སྒྱུ་རྩལ་བ་རྟ་མགྲིན་ཚེ་བརྟན་ལགས་ཀྱི་༼ཡངས་པའི་ལམ༽ཞེས་པའི་གླུ་གཞས་བརྙན་འཁོར་གཉིས་པ་དབུ་འབྱེད་ཐོག སྤྱི་འཐུས་ཚོགས་གཙོ་མཆོག་གིས་གླུ་གཞས་སྒྱུ་རྩལ་གྱིས་བོད་དོན་འཐབ་རྩོད་ལ་ནུས་པ་ཆེན་པོ་འདོན་ཐུབ་གསུངས།
དེ་རིང་སྔ་དྲོའི་ཆུ་ཚོད་ ༡༡ ཡོལ་ཙམ་ལ་དྷ་ས་མེག་གྷན་བོད་ཀྱི་གསོལ་མགྲོན་ཁང་དུ། བོད་རིགས་གཞས་པ་དང་ཁབ་གཙགས་རི་མོ་བ་རྟ་མགྲིན་ཚེ་བརྟན་ལགས་ཀྱི་༼ཡངས་པའི་ལམ༽ ཞེས་པའི་ཆེད་སྒྲིག་བརྙན་འཁོར་གཉིས་པ་དབུ་འབྱེད་གནང་ཡོད་པ་དང་། སྐུ་མགྲོན་གཙོ་བོ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དབུས་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་དང་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་སྤྲོ་ཚིགས་ཆོས་གྲགས་ལགས། དེ་བཞིན་དྷ་ས་ཁུལ་གྱི་བོད་རིགས་གཞས་པ་གཞས་མ་ཁག་ཅིག་བཅས་འཛོམས་སོང་།
དབུ་འབྱེད་ཀྱི་ཐོག་མར་དགུ་བཅུ་གསུམ་ལས་འགུལ་ཚོགས་པའི་དྲུང་ཆེ་ཟུར་པ་རྨེའུ་དཀོན་རྒྱམ་ལགས་ཀྱིས། རྟ་མགྲིན་ཚེ་བརྟན་ལགས་ཀྱིས་བཙན་བྱོལ་ནང་ ༼ཡངས་པའི་ལམ༽ཆེད་སྒྲིག་བརྙན་འཁོར་དང་པོ་དང་གཉིས་པ་འགྲེམས་སྤེལ་བྱས་ཤིང་། ད་ལྟའི་བར་གླུ་གཞས་དང་རི་མོའི་སྒྱུ་རྩལ་ལ་བརྟེན་ནས་བོད་དོན་འཐབ་རྩོད་ཀྱི་ལས་འགུལ་སྤེལ་ཏེ། བོད་མིའི་སྤྱི་ཚོགས་ཁྲོད་དགའ་མོས་དང་བག་ཆགས་བཟང་པོ་བཞག་ཡོད་སྐོར་སོགས་ངོ་སྤྲོད་གནང་རྗེས། སྐུ་མགྲོན་གཙོ་བོས་བརྙན་འཁོར་དབུ་འབྱེད་གནང་སོང་།
དེའི་རྗེས་སྒྱུ་རྩལ་བ་རྟ་མགྲིན་ལགས་ཀྱིས་ཁོང་རང་གི་ཆེད་སྒྲིག་བརྙན་འཁོར་དང་འབྲེལ་བའི་གཏམ་བཤད་གནང་སྐབས། ཁོ་བོ་བོད་ཀྱི་གནས་སྟངས་སྒྱུ་རྩལ་གྱི་ལམ་ནས་ངོ་སྤྲོད་བྱེད་ཐུབ་པར་ཡིད་ཆེས་བྱེད་མཁན་ཞིག་ཡིན་སྟབས། ཁོ་བོའི་ཆེད་སྒྲིག་བརྙན་འཁོར་ཐོག་མ་༼ཡངས་པའི་ལམ༽ཞེས་པ་ནས་མགོ་བཙུགས་ཏེ། གཞིས་བྱེས་བོད་མི་ཡོངས་ཀྱི་རེ་བ་སྟེ་༧གོང་ས་མཆོག་བོད་དུ་གདན་འདྲེན་ཞུས་ཏེ་གཞིས་བྱེས་ལྷན་འཛོམས་བྱུང་ཐུབ་པའི་རེ་འདུན་འོག ཆེད་སྒྲིག་བརྙན་འཁོར་གཉིས་པ་དང་གསུམ་པའང་མིང་དེ་བཏགས་ཡོད། དེང་སང་བོད་གཞས་བྱེས་གཉིས་སུ་གཞས་ཀྱི་གདངས་དང་ཚིག་ཕབ་བཤུས་བྱེད་པ་དང་། ལྷག་པར་དུ་རྒྱ་ནག་གི་གཞས་ཀྱི་གདངས་དེ་ཚོ་བོད་གཞས་ནང་ཕབ་བཤུ་བྱེད་བཞིན་པ་འགོག་ཆེད། ༼ཡངས་པའི་ལམ༽བརྙན་འཁོར་གཉིས་ཀྱི་ནང་ཁྱད་ཆོས་གཙོ་བོ་གཞས་ཀྱི་གདངས་དང་ཚིག་གཉིས་ཀ་གསར་པ་ཡིན་པ་མ་ཟད། ཚང་མ་བོད་དོན་དང་འབྲེལ་བ་ཡོད་པ་རྐྱང་རྐྱང་ཡིན་སྐོར་བརྗོད་སོང་།
སྤྲོ་ཚིགས་ཆོས་གྲགས་ལགས་ཀྱིས། གླུ་གཞས་དེ་ང་ཚོའི་ཉིན་རེའི་འཚོ་བའི་དགོས་མཁོ་གལ་ཆེན་ཞིག་ཆགས་ཡོད་པ་དང་། འདས་པའི་ལོ་ངོ་ ༣༠ བོད་ཀྱི་ལོ་རྒྱུས་དང་ལྷག་པར་དུ་བོད་ཀྱི་རྩ་དོན་འཐབ་རྩོད་དང་འབྲེལ་བའི་ལོ་རྒྱུས་ནང་བལྟས་ན། རྩོམ་པ་པོ་དང་གཞས་པ་ཚོས་དམིགས་བསལ་གྱིས་ནུས་པ་ཐོན་ཡོད་པ་རེད། ཅེས་དང་། གླུ་གཞས་ལ་མཚོན་ན་གལ་ཆེ་ཤོས་དེ་སྒྱུ་རྩལ་གྱི་ཆ་དེ་ཡིན་སྟབས། བོད་མི་རིགས་ཀྱི་གླུ་གཞས་སྒྱུ་རྩལ་ཞིག་ཡིན་ན་ངེས་པར་དུ་མི་རིགས་རང་གི་རིག་གནས་དང་སྒྱུ་རྩལ་རྨང་གཞིར་བཞག་སྟེ། གསར་གཏོད་ཀྱི་ཁྱད་ཆོས་འདོན་ཐུབ་པ་ཡིན་ན་དངོས་གནས་ཡག་པོ་ཡོད་པ་རེད། མི་རིགས་ཀྱི་ཁྱད་ཆོས་དང་ཁ་བྲལ་བ་ཡིན་ན། མི་རིགས་དེའི་གླུ་གཞས་སྒྱུ་རྩལ་ལ་ཕན་ཐོགས་ཡོད་པ་ཞིག་ཆགས་ཀྱི་མ་རེད་བསམ་གྱི་ཡོད། ཅེས་བརྗོད་སོང་།
དེ་རྗེས་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་བོད་ཀྱི་སྒྱུ་རྩལ་བ་ཚོས་ཀྱང་ཐོག་མར་རང་གི་སྐད་ཡིག་ལ་རང་སྐྱ་འཕེལ་བ་ཞིག་བཟོ་དགོས་སྐོར་བརྗོད་དོན། བཙན་བྱོལ་གྱི་གཞས་པ་དང་རྩོམ་པ་པོ། མི་ཕལ་བ་སུ་ཞིག་ཡིན་ནའང་
བོད་སྐད་ཡིག་ཐོག་ལ་ཤུགས་བརྒྱབ་སྟེ། ང་ཚོས་སྐད་ཡིག་གི་ཐོག་ལ་གོམ་པ་རྒྱག་དགོས་བ་དེ་ཧ་ཅང་གལ་ཆེན་པོ་རེད། ང་ཚོས་རང་སྐད་ནང་བསྲེས་ལྷད་མང་པོ་བྱས་ཏེ་རྐང་པ་གཉིས་སྟེང་ལངས་ཐུབ་རྒྱུ་ཡིན་ཟེར་ན། རྩོམ་པ་པོ་དང་གཞས་པ། གཞུང་ཞབས་པ་སོགས་སུ་ཞིག་ཡིན་ནའང་དཀའ་ལས་ཁག་པོ་རེད་བསམ་གྱི་འདུག ང་ཚོ་སུ་དང་སུ་ཡིན་ནའང་ཐོག་མར་རང་གི་སྐད་ཡིག་ཐོག་སྲ་ཐག་ཐག་ཅིག་ཆགས་རྒྱུ་ཧ་ལས་པའི་གལ་ཆེན་པོ་རེད། བོད་ནང་ལྟ་བུ་ཡིན་ན། རང་གི་སྐད་ཡིག་ཐོག་ཤུགས་བརྒྱབ་སྟེ་དེབ་སྨྱུག་དང་མེ་མདའ་གཉིས་ཤུགས་གང་ཆེ་བལྟ་བའི་དུས་སྐབས་ཤིག་ཏུ་སླེབ་ཡོད། བཙན་བྱོལ་སྤྱི་ཚོགས་ནང་བཀག་སྡོམ་བྱེད་མཁན་སུ་ཡང་མེད་སྟབས། ང་ཚོས་དང་པོར་བོད་སྐད་ཡིག་གི་རྨང་གཞི་གཏིང་སྟེ་དེ་ནས་རིམ་གྱིས་སྒྱུ་རྩལ་གྱི་ལམ་བུ་བདམ་ན་ལས་སླ་བོ་ཡིན་རྒྱུ་རེད་བསམ་གྱི་འདུག ཅེས་བརྗོད་སོང་།
མཇུག་ཏུ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུངས་དོན། ཁྱེད་རང་དང་ཁྱེད་རང་འདྲ་བའི་གང་ཟག་ག་ཚོད་མང་བ་ཡོད་ན་དེ་ཙམ་གྱིས་ང་ཚོའི་རྩ་དོན་ལ་ཕན་གྱི་འདུག ལྷག་པར་དུ་གཞས་ཀྱི་སྒྱུ་རྩལ་འདིའི་ཐོག་ནས་གཞོན་སྐྱེས་མང་པོ་ཞིག་གི་བསམ་བློར་འགྱུར་བ་གཏོང་ཐུབ་པའི་གནས་བབ་ཅིག་ཆགས་ཀྱི་འདུག སྤྱི་ཡོངས་ཀྱི་གནས་སྟངས་ལ་ལྟ་སྐབས། ང་ཚོ་ཚོགས་འདུ་འདྲ་བོ་ཚོགས་སྐབས་དེ་ལ་ཡོང་མཁན་ལོ་རྒན་པ་རྐྱང་རྐྱང་མ་གཏོགས་གཞོན་སྐྱེས་ཞེ་དྲག་མི་འདུག གཞས་ཟེར་དུས་རང་བཞིན་གྱིས་གཞོན་སྐྱེས་མང་པོ་ཞེ་དྲག་ཡོང་གི་ཡོད་སྟབས། གཞས་ཀྱི་ནང་ ཆབ་སྲིད་དང་འབྲེལ་བ་ཡིན་ན་རང་བཞིན་གྱིས་གཞས་ཚིག་ལ་བསམ་བློ་གཏོང་དགོས་པའི་གནས་སྟངས་ཤིག་ཆགས་ཀྱི་ཡོད་སྟབས། གཞས་ཀྱི་བརྒྱུད་ལམ་དེ་ཡང་ཕན་ཐོགས་ཆེན་པོ་ཞེ་དྲག་ཅིག་ཆགས་ཀྱི་ཡོད་པ་རེད། ང་ཚོའི་སྤྱི་ཚོགས་ནང་ལས་འགུལ་ལ་རྣམ་གྲངས་མང་པོ་ཡོད་པ་རེད། ཁག་ཅིག་གི་བསམ་བློའི་ནང་ལས་འགུལ་ཟེར་དུས་ལམ་ཀར་ཐོན་ནས་སྐད་རྒྱག་པ་གཅིག་པུ་ཙམ་མ་གཏོགས་གཞན་པ་དེ་ཚོ་ལས་འགུལ་དུ་མི་བརྩི་བ་འདྲ་བོ་ཡོད་པ་རེད། ཡིན་ནའང་། ཆབ་སྲིད་དང་འབྲེལ་བའི་གཞས་ཚིག་རྩོམ་པ་དང་གཏོང་བ་སོགས་ནི། ལས་འགུལ་གྱི་ནང་ནས་གལ་ཆེ་ཤོས་ཤིག་དང་ནུས་པ་ཆེ་ཤོས་ཤིག་ལ་ངོས་འཛིན་བྱེད་ཀྱི་ཡོད་སྟབས། མུ་མཐུད་དེ་བོད་དོན་དང་འབྲེལ་བའི་ལས་འགུལ་འདི་རིགས་སྤེལ་རོགས་གནང་ཞུ་རྒྱུ་དང་། ང་ཚོ་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཁྱེད་རང་གིས་ད་ལྟ་བར་དུ་བོད་ དོན་ཆེད་ཕྱག་ལས་གང་གནང་བཞག་པ་དང་གང་གནང་བཞིན་པ། མ་འོངས་གནང་འཆར་ག་རེ་ཡོད་པ་ཚང་མར་ཡི་རང་བསྔགས་བརྗོད་ཞུ་བཞིན་ཡོད། ཅེས་སོགས་གསུངས་སོང་།
སྒྱུར་རྩལ་པ་རྟ་མགྲིན་ནི་ཕྱིའི་ལུས་གཟུགས་དང་ནང་སྤྱོད་པ། ལས་དོན་བྱེད་ཕྱོགས་སོགས་ཕྱོགས་མང་པོ་གཅིག་ནས་ངའི་ཆེས་བློ་ལ་འགྲོ་ཤོས་ཀྱི་བཙན་བྱོལ་གཞས་པ་འམ་སྒྱུ་རྩལ་པ་གཅིག་དེ་ཡིན། ངས་རྒྱུན་དུ་ཁོང་ལ་གུས་བརྩི་དང་གང་ནུས་ཀྱི་རྒྱབ་སྐྱོར་ཡང་ཞུ་ཡི་ཡོད། འོན་ཀྱང་ད་ཐེངས་ཀྱི་ཁོང་གི་གླུ་གཞས་འོད་སྡེར་དབུ་འབྱེད་ཀྱི་མཛད་སྒོའི་སྐུ་མགྲོན་འབོད་ཕྱོགས་དེས་ངའི་བློ་ལ་ཐེ་ཚོམ་དང་་་་བློ་ཕམ་ཞིག་ཀྱང་ངང་གིས་སྐྱེད་སོང། བཙན་བྱོལ་སྤྱི་ཚོགས་སུ་ཆོལ་ཁ་དང་ཕྱོས་རིས་འཐེན་འཁྱེར་གྱི་ནད་ཡམས་ཆེན་པོ་གཅིག་ཡོད་པ་དེ་ཡང་ད་ཐེངས་ཁོང་ལ་བགོས་པ་མིན་ནམ་སྙམ་ནས་སེམས་ཁྲལ་དང་བློ་ཕམ་བྱུང་སོང། སྔོན་མ་ངས་ཁོང་ནི་ན་ཚ་དེ་དྲི་ཙམ་ཡང་མ་འགོས་པའི་ཕོ་རབས་གཅིག་དང་སྒྱུ་རྩལ་པ་ངོ་མ་གཅིག་ལ་བརྩི་ཡི་ཡོད་ལ་དེ་ལྟར་ཡིན་པའི་ཡིད་ཆེས་ཀྱང་རྒྱ་ཆ་བརྒྱ་ཡོད། ད་ཐེངས་བློ་ཚབ་ཞིག་སྐྱེས་སོང་། འོན་ཀྱང་ཁོང་ལ་ནད་ཡམས་དེ་འགོས་མེད་པ་དང་མ་འགོས་པའི་རེ་བ་ཆེན་པོ་ཡོད། ངས་ཁོང་དུས་རྟན་དུ་སྔོན་མའི་མི་དེ་རང་དུ་གནས་པའི་སྨོན་ལམ་འདེབས། དེ་ལྟར་མ་བྱུང་ན་ངའི་སེམས་ནང་གི་སྒྱུར་རྩལ་པ་དར་མ་ཞིག་མེད་པར་གྱུར་སོང་བ་རེད། དཀོན་མཆོག་མཁྱེན་ཁོང་དེ་ལྟར་མིན་པར་སྨོན།