བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༥ སྟེང་གི་རྩོམ་སྒྲིག་པའི་གཏམ།
ཉེ་ལམ་རྒྱ་ནག་པེ་ཅིན་དུ་ཨེ་ཤ་ཡའི་ཞི་བདེ་རྒྱ་མཚོའི་མངའ་ཁུལ་གྱི་དཔལ་འབྱོར་གླེང་སྟེགས་ཚོགས་འདུ་བསྡུས་པ་དང་བསྟུན་ཏེ། ཨ་རིའི་སྲིད་འཛིན་ཨོ་བྷ་མས་རྒྱ་ནག་ནང་ཉིན་གསུམ་རིང་གཟིགས་སྐོར་བྱས་ཤིང་། སྐབས་དེར་རྒྱ་ནག་གི་སྲིད་འཛིན་ཞི་ཅིན་ཕིན་དང་གྲོས་མོལ་བྱས་ཏེ། རྒྱ་ནག་གི་ཚོང་པ་དང་ཡུལ་སྐོར་སྤྲོ་འཆམ་པར་ཐོངས་མཆན་ལོ་བཅུ་དང་། སློབ་ཕྲུག་ཚོར་ལོ་ལྔ་བར་སྤྲོད་རྒྱུའི་ཐག་གཅོད་བྱས་མ་ཐག རྒྱ་ནག་ནང་གི་ཤེས་ཡོན་པ་དང་ཆབ་སྲིད་པའི་ཁྲོད་གླེང་ཕྱོགས་གསར་པ་ཞིག་བྱུང་ཡོད།
ད་ལོའི་རྒྱ་ནག་སློབ་གསོ་སྡེ་ཁག་གི་ཞིབ་འཇུག་སྙན་ཐོའི་ནང་། ༢༠༡༣ ལོར་ཕྱི་རྒྱལ་ཁག་ཏུ་སློབ་སྦྱོང་བྱེད་བཞིན་པའི་རྒྱ་ནག་གི་སློབ་ཕྲུག་ ༤༡༣༩༠༠ ལྷག་ཡོད་པའི་ཁྲོད། ཨ་རིར་སློབ་མ་ ༢༣༥༥༩༧ ཙམ་ཡོད་པ་དང་། དེས་རྒྱ་ནག་གི་ཕྱི་སྐྱོད་སློབ་མ་ཡོངས་ཀྱི་བརྒྱ་ཆ་ ༥༧ ཙམ་ཟིན་ཡོད་ལ། དེ་དག་ཁྲོད་མཐོ་འབྲིང་སློབ་མ་ཁྲི་ ༣ ཙམ་ཡོད་འདུག རྒྱལ་ཁབ་ཅིག་གི་ཤེས་ཡོན་སློབ་གསོ་དང་ཆབ་སྲིད་ལམ་ལུགས་གཉིས་ཁ་འབྲལ་ཐབས་མེད་སྟབས། གྲངས་ཀ་དེ་ནི་རྒྱ་རིགས་ལྟ་བ་མཁྲེགས་པོ་ཅན་ཚོར་རྒྱ་ནག་གི་ཆབ་སྲིད་སྒྲོམ་གཞི་དང་སློབ་གསོའི་ཁ་ཕྱོགས་ལ་ཤུཊ་རྐྱེན་ཐེབས་སྲིད་པའི་སེམས་ཁྲལ་གསར་ཤོས་དེ་ཆགས་ཡོད།
རྒྱ་ནག་གི་སློབ་མ་ཕྱི་སྐྱོད་སྲིད་བྱུས་ཐད་སྐྱོན་གནས་གསུམ་ངོས་འཛིན་བྱེད་ཀྱིན་ཡོད་པ་ནི། གཞོན་སྐྱེས་ཕོན་ཆེན་པོས་ཕྱི་རྒྱལ་ནས་སློབ་སྦྱོང་བྱས་ཏེ་ཕྱིར་ལོག་ཚེ། རྒྱ་ནག་གི་ཤེས་ཡོན་ལམ་ལུགས་ལ་གཞན་དབང་འོག་བཅོས་བསྒྱུར་ཐེབས་སྲིད་པ་དང་། རྒྱ་ནག་གི་སློབ་ཕྲུག་དྲག་ཤོས་ཡོངས་རྫོགས་ཕྱི་རྒྱལ་དུ་ཕྱིན་ན་རྒྱ་ནག་གི་སློབ་གྲྭ་མང་པོར་ད་ལྟ་སློབ་ཕྲུག་ཉུང་དུ་འགྲོ་བཞིན་པའི་ཁར་སློབ་གྲྭ་དག་གི་སྤུས་ཚད་ཀྱང་ཇེ་ཞན་དུ་འགྲོ་རྒྱུ་ཡིན་པ། རྒྱ་ནག་གི་ཕྱི་སྐྱོད་སློབ་མ་གཅིག་གི་ལོ་རེའི་འགྲོ་སོང་རྒྱ་སྒོར་ཁྲི་ ༢༥ ཡིན་པ་དང་ཕྱི་སྐྱོད་སློབ་མ་ཡོངས་ཀྱི་ལོ་གཅིག་གི་འགྲོ་གྲོན་རྒྱ་སྒོར་དུང་ཕྱུར་ ༨༠༠ ལྷག་ཆགས་ཏེ་མ་དངུལ་ཕོན་ཆེན་པོ་ཕྱི་རྒྱལ་དུ་ཤོར་གྱིན་ཡོད་པ་སོཊ་རེད།
རྒྱལ་སྤྱིའི་སྲིད་དོན་དབྱེ་ཞིབ་པ་ཚོས་བརྗོད་སྟངས་ནི་དེ་ལས་གཞན་ཞིག་རེད། རྒྱ་ནག་གི་ཕྱི་སྐྱོད་སློབ་མ་དེ་རྣམས་རིགས་གསུམ་དུ་གཏོགས་ཤིང་། གཅིག རྒྱ་ནག་གི་མཐོ་རིམ་དབང་འཛིན་པ་དང་འབྱོར་ལྡན་ཁེ་ལས་པའི་བུ་ཕྲུག་དང་གཉེན་ཚན་ཡིན་པ་དང་། གཉིས་པ། རྒྱ་ནག་གི་སློབ་གྲྭ་ཁག་ནང་སློབ་སྦྱོང་གྲུབ་འབྲས་ཡག་ཤོས་དག་ཡིན་པ། གསུམ་པ། རྒྱ་ནག་ནང་རྒྱུགས་མ་འཕྲོད་པའི་བྱིས་པ་ལང་ཤོར་རིག་རྟུལ་དག་ཡིན་སྟབས། རིགས་དང་པོ་གཉིས་པར་འཕྲལ་ཕུགས་ཀྱི་བདེ་འཇགས་ཆེད་ཐོག་མ་ནས་ཕྱིར་ལོག་རྩིས་མེད་པ་དང་། རྒྱུཊ་མ་འཕྲོད་མཁན་ཚོ་ནི་འབྱོར་འབྲིང་བྱིས་པ་ཚོ་ཡིན་སྟབས་ཁོ་ཚོས་དཔལ་འབྱོར་འཚོལ་སྒྲུབ་ལས་རྒྱལ་ཁབ་ཀྱི་ཤེས་ཡོན་ལ་ཐེ་གཏོགས་མི་བྱེད་ཟེར།
རྒྱ་ནག་གི་ཕྱི་སྐྱོད་སློབ་མ་ལོ་རེ་ནས་ལོ་རེར་མང་དུ་འགྲོ་བཞིན་ཡོད་པ་དེས་རྒྱ་ནག་མི་མང་གི་བསམ་སྤྱོད་གུ་ཡངས་རང་དབང་དང་། དམངས་གཙོའི་ཕྱོགས་སུ་སྐུལ་འདེད་གཏོང་རྒྱུ་ཡིན་པ་ནི་འགོག་ཐབས་མེད་པ་ཞིག་ཡིན། པེ་ཅིན་གནམ་བདེ་སྒོ་མོ་ཆེའི་ཐང་ཆེན་གྱི་དྲུག་བཞིའི་དོན་རྐྱེན་དེ་ཡང་། ལོ་རབས་བརྒྱད་ཅུའི་ནང་ལུག་ཞོ་པའོ་སོགས་མཐོ་རིམ་སློབ་མ་མང་པོས་ནུབ་ཕྱོགས་ཀྱི་སློབ་གསོ་མྱངས་ཏེ་ཕྱིར་རྒྱལ་ནང་དུ་ལོག་སྐབས། གཞི་ནས་རྒྱ་ནག་གི་མུན་ནག་དང་། མུན་ནག་ནང་གི་གཡའ་དྲི་ཚོར་ནས་དམངས་གཙོའི་ལས་འགུལ་དེ་བསླངས་པ་རེད། རྒྱ་ནག་གཞུང་གིས་ཀྱང་གནད་དོན་འདི་ཤེས་ཏེ། ཆེད་དུ་སྤྱི་ཚོགས་ནང་གླེང་ཕྱོགས་གསར་པ་བཟོས་ཏེ་ཆུ་མ་ཡོང་གོང་གི་རགས་སམ། ཡང་ན་བསམ་བློ་གཉིས་པ་གཏོང་རྒྱུར་གྲ་སྒྲིག་བྱེད་ཀྱིན་ཡོད།
རྒྱ་ནག་གི་ཤེས་ཡོན་པ་དང་མཐོ་རིམ་སློབ་ཕྲུག སློབ་མའི་ནང་མི་སོགས་མ་གཏོགས་ཆབ་སྲིད་དབང་འཛིན་པ་དང་འབྱོར་ལྡན་པའི་ཁྲོད། རྒྱལ་ཁབ་ཀྱི་ཁེ་ཕན་དང་སློབ་གསོའི་ཇུས་ཆེན་ལ་བསམ་བློ་གཏོང་མཁན་ཉུང་ཉུང་ཡིན། རྒྱལ་ཁབ་ལ་ཤ་ཚའི་གཏམ་སྤྱོད་སྤེལ་མཁན་རེ་འགའ་ཡོད་པའང་མཐར་དེད་ན་སྒེར་གྱི་ཁེ་ཕན་ཞིག་ལ་སྙེག་གི་ཡོད་སྟབས། རྒྱ་ནག་གི་སློབ་གསོའི་བྱ་བཞག་དེ་གནས་སྐབས་ཀྱི་ཆབ་སྲིད་མངོན་འདོད་སྒྲུབ་བྱེད་དུ་གྱུར་ཏེ་གཞུང་དམངས་བར་ན་སྐྱ་ཟད་སྔོ་གཏུགས་ཆགས་ཡོད་སྟབས། ཕྱི་སྐྱོད་སློབ་མའི་ཕྱོགས་ཀྱི་ཉེན་ཁ་ཆེ་ཤོས་དེ་རྒྱ་ནག་གི་ཤེས་ཡོན་སློབ་གསོ་ལས་རྒྱལ་ཁབ་ཀྱི་ཆབ་སྲིད་སྒྲོམ་གཞིའི་ཐོག་བསླེབ་སྲིད།
རྒྱ་ནག་གཞུང་གིས་ད་དུང་ཕྱིའི་ཤུགས་རྐྱེན་ཙམ་ལ་ཁ་གཡར་ཏེ། ནང་གི་ཆབ་སྲིད་སྒྲོམ་གཞི་དང་ཤེས་ཡོན་སློབ་གསོར་དུས་དང་བསྟུན་པའི་བཅོས་བསྒྱུར་ཞིག་མ་བཏང་ཚེ། རྒྱ་ནག་གི་ཕྱི་སྐྱོད་སློབ་མའི་ལམ་ཁ་འགོག་ཐབས་མེད་པ་མ་ཟད། ཕྱི་སྐྱོད་སློབ་མ་ཚོའི་རང་དབང་དམངས་གཙོའི་འདོད་འདུན་དེ་བས་ཀྱང་འགོག་ཐབས་མེད་སྟབས། རྒྱ་ནག་གི་སློབ་གསོའི་གནས་ཚད་ཉམས་རྒུད་དང་རྒྱལ་སྤྱིའི་ཐོག་རྒྱ་ནག་གི་སློབ་གྲྭར་མཚན་མཐོང་མེད་པ་ཆགས་ཏེ། རིམ་གྱིས་རྒྱ་ནག་གི་ན་གཞོན་ཚོར་རང་དབང་རང་རྟོག་གི་བསམ་བློ་དང་། སློབ་ཕྲུག་གི་ནང་མི་ཚོར་རང་དོན་རང་གཅེས་ཀྱི་འདུན་པ་སྐྱེས་ཏེ། རྒྱ་ནག་ནང་སློབ་གསོའི་གསར་བརྗེ་ལས་འགུལ་ཆེན་པོ་ཞིག་འབྱུང་སྲིད་ལ། འདི་དང་བསྟུན་ཏེ་རྒྱ་ནག་གི་ཆབ་སྲིད་ལམ་ཕྱོགས་དེའི་ཚེ་སྲོག་ཀྱང་མཐའ་ལ་ཐུག་སྲིད་དོ།།
