པ་ཀི་སི་ཐན་ནང་དྲག་སྤྱོད་པའི་ནུས་པ་རྒྱ་སྐྱེད།

ཉེ་ལམ་དཀྱིལ་ཤར་ཨེ་ཤ་ཡའི་འཇིགས་སྐུལ་དྲག་སྤྱོད་ཚོགས་པས་པ་ཀི་སི་ཐན་ནང་གི་འཇིགས་སྐུལ་དྲག་སྤྱོད་ཚོགས་པ་ཁག་ལ་འབྲེལ་བྱས་ཏེ་ཚོགས་མི་བསྡུ་རུབ་དང་ནུས་པ་རྒྱ་སྐྱེད་གཏོང་གི་ཡོད་འདུག  

ཟླ་འདིའི་ཚེས་ ༧ ཉིན་པ་ཀི་སི་ཐན་བདེ་འཇགས་ལས་ཁུངས་ཀྱིས་སྙན་ཐོ་ཞིག་བཏོན་པའི་ནང་། ཟླ་སྔོན་མའི་ཚེས་ ༣༡ ཉིན་དཀྱིལ་ཤར་ཨེ་ཤ་ཡའི་རྒྱལ་ཁབ་ཨི་རག་དང་སི་རེ་ཡ་གཉིས་ནང་གི་ཁ་ཆེ་འཇིགས་སྐུལ་དྲག་སྤྱོད་ཚོགས་པ་ (ISIS)ཡིས། ཀི་སི་ཐན་གྱི་ས་ཁུལ་ཀད་པུར་ (Khyber Pakhtunkhawa)དང་ཀོ་རམ་ (Kurram) གཉིས་ནང་འཇིགས་སྐུལ་དྲག་སྤྱོད་པ་ ༡༠༠༠༠ ནས་ ༡༢༠༠༠ ཙམ་གསང་བའི་ངང་བསྡུ་སྐོང་བྱས་ཡོད་སྟབས། ད་ལྟའི་ཆར་པ་ཀི་སི་ཐན་གྱི་རྒྱལ་སྲུང་བདེ་འཇགས་ལ་དུས་ཚོད་ངེས་མེད་འཇབ་རྒོལ་བྱེད་སྲིད་པའི་ཉེན་ཁ་ཡོད་སྐོར་འཁོད་འདུག

འདིའི་ཐད་པ་ཀི་སི་ཐན་གྱི་བྷ་ལོབ་ཆཱ་སི་ཐན་ (Balochistan) མངའ་སྡེའི་ནང་སྲིད་དང་གྲོང་གསེབ་ལས་ཁུངས་གཉིས་ཀྱིས་པ་ཀི་སི་ཐན་གྱི་སྐྱ་རེངས་ (The Dawn) གསར་ཁང་གི་གསར་འགོད་པར། དཀྱིལ་ཤར་ཨེ་ཤ་ཡའི་ནང་གི་ཌིད་ཞི་ (Daish) ཟེར་བའི་ཁ་ཆེ་འཇིགས་སྐུལ་ཚོགས་པ་དེས་པ་ཀི་སི་ཐན་ནང་རྟེན་གཞི་བྱས་པའི་འཇིགས་སྐུལ་དྲག་སྤྱོད་ཚོགས་པ་གཉིས་ལ་འབྲེལ་བ་བྱས་ཏེ། ཚོགས་མི་བཅུ་གྲངས་ཤིག་ལས་གྲུབ་པའི་ཐབས་ཇུས་མཁས་པའི་འཇིགས་སྐུལ་ཚོགས་པ་ཞིག་འཛུགས་ཐབས་བྱེད་ཀྱིན་ཡོད་པ་ཤེས་ཡོད་ཅེས་བརྗོད་ཡོད་འདུག

གོང་གི་འཇིགས་སྐུལ་ཚོགས་པ་གཉིས་ནི་ཁ་ཆེ་ཞཱ་ཆོས་ལུགས་རྗེས་འབྲང་པ་ཡིན་པ་དང་། ཉེ་ལམ་པ་ཀི་སི་ཐན་དམག་དཔུང་གིས་བྱང་ཝ་ཛེ་རི་སི་ཐན་ (North Waziristan) ནང་གི་འཇིགས་སྐུལ་རིང་ལུགས་པར་རྒོལ་རྡུང་བྱས་པར་དགྲ་ཤ་ལེན་ཆེད། དྲག་སྤྱོད་ཚོགས་པ་དེས་པ་ཀི་སི་ཐན་གྱི་དམག་སྒར་དང་གཞུང་གི་ལས་ཁུངས་ཁག་ལ་འཇབ་རྒོལ་བྱེད་པར་གྲ་སྒྲིག་བྱེད་བཞིན་ཡོད་ཅིང་། ཀི་སི་ཐན་གཞུང་གིས་མཐའ་མཚམས་ས་ཁུལ་དུ་དམག་དཔུང་མང་དུ་བཏང་སྟེ་འཇིགས་སྐུལ་དྲག་སྤྱོད་པའི་འཇབ་རྒོལ་ལ་རྟོག་ཞིབ་ཤུགས་ཆེ་རུ་བཏང་ཡོད་འདུག

པ་ཀི་སི་ཐན་གྱི་སྲིད་དོན་པ་སྐུ་ཞབས་ཧོ་སན་ (Altaf Hussain) ལགས་ཀྱིས་དཀྱིལ་ཤར་ཨེ་ཤ་ཡའི་འཇིགས་སྐུལ་དྲག་སྤྱོད་ཚོགས་པ་པ་ཀི་སི་ཐན་ནང་སིམ་འཛུལ་དང་ནུས་པ་རྒྱ་སྐྱེད་བཏང་སྟེ། ནམ་ཞིག་རྒྱལ་ཁབ་ཀྱི་བདེ་འཇགས་ལ་མངོན་གསལ་དད་པོས་ཐོག་ནས་འཇབ་རྒོལ་བྱེད་སྲིད་སྐོར་བརྗོད་འདུག གཞན། པ་ཀི་སི་ཐན་གྱི་བདེ་འཇགས་ཆེད་མཁས་ཨེ་ཇ་ཛི་ཧོ་སན་ (Ejaz Hussain)ལགས་ཀྱིས་ཀྱང་། དཀྱིལ་ཤར་ཨེ་ཤ་ཡའི་འཇིགས་སྐུལ་ཚོགས་པ་དང་པ་ཀི་སི་ཐན་ནང་གི་འཇིགས་སྐུལ་ཚོགས་པ་ཁག་བར་འཆམ་མཐུན་བྱེད་པའི་གྲོས་མོལ་མགོ་འཛུགས་བྱེད་པར་པ་ཀི་སི་ཐན་གཞུང་གིས་དུས་ཐོག་གདོང་ལེན་བྱེད་མ་ཐུབ་ཚེ། འབྱུང་འགྱུར་པ་ཀི་སི་ཐན་ནང་དུ་བསམ་ཡུལ་ལས་འདས་པའི་འཇབ་རྒོལ་དོན་རྐྱེན་འབྱུང་སྲིད་སྐོར་བརྗོད་འདུག

པ་ཀི་སི་ཐན་ནང་འཇིགས་སྐུལ་དྲག་སྤྱོད་པའི་གནས་ཚུལ་ཤུགས་ཆེ་རུ་འགྲོ་བཞིན་པ་དེ་གཞུང་ལ་ངོ་རྒོལ་བྱེད་ཆེད་གཅིག་པུ་མ་ཡིན་པར། པ་ཀི་སི་ཐན་ནང་གི་ཁ་ཆེ་ཆོས་ལུགས་ཀྱི་གྲུབ་མཐའ་མ་འདྲ་བའི་འཇིགས་སྐུལ་དྲག་སྤྱོད་ཚོགས་པ་ཕན་ཚུན་བར་གྱི་འཐབ་རྩོད་ཅིག་ཀྱང་ཆགས་ཀྱི་ཡོད་འདུག

རྒྱ་གར་གྱི་བདེ་འཇགས་ཆེད་མཁས་པ་ཚོས། པ་ཀི་སི་ཐན་ནང་དཀྱིལ་ཤར་ཨེ་ཤ་ཡའི་འཇིགས་སྐུལ་ཚོགས་པ་བསླེབས་ཚེ་རྒྱ་གར་གྱི་བྱང་ཕྱོགས་ཇ་མུ་ཀ་ཤི་མུར་མངའ་སྡེ་གཙོས་རྒྱལ་ཁབ་ཀྱི་བདེ་འཇགས་ལ་འཇིགས་སྐུལ་ཡོད་སྟབས། མུ་དྷི་གཞུང་གིས་སྔ་ས་ནས་པ་ཀི་སི་ཐན་གྱི་མཐའ་མཚམས་ཁུལ་དུ་དམག་དཔུང་ཁ་སྣོན་བྱས་ཏེ་སྔོན་འགོག་ལས་གཞིར་དམ་དོན་བྱེད་གལ་ཆེ་ཚུལ་བརྗོད་འདུག