སྔགས་ཀྱི་གཞུང་ཆེན་ཁག་ལ་ཐོས་བསམ་སྒོམ་གསུམ་གནང་གལ་ཆེ།

དགའ་ལྡན་ཁྲི་རིན་པོ་ཆེ་མཆོག་ནས་༧གོང་ས་མཆོག་གིས་ཆབ་སྲིད་ཀྱི་དབང་ཆ་ཡོངས་རྫོགས་བོད་མི་མང་གིས་བདམས་པའི་སྲིད་སྐྱོང་ལ་སྐུ་དབང་རྩིས་སྤྲོད་གནང་རྗེས། ད་ལྟ་རི་བོ་དགེ་ལྡན་པ་སྤྱི་དང་སངས་རྒྱས་ཀྱི་བསྟན་པ་ཉམས་པ་སླར་གསོ་དང་མི་ཉམས་རྒྱུན་འཛིན་གྱི་ཐུགས་འགན་བཞེས་ནས་མཛད་འཕྲིན་བསྐྱངས་དང་སྐྱོང་མུས་ཡིན་ཞེས་གསུངས།

རྒྱུད་སྟོད་གྲྭ་ཚང་དུ་ཚོགས་བཞིན་པའི་རྗེ་ཙོང་ཁ་པ་ཆེན་པོ་མཆོག་གིས་འགྲེལ་པ་བཞི་སྦྲགས་བརྩམས་ཏེ་ལོ་ ༦༠༠ འཁོར་བའི་རྗེས་དྲན་དང་སྔགས་ཀྱི་བགྲོ་གླེང་དེ་རིང་ཉིན་རྒྱབ་ཆུ་ཚོད་ ༡།༠༠ སྟེང་མཇུག་བསྒྲིལ་བའི་མཛད་སྒོ་ཞིག་ཚོགས་ཡོད་ཅིང་། ཚོགས་མགོན་དུ་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་རྗེ་རྣམ་གཉིས། རི་བོ་དགེ་ལུགས་པའི་གྲྭ་ཚང་ཁག་གི་མཁན་པོ་ལས་ཟུར་རྣམ་པ་གཙོས་བགྲོ་གླེང་ནང་མཉམ་ཞུགས་གནང་མཁན་གྱི་དགེ་བཤེས་རྣམ་པ། རྒྱུད་སྟོད་ཀྱི་གྲྭ་མང་བཅས་ཁྱོན་མི་ ༧༠༠ འདུ་འཛོམས་གནང་སོང་།

སྐབས་དེར་དགའ་ལྡན་ཤར་རྩེའི་མཁན་རིན་པོ་ཆེ་བྱང་ཆུབ་ཆོས་ལྡན་མཆོག་ནས་བགྲོ་གླེང་གི་འཆར་སྣང་སྐོར་གསུངས་དོན། ལོ་འགའི་གོང་རྒྱ་ནག་གཞུང་གི་གོ་སྒྲིག་འོག་བོད་ཀྱི་དགའ་ལྡན་དགོན་པ་ཕྱག་བཏབ་ཏེ་ལོ་ ༦༠༠ འཁོར་བའི་དུས་དྲན་ཞིག་ཚོགས་ཡོད་ཀྱང་། ང་ཚོས་དུས་དྲན་དེ་སྲུང་གཙི་ཞུ་ཐུབ་མེད་སྟབས། དེ་མཚུངས་ག་རེ་བྱེད་དགོས་མིན་སྐོར་ལ་བསམ་བློ་གཏོང་སྐབས་རྗེ་རིན་པོ་ཆེ་མཆོག་གིས་ལམ་རིམ་ཆེན་མོ་ལྗགས་རྩོམ་མཛད་ནས་ལོ་ ༦༠༠ འཁོར་བའི་དུས་དྲན་དེ་འདས་ཟིན་ཡང་། དགའ་ལྡན་ཕྱག་བཏབ་རྗེས་དགའ་ལྡན་ལ་ལམ་རིན་ཆེན་མོའི་བཀའ་ཆོས་བསྩལ་ནས་ལོ་ ༦༠༠ འཁོར་བའི་དུས་སྟོན་དང་འབྲེལ་དགའ་ལྡན་ལ་ལམ་རིམ་ཆེན་མོའི་བགྲོ་གླེང་ཞིག་ཚོགས་ཏེ། རྗེ་རིན་པོ་ཆེའི་མཛད་རྗེས་ལ་བཀའ་དྲིན་རྗེས་དྲན་ཞུས་པ་དང་། ད་དུང་དེ་མཚུངས་མ་འོངས་པར་བཀའ་དྲིན་རྗེས་དྲན་ག་རེ་ཞུ་དགོས་མིན་ཐད་བཀའ་བསྡུར་གནང་སྐབས། རྗེ་རིན་པོ་ཆེ་མཆོག་གིས་གསང་བ་འདུས་པའི་འགྲེལ་པ་བཞི་སྦྲགས་མཛད་ནས་ལོ་ ༦༠༠ འཁོར་བའི་དུས་དྲན་ལོ་འདིར་འཁེལ་གྱི་ཡོད་སྟབས། རྗེས་དྲན་གྱི་འགྲོ་གྲོན་ཐད་ང་ཚོས་ནང་ཁུལ་གྲོས་བསྡུར་བྱེད་སྐབས་དཔལ་ལྡན་སྟོད་རྒྱུད་གྲྭ་ཚང་གིས་འགན་འཁུར་བླངས་ཏེ། ད་རེབ་བགྲོ་གླེང་འདི་སྤུས་དག་པོ་ཞེ་དྲག་བྱུང་ཡོད་པ་མ་ཟད། ༧ གོང་ས་མཆོག་ཀྱང་ཐུགས་དགྱེས་ཚོར་ཆེན་པོ་བྱུང་སྟེ་དབུ་འབྱེད་མཛད་སྒོར་ཕེབས་ཏེ་ཐུགས་སྨོན་དང་བཀའ་སློབ་ཟབ་མོ་ཕེབས་པ་དེ་རྫོགས་ལྡན་གསར་པའི་བསྐལ་བཟང་ཞིག་ཀྱང་ཆགས་ཡོད། ཅེས་གསུངས་སོང་།

ཁོང་གིས་མུ་མཐུད་མ་འོངས་རྗེས་དྲན་ཞུ་ཕྱོགས་ཐད་གསུངས་དོན། ང་ཚོས་རྗེ་རིན་པོ་ཆེ་མཆོག་ལ་ད་དུང་རྗེས་དྲན་ཞུ་རྒྱུ་མང་པོ་ཞིག་ལྷག་ཡོད། དེ་ཡང་ ༢༠༡༩ ལོར་འཇམ་མགོན་བླ་མ་ཙོང་ཁ་པ་ཆེན་པོ་མཆོག་དགོངས་པ་གཞན་དོན་དུ་གཤེགས་ནས་དགའ་ལྡན་ལྔ་མཆོད་མགོ་བཙུགས་ཏེ་ལོ་ ༦༠༠ འཁོར་གྱི་ཡོད་སྟབས། དགེ་ལུགས་སྤྱི་ཐོག་ནས་ལས་འགུལ་ཞིག་སྤེལ་རྒྱུའི་གྲོས་ཆོད་བཞག་ནས་བསམ་བློ་གཏོང་གི་ཡོད་ཀྱང་། དགེ་ལུགས་སྤྱི་ཐོག་ནས་ལས་འགུལ་སྤེལ་ཐུབ་ན་རབ་ཡིན་ཡང་། གལ་ཏེ་དེ་མ་འབྱུང་ཚེ་རི་བོ་དགེ་ལྡན་པའི་ཆོས་བརྒྱུད་འཛིན་མཁན་གྱི་གདན་ས་དང་གྲྭ་ཚང་མང་པོ་ཡོད་སྟབས། གྲྭ་ཚང་སོ་སོས་ལས་འགུལ་གནང་ན་ཏན་ཏན་ཚགས་ཚུད་ཞིག་དང་གྲུབ་ཐུབ་རྒྱུ་ཡོད་པ་ཞིག་ཆགས་ཀྱི་ཡོད་པར་བརྟེན། དགེ་འདུན་བསྡུས་མང་གི་ཐུགས་ལ་བཅང་ན་ཐུགས་མཐུན་པའི་ཐོག་ནས་ཕྱག་ལས་བསྒྲུབ་རྒྱུ་ཡོང་གི་རེད་བསམ་གྱི་འདུག ཅེས་སོགས་གསུངས་སོང་།

དེའི་རྗེས་གདན་ས་དང་གྲྭ་ཚང་ཁག་གི་མཁན་ཟུར་ ༩ ཡིས་ད་རེབ་ཀྱི་བགྲོ་གླེང་ཐོག་གི་འཆར་སྣང་གསུངས་རྗེས། རྒྱུད་སྟོད་གྲྭ་ཚང་གི་མཁན་པོ་བྱ་རྡོ་རིན་པོ་ཆེ་མཆོག་གིས་གསུངས་དོན། རྒྱུད་པའི་དགེ་འདུན་རྣམ་པས་བགྲོ་གླེང་གནང་ཡུལ་དེ་རྩ་རྒྱུད་གཙོར་འདོན་བྱས་ཏེ་གསུངས་བ་དེ་གང་ནས་བྱུང་ངམ་ཞེ་ན། ཐུབ་པ་སངས་རྒྱས་བཅོམ་ལྡན་འདས་རྒྱལ་བ་རྡོ་རྗེ་འཆང་གི་སྐུའི་ཞལ་རྣམ་པར་བསྟན་ནས་མར་གསུངས་པ་ཞིག་ཡིན་པ་མ་ཟད། བཤད་རྒྱུད་ཆེན་པོ་དྲུག་བསྩལ་ཡོད་པ་རེད། དེ་འདྲའི་རྒྱན་ཉེར་བརྒྱད་ཀྱིས་མཚོན་པའི་བཤད་རྒྱུད་ཆེན་པོ་གོ་ཁག་པོ་ཡོད་པ་དེ་ཤིང་རྟ་ཆེན་པོ་ཀླུ་སྒྲུབ་ཡབ་སྲས་ཀྱིས་གཞུང་ལུགས་གཏན་འབེབས་གནང་བའི་སྒོ་ནས་འགྲེལ་བ་སྒྲོན་གསལ་མཚོན་པའི་ཟབ་ཅིང་རྒྱ་ཆེ་བ་འདི་འདྲ་ཞིག་སྤྲད་གནང་ཡོད་སྟབས། བོད་ཀྱི་ལོ་ཙྭ་བ་ཚོས་བསྒྱུར་གནང་བ་མ་ཟད་འཇམ་མགོན་བླ་མ་ཙོང་ཁ་པ་ཆེན་མོ་མཆོག་གིས་དངོས་གནས་དྲང་གནས་དག་ཐེར་ལེགས་པར་མཛད་ནས་གཏན་ལ་ཕབ་པ་དེ། དེང་རབས་ཀྱི་འཛམ་གླིང་ནང་ཡོད་པའི་སྙན་གྲགས་ཅན་གྱི་མཁས་པ་ཚོའི་རྩོམ་རིགས་ཀྱི་རྩོམ་སྒྱུར་དང་རྩོམ་རྩལ་ཐོག་ནས་བཤད་ན། དེང་དུས་ཀྱི་མཁས་པ་ཚོས་ཡིད་འཕྲོག་ཡུལ་གྱི་ལོ་ ༦༠༠ སྔོན་དུ་བོད་ལ་མཁས་པ་དེ་འདྲ་ཞིག་བྱུང་བ་དེ་དངོས་གནས་སྤོབས་པ་སྐྱེ་འོས་པ་ཞིག་ཆགས་ཡོད། ད་རེབ་བགྲོ་གླེང་འདི་ལྟ་བུ་ཞིག་ཚོགས་ཐུབ་པ་དེ་རྒྱུ་མེད་རྐྱེན་མེད་ཅིག་མིན་པར་སྔོན་བྱོན་དང་ད་ལྟ་བཞུགས་ཡོད་པའི་བསྟན་འཛིན་གྱི་སྐྱེས་བུ་རྣམས་ཀྱི་བཀའ་དྲིན་དང་། སྒོས་སུ་མི་ཡུལ་གྱི་ལུང་པ་འདི་འདྲ་ཞིག་ལ་གནམ་དང་ས་མ་གཏོགས་གྲོགས་པོ་མེད་མཁན་གྱི་ས་ཆར་འདིར། ད་རེབ་འདི་འདྲ་ཞིག་གནང་ཐུབ་པ་དེ་ནི་༧གོང་ས་མཆོག་གིས་ཐུགས་རྗེའི་བཀའ་དྲིན་ལ་བརྟེན་ནས་བྱུང་བ་ཞིག་ཡིན། ཞེས་སོགས་གསུངས་སོང་།

བྱང་རྩེ་ཆོས་རྗེ་བློ་བཟང་བསྟན་འཛིན་མཆོག་གིས་གསུངས་དོན། སྔ་མོ་ཡིན་ན་གསང་བ་འདུས་པ་སོགས་ཀྱི་བསྟན་ཆོས་དག་སོ་སོས་སྦྱང་དགོས་པ་ཙམ་མ་གཏོགས་གཞན་གྱིས་སློབ་ཁྲིད་བྱེད་མཁན་ཉུང་ཉུང་ཡིན། ད་ལྟ་སྔ་མོ་དང་མི་འདྲ་བར་དཔེ་ཆ་ཁྲིད་མཁན་སོགས་ཕྱོགས་གང་ཅིའི་ཐད་ནས་གྲྭ་ཚང་གིས་མཐུན་རྐྱེན་སྦྱོར་གྱི་ཡོད་སྟབས། རྒྱུད་ཀྱི་གཞུང་ལ་འཆད་ཉན་བྱས་པའི་འབྲས་རྟགས་འདྲ་པོ་བགྲོ་གླེང་སྐབས་དྲི་བ་སྐུལ་སྟངས་དང་ལན་རྒྱག་སྟངས་སོགས་ཧ་ལས་པ་ཡག་པོ་ཞེ་དྲག་འདུག དེ་ནི་ང་ཚོས་སློབ་གཉེར་བྱེད་དགོས་དོན་ཡང་དེ་རང་ཆགས་ཡོད་སྟབས། ཚང་མས་དཔེ་མི་སྲིད་པའི་ཡག་པོ་གནང་འདུག མ་འོངས་པར་ད་དུང་སྔགས་ཀྱི་ས་ལམ་ལྟ་དགོས་པ་མ་ཟད། གཙོ་བོ་འཇམ་མགོན་བླ་མ་ཙོང་ཁ་པ་ཆེན་པོ་མཆོག་གི་གསུང་རིམ་ལྔ་གསལ་སྒྲོན་དང་རིམ་ལྔ་རྟེན་གཙོ་སོགས་སྔགས་ཀྱི་གཞུང་ཆེན་མོ་དེ་ཚོར་ཐོས་བསམ་སྒོམ་གསུམ་གནང་རྒྱུ་གལ་ཆེན་པོ་ཆགས་ཡོད། དེ་བཞིན་རྗེ་ཙོང་པ་ཆེན་པོ་མཆོག་ལ་གངས་ཅན་ཤིང་རྟའི་སྲོལ་བྱེད་ཙོང་ཁ་པ་ཞེས་མཚན་ཐོགས་དོན་ཡང་སྔགས་ཀྱི་རིམ་གཉིས་གནས་མཆོག་གཡོ་ལྷད་མེད་པར་གསལ་བར་བྱེད་པ་དང་། རྣམ་རིག་གི་ལྟ་བ་དེ་གཞན་དང་མི་འདྲ་བ་ཞིག་ཡོད་སྟབས་མཚན་དེ་ལྟར་ཐོབ་ཡོད། ཅེས་སོགས་གསུངས་སོང་།

ཤར་རྩེ་ཆོས་རྗེ་མཆོག་གིས་གསུངས་དོན། སངས་རྒྱས་ཀྱི་བསྟན་པ་ལ་ཤེས་ནས་དད་པ་ཐོབ་དགོས་སྟབས། ཚད་མའི་གཞུང་དེ་དག་ལ་ཉིན་གཅིག་གཉིས་མིན་པར་དགེ་བའི་བཤེས་གཉེན་ལ་གཏུགས་དགོས་པ་མ་ཟད། ལོ་དང་ལོ་བསྟུད་ནས་རྩོད་པ་རྩོད་ནས་དགག་བཞག་སྤོང་གསུམ་གནང་རྒྱུ་དེ་གལ་ཆེན་པོ་ཆགས་ཡོད། དེ་བཞིན་ཆོ་ག་ཕྱག་ལེན་དག་མི་ཉམས་རྒྱུན་འཛིན་བྱ་རྒྱུ་གལ་ཆེན་པོ་ཆགས་ཡོད། གསང་བ་འདུས་པའི་ཆོ་ག་ཕྱག་ལེན་གཙོས་ལྷ་ ༣༢ དེ་དག་གི་ཞལ་ངོ་ཆོད་པ་ཡིན་ན། སྔགས་ཀྱི་ཉམས་ལེན་ལ་ཕན་ཐོགས་ཡོད་སྟབས། གསང་བ་འདུས་པའི་འགྲེལ་པ་བཞི་སྦྲགས་ལ་སོགས་པར་ཐོས་བསམ་སྒོམ་གསུམ་གནང་ནས་སྐྱེས་ཆེན་དམ་པ་ཚོའི་བཀའ་དྲིན་རྗེས་དྲན་ཞུ་ཐུབ་པ་བྱ་དགོས་པ་མ་ཟད། ང་ཚོས་༧རྒྱལ་དབང་སྐུ་ཕྲེང་ཡོངས་རྫོགས་ལ་རྗེས་དྲན་ཞུ་མ་ཐུབ་པ་ཡིན་ཡང་། དུས་དང་རྣམ་པ་ཀུན་ཏུ་༧གོང་ས་སྐྱབས་མགོན་ཆེན་པོ་སྐུ་ཕྲེང་ ༡༤ པ་ཆེན་མོ་མཆོག་ལ་བཀའ་དྲིན་རྗེས་དྲན་ཞུ་རྒྱུ་དེ་གལ་འགངས་ཆེན་པོ་ཆགས་ཡོད། ཅེས་སོགས་གསུངས་སོང་།

མཇུག་ཏུ་དགའ་ལྡན་ཁྲི་ཆེན་ཐུབ་བསྟན་ཉི་མ་རིན་པོ་ཆེ་མཆོག་གིས་གསུངས་དོན། ༡༩༥༩ ལོར་༧གོང་ས་མཆོག་རྒྱ་གར་དུ་བཙན་བྱོལ་ལ་ཕེབས་རྗེས། བོད་བསྟན་སྲིད་མི་རིགས་ཆེད་སྐུ་ངལ་རབ་དང་རིམ་པ་མང་པོ་ཞིག་བསྐྱོན་ནས་མཐར། ༢༠༡༡ ལོར་ཆབ་སྲིད་ཀྱི་དབང་ཆ་ཡོངས་རྫོགས་བོད་མི་མང་གིས་བདམས་པའི་སྲིད་སྐྱོང་ལ་རྩིས་སྤྲོད་གནང་རྗེས། ད་ལྟ་རི་བོ་དགེ་ལྡན་པ་སྤྱི་དང་སངས་རྒྱས་ཀྱི་བསྟན་པ་ཉམས་པ་སླར་གསོ་དང་མི་ཉམས་རྒྱུན་འཛིན་གྱི་ཐུགས་འགན་བཞེས་ནས་མཛད་འཕྲིན་བསྐྱངས་དང་སྐྱོང་མུས་ཡིན། དེ་སྔོན་༧གོང་ས་མཆོག་གིས་དགུང་ལོ་ ༩༣ བར་བསྟན་པ་སྤྱི་དང་བོད་མི་རིགས་ཆེད་སྐུ་ངལ་བསྐྱོན་རྒྱུའི་ཞལ་བཞེས་དང་དེའི་རྗེས་དགུང་ལོ་བགྲེས་པོ་ཆགས་ནས་ཕྱག་ལས་གནང་ཐུབ་རྒྱུ་དཀའ་ལས་ཁག་པོ་ཡོད་པའི་བཀའ་སློབ་ཟབ་མོ་ཡང་ཡང་ཕེབས་ཡོད་སྟབས། ༧གོང་ས་མཆོག་གིས་དགུང་ལོ་ ༩༣ བར་གྱི་མཛད་འཕྲིན་དེ་དག་བསྒྲུབ་རྒྱུ་ཉག་ཅིག་ཡིན་པར་བརྟེན། གཅིག་ནས་ང་ཚོར་བསོད་ནམས་ཡག་པོ་ཞིག་དགོས་པ་དང་། གཉིས་ནས་གདུལ་བྱ་ཚོས་བཀའ་སྲུང་ཅི་སྒྲུབ་ཞུས་ཚེ་རྒྱལ་བ་དགྱེས་པའི་མཆོད་སྤྲིན་དུ་འགྱུར་རྒྱུ་རེད། ཅེས་སོགས་གསུངས་རྗེས། རྒྱུད་སྟོད་གྲྭ་ཚང་གི་བླ་མ་དབུ་མཛད་མཆོག་གིས་ཐུགས་རྗེ་ཆེའི་གསུང་བཤད་གནང་བ་དང་། དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་གི་ཆོས་རྗེ་རྣམ་གཉིས་གཙོས། བགྲོ་གླེང་བ་རྣམས་ལ་སངས་རྒྱས་ཀྱི་སྐུ་འདྲ་རེ་བསྩལ་སོང་།

གསར་འགོད་པ། དོན་གྲུབ།