གྲྭ་བ་ཞིག་གིས་རང་ལུས་མེར་བསྲེཊ་གནང་།

གནས་ཚུལ་ཐོན་པར་དེ་རིང་སྔ་དྲོར་བོད་ནང་གི་ཁམས་རྟའུ་ཉ་མཚོ་དགོན་པའི་གྲྭ་སྐལ་བཟང་ཡེ་ཤེས་ཞུ་བ་ཞིག་གིས་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག

ད་ལྟ་རང་འདི་ག་གསར་ཁང་གི་གློག་འཕྲིན་ནང་གནས་ཚུལ་འབྱོར་བ་ལྟར་ན། དེ་རིང་སྔ་དྲོའི་བོད་ནང་གི་ཆུ་ཚོད་ ༡༡།༢༠ ཙམ་ལ་ཁམས་དཀར་མཛེས་རྟའུ་ཉ་མཚོ་དགོན་པའི་གྲྭ་སྐལ་བཟང་ཡེ་ཤེས་ལགས་ཀྱིས་རྒྱ་གཞུང་ལ་ངོ་རྒོལ་གནང་སྟེ། ༧གོང་ས་མཆོག་བོད་ནང་གདན་འདྲེན་ཞུ་དགོས་པའི་འབོད་ཚིག་སྒྲོག་བཞིན་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག

དེ་རི་ཕྱི་དྲོར་སྤྱི་ཚོགས་བརྒྱུད་ལམ་ཁག་ཏུའང་གོང་གསལ་གནས་ཚུལ་དང་པར་ཁག་ཅིག་བརྒྱུད་འགོད་བྱེད་བཞིན་འདུག་ཀྱང་། ད་སྔ་ཁོང་གི་ལོ་དང་ནང་མིའི་གནས་ཚུལ། རང་ལུས་མེར་བསྲེགས་རྗེས་གནས་ཚུལ་ཅི་བྱུང་སོགས་ཞིབ་ཕྲ་གང་ཡང་རག་ཐུབ་མ་སོང་བས་གནས་ཚུལ་ཐོན་རིམ་བཞིན་ཇེ་གསལ་དུ་གཏོང་ངེས་ཡིན།

གནས་ཚུལ་ཐོན་རིམ་གཉིས་པ། དེ་རིང་རང་ལུས་མེར་བསྲེགས་གནང་མཁན་གྲྭ་སྐལ་བཟང་ཡེ་ཤེས་ལགས་ཀྱིས་རྟའུ་ཉ་མཚོ་དགོན་པའི་རྒྱ་གཞུང་གི་ལྟ་སྲུང་ཉེན་རྟོག་ལས་ཁུངས་སྒོ་འགྲམ་དུ། “༧རྒྱལ་དབང་བསྟན་འཛིན་རྒྱ་མཚོ་བོད་ནང་གདན་འདྲེན་ཞུ་དགོས། བོད་མི་རིགས་ལ་རང་དབང་སྤྲོད་དགོས།” ཞེས་སྐད་འབོད་གནང་བཞིན་སྐུ་ལུས་མེར་བསྲེགས་གནང་ཡོད་འདུག

ཅུང་ཙམ་རྗེས་རྒྱ་གཞུང་ཉེན་རྟོག་པ་འབྱོར་ཏེ་ཁོང་གི་སྐུ་ཕུང་རྟའུ་རྫོང་ཉེན་རྟོག་ལས་ཁུངས་སུ་བཙན་འཁྱེར་བྱས་ཡོད་འདུག ས་གནས་མང་ཚོགས་ཕོན་ཆེན་པོ་འཛོམས་ཏེ། སྐལ་བཟང་ཡེ་ཤེས་ལགས་ཀྱི་སྐུ་ཕུང་ཕྱིར་མང་ཚོགས་ལ་སྤྲོད་དགོས་པ་དང་། ཁོང་སྐུ་གྲོངས་ཟིན་ཡོད་སྟབས་བོད་ལུགས་དགོན་པའི་འགྲོ་སྟངས་ལྟར་འདས་པོར་ཆོས་ཀྱི་བྱེད་སྒོ་སྤེལ་རྒྱུ་ཡིན་ཚུལ་བརྗོད་ཡོད་འདུག

གྲྭ་སྐལ་བཟང་ཡེ་ཤེས་ལགས་སྔོན་ཆད་རྒྱ་གར་ནང་ཕེབས་ཏེ་ལྷོ་ཕྱོགས་དགའ་ལྡན་བྱང་རྩེ་གྲྭ་ཚང་དུ་སློབ་གཉེར་གནང་ཡོད་པ་དང་། རྗེས་སུ་ཕྱིར་བོད་ནང་ལོག་རྗེས་དགོན་པའི་གྲྭ་བ་ཆུང་ཆུང་ཚོ་དང་མང་ཚོགས་ལ་ནང་ཆོས་ངོ་སྤྲོད་དང་རིག་གནས་འཆད་སྤེལ་སོགས་ཀྱི་ཕྱག་ལས་གནང་བཞིན་ཡོད་འདུག ཁོང་གི་འཁྲུངས་ཡུལ་རྟའུ་ཐེ་ཝ་ཡུལ་ཚོའི་གྲོང་པ་ཡིན་པ་དང་། ཁོང་ད་ལྟ་རང་ལོ་ ༢༧ ཡིན་ཞིང་ཕ་མིང་ལ་བྱམས་པ་དང་མ་མིང་ལ་རྡོ་རྗེ་ཞུ་བཞིན་ཡོད་འདུག

གནས་ཚུལ་ཐོན་རིམ་གསུམ་པ། ཁ་སང་གྲྭ་སྐལ་བཟང་ཡེ་ཤེས་ལགས་ཀྱིས་རང་ལུས་མེར་བསྲེགས་གནང་མ་ཐག རྒྱ་གཞུང་ཉེན་རྟོག་པ་མང་པོ་བསླེབས་ཏེ་ཁོང་གི་ལུས་ལ་མེ་འབར་བཞིན་དུ་རླངས་འཁོར་ནང་གཡུགས་ཏེ་འཁྱེར་ཡོད་པ་དང་། སྐབས་དེར་ས་གནས་བོད་མི་སྐྱ་སེར་མང་པོ་འཛོམ་ཡོང་སྐབས་ཉེན་རྟོག་པས་མེ་མདའ་བརྒྱབ་པ་དང་། རླངས་འཁོར་མང་པོས་ཉེན་བརྡའི་དུང་སྒྲ་བརྒྱབ་པ་སོགས་བྱས་ཏེ་མང་ཚོགས་ལ་འཇིགས་སྐུལ་བྱས་ཡོད་འདུག

གྲྭ་སྐལ་བཟང་ཡེ་ཤེས་ལགས་ད་ལྟ་རང་ལོ་ ༣༨ ཡས་མས་ཡིན་པ་དང་། ཁོང་སྔོན་མ་རྒྱ་གར་ལྷོ་ཕྱོགས་དགའ་ལྡན་དུ་ལོ་བདུན་བརྒྱད་རིང་སློབ་གཉེར་གནང་ཡོད་ཅིང་། རྗེས་སུ་ཕྱིར་བོད་ནང་ལོག་རྗེས་ཉ་མཚོ་དགོན་པ་གཙོས་པའི་རྟའུ་དང་བྲག་མགོ དཀར་མཛེས་སོགས་སུ་མང་ཚོགས་ཀྱི་ཡིག་རྨོངས་སེལ་ཐུབ་ཐོག་ཕྱག་ལས་མང་པོ་གནང་ཡོད་པ་དང་། ས་གནས་དེ་ཁུལ་གྱི་མཁན་སྤྲུལ་ཚོར་མཉམ་འབྲེལ་བྱས་ཏེ་ཕྱག་ལས་གནང་ཡོད་པ་མ་ཟད། ཁོང་གི་ཕ་ཡུལ་རྟའུ་རུ་མི་ ༡༠༠ ལྷག་ཡོད་པའི་སྤྱི་ཚོགས་ཞབས་ཞུའི་ཚོགས་པ་ཞིག་ཀྱང་བཙུགས་ཡོད་འདུག

གཞན། ཕྱི་ལོ་ ༢༠༡༡ ཟླ་ ༨ ཚེས་ ༡༥ ཉིན། རྟའུ་ཉ་མཚོ་དགོན་པའི་དགེ་འདུན་པ་རང་ལོ་ ༢༩ ཡིན་པའི་ཚེ་དབང་ནོར་བུ་(ནོར་ཁོ།)ལགས་ཀྱིས་རྫོང་གི་ལས་ཁུངས་སྒོ་མདུན་དུ་རྒྱ་གཞུང་ལ་ངོ་རྒོལ་གནང་སྟེ། “བོད་ལ་རང་དབང་དགོས། ༧གོང་ས་མཆོག་སྐུ་ཚེ་ཁྲི་ལོ་བརྟན་པར་ཤོག ༧གོང་ས་མཆོག་བོད་ལ་གདན་འདྲེན་ཞུ་དགོས།”ཞེས་སྐད་འབོད་སྒྲོག་བཞིན་རང་ལུས་མེར་བསྲེགས་གནང་སྟེ་སྐུ་གྲོངས་ཡོད།

ཕྱི་ལོ་ ༢༠༡༣ ཟླ་ ༧ ཚེས་ ༦ ཉིན་རྟའུ་ཉ་མཚོ་དགོན་པའི་དགེ་འདུན་པ་ཚོས་༧གོང་ས་མཆོག་དགུང་གྲངས་ ༧༨ བཞེས་པའི་སྐུའི་འཁྲུངས་སྐར་སྲུང་གཙི་ཞུས་སྐབས། རྒྱ་གཞུང་ཉེན་རྟོག་པ་མང་པོ་འབྱོར་ཏེ་མང་ཚོགས་ཐོག་གང་བྱུང་མེ་མདའ་བརྒྱབ་སྟེ་བོད་མི་བཅུ་གྲངས་ཤིག་ལ་རྨས་སྐྱོན་བཟོས་ཡོད་པ་མ་ཟད། གཞན་སྐྱ་སེར་ཕ་མོ་ ༡༥ ཙམ་འཛིན་བཟུང་བྱས་ཡོད།