ལོ་ཙཱ་བ་བཀྲ་ཤིས་ཚེ་རིང་ལགས་སྐུ་གཤེཊ།

གནས་ཚུལ་འབྱོར་གསལ་ལྟར་ན། ཕྱི་ཚེས་ ༥ ཉིན་བོད་ཀྱི་རྩོམ་པ་པོ་དང་ལོ་ཙཱ་བ་ཆེན་མོ་རྒན་བཀྲ་ཤིས་ཚེ་རིང་ལགས་དགུང་གྲངས་ ༨༥ སྟེང་ལྷ་སར་སྐུ་གཤེགས་ཡོད་འདུག

བོད་ཀྱི་ཤེས་ཡོན་སློབ་གསོའི་ལས་དོན་ཐོག་ཕྱག་རྗེས་རླབས་ཆེན་འཇོག་གནང་མཁན། བོད་མི་ཡིག་ངོ་ཆོད་མཁན་ཡོངས་ཀྱི་སེམས་ནང་བག་ཆགས་ཟབ་པའི་<<དབྱིན་བོད་རྒྱ་གསུམ་ཚིག་མཛོད།>>རྩོམ་མཁན་ལོ་ཙཱ་བ། བོད་ལྗོངས་སློབ་གྲྭ་ཆེན་མོ་དང་དབུས་གཙང་ཁུལ་དུ་དབྱིན་ཡིག་ཁྱབ་བརྡལ་གཏོང་མཁན་དང་བོད་པའི་རུམ་གདན་དང་ཁེ་ལས་ཐོན་རྫས་ཕྱིར་གཏོང་ནང་འདྲེན་གྱི་གསར་བརྗེ་བ་རྒན་བཀྲ་ཤིས་ཚེ་རིང་ལགས་དེ་རིང་ཕྱི་ཟླ་ ༡༢ ཚེས་ ༥ ཉིན་གྱི་ཞོགས་པར་ལྷ་སར་སྐུ་ཚེའི་ཕན་པ་རྫོགས་ཡོད་འདུག

རྒྱ་ནག་གཞུང་འབྲེལ་དྲ་གནས་སུ་རྒན་བཀྲ་ཤིས་ཚེ་རིང་ལགས་ཀྱི་མི་ཚེའི་ལོ་རྒྱུས་མདོར་ཙམ་འཁོད་པའི་ནང་། བཀྲ་ ཤིས་ཚེ་རིང་ལགས་ནི་ ༡༩༢༩ ལོར་གཙང་རྣམ་གླིང་རྫོང་གི་དབུལ་པོའི་ཁྱིམ་ཚང་ཞིག་ཏུ་འཁྲུངས་པ་དང་དགུང་ལོ་ ༡༠ པའི་ཐོག་ཁྲལ་པའི་ལས་དབང་དང་བསྡེབས་ནས་ལྷ་སར་བཀའ་ཤག་སྲིད་གཞུང་གི་ནང་མའི་འཁྲབ་སྟོན་པར་བཀུག་པ་དང་གར་པ་མཚོ་ཆེན་ཟློས་གར་ཚོགས་པའི་སློབ་མ་ཞིག་ཏུ་གྱུར་ པ་རེད། དགུང་ལོ་ ༡༣ ལོར་ཕ་ཡུལ་དུ་ལོག་ནས་དེ་གའི་སྒེར་བཙུགས་སློབ་གྲྭ་ཞིག་ཏུ་རང་ཅག་བོད་ཀྱི་སྐད་ ཡིག་ལ་སྦྱང་པ་གནང་བ་དང་ཕྱིར་ལྷ་སར་སླེབས་རྗེས་བཀའ་ཤག་སྲིད་གཞུང་གི་གཉེར་ གཡོག་རྒྱུགས་ཀྱིན་བསྡད། ༡༩༥༧ ལོར་སྟེས་དབང་གི་གོ་སྐབས་ཤིག་གིས་རྒྱ་གར་དུ་ཚོང་རྒྱག་པར་འགྲོ་ཐུབ་པ་བྱུང་ཞིང་སྐབས་དེ་ནས་བཟུང་དབྱིན་ཡིག་གཙོས་ནུབ་གླིང་གི་རིག་གནས་སྤྱི་དང་བྱེ་བྲག་ལ་སྦྱང་བརྩོན་བྱེད་མགོ་བརྩམས།

ཕྱིས་སུ་ཨ་རིར་ཕེབས་ཡོད་ཀྱང་ ༡༩༦༤ ཁོང་གིས་ཕ་ཡུལ་བོད་ཀྱི་གནས་བབ་ལ་རྒྱང་གཟིགས་དང་དེའི་རྗེས་ལུས་ཀྱི་རྣམ་པར་ འགྱུར་བ་གཏོང་སླད་རང་དབང་དང་། ཡར་རྒྱས། དཔལ་ཡོན་གྱི་ཕུགས་འདུན་ཞིག་ལ་སྙེག་ཕྱིར་ཨ་རིར་ཡོད་པའི་གྲོགས་པོ་ཚོའི་ཁ་ཏར་མ་ཉན་པར་ཕྱིར་རང་ཡུལ་དུ་ལོག་ཕེབས་ཤིང་བོད་ལྗོངས་མི་རིགས་སློབ་གླིང་གི་སྒོ་ ཐེམ་འཛུལ་ནས་དེ་གར་སློབ་གསོའི་ཕྱག་ལས་གཉེར། སྐབས་དེར་ཀྲུང་གོའི་དུས་བབ་ཟང་ཟིང་དང་ཆབ་སྲིད་ཀྱི་མཁའ་དབུགས་སྟུག་པོའི་ ཁྲོད་དུ་ཁོང་ཉིད་ལོ་ངོ་ ༦ རིང་བཙོན་དུ་ཚུད་པ་དང་སྤྱི་ལོ་ ༡༩༧༣ ལོར་ད་གཟོད་གློད་གྲོལ་ཐོབ།

༡༩༨༢ ལོར་བོད་ལྗོངས་སུ་ལས་གནས་སྤར་བ་དང་སྔར་བཞིན་སློབ་གསོའི་ལས་དོན་ལ་ནུས་པ་གང་ཡོད་འདོན་གྱིན་བཞུགས་པ་རེད། ༡༩༨༥ ལོར་ཁོང་གིས་ལྷ་སར་ལས་ཞོར་དབྱིན་ཡིག་གསབ་སྦྱོང་འཛིན་གྲྭ་ཞིག་བཙུགས་པ་དང་ བོད་ལྗོངས་སུ་དབྱིན་སྐད་ཀྱི་ཡུལ་སྐོར་སྣེ་ཤན་པ་དང་མགྲོན་ཁང་གི་ཞབས་ཞུ་བ་ སྐོར་ཞིག་གསོ་སྐྱོང་མཛད། སྐབས་དེར་རང་ཉིད་ཕྱིན་ཆད་ཀྱི་དགེ་སྒྲུབ་ལས་འགུལ་སྤེལ་རྒྱུར་མཁོ་བའི་མ་དངུལ་ ཡང་མི་ཉུང་བ་གསོག་འཇོག་གནང་ཡོད།

དུས་རབས་ ༢༠ པའི་ལོ་རབས་ ༨༠ པའི་ནང་ཕ་ཡུལ་གྱི་སློབ་གྲྭ་ཁག་ལ་གོད་ཆག་ཚབས་ཆེན་བྱུང་བའི་རྐྱེན་གྱིས་ས་དེ་གའི་སློབ་མ ༡༠༠ ལྷག་ལ་སློབ་གཉེར་བྱེད་སའི་མཐུན་རྐྱེན་མེད་པར་གཟིགས་ནས་ཁོང་ཉིད་ཀྱིས་མ་དངུལ་ ཡོད་ཚད་བཏོན་གནང་སྟེ་ས་དེ་གར་སློབ་གྲྭ་འཛུགས་རྒྱུའི་དགོངས་བཞེས་རྙེད། ༡༩༩༠ ལོའི་ཟླ་ ༧ པའི་ཚེས་ ༡༡ ཉིན་སློབ་གྲྭ་གསར་འཛུགས་ཀྱི་ལས་འགོ་ཚུགས་པ་དང་སློབ་མ་བརྒྱ་ལྷག་གི་ཟས་གོས་ དང་སློབ་སྦྱོང་གི་མཐུན་རྐྱེན་སྦྱར་ཞིང་སློབ་མ་ཕལ་ཆེ་བ་བདེ་བླག་ངང་རྫོང་ སློབ་ཆུང་གི་ལོ་རིམ་ལྔ་པར་འཕར་ཐུབ་པ་བྱུང་བ་དང་དེ་དག་ལས་ཤི་ལོག་ཚེ་རིང་སོགས་སློབ་མ་འགའ་ཕུལ་བྱུང་གི་སྦྱང་འབྲས་ལ་བརྟེན་ནས་ནང་སའི་སློབ་གྲྭ་ཁག་ཏུ་ ཚུད་ཡོད།

རྒྱུ་བཟང་པོར་འབྲས་བུ་བཟང་པོ་འབྱུང་བ་ནི་འཇིག་རྟེན་གྱི་ཆོས་ཉིད་ཡིན་པས་ཡང་དག་ པའི་བྱ་གཞག་དེར་གྲུབ་འབྲས་གཟེངས་སུ་ཐོན་པ་བྱུང་བ་ཚོར་ནས་ཁོང་ཉིད་ཀྱི་དགེ་ སྒྲུབ་སྤྱི་ཕན་གྱི་བྱ་གཞག་ལ་སྔར་བས་སྒུལ་ཤུགས་བྱིན་པ་དང་སྤྱི་ལོ་ ༡༩༩༢ ལོར་སྒོར་ ༣༠༠༠༠ གྱི་མ་དངུལ་བཏང་ནས་རང་ཉིད་ཀྱི་ཕ་ཡུལ་དུ་སླར་ཡང་སློབ་གྲྭ་གསར་རྒྱག་གི་བྱ་ གཞག་རླབས་པོ་ཆེར་ཞུགས་གནང་ཞིང་ ༡༩༩༧ ལོ་བར་ཕ་ཡུལ་གྱི་ཡུལ་ལུང་གང་སར་སློབ་གྲྭ་ཁྱོན་ ༣༠ གསར་འཛུགས་གནང་བ་རེད། ཁོང་ཉིད་ཀྱི་མི་ཚེ་གང་པོ་བོད་ཀྱི་སློབ་གསོའི་བྱ་གཞག་དོན་དུ་ལེགས་སྐྱེས་ཕུལ་ཡོད། ཅེས་སོགས་འཁོད་འདུག