ད་ལྟའི་བོད་སྐད་ཡིག་གི་ཉེན་ཁ་གཉིས་ངོས་ཟིན་པ་བྱོས།

དེ་རིང་ཤེས་རབ་དགའ་ཚལ་སློབ་གླིང་གི་ཐ་སྙད་གསར་པའི་འགྲན་ཚོགས་མཇུག་བསྡོམས་ཐོག ཤེས་རིག་དྲུང་ཆེ་ལགས་ཀྱིས་ད་ལྟའི་བོད་སྐད་ཡིག་གི་ཕྱི་ནང་ཉེན་ཁ་གཉིས་ངོས་ཟིན་རྒྱུ་གལ་ཆེན་པོ་ཡིན་སྐོར་གསུངས་སོང་།

དེ་རིང་ཤེས་རབ་དགའ་ཚལ་སློབ་གླིང་གི་ཐ་སྙད་གསར་པའི་འགྲན་ཚོགས་ཀྱི་ཉིན་གཉིས་པར། བོད་མིའི་སློབ་གྲྭ་དང་དགོན་སྡེ་ཁག་ནས་ཡོང་བའི་འགྲན་ཞུགས་རུ་ཁག་ ༡༦ བར་ནམ་རྒྱུན་འཚོ་བའི་ཁྲོད་བཀོལ་སྤྱོད་ཆེ་བའི་ཅ་དངོས་གསར་པའི་བརྡ་ཆད་ངོས་འཛིན་དང་ནོར་བཅོས་སོགས་ཀྱི་འགྲན་སྡུར་གནང་སོང་བ་དང་། དེ་དང་ལྷན་དུ་སློབ་གྲྭའི་གཞས་པ་གཞས་མ་ཁག་ཅིག་གིས་གཞས་དང་རྡུང་ལེན་བྱས་སོང་། སྐུ་མགྲོན་གཙོ་བོ་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་ཀྱིས་སློབ་བུ་ཚུལ་ཁྲིམས་འབྱུང་གནས་ཀྱིས་བརྩམས་པའི་སྙན་དེབ་༼འབར༽ཞེས་པ་ཞིག་དབུ་འབྱེད་བཅས་གནང་སོང་།

ཉིན་རྒྱབ་ཏུ་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་ཀྱིས། ཐེངས་གཉིས་པའི་ཐ་སྙད་གསར་པའི་འགྲན་ཚོགས་ཐོག ཨང་དང་པོ་ཐོབ་མཁན་མེས་དབོན་གཙུག་ལག་དཔེ་སྟོན་སློབ་གྲྭའི་རུ་ཁག་ལ་ཧིན་སྒོར་ ༣༠༠༠༠ དང་། ཨང་གཉིས་པ་སྨན་རྩིས་ཁང་མཐོ་སློབ་ལ་སྒོར་ ༢༠༠༠༠། ཨང་གསུམ་པ་སཱ་ར་མཐོ་སློབ་ལ་ཧིན་སྒོར་ ༡༢༠༠༠། ཨང་བཞི་པ་སྤོན་ཊ་སཾ་བྷི་ཊ་གཏན་སློབ་ལ་སྒོར་ ༨༠༠༠ བཅས་གནང་སོང་བ་དང་། དེ་རྗེས་སློབ་སྤྱི་ཚེ་རིང་གཡུ་སྒྲོན་ལགས་ཀྱིས་འགྲན་ཞུགས་པ་ཡོངས་ལ་སྒོར་ ༣༠༠༠ དང་བོད་ཀྱི་བརྡ་ཆད་གསར་པའི་དཔེ་དེབ་གཉིས་རེའི་བྱ་དགའ་གནང་སོང་། དེ་ནས་དགེ་ཆེ་ཟླ་བ་ཚེ་རིང་ལགས་ཀྱིས་འགྲན་ཞུགས་པ་ཚོར་སློབ་སྟོན་གནང་མཁན་གྱི་ཆེད་བཅར་དགེ་རྒན་རྣམས་ལ་ལེགས་སྐྱེས་བཅས་གནང་སོང་།

མཇུག་བསྡོམས་ཐོག་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་ཀྱིས། འགྲན་སྡུར་ནང་ཞུགས་མཁན་ཚང་མས་ཐ་སྙད་གསར་པའི་ཐོག་ལ་དོ་སྣང་ཞེ་དྲགས་གནང་འདུག་པས་ཚོར་བ་ཆེན་པོ་བྱུང་ལ། ཐུགས་རྗེ་ཆེ་ཞེས་ཞུ་འདོད་བྱུང་། ཡིན་ནའང་། ཐ་སྙད་དེ་ཚོ་འགྲན་སྡུར་སྐབས་ཞེ་དྲགས་སྦྱངས་ཏེ་སྐབས་དེར་སྐྱོར་རྒྱུ་ཡོད་པ་ཙམ་མ་གཏོགས་དུས་རྒྱུན་བེད་སྤྱོད་མ་བྱས་པ་ཡིན་ན། ང་ཚོས་དགོས་པ་དང་དགེ་མཚན་ཞེ་དྲགས་ཤིག་བསྒྲུབས་ཐུབ་ཡོད་པ་མ་རེད་བསམ་གྱི་འདུག དེའི་ཕྱིར་དེ་རིང་འདིར་ཐུགས་སྣང་གནང་སྟེ་འགྲན་སྡུར་ལ་ཕེབས་པ་ལྟར་རྒྱུན་དུ་ང་ཚོའི་ཐ་སྙད་དེ་ཚོ་བེད་སྤྱོད་བྱེད་དགོས་པ་དེ་ཞེ་དྲགས་གནད་འགག་ཆེན་པོ་རེད་འདུག ཅེས་གསུངས་སོང་།

ད་ལྟའི་བོད་སྐད་ཡིག་གི་ཉེན་ཁའི་སྐོར་ལ་ཁོང་གིས། ང་རང་གི་ངོས་ནས་བོད་སྐད་ཡིག་ཐོག་ཉེན་ཁ་ཕྱོགས་གཉིས་ནས་མཐོང་གི་འདུག གཅིག་ཕྱི་ཕྱོགས་ཀྱི་ཉེན་ཁ་དང་གཅིག་ནང་གི་ཉེན་ཁ་རེད། ཉེན་ཁ་འདི་གཉིས་ང་ཚོ་ཚང་མས་ངོས་ཟིན་དགོས་ཀྱི་འདུག ཕྱི་ཕྱོགས་ཀྱི་ཉེན་ཁ་ནི་དཔེར་ན་བོད་ནང་ལ་ཆ་བཞག་ན། རྒྱ་ནག་གཞུང་གིས་བོད་ཀྱི་སྐད་ཡིག་བེད་སྤྱོད་དང་སྲུང་སྐྱོབ་སོགས་ཀྱི་ཐོག་ལ་སྲིད་བྱུས་ག་འདྲ་ཞིག་འཛིན་གྱི་ཡོད་པ་རེད། དེ་ཚོ་ལ་ང་ཚོས་དགོངས་པ་གཅིག་བཞེས་དགོས་ཀྱི་འདུག དེ་བཞིན་ང་ཚོ་བཙན་བྱོལ་བོད་མི་ཉུང་ཉུང་དེ་རྒྱ་གར་དང་ཕྱི་རྒྱལ་ཁག་གི་སྤྱི་ཚོགས་ཆེན་པོ་ཞིག་གི་ནང་བསྡད་ཡོད་སྟབས། ང་ཚོ་རང་གི་སྐད་ཡིག་སྲུང་སྐྱོབ་བྱེད་པར་རང་བཞིན་གྱིས་ཉེན་ཁ་ཞིག་སླེབ་ཀྱི་ཡོད་པ་རེད། ནང་ལོགས་ནས་ང་ཚོར་ཉེན་ཁ་ག་རེ་ཡོད་པ་རེད་ཟེར་ན། ང་ཚོ་སོ་སོའི་སྐད་ཡིག་ཐོག་དོ་སྣང་ཆུང་དྲགས་པ་དང་མི་འབོར་ཉུང་ཉུང་ཡིན་པ་དེ་ཡིན་པས། ང་ཚོས་གཟབ་གཟབ་བྱས་ཏེ་བོད་རིགས་ནང་ཁུལ་དུ་སོ་སོའི་སྐད་ཡིག་ར་འཕྲོད་པ་དང་ངོ་ཤེས་དགོས་པ་རེད། ཅེས་དང་། བཙན་བྱོལ་དུ་ཡོད་པའི་ཕ་མ་ཚོས་བོད་སྐད་ཤེས་བཞིན་དུ་སྣང་ཆུང་གིས་བོད་སྐད་ནང་གཞན་སྐད་མང་པོ་བསྲེས་ལྷད་བྱས་རྐྱེན། ཕྲུ་གུ་ཚོ་ལའང་གོམས་གཤིས་དེ་རྒྱུན་འཇགས་སུ་འགྲོ་བཞིན་ཡོད་སྟབས། ཕ་མ་ཚོས་སྣེ་ཁྲིད་དེ་ཁྱིམ་ཚང་ནང་བོད་སྐད་བེད་སྤྱོད་གཏོང་རྒྱུ་དང་། བོད་མིའི་ཡ་རབས་གུས་ལུགས་སོགས་རྒྱུན་འཛིན་བྱེད་པར་དོ་འཁུར་བྱེད་རྒྱུ་གལ་ཆེན་ཡིན་སྐོར་གསུངས་སོང་།