བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༤ སྟེང་གི་རྩོམ་སྒྲིག་པའི་གཏམ།
བདུན་ཕྲག་གཉིས་སྔོན་ལ་ཁེ་ན་ཌའི་གྲོང་ཁྱེར་ཊོ་རོན་ཊོར་རྟེན་གཞི་བྱས་པའི་ཤེས་ཡོན་ལྷན་ཚོགས་ཀྱིས་ཁེ་ན་ཌའི་ནང་། རྒྱ་ནག་གི་ཁུང་ཙི་སློབ་གླིང་འཛུགས་རྒྱུར་མོས་མཐུན་མེད་པའི་ཐག་གཅོད་བྱས་པ་དེ། ནུབ་ཕྱོགས་སུ་རྒྱ་ནག་གཞུང་གི་དམིགས་ཡུལ་གཅིག་ལ་ཕམ་ཁ་ཉོས་པ་གསུམ་པ་དེ་རེད། ཐེངས་དང་བོར་ལོ་གཉིས་ཀྱི་གོང་ལ་ཨོ་སི་ཊོ་ལི་ཡའི་ཁུང་ཙི་སློབ་གླིང་ཞིག་ཏུ་གླེང་རྙོག་ཅིག་བྱུང་ཡོད་ཅིང་། དེ་དང་འབྲེལ་ནས་དབྱིན་ཡུལ་ལོན་ཌོན་དུའང་ཁུང་ཙི་སློབ་གླིང་སྐོར་ལ་གླེང་སློང་ཆེན་པོ་བྱུང་ཡོད། གཉིས་པ་ད་ལོའི་ལོ་མགོར་ཨ་རིའི་གཙུག་ལག་སློབ་དཔོན་ཐུན་ཚོགས་ཀྱིས་བསྒྲགས་གཏམ་སྤེལ་ཏེ་ཁུང་ཙི་སློབ་གླིང་གི་དམིགས་ཡུལ་དང་ལས་འགན་སོགས་ལ་ཐེར་འདོན་བྱས་ཡོད།
ཨ་རིའི་གཙུག་ལག་སློབ་དཔོན་ཐུན་ཚོགས་ཀྱིས་འདི་ལྟར་བརྗོད། རྒྱ་ནག་དམར་པོའི་སྲིད་གཞུང་གིས་དེང་སྐབས་རྒྱལ་སྤྱིའི་སྟེང་རྒྱ་ནག་གི་འཇམ་པོའི་ནུས་ཤུགས་གོང་སྤེལ་གཏོང་རྒྱུ་དང་། རྒྱ་ནག་དམར་ཤོག་ཚོགས་པའི་སྣང་བརྙན་ཇེ་ཡག་ཏུ་གཏོང་ཆེད་འཛམ་གླིང་གང་སའི་མཐོ་སློབ་དང་གཙུག་ལག་སློབ་གྲྭ་སོགས་སུ་ཁུང་ཙི་སློབ་གླིང་ཟེར་བའི་ཚན་པ་གསར་འཛུགས་བྱས་ཏེ། རྒྱ་ནག་གི་སྐད་ཡིག་དང་རིག་གཞུང་། ལོ་རྒྱུས་སོགས་ཀྱི་སྐོར་སློབ་ཁྲིད་བྱེད་བཞིན་ཡོད། སློབ་གྲྭའམ་གཙུག་ལག་སློབ་གྲྭ་གང་ཞིག་གིས་ཁུང་ཙི་སློབ་གླིང་དང་ཤེས་ཡོན་བརྗེ་ལེན་ལ་གན་རྒྱ་བཞག་ཚེ་རྒྱ་ནག་གཞུང་གིས་དངུལ་ཧ་ཅང་ཕོན་ཆེན་སྤྲོད་བཞིན་ཡོད་ཀྱང་། ཚོགས་སྡེ་གང་ཞིག་གིས་ལས་གཞི་འདིར་གན་རྒྱ་བཞག་རྗེས་རྒྱ་ནག་དམར་པོའི་སྲིད་གཞུང་གི་ལངས་ཕྱོགས་ལ་རྒྱབ་སྐྱོར་བྱེད་དགོས་པ་ཆགས་ཡོད་ཅེས་བརྗོད་འདུག
སྤྱིར་བཏང་དམར་ཤོག་གི་ལམ་སྲོལ་འདིས་ཆོས་ལུགས་དང་སྲོལ་རྒྱུན་སོགས་བསམ་པའི་དཔལ་ཡོན་ལ་དགའ་མོས་དེ་ཙམ་མི་བྱེད་ལ། ལྷག་པར་དུ་རྒྱ་ནག་གཞུང་གི་ད་ལྟའི་སྲིད་ལུགས་འདིས་ “མི་ལྟེ་བར་བཞག་པའི་ཚན་རིག་དང་མཐུན་པའི་འཕེལ་རྒྱས་ཀྱི་ལྟ་བ།” ཞེས་པའི་ལྟ་གྲུབ་ཀྱི་འོག་ནས་རང་དབང་དམངས་གཙོ་དང་། འདྲ་མཉམ་སོགས་ལ་དངོས་ཤུགས་བརྒྱུད་གསུམ་ནས་རྡོག་རོལ་གཏོང་གི་ཡོད་ལ། སྤྱི་ཚོགས་ནང་གི་གུས་བཀུར་གྱི་ལམ་སྲོལ་དང་། མིའི་འདུ་ཤེས་ངོས་ཀྱི་དྲིན་བཟོའི་བསམ་བློ་ལའང་བཀག་སྡོམ་བྱེད་མཁན་ཞིག་ཡིན། ཁུང་ཙི་དང་ལའོ་ཙི། རུའུ་ལུགས་ཀྱི་བསྟན་བཅོས་གསུམ་ནི་དམར་གཞུང་གིས་སྐྱེད་སྲིང་བྱས་པའི་མི་ཚོས་ཟུར་ཟ་བྱེད་ཡུལ་གཙོ་བོ་ཞིག་ཡིན།
དུས་རབས་ཉེར་གཅིག་པ་མགོ་བཙུགས་པ་དང་མཉམ་དུ། རྒྱ་ནག་གི་རུའུ་ལུགས་ཀྱི་སྟོན་པ་དང་མི་ཆོས་བསམ་བློ་བ་ཆེན་མོ་ཁུང་ཙི་འཛམ་གླིང་མཁས་པ་བཅུའི་གྲས་སུ་བདམས་པ་དང་། སྟོན་པ་ཤཱཀྱ་ཐུབ་པ་དང་སྟོན་པ་མ་ཧཱ་མད་ཏི། སྟོན་པ་ཡེ་ཤུ། ཁུང་ཙི་བཞི་ལ་འཛམ་གླིང་གི་འཕགས་པའི་སྐྱེས་མཆོག་རྣམ་བཞི་ཞེས་མཚན་སྙན་རྒྱས་ཤིང་། ནུབ་ཕྱོགས་ནས་ཁུང་ཙིའི་ལྟ་གྲུབ་ལ་གདེང་འཇོག་ཐོབ་པ་སོགས་དང་བསྟུན་ཏེ། རྒྱ་གཞུང་གིས་ཀྱང་ཐབས་ཤེས་གསར་པ་ཞིག་དྲན་ཡོད། ༢༠༠༤ ལོ་ཙམ་ནས་ཁུང་ཙིའི་མཚན་གནས་བེད་སྤྱད་དེ། ནུབ་ཕྱོགས་རྒྱལ་ཁབ་ཁག་ནང་ཁུང་ཙི་བསྟི་གནས་ཁང་སམ། ཁུང་ཙི་སློབ་གླིང་ཞེས་པ་བརྒྱ་ཕྲག་མང་པོ་གསར་འཛུགས་བྱས་ཤིང་། གཞུང་འབྲེལ་མིན་པའི་རྣམ་པའི་ཐོག་ནས་རྒྱལ་སྤྱིའི་ཞི་བདེའི་ཞིབ་འཇུག་ལྟེ་གནས་ཟེར་བ་ཞུགས་བཙུགས་ཏེ། ༢༠༡༡ ལོའི་ཁུང་ཙིའི་ཞི་བདེའི་གཟེངས་རྟགས་དེ་ར་ཤི་ཡའི་སྲིད་འཛིན་པུ་ཊིན་ལ་སྤྲད་པའི་དགོད་གཏམ་ཞིག་ཡོད།
ད་ལོའི་ཕྱི་ཟླ་ ༤ པའི་ཚེས་ ༢༤ ཉིན་ཁུང་ཙི་སྐུ་འཁྲུངས་ནས་ལོ་ ༢༥༦༥ འཁོར་བའི་མཛད་སྒོ་བསྡུས་ཏེ། རྒྱ་ནག་གི་སྲིད་འཛིན་ཞི་ཅིན་ཕིན་གྱིས། ལོ་རྒྱུས་མ་བརྗེད་ན་གཞི་ནས་མ་འོངས་པ་གཏོད་ཐུབ། རྒྱུན་འཛིན་མཁས་པོ་བྱས་ན་གཞི་ནས་གསར་གཏོད་མཁས་པོ་བྱེད་ཐུབ། ཅེས་ལབ་པ་དང་། ཀྲུང་གོ་ལ་ཞི་བདེ་དགོས་པ་དང་། ཀྲུང་གོ་ཞི་བདེ་ལ་དགའ་པོ་ཡོད། ཀྲུང་གོས་བློ་བརྟན་འགྱུར་མེད་ངང་ཞི་བདེ་འཕེལ་རྒྱས་འགྲོ་ལམ་ཐོག་སྐྱོད་རྒྱུ་ཡིན་ཞེས་སོགས་བརྗོད། ཉེ་ལམ་ཕྱི་ཟླ་ ༩ པའི་ཚེས་ ༢༨ ཉིན་སླར་ཡང་ “ སའི་གོ་ལ་ཡོངས་ནས་ཁུང་ཙི་སློབ་གླིང་བཙུགས་ནས་ལོ་ ༡༠ འཁོར་བ།”ཞེས་པ་ཞིག་ཚོགས་ཏེ། སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆང་གཉིས་ཀས་འཛམ་གླིང་ཞི་བདེ་དང་རིག་གཞུང་བརྗེ་ལེན། མཐུན་སྒྲིལ་མཛའ་བཤེས་སོགས་ཀྱི་ཚིག་གང་ལེགས་གང་སྙན་བེད་སྤྱོད་བཏང་སྟེ་སྐུལ་སློང་བྱས་ཡོད།
ནུབ་ཕྱོགས་རྒྱལ་ཁབ་ཁག་ཏུ་བཙུགས་ཡོད་པའི་ཁུང་ཙིའི་སློབ་གླིང་ནང་བོད་དོན་གཙོས་པའི་རྒྱ་ནག་གཞུང་དང་ལྟ་བ་མི་མཐུན་པའི་རིགས་གླེང་སློང་བྱེད་མི་ཆོག་པ་མ་ཟད། རང་དབང་དམངས་གཙོ་སོགས་ལའང་ཚོད་འཛིན་བྱེད་ཀྱིན་ཡོད་པ་དེ་ཁུང་ཙི་སློབ་གླིང་གི་རང་གཟུགས་ངོ་མ་དེ་ཡིན། ལོ་རབས་དྲུག་ཅུ་བདུན་ཅུའི་ནང་ཨ་རིས་སྣེ་འཁྲིད་པའི་དམངས་གཙོ་དང་ཨུ་རུ་སུས་སྣེ་འཁྲིད་པའི་དམར་ཤོག་བར་གྱི་ཆབ་སྲིད་ལྟ་གྲུབ་ཀྱི་འཐབ་རྩོད། འཛམ་གླིང་གྲང་དམག་ཆེན་མོ་མཇུག་སྒྲིལ་ཞིང་། ཨུ་རུ་སུ་འཐོར་ཞིག་ཏུ་སོང་སྟེ་དམངས་གཙོར་གྱུར་བའི་རྗེས་ལ། དམར་ཤོག་སྟོབས་ཆེ་ཤོས་དེ་རྒྱ་ནག་ཆགས་ཡོད། ད་ལྟ་སླར་ཡང་རྒྱ་ནག་གིས་ཁུང་ཙིའི་གདོང་འབག་འོག་ནས་ཞི་བདེའི་ཁ་གཡང་སྒྲོག་བཞིན་ནུབ་ཕྱོགས་ཀྲུང་རྒོལ་བ་རྣམས་ཕམ་པར་བརྒྱབ་སྟེ། དམར་ཤོག་དར་སྤེལ་གཏོང་འདོད་པའི་ཕུགས་ཀྱི་སྲིད་དོན་དམིགས་ཡུལ་ཞིག་བཟུང་སྟེ། འཛམ་གླིང་གྲང་དམག་ཆེན་མོར་དྲན་གསོ་དང་ཨ་རི་དང་ནུབ་ཕྱོགས་རྒྱལ་ཁབ་ཁག་ལ་ཤ་འཁོན་རྩོད་འདོད་པ་དེ་ཡང་ཡིན་ནོ།།
