེས་སོགས་འཁོད་འདུག
འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཁ་སང་ཚེས་ ༥ ཉིན་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ། སློབ་གཉེར་ཁང་གི་སློབ་ཟུར་བ་ཡོངས་ཀྱི་གོ་སྒྲིག་འོག སློབ་གྲྭ་དེ་ཉིད་ཀྱི་སློབ་སྤྱི་ཟུར་བ་བཀའ་བློན་ཁྲི་ཟུར་བ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དགུང་གྲངས་ ༧༥ ལ་ཕེབས་པའི་འཁྲུངས་སྐར་སྲུང་གཙི་གནང་ཡོད་ཅིང་། ཞོགས་པར་སློབ་གྲྭའི་དུས་འཁོར་ཐང་ཆེན་དུ་བསང་གསོལ་བཏང་རྗེས། ཟམ་གདོང་རིན་པོ་ཆེ་མཆོག་གིས་སློབ་གྲྭའི་སློབ་ཟུར་རྣམས་དང་། དགེ་ལས་སློབ་ཕྲུག་སེར་སྐྱ་མི་མང་ ༡༠༠༠ ལྷག་ལ་བློ་སྦྱོང་ཚིག་བརྒྱད་མའི་བཀའ་ཁྲིད་གནང་ཡོད་འདུག
ཉིན་རྒྱབ་ཆུ་ཚོད་ ༣ པའི་ཐོག་སློབ་གྲྭའི་ཨ་ཏི་ཤཱ་ཚོམས་ཆེན་དུ་མཛད་སྒོ་དངོས་གཞི་ཚོགས་ཡོད་ཅིང་། མཛད་སྒོའི་ཐོག་སྐུ་མགྲོན་གཙོ་བོ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དབུ་བཞུགས་འོག ཝ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིག་བདག་དགེ་བཤེས་ངག་དབང་བསམ་གཏན་མཆོག་དང་། རིན་པོ་ཆེ་མཆོག་དང་ཡུན་རིང་ཐུགས་འདྲིས་ཆེ་བའི་གྲོགས་པོ་རྒྱ་གར་གྱི་གྲགས་ཅན་མཁས་དབང་ཀིར་ཞི་ན་མི་ཏི(Kirashnanath)གཙོས་རྒྱ་གར་གྱི་མཁས་དབང་གཞན་ལྔ། བཀའ་ཟུར་དང་བོད་མི་མང་སྤྱི་འཐུས་ཐུབ་བསྟན་ལུང་རིག་ལགས་དང་ཚོགས་ཟུར་པདྨ་འབྱུང་གནས་རྣམ་གཉིས་གཙོ་བྱས་ཏེ། སློབ་ཟུར་རྣམས་དང་དགེ་ལས་སློབ་ཕྲུག་ཡོངས། ཟབ་སྦྱོང་དུ་ཕེབས་ཡོད་པའི་བྷན་ཐར་དགེ་འོས་སློབ་གྲྭའི་དགེ་ལས་སློབ་མ། དྷ་ས་ནས་འཁྲུངས་སྐར་ལ་ཆེད་བཅར་ཞུས་པའི་རྒྱུད་སྟོད་གྲྭ་ཚང་གི་སྐུ་ཚབ་དང་ལྷ་སྤྱི་ཚོགས་ཞབས་ཞུ་ཁང་གི་འགན་འཛིན་དང་མི་མང་བཅས་ཁྱོན་མི་ ༢༠༠༠ ལྷག་འཛོམས་ཡོད་འདུག
མཛད་སྒོའི་ཐོག་མར་ཟམ་གདོང་རིན་པོ་ཆེ་མཆོག་གིས་སྣང་སེལ་མར་མེ་ཞལ་འབྱེད་གྲུབ་མཚམས། བོད་མི་མང་སྤྱི་འཐུས་ཐུབ་བསྟན་ལུང་རིགས་ལགས་ཀྱིས་༸གོང་ས་མཆོག་གིས་བསྩལ་བའི་གསུང་འཕྲིན་སྒྲོག་སྦྱང་གནང་བའི་འཁོད་དོན། འབྲས་བློ་གླིང་མཁས་དབང་ཟམ་གདོང་རིན་པོ་ཆེ་དགུང་གྲངས་དོན་ལྔར་སོན་པའི་སྐྱེས་སྐར་ལ་ཝཱ་ར་ཎ་སི་དབུས་བོད་ཀྱི་གཙུག་ལག་སློབ་གཉེར་ཁང་གི་སློབ་ཐོན་པ་ཡོངས་ནས་དཀའ་དྲིན་རྗེས་དྲན་ཆེད་མངོན་བསྟོད་ཀྱི་དུས་དྲན་སྲུང་བརྩི་དང་འབྲེལ། གཙུག་ལག་སློབ་གཉེར་ཁང་གི་བྱུང་རིམ་ལོ་རྒྱུས་འཁོད་པའི་དྲན་རྟེན་གླེགས་བམ་ཞིག་འདོན་སྤེལ་བགྱིས་པར་ཡི་རང་བསྔགས་བརྗོད་དང་བཀྲ་ཤིས་བདེ་ལེགས་ཡོད།
རང་རེ་བཙན་བྱོལ་དུ་འབྱོར་རྗེས་ན་གཞོན་རྣམས་ལ་ཤེས་ཡོན་སློབ་སྦྱོང་དགོས་གལ་ཛ་དྲག་ཏུ་མཐོང་སྟེ། འདི་ནས་བཀོད་མངགས་བགྱིས་པ་ལྟར། རིན་པོ་ཆེ་ཉིད་ཤེས་ཡོན་སློབ་སྦྱོང་སྡེ་ཚན་ཁག་ཏུ་ལྷག་བསམ་སྙིང་སྟོབས་ཆེན་པོས་རྐང་འགན་བཞེས་པའི་མཛད་རྗེས་ཝཱ་ཎ་ཡི་ལོ་རྒྱུས་གླེགས་བམ་ནང་འཁོད་ཡོད་པ་ལྟར་དང་། དེ་བཞིན་མང་གཙོའི་ལམ་སྲོལ་དུས་བསྟུན་འཕེལ་རྒྱས་ཆེད་ལམ་དུ་བཀྲི་ཕྱིར་ངོས་ནས་ཐད་བསྐོས་སྤྱི་འཐུས་བསྐོ་བཞག་བགྱིས་པ་དང་ལེན་གྱིས་སྤྱི་འཐུས་སྐབས་བཅུ་གཅིག་པ་ནས་བཟུང་། སྐབས་གཉིས་ཀྱི་ཚོགས་གཙོ་ཡི་འགན་འཁུར་རིང་ཁྲིམས་སྒྲིག་ཡིག་ཆ་མང་པོ་གཏན་འབེབས་ཀྱིས་ཁྲིམས་ཀྱི་དབང་བསྒྱུར་ཚད་ལྡན་དང་། དེ་རྗེས་བཀའ་ཤག་སྐབས་བཅུ་གཉིས་པའི་བཀའ་བློན་ཁྲི་པ་བཙན་བྱོལ་བོད་མིའི་མང་ཚོགས་ནས་ཐད་ཀར་འོས་འདེམས་ཀྱིས་མང་མོས་ཐོབ་སྟེ། དེ་ནས་སྐབས་གཉིས་རིང་ཆབ་སྲིད་ཀྱི་འགན་དབང་གང་ཅིར་འཐུས་ཤོར་མེད་པར་མདུན་བསྐྱོད་བྱེད་ཐུབ་པ་བྱུང་ཞིང་། མི་ལོ་ལྔ་བཅུ་བརྒལ་བའི་རིང་འདོད་ཆུང་ཆོག་ཤེས་ལྷག་བསམ་རྣམ་དག་ངང་གཉན་འཕྲང་གི་དུས་སྐབས་འདིར་བྱས་རྗེས་ཆེན་པོ་བྱུང་ཡོད། ཅེས་སོགས་འཁོད་འདུག
དེའི་རྗེས་སྐུ་མགྲོན་གཙོ་བོ་ (Kirashnanath) མཆོག་གཙོས་སྐུ་མགྲོན་རྒྱ་གར་གྱི་མཁས་དབང་རྣམ་པས་རིན་པོ་ཆེ་མཆོག་གི་འགྲན་ཟླ་བྲལ་བའི་མཁྱེན་དཔྱོད་དང་། འདོད་ཆུང་ཆོག་ཤེས། ཚུལ་ཁྲིམས་ཀྱི་བསླབ་པ་མིག་འབྲས་བཞིན་སྲུང་བའི་གནས་བརྟན་འདུལ་བ་འཛིན་པ་ཆེན་པོ་ནང་པ་ཡོངས་ཀྱི་གཙུག་ནོར། བོད་མི་རིགས་ཀྱི་སྤོབས་པ་དང་ངོམས་སོ་བྱེད་འོས་པའི་མཁས་དབང་བཅས་ཡིན་ཚུལ་སོགས་ཀྱི་བསྔགས་བརྗོད་མཛད་ཅིང་། ཟམ་གདོང་རིན་པོ་ཆེ་མཆོག་གིས་ཝཱར་ཎའི་སློབ་ཟུར་ཡོངས་ནས་༼དྲན་རྟེན་གླེགས་བམ་༽ཞེས་པ་ཚོན་ལྡན་བརྙན་དེབ་དབུ་འབྱེད་གནང་ཡོད་འདུག དེའི་རྗེས་ཚོགས་ཟུར་པདྨ་འབྱུང་གནས་ལགས་དང་གོ་སྒྲིག་ཚོགས་ཆུང་གི་ཚོགས་གཙོ་སྤེན་པ་རྡོ་རྗེ་ལགས་གཉིས་ཀྱིས་སློབ་ཟུར་རྣམས་ཀྱིས་ཕུལ་བའི་མངོན་བསྟོད་ཡི་གེ་དང་། བོད་ཕྱི་ནང་གི་མཁས་དབང་དང་རྩོམ་པ་པོ་མང་པོས་ཤིས་ཚིག་བསྐུར་བ་རྣམས་སྒྲོགས་སྦྱང་གནང་། དེའི་རྗེས་རྒྱུད་སྟོད་གྲྭ་ཚང་དང་ཕ་སྐད་གཙང་མའི་ཚོགས་པ་བཅས་ཀྱིས་ཚེ་ལྷ་རྣམ་གསུམ་གྱི་ཞལ་ཐང་སོགས་རྟེན་གསུམ་འབུལ་འདེགས་འབུལ་ཞུས་སོང་།
དགོང་མོའི་ཆུ་ཚོད་ ༦།༣༠ ཝཱར་ཎ་སློབ་གཉེར་ཁང་གི་ཉེ་བའི་རིག་བདག་དགེ་བཤེས་བྱམས་པ་བསམ་གཏན་མཆོག་གིས་དཔེ་དེབ་དང་། ཟམ་གདོང་རིན་པོ་ཆེའི་བཀའ་རྩོམ་དང་གཏམ་བཤད་སོགས་སྡེ་ཚན་སྣ་མང་འདུ་བའི་དྲ་རྒྱ་ www.samdhongrinpoche.com ཨིན་བོད་གཉིས་ལྡན་ཅན་ཞིག་དབུ་འབྱེད་གནང་།
སྐབས་དེར་ལྷ་སྤྱི་ཚོགས་ཞབས་ཞུ་ཁང་གི་འགན་འཛིན་ངག་དབང་རབ་རྒྱས་ལགས་ཀྱིས་མངོན་བསྟོད་གླེགས་བམ་དང་དྲ་རྒྱ་གསར་བཟོའི་རྒྱུ་མཚན་སོགས་ངོ་སྤྲོད་གནང་གྲུབ་མཚམས། བོད་དང་འབྲུག ལ་དྭགས། བལ་ཡུལ། རྒྱ་གར་བཅས་ཀྱི་གཞས་སྣ་འཁྲབ་སྟོན་གནང་སོང་།
ཐེངས་འདིར་དབུ་འབྱེད་བྱས་པའི་༼ དྲན་རྟེན་གླེགས་བམ།༽ཞེས་པའི་དཔེ་དེབ་དེར་ལེའུ་གསུམ་དང་ཤོག་ངོས་ ༦༤ འདུག་ཅིང་། དེའི་ནང་སྐྱེས་ཆེན་ཁག་གིས་མཛད་པའི་ཟམ་གདོང་རིན་པོ་ཆེ་མཆོག་གི་ཞབས་བརྟན་གསོལ་འདེབས་དང་། རིན་པོ་ཆེ་མཆོག་གིས་གཙུག་ལག་སློབ་གཉེར་ཁང་གི་ཡར་རྒྱས་ཀྱི་ལམ་དུ་འཁྲིད་གནང་མཛད་པའི་བྱུང་རིམ་པར་རིས་དང་འགྲེལ་བཤད་སྦྲགས་མ། སློབ་གཉེར་ཁང་ནས་ཐོན་པའི་སློབ་ཟུར་ཁག་གིས་བོད་ཀྱི་ཆོས་རིག་སྲི་ཞུ་ཇི་ལྟར་སྒྲུབ་ཡོད་མེད་པར་རིས་དང་ལོ་རྒྱུས་སྙིང་བསྡུས་བཅས་འཁོད་ཡོད་པ་བཅས་ཀྱི་གནས་ཚུལ་སྐོར་ས་གནས་ནས་བློ་བཟང་ཆོས་འབྱོར་ལགས་ནས་བཏང་འབྱོར་བྱུང་།
