ཉེ་སྔོན་རྒྱ་ནག་གཞུང་གིས་སྲིད་གཞུང་གི་དྲ་བའི་ཆ་འཕྲིན་སྒྲིག་ཡིག་དོན་ཚན་ ༡༠ ཅན་ཞིག་བསྒྲཊ་ཏེ། གནས་ཚུལ་མ་སྤེལ་གོང་དུ་ཞིབ་བཤེར་ལས་དོན་ལེགས་པོ་སྒྲུབ་སྟེ་གསང་བ་ཤོར་བར་སྔོན་འགོག་དགོས་སྐོར་བསྒྲགས་འདུག
ཟླ་འདིའི་ཕྱི་ཚེས་ ༡ ཉིན་རྒྱ་ནག་གཞུང་གིས་༼རྒྱལ་སྲིད་སྤྱི་ཁྱབ་གཞུང་སྒྲུབ་ཁང་གི་འབྲེལ་ཡོད་སྲིད་གཞུང་གི་དྲ་བའི་ཆ་འཕྲིན་ནང་དོན་འདོན་སྤེལ་སྐོར་གྱི་བསམ་འཆར༽ཞེས་པའི་སྒྲིག་ཡིག་ཅིག་ཕྱིར་བསྒྲགས་བྱས་ཏེ། ས་གནས་སུ་དོན་རྐྱེན་ཆེན་པོ་བྱུང་ཚེ་ཁྲིམས་ལྟར་གོ་རིམ་ལྡན་པའི་སྒོ་ནས་སྤེལ་ཏེ། སྲིད་གཞུང་གི་ལངས་ཕྱོགས་གསལ་བསྒྲགས་བྱེད་དགོས་པ་དང་། གནས་ཚུལ་ཁྱབ་བསྒྲགས་བྱེད་པར་ཐོག་མར་དཔྱད་ཞིབ་དང་ཡར་ཞུ་སོགས་གསང་རྒྱའི་ཞིབ་བཤེར་ལས་དོན་ལེགས་པོ་སྒྲུབ་དགོས་ལ། དྲ་བའི་ནང་དོན་གསར་བསྒྱུར་ལ་ཁག་ཐེག་བྱེད་མི་ཐུབ་པའི་ལེ་ཚན་དག་དུས་ཐོག་ཏུ་གཅིག་སྡུད་ཀྱིས་སྟོབས་ཤུགས་གཅིག་ཏུ་བསྡུ་བའམ་སྒོ་གཏན་རྒྱུ་དང་། ཚད་ལྡན་མིན་པའི་དྲ་བ་རིགས་ལ་དུས་ཐོག་བསྒྱུར་བཅོས་དང་། འབྲེལ་ཡོད་འགན་ཁུར་པ་དང་ལས་བྱེད་མི་སྣར་འགན་འཁྲི་རྩད་གཅོད་གཏོང་རྒྱུ་ཡིན་སྐོར་གྱི་དོན་ཚན་ ༡༠ གཏན་འབེབས་བྱས་འདུག
སྒྲིག་ཡིག་དེའི་ནང་དུ་དོན་རྐྱེན་ཆེན་པོ་བྱུང་བའི་གནས་ཚུལ་རིགས་སྤེལ་སྟངས་ཐད། ས་གནས་རང་དང་སྡེ་ཚན་རང་དུ་གཏོགས་པའི་གློ་བུར་བའི་དོན་རྐྱེན་དང་། མྱུར་བར་ཐག་གཅོད་དགོས་པའི་དོན་རྐྱེན་བྱུང་ཚེ། ཁྲིམས་ལྟར་གོ་རིམ་ལྡན་པའི་ངང་དུས་ཐོག་ཏུ་སྲིད་གཞུང་དྲ་བ་བརྒྱུད་ནས་ཆ་འཕྲིན་གསལ་བསྒྲགས་དགོས་ཤིང་། ནང་དོན་བསྒྲགས་པ་དྲང་བདེན་དོན་དངོས་ཡིན་དགོས་པ་མ་ཟད། དོན་དག་འཕེལ་རིམ་དང་ལས་ཀའི་མྱུར་ཚད་དང་བསྟུན་དུས་ཐོག་ཏུ་ལས་རིམ་ཆ་འཕྲིན་དང་། སྲིད་གཞུང་གི་ལངས་ཕྱོགས་གསལ་བསྒྲགས་གནང་དགོས། ཞེས་དང་།
ཡང་ནང་དོན་ལ་ཚོད་འཛིན་དང་གསང་བ་ཤོར་བར་སྔོན་འགོག་དགོས་པའི་སྐོར་ལ། བྱེད་ནུས་སྡེ་ཚན་གྱིས་ནང་དོན་དང་ངོ་བོ་མི་འདྲ་བར་དམིགས་ནས་རིམ་པ་དང་རིགས་དགར་ནས་ཐག་གཅོད་དགོས་པ་དང་། ཆ་འཕྲིན་ཕྱིར་སྒྲོག་བྱེད་ཐབས་གདམ་ནས་ཆ་འཕྲིན་གྱི་ནང་དོན་ལ་ཚོད་འཛིན་བྱས་པ་བརྒྱུད་གཙོ་གནད་འབུར་དུ་ཐོན་པར་བྱ་དགོས་པ། ཆ་འཕྲིན་གྱི་ནང་དོན་མཁོ་སྤྲོད་ཀྱི་འགན་ཁུར་གསལ་བོ་བྱེད་པ། ནན་ཏན་སྒོས་འཚོལ་སྡུད་དང་དཔྱད་ཞིབ། ཡར་ཞུ། བསྐྱར་བཅོས། བརྒྱུད་སྒྲོག་བཅས་ཀྱི་གོ་རིམ་ནན་ཏན་གྱིས་ལག་བསྟར་བྱས་ཏེ། ཆ་འཕྲིན་སྤྱི་སྒྲོག་སྔོན་གྱི་གསང་རྒྱའི་ཞིབ་བཤེར་ལས་དོན་ལེགས་པོ་སྒྲུབ་ནས་གསང་བ་ཕྱི་ལ་ཤོར་བར་སྔོན་འགོག་བྱེད་དགོས། ཞེས་བཀོད་འདུག
གསར་འགོད་པ། པདྨ་མཚོ།
