བཙུན་མ་ ༢༦ ཕྱིར་འཕུད་བཏང་།

ཉེ་ཆར་ནག་ཤོད་འབྲི་རུ་བྱ་མདའ་དགོན་པའི་བཙུན་མ་ ༢༦ ཙམ་ལ་རྒྱ་གཞུང་གི་ཆོག་མཆན་མེད་པའི་མིང་ཐོག་ནས་ཕྱིར་འཕུད་བཏང་ཡོད་འདུག

ཟླ་འདིའི་ཚེས་ ༡༥ ཉིན་བོད་ནས་མིང་བརྗོད་འདོད་མེད་པ་ཞིག་གིས་དྷ་སར་གནས་སྡོད་ངག་དབང་ཐར་པ་ལགས་སུ་གནས་ཚུལ་མཁོ་སྤྲོད་གནང་བ་ལྟར་ན། ནག་ཤོད་འབྲི་རུ་རྫོང་བན་དཀར་(པད་དཀར་)ཡུལ་ཚོ། བྱ་མདའ་དཔལ་ལྡན་མཁའ་སྤྱོད་གླིང་བཙུན་དགོན་དུ། རྒྱ་གཞུང་གི་ཆོག་མཆན་ཡོད་པའི་བཙུན་མ་ ༡༤༠ ཡོད་ཀྱང་། ཆོག་མཆན་མ་རག་པའི་བཙུན་མ་མང་པོ་ཞིག་གིས་དགོན་དེར་སློབ་གཉེར་བྱེད་ཀྱིན་ཡོད་སྟབས། རྒྱུན་དུ་རྒྱ་གཞུང་གི་ལས་དོན་རུ་ཁག་ཡོང་སྐབས་ཐོ་དེབ་ནང་མ་འཁོད་པའི་བཙུན་མ་དེ་དག་རི་མགོ་སོགས་ལ་གབ་དགོས་པའི་གནས་སྟངས་བྱུང་འདུག

ད་ལོའི་ཕྱི་ཟླ་ ༩ ནས་བཟུང་ལས་དོན་རུ་ཁག་ཆེས་མང་པོ་དགོན་དུ་ཡོང་ནས། ༧གོང་ས་མཆོག་ལ་མཚན་སྨད་བྱེད་དགོས་པའི་བཙན་བཀའ་བཏང་ཡང་། བཙུན་མ་དེ་དག་གི་ཁ་གཅིག་གྲག་གིས་ཁས་ལེན་མ་བྱས་སྟབས། བཅའ་སྡོད་ལས་བྱེད་དེ་ཚོས་ཞིབ་བཤེར་བྱས་ཏེ་ཐོ་དེབ་ནང་མ་མཁོད་པའི་བཙུན་མ་ ༢༦ ཙམ་ཕྱིར་འཕུད་བཏང་འདུག བཙུན་མ་ཁག་གཅིག་ཆགས་ས་བརྟེན་ས་མེད་པ་ཆགས་ཏེ་ངུ་བཞིན་ཡོད་པའི་གནས་ཚུལ་ཡང་འདུག

བྱ་མདའ་དགོན་པ་ནི་དགེ་ལུགས་པའི་ཆོས་བརྒྱུད་འཛིན་པའི་བཙུན་མའི་དགོན་སྡེ་ཞིག་ཡིན་པ་དང་། འཛིན་རིམ་དགུ་པ་བར་དུ་སློབ་སྦྱོང་བྱེད་ཆོག རྒྱུན་དུ་བན་དཀར་ཡུལ་ཚོའི་བཙུན་མ་དང་། ཉེ་འཁོར་གྱི་རྒྱལ་སྟོན། ཁྲི་རྡོ། ནགས་ཤོད། སོག་རྫོང་བཅས་ཀྱི་བཙུན་མ་མང་པོ་སློབ་གཉེར་བྱེད་བཞིན་ཡོད་པ་མ་ཟད། མདོ་དབུས་ཁམས་གསུམ་གང་ས་ནས་བཙུན་མ་མང་པོ་སློབ་གཉེར་བྱེད་དུ་བསླེབས་ཡོད་འདུག

བྱ་མདའ་དགོན་དཔལ་ལྡན་མཁའ་སྤྱོད་གླིང་ནི། ཡེ་ཤེས་མཁའ་འགྲོ་བསོད་ནམས་དཔལ་འདྲེན་གྱི་སྲས་དྲུང་ཆེན་བསོད་ནམས་དོན་གྲུབ་ཀྱིས་ ༡༤༨༨ ལོར་ཕྱག་བཏབ། ཐོག་མར་བཀའ་བརྒྱུད་པའི་དགོན་པ་ཡིན་པ་དང་། ཕྱིས་སུ་སྟག་ཕུ་མཐུ་ཆེན་བློ་བཟང་འཇམ་དཔལ་གྱིས་དགེ་ལྡན་པའི་དགོན་པར་བསྒྱུར་ཡོད་འདུག རིག་གསར་སྐབས་བོད་སྤྱིའི་དགོན་སྡེ་ལྟར་གོད་ཆག་བྱུང་རྗེས་ ༡༩༨༤ ལོ་ཙམ་ནས་བཙུན་མ་ཆོས་འཛོམས་ཀྱིས་གཙོས་བཙུན་མ་དག་གི་ཉམས་གསོ་བྱས་ཡོད་འདུག