དེ་རིང་འཛམ་གླིང་གཉན་ནད་རེག་དུག་གི་ཉིན་མོ་དང་བསྟུན་ན་ཚ་དེ་སྔོན་འགོག་བྱེད་ཐབས་ཀྱི་གོ་རྟོགས་གོང་འཕེལ་དང་། འགོས་ནད་དེ་ཕོག་པའི་ནད་པ་ཚོར་བདག་སྐྱོང་བྱས་ན་སྤྱི་ཚོགས་ཁྱོན་ཡོངས་ལ་ཕན་སྐོར་བརྗོད་སོང་།
དེ་རིང་སྔ་དྲོའི་ཆུ་ཚོད་ ༩།༣༠ ཡོལ་ཙམ་ལ་དྷ་ས་མེག་གྷན་རླངས་འཁོར་འབབ་ཚིགས་སུ། ལྷ་སྤྱི་ཚོགས་ཞབས་ཞུ་ཁང་དང་ཀུན་ཕན་ཚོགས་པ་གཉིས་ཀྱི་གོ་སྒྲིག་འོག འཛམ་གླིང་གཉན་ནད་རེག་དུག་(ཨེ་ཙི)གི་ཉིན་མོ་དང་བསྟུན་ཏེ། གཉན་ནད་རེག་དུག་སྔོན་འགོག་བྱེད་ཐབས་སོགས་ཀྱི་གོ་རྟོགས་གོང་འཕེལ་ཆེད། བོད་དབྱིན་ཧིན་གསུམ་གྱི་ཡི་གེའི་ནང་གཉན་ནད་རེག་དུག་སྔོན་འགོག་གི་རྒྱུན་ཤེས་ཡིག་ཆ་འགྲེམས་སྤེལ་དང་འགྱིག་ཤུབས་རིན་མེད་ཀྱིས་སྤྲོད་པ། གཞན་ཡང་། བདེ་ལེགས་སྨན་ཁང་གིས་ན་ཚ་དེ་ཡོད་མེད་ཀྱི་ཁྲག་བརྟག་དཔྱད་བཅས་བྱེད་བཞིན་འདུག
ཀུན་ཕན་ཚོགས་པའི་འགན་འཛིན་སྤྱི་འཐུས་ཟླ་བ་ཚེ་རིང་ལགས་སུ་ལས་འགུལ་གྱི་དགོས་དམིགས་དང་འབོད་སྐུལ་ཅི་ཡོད་སྐོར་བཅར་འདྲི་ཞུ་སྐབས། དེ་རིང་ཉིན་མོ་འདི་དང་བསྟུན་ནས་དེང་སང་བོད་ཕྱི་ནང་གཉིས་ཀྱི་སྤྱི་ཚོགས་ནང་ཉལ་ཐ་འདྲ་མི་འདྲ་བེད་སྤྱོད་བྱེད་པ་སོགས་གོ་རྟོགས་མེད་པའི་དཀའ་ངལ་མང་པོ་ཞིག་འཕྲད་བཞིན་ཡོད་སྟབས། སྤྱི་ཚོགས་ཀྱི་དཀའ་ངལ་དེ་སྤྱི་ཚོགས་རང་གིས་འགན་འཁུར་ནས་སྔོན་འགོག་གི་སློབ་སྟོན་བྱེད་རྒྱུ་གལ་ཆེན་པོ་ཡིན་པ་དང་། སྤྱི་ཚོགས་ཀྱི་དཀའ་ངལ་དེ་སྒྲིག་འཛུགས་ཤིག་དང་ཚོགས་སྡེ་ཞིག་གིས་སེལ་ཐབས་བྱས་པ་ཙམ་མ་ཡིན་པར་མི་རེ་ངོ་རེ་ནས་སྔོན་འགོག་དང་། ན་ཚ་འགོས་ཡོད་མེད་ཀྱི་བརྟག་དཔྱད་བྱེད་རྒྱུ་གལ་ཆེན་པོ་ཡིན་ལ། ནན་ཚ་དེ་མེད་ན་སྔོན་འགོག་གི་བྱ་བར་དོ་གཟབ་དགོས་པ་དང་། གལ་སྲིད་ན་ཚ་དེ་ཡོད་ན། དེ་ལ་དཔག་པའི་སྨན་ཟོས་པ་ཡིན་ན་ན་ཚ་སྡུག་ཏུ་མ་སོང་བར་ལོ་ ༥༠ དང་ ༦༠ ་ལ་འཚོ་ཐུབ་ཀྱི་ཡོད་སྐོར་དང་། ན་ཚ་དེ་ཕན་ཚུན་ལག་པ་བཏང་བ་དང་གནས་གོས་ཟས་མལ་མཉམ་སྤྱོད་བྱས་པ་ཙམ་གྱིས་འགོས་ཀྱི་མེད་སྟབས། ན་ཚ་དེ་ཡོད་པའི་ནད་པ་ཚོར་བདག་སྐྱོང་དང་རོགས་རམ་བྱེད་དགོས་པ་ལས། ཁོང་ཚོར་རྒྱང་ཐག་བཟུང་སྟེ་སྤྱི་ཚོགས་ནང་ནས་ཕུད་བཞག་པ་ཡིན་ན། ནད་པའི་གནས་སྟངས་སྡུག་ཏུ་འགྲོ་བ་དང་། ན་ཚ་དེ་འགོས་པའི་ནད་པ་མང་པོ་ཞིག་གིས་གསང་བ་བྱས་ཏེ་ན་ཚ་དེ་རྒྱ་ཁྱབ་ཏུ་འགྲོ་བའི་ཉེན་ཁ་ཆེན་པོ་ཡོད་སྐོར་བརྗོད་སོང་།
གཉན་ནད་རེག་དུག་ནི་འཁྲིག་སྤྱོད་སྐབས་འགྱིག་ཤུབས་བེད་སྤྱོད་མ་བྱས་པ་དང་། སྨན་ཁབ་དང་སྐྲ་བཞར་གྲི། ཐ་མག་ནག་པོ་སོགས་མྱོས་རྫས་རིགས་ཀྱི་མཁོ་ཆས་མཉམ་སྤྱོད་བྱས་པ། དེ་བཞིན་ན་ཚ་དེ་ཡོད་པའི་ཨ་མའི་འོ་མ་སོགས་བརྒྱུད་དེ་ཕྲུ་གུར་འགོས་པ་དང་། ཁྲག་གསབ་པ་བཅས་ནས་འགོས་ཁྱབ་ཏུ་འགྲོ་བཞིན་ཡོད་པ་དང་། ན་ཚ་དེ་འགོས་བའི་ནད་པ་མང་པོར་ཚ་བ་འཕར་བ་དང་འབྲུམ་བུ་ཐོན་པ། རྨེན་ཁྲོས་པ། མགྲིན་པ་ན་བ། ཁ་དང་མགྲིན་པར་རྨ་འབྲུམ་ཐོན་པ། ལུས་ཀྱི་ཚིགས་དང་ཤ་རྒྱུས་ལ་ན་ཟུག་སྐྱེས་བ་སོགས་ཀྱི་ནད་རྟགས་ཐོན་གྱི་ཡོད་འདུག
གཉན་ནད་རེག་དུག་ནི་ཕྱི་ལོ་ ༡༩༨༡ ཟླ་ ༦ ཚེས ༥ ཉིན་ཨ་རིའི་འགོས་ནད་ཆེད་མཁས་མི་སྣས་ཐོག་མར་ངོས་ཟིན་ཏེ། མཉམ་འབྲེལ་རྒྱལ་ཚོགས་ཀྱིས་ཡོངས་ཁྱབ་གསལ་བསྒྲགས་བྱས་ཡོད་པ་དང་། ད་ལྟའི་ཆར་འཛམ་གླིང་ནང་མི་གྲངས་ས་ཡ་ ༦༠ ཙམ་ལ་ན་ཚ་དེ་འགོས་ཡོད་པ་མ་ཟད། མི་གྲངས་ས་ཡ་ ༣༠ ལྷག་འདས་གྲོངས་སུ་གྱུར་འདུག ཕྱི་ལོ་ ༢༠༡༠ ལོར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་ཞིབ་འཇུག་བྱས་པ་ལྟར་ན། བཙན་བྱོལ་བོད་མིའི་སྤྱི་ཚོགས་ནང་ཁྱོན་བོད་མི་ ༡༣༠ ཙམ་ལ་ན་ཚ་དེ་འགོས་ཡོད་པ་དང་། དེའི་ནང་ནས་མི་ ༦༠ ཙམ་འདས་གྲོངས་སུ་ཕྱིན་ཡོད་འདུག དེ་བཞིན། བོད་ནང་གནས་བཞུགས་སྨན་སྤྲུལ་དགེ་གྲགས་ལགས་ཀྱིས་བརྩམས་པའི་གཉན་ནད་རེག་དུག་སྐོར་གྱི་དཔེ་དེབ་ནང་། ཕྱི་ལོ་ ༢༠༠༩ ལོར་བོད་རང་སྐྱོང་ལྗོངས་སུ་གཉན་ནད་རེག་དུག་འགོས་པའི་མི་ ༡༠༣ དང་། མཚོ་སྔོན་ཞིང་ཆེན་ནང་མི་ ༡༦༧། ཀན་སུ་ཞིང་ཆེན་ནང་ ༢༨༧། དཀར་མཛེས་བོད་རིགས་རང་སྐྱོང་ཁུལ་དུ་མི་ ༣༠༡༠༠། ཡུན་ནན་ཞིང་ཆེན་དུ་ ༧༢༩༣༩ ཡོད་པ་ཤེས་རྟོགས་བྱུང་ཡོད་ཀྱང་། ཕྱི་ལོ་ ༢༠༡༠ ལོར་ཡུན་ནན་ཞིང་ཆེན་ནང་མི་ ༡༦༡༨༦༣ ལ་འཕར་ཡོད་སྐོར་བརྗོད་འདུག
གསར་འགོད་པ། པདྨ་མཚོ།
ཕྱི་ལོ་ ༢༠༡༠ ལོར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་ཞིབ་འཇུག་བྱས་པ་ལྟར་ན་བོད་མི་ ༡༣༠ ཙམ་ལ་ན་ཚ་དེ་འགོས་འདུག་ཟེར།
ཕྱི་ལོ་ ༢༠༠༩ ལོར་བོད་རང་སྐྱོང་ལྗོངས་སུ་གཉན་ནད་རེག་དུག་འགོས་པའི་མི་ ༡༠༣ དང་། མཚོ་སྔོན་ཞིང་ཆེན་ནང་མི་ ༡༦༧། ཀན་སུ་ཞིང་ཆེན་ནང་ ༢༨༧། དཀར་མཛེས་བོད་རིགས་རང་སྐྱོང་ཁུལ་དུ་མི་ ༣༠༡༠༠། ཡུན་ནན་ཞིང་ཆེན་དུ་ ༧༢༩༣༩ ཡོད་པ་ཤེས་རྟོགས་བྱུང་ཡོད་ཀྱང་། ཕྱི་ལོ་ ༢༠༡༠ ལོར་ཡུན་ནན་ཞིང་ཆེན་ནང་མི་ ༡༦༡༨༦༣ ལ་འཕར་ཡོད་སྐོར་བརྗོད་འདུག