བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༦ སྟེང་གི་རྩོམ་སྒྲིག་པའི་གཏམ།
ཉེ་ལམ་བལ་ཡུལ་རྒྱལ་སར་ལྷོ་ཨེ་ཤ་ཡའི་རྒྱལ་ཁབ་བརྒྱད་ཀྱི་ཚོགས་འདུ་ཚོགས་པའི་སྟེང་། ཚ་གྲང་བར་གྱི་སྨན་པའི་དཀའ་ཟེར་བ་ལྟར། རྒྱ་གར་ནག་བར་གྱི་རྒྱལ་ཁབ་སྐོར་ཞིག་ཅི་བྱ་གཏོལ་མེད་ཆགས། བལ་གཞུང་གིས་ཀྱང་མདུན་ནས་རྒྱ་གར་ལ་ངོ་བསྟོད་བྱེད་བཞིན་རྒྱབ་ནས་རྒྱ་ནག་གི་བཀའ་གསུང་ཅི་སྒྲུབ་ཞུས་ཤིང་། པ་ཀི་སི་ཐན་གྱིས་ཀྱང་གོ་སྐབས་བཟུང་སྟེ་རྒྱ་གར་ལ་ཁ་གཏད་བཅག་ཅིང་། ཞོར་དུ་རྒྱ་ནག་ལ་དོན་ཕན་ལྡན་པའི་ལས་དོན་སྒྲུབ་རོགས་བྱས།
ཐེངས་འདིའི་ལྷན་ཚོགས་སྟེང་རྒྱ་གར་དང་བལ་ཡུལ། འབྲུག པ་ཀི་སི་ཐན། ཨབ་གྷན། སིང་ག་ལ། བྷང་གྷ་ལ། མལ་ཌེབ་སི་བཅས་རྒྱལ་ཁབ་བརྒྱད་ཡོད། རྒྱ་ནག་ཚོགས་འདུར་དངོས་སུ་ཞུགས་མེད་ཀྱང་། གྲོས་གཞི་ཐག་གཅོད་བྱེད་སྐབས་རྒྱ་ནག་གི་ཤུགས་རྐྱེན་ཆེ་ཤོས་ཆགས་ཡོད། ལྷག་པར་དུ་ཐེངས་འདིའི་ལྷན་ཚོགས་ཀྱི་མགྲོན་བདག་བལ་གཞུང་ཡིན་ཡང་ཚོགས་བཅར་བར་ཟས་མགྲོན་གྱི་སྦྱིན་བདག་གཏོང་མཁན་རྒྱ་ནག་ཆགས་ཡོད།
རྒྱལ་ཁབ་འདི་དག་ཁྲོད་རྒྱ་གར་ནི་རྒྱལ་ཁབ་ཆེ་ཤོས་དང་སྟོབས་འབྱོར་ཡག་ཤོས་ཡིན་སྟབས། ད་རེབ་ཚོགས་འདུར་སྣེ་ཁྲིད་བྱེད་རྒྱུ་ཡིན་པ་དེ་པ་ཀི་སི་ཐན་གྱིས་སྔོན་མ་ནས་ཚོད་དཔག་ཐུབ་ཏེ། པ་ཀི་སི་ཐན་གྱི་སྲིད་བློན་ཚོགས་བཅར་མ་ཞུས་སྔོན་ལ་གསར་འགོད་པར། མ་འོངས་པར་རྒྱ་གར་དང་པ་ཀི་སི་ཐན་བར་འབྲེལ་ལམ་གང་འདྲ་ཞིག་དགོས་མིན་གྱི་སྤོ་ལོ་དེ་རྒྱ་གར་གྱི་རྩེད་ཐང་དུ་ཡོད་ཅེས་བརྗོད་ཡོད་ལ། ཚོགས་འདུ་དངོས་གཞིའི་སྐབས་རྒྱ་གར་སྲིད་བློན་གྱིས་ཚོགས་མིའི་རྒྱལ་ཁབ་ཁག་བར་གློག་ཤུགས་དང་འགྲིམ་འགྲུལ། ལྕགས་ལམ་བཅས་ཀྱི་གྲོས་འཆར་བཏོན་པ་དེར་དགག་པ་བརྒྱབ་ཡོད།
ད་རེས་ཀྱི་ཚོགས་འདུ་དེ་རྒྱ་གར་དང་རྒྱ་ནག པ་ཀི་སི་ཐན་གསུམ་གྱི་འཐབ་འཛིང་གི་གཡུལ་ས་ཞིག་ཏུ་གྱུར་ཅིང་། གཡུལ་འཁྲུག་གི་ལག་ཆ་གཙོ་བོ་བོད་དང་ཇ་མུ་ཀ་ཤི་མིར་སོགས་ཆགས་ཡོད། ཚོགས་འདུ་དེར་གྲ་སྒྲིག་བྱེད་སྐབས་བལ་ཡུལ་གཞུང་གིས་བོད་མི་ཚོ་བལ་ཡུལ་མཆོད་བརྟེན་ལ་སྐོར་བར་འགྲོ་མི་ཆོག་པའི་བཀའ་རྒྱ་བཏང་འདུག འདི་ནི་ཚོགས་འདུའི་སྐབས་བོད་པ་ཚོའི་རྒྱ་ནག་ལ་ངོ་རྒོལ་རིགས་འགོག་ཆེད་ཡིན་མོད། བཀའ་ཁྱབ་འདིས་རྒྱ་ནག་ལ་ངོ་སྲུང་གི་ཡོད་པ་མ་ཟད། རྒྱལ་ཁབ་ནང་དུ་མི་རིགས་དབྱེ་འབྱེད་དང་ཆོས་དད་རང་དབང་ལ་རྡོག་རོལ་བཏང་བ་ཞིག་ཀྱང་ཆགས་ཡོད།
བལ་ཡུལ་ནང་བོད་མི་ཚོས་ཆབ་སྲིད་ལས་འགུལ་སྤེལ་རྒྱུ་ཕར་ཞོག ལོ་གསར་དང་ཞི་བདེའི་གཟེངས་རྟགས་དུས་དྲན་སོགས་ལ་འདུ་འཛོམས་ཀྱང་བྱེད་བཅུག་གི་མེད། བོད་མིར་གཅར་རྡུང་འཛིན་བཟུང་དང་དངུལ་ཆད་བཏང་བ་ཉུང་ཉུང་མིན་ལ། རྒྱལ་མཚམས་བརྒལ་ནས་སྐྱབས་བཅོལ་དུ་ཡོང་མཁན་ཚོ་ཕྱིར་རྒྱ་ལག་ཏུ་སྤྲད་པའང་ཐེངས་གཅིག་གཉིས་མིན། ཟླ་སྔོན་མའི་ནང་བོད་རང་སྐྱོང་ལྗོངས་ཀྱི་མགོ་གཙོ་བློ་བཟང་རྒྱལ་མཚན་བལ་ཡུལ་ནང་སྐོར་སྐྱོད་སྐབས། བོད་མི་ཚོར་སྔར་ལས་དམ་དྲག་བྱ་རྒྱུ་དང་མ་འོངས་པར་བོད་མི་ཚོར་སྐྱབས་བཅོལ་ལམ་ཁ་ཙམ་ཡང་སྤྲོད་རྒྱུ་མིན་པའི་ཁས་ལེན་དམ་བཅའ་བྱས་ཡོད།
བལ་ཡུལ་གྱི་བྱེད་སྟངས་འདི་དག་གིས་བལ་གཞུང་གི་བྱ་སྤྱོད་གཞན་མང་པོ་ཞིག་ཀྱང་དྲན་བསླངས་སོང་། ༡༩༤༩ ལོར་བལ་ཡུལ་མཉམ་འབྲེལ་རྒྱལ་ཚོགས་ནང་ཞུགས་རྒྱུར་སྙན་ཞུ་ཕུལ་སྐབས། ༡༨༥༦ ལོར་བོད་དང་བལ་བོའི་བར་ཆིངས་ཡིག་བཞག་པ་དེ་བལ་བོ་རང་བཙན་རྒྱལ་ཁབ་ཅིག་ཡིན་པའི་སྒྲུབ་བྱེད་དཔང་རྟགས་སུ་བགྲངས་ཡོད། ང་དགུ་ལོར་བོད་ས་རྒྱ་ལག་ཏུ་ཤོར་བའི་སྔ་རྗེས་ལ་མཉམ་འབྲེལ་རྒྱལ་ཚོགས་ནང་བོད་དོན་གྲོས་ཆོད་འཇོག་སྐབས། བལ་གཞུང་གིས་བོད་པར་རྒྱབ་སྐྱོར་བྱས་མེད་པར། འདས་པའི་ལོ་རྒྱུས་ཐོག་བོད་རང་བཙན་ཡིན་པའང་མ་ཤེས་མདོག་མདོག་གིས་བར་གནས་སུ་བསྡད། དྲིན་ལན་ལོག་འཇལ་གྱི་བཤད་སྤྱོད་འདི་དག་གིས་ནམ་ཞིག་རང་གི་འཕོངས་ཤ་ཡང་ཕྱི་རུ་སློག་སྲིད།
