ཁ་སང་རྒྱ་གཞུང་གིས་རེབ་གོང་ཁུལ་ཐོག་ནས་ཡིན་པའི་སློབ་འབྲིང་སློབ་མ་རྡོ་རྗེ་རིན་ཆེན་ལཊ་བཙོན་འཇུག་དུས་ཡུན་མ་རྫོཊ་གོང་ཀློད་གྲོལ་བཏང་ཡོད་འདུག
འདི་གར་བསོད་ནམས་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༡༢ ལོར་རེབ་གོང་ཁུལ་གྱི་སློབ་མས་གཙོས་ས་གནས་སེར་སྐྱ་མི་མང་གིས་རྒྱ་གཞུང་གི་བཙན་གནོན་ལ་ངོ་རྒོལ་བྱས་ཏེ་རང་ལུས་མེར་བསྲེགས་ཀྱི་གནས་ཚུལ་རིམ་པར་བྱུང་ཡོད་པ་དང་། སྐབས་དེར་རྒྱ་གཞུང་གིས་ཆབ་སྲིད་ཀྱི་ཉེས་མིང་སྣ་ཚོགས་བཙུགས་ཏེ་སེར་སྐྱ་མང་པོ་འཛིན་བཟུང་བཙོན་འཇུག་བྱས་ཡོད་པ་ལྟར། ངོ་རྒོལ་ནང་མཉམ་ཞུགས་བྱས་པ་དང་རང་ལུས་མེར་བསྲེགས་དང་འབྲེལ་བ་ཡོད་པ། དེ་བཞིན་༼གངས་སྲོལ་རྒྱུན་རིག་གནས་ཞབས་ཞུ་ཚོགས་པ༽བཙུགས་པ་བཅས་ཀྱི་ཉེས་མིང་འོག སློབ་འབྲིང་སློབ་མ་རྡོ་རྗེ་རིན་ཆེན་ནམ་སྨྱུག་མིང་ཞོགས་སྤྲིན་ཞུ་བ་འཛིན་བཟུང་བྱས་ཏེ། འདས་ལོའི་ཕྱི་ཟླ་ ༢ པའི་ཟླ་མགོ་ཙམ་དུ་ཁོང་ལ་ལོ་ ༢ དང་ལོ་ཕྱེད་ཀྱི་ཁྲིམས་ཐག་བཅད་དེ། མཚོ་སྔོན་ཞིང་ཆེན་ཅན་ཤིན་བཙོན་ཁང་ཞེས་པའི་ནང་བཅུག་ཡོད་ཀྱང་། ཁ་སང་ཕྱི་ཚེས་ ༢ ཉིན་ཁོང་ཀློད་གྲོལ་བཏང་ཡོད་འདུག
རྡོ་རྗེ་རིན་ཆེན་ལགས་ནི་རྨ་ལྷོ་ཁུལ་ཐུན་རིན་རྫོང་མདོ་བ་ཁྱི་ལྔ་སྡེ་བ་ནས་ཡིན་ཞིང་། ཕྱི་ལོ་ ༢༠༡༢ ལོར་༼གངས་སྲོལ་རྒྱུན་རིག་གནས་ཞབས་ཞུ་ཚོགས་པ༽ཆེད་འཛུགས་བྱས་ཏེ། བོད་ཀྱི་སྐད་ཡིག་རྒྱུན་འཛིན་དང་འབྲོག་པའི་འཚོ་ཐབས་རྒྱུན་འཁྱོངས་བྱེད་པར་སྐུལ་འདེད། རྒན་བཀུར་ཆུང་བྱམས་དང་མཐུན་སྒྲིལ་རོགས་རེས་སོགས་བོད་ཁུལ་གྱི་སློབ་གསོ་ཡར་སྐུལ་བྱེད་པའི་ལས་འགུལ་མང་པོ་སྤེལ་ཡོད་འདུག
གསར་འགོད་པ། པདྨ་མཚོ།
