“སྐྱིད་སྡུག་མཉམ་མྱོང་གི་སྤུན་ཟླ་གསུམ་” ཆིན་ཁྲིན་བཙོན་ཁང་ནས་མཇལ།

ཉིན་འདི་གར་རྒྱལ་སྤྱིའི་བརྒྱུད་ལམ་ཁག་གི་གནས་ཚུལ་ཆེ་ཤོས་རྒྱ་ནག་དབུས་སྲིད་ཁྲིམས་ལྷན་ཁང་གི་མགོ་གཙོ་ཟུར་བ་ཀྲུའུ་ཡོང་ཁང་དང་རྒྱ་ནག་གི་སྲིད་འཛིན་ཟུར་བ་ཅང་ཙེ་མིན་ཕྱོགས་གཏོགས་ཀྱི་གནས་ཚུལ་དག་ཡིན་ཞིང་། དེའི་ཁྲོད་ནས་པའོ་ཞི་ལེ་དང་ཝང་ལིའི་ཅུན་དང་ཀྲུའུ་ཡོང་ཁང་། ཉེ་ལམ་རང་ལ་ཐོན་པའི་ལིན་ཅི་ཧྭ་སོགས་ནི་རྒྱ་ནག་གི་སྲིད་འཛིན་ཞི་ཅིན་ཕིན་གྱི་རྙི་ནང་ལ་ཚུད་ཟིན་པའི་སྟག་རྒན་དག་ཡིན།

ཟླ་འདིའི་ཚེས་ ༢༢ ཉིན་ཝུན་ཞའེ་ཁྲིན་ (Wen Xuecheng)ཞེས་པའི་རྒྱ་ཡིག་གསར་ལམ་ཐོག་གནས་ཚུལ་ཐོན་པ་ལྟར་ན། དེ་སྔའི་རྒྱ་ནག་དབུས་སྲིད་ཁྲིམས་ལྷན་ཁང་གི་འགན་འཛིན་ཀྲུའུ་ཡོང་ཁང་གིས་འདས་པའི་ལོ་བརྒྱད་རིང་རྒྱལ་ཁབ་ཀྱི་གསང་བ་ཐེངས་ ༡༡ ཙམ་ལ་ཕྱི་གྱར་བྱས་ཡོད་པ་དང་། དེ་དག་ལས་ ༢༠༠༤། ༢༠༠༧། ༢༠༡༠། ༢༠༡༡། ༢༠༡༢ བཅས་སུ་རྒྱལ་ཁབ་ཀྱི་གསང་བ་གལ་ཆེན་ཕྱིར་བསྐྱལ་ཡོད། དེ་དག་ཁྲོད་གསང་བ་ ༧ ནི་རྒྱལ་ཁབ་གཞན་གྱི་ཁེ་དབང་དང་འབྲེལ་བ་ཡོད་པའི་གསང་བ་ཡིན་ཚུལ་སོགས་འཁོད་འདུག

ཟླ་འདིའི་ཚེས་ ༦ ཉིན་ནས་བཟུང་རྒྱ་ནག་གཞུང་གིས་ཀྲུའུ་ཡོང་ཁང་གི་གྱོད་དོན་ཕྱི་བསྒྲགས་བྱས་ཡོད་ཅིང་། སྐབས་དེར་ཁོང་ལ་ལྐོག་ཟ་རུལ་སུངས་དང་དབང་ཆ་སྒེར་སྤྱོད། རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་པ། བུད་མེད་མང་པོར་ཆགས་སྲེད་ལྐོག་འབྲེལ་བྱས་པ་སོགས་ཀྱི་ནག་ཉེས་དོན་ཚན་དྲུག་བཙུགས་ཏེ་ཁྱབ་བསྒྲགས་བྱས་ཡོད།

ཆབ་སྲིད་དཔྱད་བརྗོད་པ་ཚོས་ཀྲུའུ་ཡོང་ཁང་གིས་རྒྱ་ནག་གི་གསང་བ་ཕྱི་གྱར་བྱས་པ་ཁག་ལས་གནད་དོན་ཆེ་ཤོས་གཉིས་ནི། ༢༠༡༢ ལོར་དེ་སྔོན་ཁྲོན་ཆིན་གྲོང་ཁྱེར་སྤྱི་བདེ་འགན་འཛིན་ཝང་ལེའི་ཅུན་ཁྲིན་ཏུའུ་ཨ་རིའི་གཞུང་ཚབ་ཁང་དུ་བྲོས་པའི་གནས་ཚུལ་པའོ་ཞེ་ལེ་ལ་བཤད་པ་དང་། རྒྱ་ནག་གི་དཔོན་རིགས་ཁག་ཅིག་གི་དཔལ་འབྱོར་གནས་སྟངས་དང་ཚོང་འབྲེལ་རྒྱུ་ནོར་སོགས་ཕྱིའི་གསར་ལམ་ནེའུ་ཡོག་དུས་བབ་སོགས་ལ་སྤྲད་པ་གཉིས་ཡིན་པའི་ཚོད་དཔག་བྱེད་བཞིན་ཡོད་འདུག

ཟླ་ ༡༢ ཚེས་ ༧ ཉིན་བྷེ་བྷེ་སེ་ BBC གསར་ཁང་གིས་གཟའ་ཉི་མའི་དུས་བབ་”Sunday Times”ཀྱི་གནས་ཚུལ་ལུང་འདྲེན་བྱས་པའི་ནང་། ཀྲུའུ་ཡོང་ཁང་གིས་ཏང་དང་རྒྱལ་ཁབ་ཀྱི་གསང་བ་ཕྱི་གྱར་བྱས་པ་དེ་དག་ནི། ནུབ་ཕྱོགས་ཀྱི་ཆབ་སྲིད་པ་ཚོས་ཧ་ཅང་ཤེས་འདོད་ཆེ་བའི་གནས་ཚུལ་དག་ཡིན་པ་དང་། རྒྱ་ནག་སྲིད་ཁྲིམས་ལྷན་ཁང་གི་མགོ་གཙོར་བསྡད་མྱོང་བའི་ཀྲུའུ་ཡོང་ཁང་གིས་རྒྱ་ནག་གི་གསང་བ་ཡོད་ཚད་ཤེས་ཡོད་སྟབས། ཐེངས་འདིར་རྒྱ་ནག་གཞུང་གིས་ཀྲུའུ་ཡོང་ཁང་གི་ཉེས་གསོག་ལྟར་ཁྲིམས་ཆད་ལག་བསྟར་བྱས་ཚེ་ཁོ་ལ་སྲོག་ཁྲིམས་གཅོད་རྒྱུ་ལས་ལམ་ཁ་གཞན་མེད་ཚུལ་སོགས་འཁོད་འདུག

ཟླ་འདིའི་ཚེས་ ༡༥ ཉིན། ཨ་རིར་གནས་སྡོད་རྒྱ་རིགས་སྲིད་དོན་དཔྱད་བརྗོད་པ་ཁྲིན་ཕའོ་ཁོན་གྱིས་གནས་ཚུལ་སྤེལ་བ་ལྟར་ན། ༢༠༡༤ ལོ་ཟླ་ ༤ ཚེས་ ༣༠ ཉིན་ཞིན་ཅང་ཡུ་གུར་མེ་འཁོར་ས་ཚིགས་ནས་འགད་རྫས་དོན་རྐྱེན་བྱུང་བ་ནི་ཀྲུའུ་ཡོང་ཁང་གིས་ཞི་ཅིན་ཕིན་ལྐོག་གསོད་ཀྱི་འཆར་གཞི་ཡིན་པ་དང་། ཟླ་ ༤ བ་ནས་ཀྲུའུ་ཡོང་ཁང་གི་རང་དབང་བཀག་སྡོམ་བྱས་ཡོད་ཀྱང་སྲིད་ཁྲིམས་ཁང་དུ་ཁོ་ལ་མི་ཡོད་སྟབས། ཁོ་ཚོས་ཞི་ཅིན་ཕིན་གྱི་འགྲོ་འདུག་གསང་བའི་ངང་ཡུ་གུར་ངོ་ལོག་ཚོགས་ཁག་ལ་སྤྲད་དེ་ཞི་ཅིན་ཕིན་རྩ་མེད་བྱ་འཆར་ཡོད་ཀྱང་། ཟླ་ ༤ ཚེས་ ༢༧ ནས་ ༣༠ བར་ཞི་ཅིན་ཕིན་ཡུ་གུར་ནང་ལྟ་སྐོར་དུ་བསྐྱོད་རྗེས་མེ་འཁོར་ནང་ཕྱི་ལོག་ནས་ཆུ་ཚོད་ཁ་ཤས་རྗེས་འགད་རྫས་དོན་རྐྱེན་དེ་བྱུང་ཡོད་སྟབས། ལྐོག་གསོད་འཆར་གཞི་དེ་ལེགས་འགྲུབ་བྱུང་མེད།

ཁྲིན་ཕའོ་ཁོན་གྱིས། རྒྱ་ནག་གཞུང་གིས་ཀྲུའུ་ཡོང་ཁང་ལ་སྲོག་ཁྲིམས་གཅོད་རྒྱུའི་གཉེན་ཁ་ཡོད་པའི་དཔེ་མཚོན་གཉིས་བགྲང་ཡོད་པ་ནི། ༡ ༽ བདུན་ཕྲག་ཁ་ཤས་སྔོན་ལ་རྒྱ་ནག་གཞུང་འབྲེལ་མཐོ་རིམ་མགོ་གཙོ་ ༢༠༠ ལྷག་གིས་ “ཧོང་ཁུ་ཀོན་ (Huang kegong) གྱི་གྱོད་དོན” ཞེས་བའི་བརྙན་འཕྲིན་ཞིག་ལ་བལྟས་ཡོད་པ་དང་། ཧོང་ཁུ་ཀོན་ནི་མཐོ་རིམ་དམག་དཔོན་ཞིག་ཡིན་ཡང་། རྗེས་སུ་སློབ་མ་བུ་མོ་ཞིག་བསད་པའི་ཉེས་མིང་འོག་སྲོག་ཁྲིམས་བཅད་ཡོད་འདུག

༢ ༽ མི་དམངས་དྲ་རྒྱ་ (Renming Wang) ནས་གནས་ཚུལ་སྤེལ་བར། ཀྲུའུ་ཡོང་ཁང་གི་བྱ་སྤྱོད་ནི་ངོ་ལོག་པ་དང་གཅིག་མཚུངས་ཡིན་པ་དང་། ངོ་ལོག་པ་ལྔའི་ནང་གཉིས་གོ་མིན་ཏང་གིས་བསད་ཡོད་པ་དང་། གསུམ་གུང་ཁྲན་ཏང་རང་གིས་བསད་ཡོད་ཅེས་སོགས་བརྗོད་འདུག

ཁྲིན་ཕའོ་ཁོན་གྱིས་ཞི་ཅིན་ཕིན་ལ་དཔྱད་ཞིབ་གཞན་ཞིག་ནི། ཞི་ཅིན་ཕིན་ནི་མའོ་ཙེ་ཏུང་དང་ཏིན་ཞའོ་ཕན་གཉིས་ལས་ལྷག་ཡིན་ཞིང་། རྒྱུ་མཚན་ནི་མའོ་ཙེ་ཏུང་དང་ཐོག་དཔལ་འབྱོར་རྩ་གཏོར་བཏང་ཡོད་པ་དང་། ཏིན་ཞའོ་ཕིན་གྱིས་མའོ་ཡི་ནོར་འཁྲུལ་ཡོ་བསྲང་བྱས་ཏེ། དཔལ་འབྱོར་བཅོས་སྒྱུར་བྱས་ཡོད་འདུག ཏིན་ཞའོ་ཕིན་གྱིས་དཔལ་འབྱོར་བཅོས་བསྒྱུར་བཅོས་པ་ལས་ཆབ་སྲིད་བཅོས་བསྒྱུར་བྱས་མེད་སྟབས། ད་བར་ལྐོག་ཟ་རུལ་སུངས་གྱི་གནས་ཚུལ་རྒྱ་ཡན་དུ་བཏང་ཡོད་སྟབས། ད་ཆར་ཞི་ཅིན་ཕིན་གྱི་གོ་སྐབས་ནི་ལྐོག་ཟ་རུལ་སུངས་རྩ་མེད་བཟོ་རྒྱུ་དེ་རེད། ཅེས་དབྱེ་ཞིབ་བྱས་འདུག

ཁྲིན་ཕའོ་ཁོན་གྱིས་བཤད་རྒྱུར། ཞི་ཅིན་ཕིན་གྱིས་རྒྱལ་ཆེ་ས་ནས་ལྐོག་ཟ་རུལ་སུངས་མེད་པ་བཟོ་བཞིན་ཡོད་ཀྱང་། ཁོའི་ངར་ཤུགས་ཆེ་རུ་འགྲོ་མིན་དེ་ཁོས་ཀྲུའུ་ཡོང་ཁང་གསོད་ཐུབ་མིན་ལ་རག་ལས་ཡོད། གལ་སྲིད་ཞི་ཅིན་ཕིན་གྱིས་དབུས་རྒྱུན་ལས་ཨུ་ཡོན་ཞིག་བསད་པ་ཡིན་ན། ཁོའི་ངར་ཤུགས་དེས་རྒྱལ་ཁབ་ཕྱི་ནང་ཀུན་ལ་གཡོ་འགུལ་ཆེན་པོ་གཏོང་པ་མ་ཟད། ཅང་ཙེ་མིན་གྱིས་ཀྱང་ལག་པ་བསྲིང་མི་ཐུབ་པས་གཞུང་གི་དབང་ཆ་ཡོད་ཚད་ཞི་ཅིན་ཕིན་ལ་དབང་ངེས་ཡིན། གལ་སྲིད་ཞི་ཅིན་ཕིན་གྱིས་ཀྲུའུ་ཡོང་ཁང་མ་བསད་ཚེ། ཞི་ཅིན་ཕིན་གྱིས་ཀྲུའུ་ཡོང་ཁང་གི་རྒྱབ་ལོགས་ཀྱི་སྟག་རྒན་ཅང་ཙེ་མིན་ལ་དམིགས་ཡོད་པ་རྟོགས་ཐུབ། གང་ཡིན་ཞེ་ན། ཀྲུའུ་ཡོང་ཁང་མ་བསད་པར་མུ་མཐུད་བཙོན་འཇུག་བྱས་ཏེ་བཞག་ན། ཁོ་དང་འབྲེལ་ཡོད་ཀྱི་མི་མང་པོ་ཞིག་ཕྱིར་འདོན་ཐུབ་པ་མ་ཟད། ལྷག་པར་དུ་ཅང་ཙེ་མིན་ཁུང་བུ་ནས་ཕྱིར་འདོན་བྱེད་ཐུབ་པས་ཡིན། ཞེས་སོགས་བརྗོད་འདུག

ཟླ་འདིའི་ཚེས་ ༡༤ ཉིན་ཞིན་ཐཱང་རིན་(xintangren)ཞེས་པའི་དྲ་ཚིགས་སྟེང་གནས་ཚུལ་སྤེལ་བ་ལྟར་ན། ཀྲུའུ་ཡོང་ཁང་ཚེས་ ༡༣ ཉིན་རྒྱ་ནག་དྲག་ཆས་དམག་མིས་འདྲི་གཅོད་བྱེད་ཡུལ་ནས་ཆིན་ཁྲིན་བཙོན་ཁང་དུ་ཁྲིད་ཡོད་པའི་གནས་ཚུལ་སྤེལ་ཡོད་སྟབས། ཆབ་སྲིད་དཔྱད་བརྗོད་པ་ཚོས། གལ་སྲིད་གནས་ཚུལ་དེ་དངོས་སུ་བྱུང་ཡོད་པ་ཡིན་ན་ཀྲུའུ་ཡོང་ཁང་དང་། རྒྱ་ནག་ཁྲོན་ཆིན་གྲོང་ཁྱེར་གྱི་དེ་སྔའི་ཉེན་རྟོག་འགན་འཛིན་ཟུར་བ་ཝང་ལིའི་ཅུན་དང་། དེ་སྔའི་ཁྲོན་ཆེན་གྲོང་ཁྱེར་ཨུ་ཡོན་མགོ་གཙོ་པའོ་ཞི་ལེ་བཅས་ “སྐྱིད་སྡུག་མཉམ་མྱོང་གི་སྤུན་གྲོགས་གསུམ་” ཆིན་ཁྲིན་ནས་ལྷན་འཛོམས་བྱུང་འདུག་ཅེས་ཟུར་ཟ་བྱས་འདུག

ཟླ་འདིའི་ཚེས་ ༡༣ ཉིན་ཧོང་ཀོང་རྨ་བྱ་གསར་ཁང་གི་གསར་འགོད་པ་ཚོན་ནའི་མིན་ (Cong Niming) གྱིས་གནས་ཚུལ་སྤེལ་པ་ལྟར་ན། ཟླ་ ༡༢ ཚེས་ ༥ ཉིན་དྲག་ཆས་དམག་མས་ཀྲུའུ་ཡོང་ཁང་འདྲི་གཅོད་ཁང་ནས་ཆིན་ཁྲེན་བཙོན་ཁང་དུ་གནས་སྤོར་བྱས་ཡོད་པའི་ཚོད་དཔག་བྱས་ཡོད་ཀྱང་། ཀྲུའུ་ཡོང་ཁང་གི་འདྲི་གཅོད་བྱེད་ཡུལ་གང་ཡིན་གསལ་བོ་ཤེས་མེད་ཀྱང་། ཉེ་ཆར་དྲ་ལམ་དུ་ཀྲུའུ་ཡོང་ཁང་ལ་ས་གནས་མི་འདྲ་བ་གསུམ་ནང་འདྲི་གཅོད་བྱས་ཡོད་པ་དང་། ས་གནས་དེ་དག་ནི་ཧྲན་ཏོན་ཀོ་ཡང་རྫོང་དང་། ནང་སོག ཐེན་ཅིན་བཅས་ཡིན་སྐོར་ཚོད་དཔག་བྱས་ཀྱང་ཁུངས་ལྡན་ར་སྤྲོད་བྱེད་མཁན་སུ་ཡང་བྱུང་མི་འདུག་ཅེས་སྤེལ་ཡོད་འདུག

སྲིད་དོན་དཔྱད་བརྗོད་པ་ཚོས། ཀྲུའུ་ཡོང་ཁང་དང་པའོ་ཞི་ལེ། ཝང་ལིའི་ཅུན་གསུམ་གྱི་གྱོད་དོན་ལ་མི་འདྲ་བའི་ཆ་ཡོད་ཀྱང་། དོན་དངོས་སུ་དེ་ནི་ཕན་ཚུན་འབྲེལ་བ་ཡོད་པ་དང་། དེ་ནི་ཀྲུའུ་ཡོང་ཁང་དང་ཝང་ལིའི་ཅུན། པའོ་ཞི་ལེ་གང་རུང་གི་ནག་ཉེས་མིན་པར། ཀྲུའུ་ཡོང་ཁང་གི་རྒྱབ་ཏུ་ཅང་ཙེ་མིན་ཡོད་སྟབས། ནག་ཉེས་གཙོ་བོ་ཅང་ཙེ་མིན་ལ་ཡོད་པ་དང་། ཅང་ཙེ་མིན་གྱི་ནག་ཉེས་དེ་གུང་ཁྲན་ཏང་གི་ནག་ཉེས་ཆགས་ཡོད་སྟབས། ཀྲུའུ་ཡོང་ཁང་མེད་པར་བཟོས་ཏེ་ཅང་ཙེ་མིན་གྱི་ནག་ཉེས་འགེབས་ཐུབ་བྱ་རྒྱུ་ཡིན་པའི་ཚོད་དཔག་བྱས་ཡོད།

རྨ་བྱ་གསར་ཁང་གིས་ཕྱི་སྡོད་རྒྱ་རིགས་སྲིད་དོན་དབྱེ་ཞིབ་པ་ཚོས་དཔྱད་བརྗོད་བྱས་པའི་གནས་ཚུལ་འཁོད་པའི་ནང་། ཀྲུའུ་ཡོང་ཁང་དང་པའོ་ཞི་ལེ། ཝང་ལིའི་ཅུན་གསུམ་གྱི་གྱོད་དོན་ཕྱོགས་བསྡུས་དབྱེ་ཞིབ་བྱས་ཡོད་པའི་ནང་། ཝང་ལིའི་ཅུན་གྱི་གྱོད་གཞི་ནི་པའོ་ཞི་ལེ་ཡི་སྐྱེས་དམན་ཀོ་ཁེད་ལའེ་ (GuKailai) ཡིས་དབྱིན་ཇིའི་ཚོང་པ་ནེད་ཧེ་ཝོ་ཌི་(Neil Heywood)ཟེར་བ་ཞིག་ལྐོག་གསོད་བྱས་རྗེས། ཝང་ལིའི་ཅུན་ཁྲིན་ཏུའུ་ཨ་རིའི་གཞུང་ཚབ་ཁང་དུ་བྲོས་པ་དེ་ནས་མགོ་བཙུགས་འདུག

༢༠༡༡ ལོ་ཟླ་ ༡༡ ཚེས་ ༡༢ ཉིན། (Neil Heywood) དང་ཀོ་ཁེད་ལའེ་གཉིས་ཀྱིས་རང་ཉིད་ཀྱི་ནག་ཚོང་འགེབས་སྲོང་བྱེད་ཆེད། དབྱིན་ཇིའི་ཚོང་པ་ནེལ་ཧེ་བོ་ཊི་ལྐོག་གསོད་བྱ་རྒྱུའི་ངན་གྲོས་བྱས་ཡོད་པ་དང་། ཚེས་ ༡༣ ཉིན་ཀོ་ཁེད་ལའེ་ཡིས་མོའི་འོག་གི་མི་ཞིག་ལ་ནེལ་ཧེ་བོ་ཊི་ལ་དུག་བླུད་དེ་ལྐོག་གསོད་བྱས་བཅུག་ཡོད་འདུག

༢༠༡༡ ལོ་ཟླ་ ༡༡ ཚེས་ ༡༤ ཉིན་གུང་། ཀོ་ཁེད་ལའེ་ཡིས་ནེལ་ཧེ་བོ་ཊི་ལྐོག་གསོད་ཀྱི་གནས་ཚུལ་ཝང་ལིའི་ཅུན་ལ་བཤད་སྐབས་ཁོས་ལྐོག་ནས་སྒྲ་འཇུག་བྱས་ཡོད་པ་དང་། ཁོ་གཉིས་ཀྱིས་སྒྲུབ་པའི་བྱ་བ་ཀོ་ཁེད་ལའེ་ཡིས་གསང་བ་བྱ་རྒྱུའི་ཁས་ལེན་བྱས་རྗེས། ཁྲོན་ཆིན་གྲོང་ཁྱེར་ཉེན་རྟོག་པས་ནེལ་ཧེ་བོ་ཊི་ཆང་གིས་བཟི་ནས་ཤི་བ་གསལ་བསྒྲགས་བྱས་ཡོད་འདུག

གནས་ཚུལ་དེ་དག་བྱུང་རྗེས་ཝང་ལིའི་ཅུན་དང་ཀོ་ཁེད་ལའེ་གཉིས་ཀྱིས་ཕན་ཚུན་དོགས་པ་བྱས་མཐར། ༢༠༡༢ ལོ་ཟླ་ ༡ ཚེས་ ༢༨ ཉིན་ཝང་ལིའི་ཅུན་གྱིས་པའོ་ཞི་ལེ་ལ་ཁྱེད་ཚང་གི་གལ་ཆེའི་གྱོད་དོན་ཞེས་སྙན་སེང་ཞུས་ཡོད་ཀྱང་། པའོ་ཞི་ལེ་ཡིས་སྐབས་དེར་ཁོ་ལ་འགྲམ་ལྕག་ཅིག་གཞུས་ཡོད་འདུག

ཟླ་ ༢ ཚེས་ ༢ ཉིན་ཝང་ལིའི་ཅུན་སྤྱི་བདེ་འགན་འཛིན་གྱི་གོ་གནས་ནས་སྤོར་པ་དང་། གྱོད་དོན་རྩད་ཞིབ་པ་ཚོས་ཝང་ལིའི་ཅུན་གྱི་ལས་བྱེད་མི་སྣ་དང་ཀོ་ཁེད་ལའེ་ཡི་གྱོད་གཞི་ཞིབ་བཤེར་བྱེད་སྐབས། ཝང་ལིའི་ཅུན་ལའང་འཇིགས་སྣང་བྱུང་སྟེ། ༢༠༡༢ ལོ་ཟླ་ ༢ ཚེས་ ༦ ཉིན་ཝང་ལིའི་ཅུན་རང་ཉིད་སྲུང་སྐྱོབ་ཆེད་ཨ་རིའི་གཞུང་ཚབ་ཁང་དུ་བྲོས་ཡོད་འདུག

༢༠༡༢ ལོ་ཟླ་ ༢ ཚེས་ ༩ ཉིན་རྒྱ་ནག་ཕྱི་སྲིད་ལྷན་ཁང་གིས་ཨ་རིའི་གཞུང་ཚབ་ཁང་ལ་ཁ་པར་བཏང་སྟེ་ཝང་ལིའི་ཅུན་རྩད་གཅོད་བྱས་མཐར། ཁོ་ཡོང་ནས་ཉིན་གཅིག་གི་རྗེས་སུ་གཞུང་ཚབ་ཁང་དང་ཁ་བྲལ་ཡོད་པ་ཤེས་རྟོགས་བྱུང་ཞིང་། དེའི་རྗེས་མུ་མཐུད་རྩད་ཞིབ་བྱས་འདུག

༢༠༡༢ ལོ་ཟླ་ ༩ ཚེས་ ༥ ཉིན་གྱི་དགོང་མོ་ཞིན་ཧཱ་གསར་ཁང་གི་གནས་ཚུལ་སྤེལ་བ་ལྟར་ན། རྒྱ་ནག་ཁྲིན་ཏུའུ་གྲོང་ཁྱེར་ཞིབ་བཤེར་ཁང་གིས་ཝང་ལིའི་ཅུན་གྱི་གྱོད་གཞི་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་འབྲང་རིམ་ཁྲིམས་ཞིབ་ཁང་དུ་ཞུ་གཏུག་བྱས་པ་གསལ་བསྒྲགས་སྤེལ་འདུག

༢༠༡༢ ལོ་ཟླ་ ༩ ཚེས་ ༢༤ ཉིན་གྱི་སྔ་དྲོར། ཁྲིན་ཏུའུ་འབྲང་རིམ་ཁྲིམས་ཞིབ་ཁང་ནས་ཝང་ལིའི་ཅུན་གྱིས་དབང་ཆ་སྒེར་སྤྱོད་དང་། གཉེན་ཉེ་འགེབས་སྲུང་། བྲོས་བྱོལ་རྒྱབ་འགལ། ལྐོག་ཟ་རུལ་སུངས། བུད་མེད་མང་པོར་ལྐོག་འབྲེལ་བྱས་པ་སོགས་ཀྱི་ཉེས་མིང་བཙུགས་ཏེ་ལོ་ ༡༥ བཙོན་འཇུག་བྱ་རྒྱུ་དང་། ལོ་ ༡ ལ་ཆབ་སྲིད་དབང་ཆ་ཕྱིར་བསྡུ་བྱ་རྒྱུའི་གསལ་བསྒྲགས་བྱས་འདུག

པའོ་ཞི་ལེ་ཡི་གྱོད་གཞི་ནི། ༢༠༡༢ ལོ་ཟླ་ ༢ ཚེས་ ༦ ཉིན་ཝང་ལིའི་ཅུན་ཁྲིན་ཏུའུ་ཨ་རིའི་གཞུང་ཚབ་ཁང་དུ་བྲོས་བྱོལ་བྱས་རྗེས། ཟླ་ ༣ ཚེས་༩ ཉིན་པེ་ཅིན་དུ་མི་དམངས་ཨུ་ཡོན་ཚོགས་འདུའི་གསར་འགོད་གསལ་བསྒྲགས་ཤིག་གི་སྐབས་སུ། པའོ་ཞི་ལེ་ཡིས་རང་ནུས་གང་ཐུབ་ཀྱིས་ཁོ་དང་ཁོའི་ཆུང་མ་ཀོ་ཁེད་ལའེ་གཉིས་ཀྱི་ནག་ཉེས་འགེབས་སྲུང་བྱས་ཡོད་འདུག

༢༠༡༢ ལོ་ཟླ་ ༣ ཚེས་ ༡༤ ཉིན་རྒྱ་ནག་གི་སྲིད་བློན་ཝུན་ཅ་པོ་ཡིས་གསར་འགོད་གསལ་བསྒྲགས་སྟེང་། ཁྲོན་ཆིན་གྲོང་ཁྱེར་ཨུ་ཡོན་དང་གྲོང་ཁྱེར་སྲིད་གཞུང་གཉིས་ཀྱིས་ཝང་ལིའི་ཅུན་གྱི་གྱོད་གཞི་དེ་བསྐྱར་ཞིབ་བྱ་རྒྱུ་ཡིན་པ་བསྒྲགས་ཡོད།

༢༠༡༢ ལོ་ཟླ་ ༣ ཚེས་ ༡༥ ཉིན། པའོ་ཞི་ལེ་ཡི་ཁྲོན་ཆིན་གྲོང་ཁྱེར་ཨུ་ཡོན་མགོ་གཙོ་དང་རྒྱུན་ལས་ཨུ་ཡོན་གྱི་གོ་གནས་ཕྱིར་བསྡུ་བྱས་ཡོད་པ་དང་། སྐབས་དེར་ཁོའི་སྐྱེས་དམན་ཀོ་ཁེད་ལེ་དང་མོའི་འོག་གི་ལས་བྱེད་ཀྲོང་ཞའོ་ཅིན་(Zhang Shaojun) གཉིས་ལ་དབྱིན་ཇིའི་ཚོང་པ་ནེལ་ཧེ་བོ་ཊི་ལྐོག་གསོད་བྱས་པའི་དོགས་གཞིའི་འོག་ཞིབ་བཤེར་བྱ་རྒྱུའི་ཁྱབ་བསྒྲགས་བྱས་འདུག

༢༠༡༢ ལོ་ཟླ་ ༤ ཚེས་ ༡༠ ཉིན། པའོ་ཞི་ལེ་ཡིས་དབུས་ཆབ་སྲིད་ཁང་དང་དབུས་ཨུ་ཡོན་གྱི་ལས་གནས་ནས་མཚམས་འཇོག་བྱ་དགོས་པ་དང་། དབུས་སྒྲིག་ཁྲིམས་ཞིབ་བཤེར་ཨུ་ཡོན་གྱིས་གྱོད་གཞི་རྩད་ཞིབ་དང་། ཀོ་ཁེད་ལའེ་དང་ཀྲོང་ཞའོ་ཅིན་གཉིས་ལ་མི་གསོད་དོགས་གཞིའི་འོག་ཁྲིམས་འཛིན་ཁང་ནས་རྩད་ཞིབ་བྱ་རྒྱུ་ཐག་གཅོད་བྱས་འདུག

༢༠༡༢ ལོ་ཟླ་ ༩ ཚེས་ ༢༨ ཉིན། པའོ་ཞི་ལེ་ཏང་དང་རྒྱལ་ཁབ་ཀྱི་གོ་གནས་ནས་ཕབ་པ་དང་། ནག་ཉེས་ལ་དོགས་གཞི་ཡོད་པའི་ཐོག་ཁྲིམས་འཛིན་ཁང་དུ་འདྲི་གཅོད་བྱ་རྒྱུ་དང་། ཝང་ལིའི་ཅུན་དང་ཀོ་ཁེད་ལའེ་གཉིས་ཀྱི་མི་གསོད་དོན་རྐྱེན་ཐོག་པའོ་ཞི་ལེ་ཡིས་དབང་ཆ་སྒེར་སྤྱོད་བྱས་པ་དང་། གཞན། ཁོས་དམངས་དངུལ་སྒེར་སྤྱོད། ལྐོག་ཟ་རུལ་སུངས་བཅས་ཀྱི་ནག་ཉེས་བསྒྲགས།

༢༠༡༢ ལོ་ཟླ་ ༡༠ ཚེས་ ༢༦ ཉིན། པའོ་ཞི་ལེ་ཡི་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་བཅུ་གཅིག་པའི་ཐོབ་ཐང་ཕྱིར་བསྡུ་བྱས་རྗེས་ཁོ་ཁྲིམས་འཛིན་ཁང་དུ་བསྐྱལ་ཡོད།

༢༠༡༢ ལོ་ཟླ་ ༡༡ ཚེས་ ༧ ཉིན། རྒྱ་ནག་གུང་ཁྲན་ཏང་སྐབས་བཅུ་བདུན་པའི་དབུས་ཨུ་ཡོན་གྱི་ཚོགས་ཆེན་ཐེངས་བདུན་པའི་ཐོག་པའོ་ཞི་ལེ་ཏང་གི་ནང་ནས་ཕྱིར་འཕུད་གཏོང་རྒྱུའི་ཐག་གཅོད་བྱས།

༢༠༡༣ ལོ་ཟླ་ ༧ ཚེས་ ༢༥ ཉིན། རྒྱ་ནག་ཧྲན་ཏུང་ཞང་ཆེན་ཅི་ནན་གྲོང་ཁྱེར་ཞིབ་བཤེར་ཁང་གིས་པའོ་ཞི་ལེ་ཡི་གྱོད་གཞི་ཅི་ནན་འབྲང་རིམ་ཁྲིམས་ཞིབ་ཁང་ཏུ་ཞུ་གཏུག་བྱས།

༢༠༡༣ ལོ་ཟླ་ ༨ ཚེས་ ༢༢ ནས་ ༢༦ ཉིན་ཧྲན་ཏུང་ཞང་ཆེན་ཅི་ནན་གྲོང་ཁྱེར་འབྲང་རིམ་ཁྲིམས་ཞིབ་ཁང་གི་ཁྲིམས་ཁང་ལྔ་བའི་ནང་དུ་པའོ་ཞི་ལེ་ཡི་གྱོད་གཞི་འདྲི་གཅོད་བྱས་ཤིང་། ཅི་ནན་འབྲང་རིམ་ཁྲིམས་ཞིབ་ཁང་གི་གཞུང་འབྲེལ་མི་སྣས་བེའུ་པོའོ་ (Weibo) དྲ་ཐོག་ལ་འདྲི་གཅོད་ཀྱི་བརྒྱུད་རིམ་ཁྱབ་བསྒྲགས་བྱས་ཡོད་འདུག

༢༠༡༣ ལོ་ཟླ་ ༨ ཚེས་ ༢༤ ཉིན། པའོ་ཞི་ལེ་ཡི་འདྲི་གཅོད་ཉིན་གསུམ་སོང་རྗེས། ཝང་ལིའི་ཅུན་རྐུབ་སྟེགས་འཁོར་ལོ་ཅན་ཞིག་ཏུ་བསྡད་དེ་པའོ་ཞི་ལེ་ལ་ཁ་གཏད་དུ་ཡོང་སྟེ། པའོ་ཞི་ལེ་ཡིས་ང་ལ་འགྲམ་ལྕག་གཞུས་པ་དེ་ནི་འགྲམ་ལྕག་ཞིག་གི་གནད་དོན་རྩ་བ་ནས་མིན་ཞེས་བརྗོད་ཡོད།

༢༠༡༣ ལོ་ཟླ་ ༩ ཚེས་ ༢༢ ཉིན་ཅི་ནན་གྲོང་ཁྱེར་འབྲང་རིམ་ཁྲིམས་ཁང་གིས་པའོ་ཞི་ལེ་ལ་ལྐོག་ཟ་རུལ་སུངས་དང་། དབང་ཆ་སྒེར་སྤྱོད་ཀྱི་ཉེས་མིང་འོག་བཙོན་འཇུག་དང་། ཚེ་གང་བོར་ཆབ་སྲིད་ཀྱི་དབང་ཆ་ཕྱིར་བསྡུ་ཐག་གཅོད་བྱས་ཡོད་ཀྱང་། ཁོའི་སྒེར་གྱི་རྒྱུད་ནོར་གཞུང་བཞེས་བཏང་མེད།

༢༠༡༢ ལོ་ཟླ་ ༩ ཚེས་ ༢༨ ཉིན་ཞིན་ཧྭ་གསར་ཁང་གིས། པའོ་ཞི་ལེ་ཡི་གྱོད་དོན་ཞིབ་བཤེར་བྱས་སྐབས་ཁོས་བུད་མེད་མང་པོར་ཁྲིམས་འགལ་བྱ་སྤྱོད་སྤེལ་བ་ཤེས་རྟོགས་བྱུང་ཡོད་ཅེས་ཕྱི་བསྒྲགས་བྱས།

ཀྲུའུ་ཡོང་ཁང་གི་གྱོད་དོན་ནི། ཨ་རིའི་ནེའོ་ཡོག་དུས་བབ་ (The New York Times) ཀྱིས་གནས་ཚུལ་སྤེལ་བ་ལྟར་ན། ༢༠༡༢ ལོ་ཟླ་ ༣ ཚེས་ ༧ ཉིན་རྒྱ་ནག་དབུས་རྒྱུན་ལས་ཆབ་སྲིད་ཨུ་ཡོན་ལྷན་ཚོགས་ཐོག་སྲིད་འཛིན་ཧུའུ་ཅིན་ཐོ་དང་། ཝུན་ཅ་པོ། ཞི་ཅིན་ཕིན། ལི་ཁེ་ཆིང་བཅས་ཀྱིས་པའོ་ཞི་ལེ་ཆབ་སྲིད་ཨུ་ཡོན་ལྷན་ཁང་ནས་ཕྱིར་འཕུད་བྱ་རྒྱུའི་ཐག་གཅོད་སྐབས་ཀྲུའུ་ཡོང་ཁང་གིས་ངོ་རྒོད་བྱས་ཡོད་འདུག

ཉི་ཧོང་གི་གསར་ཤོག་ཡའོ་མེའོ་རེ་ཞའི་ཕང་ (Yomiuri Shimbun)གིས་གནས་ཚུལ་སྤེལ་བ་ལྟར་ན། ཀྲུའུ་ཡོང་ཁང་དང་པའོ་ཞི་ལེ་གཉིས་ལ་ལྐོག་འབྲེལ་དམ་པོ་ཡོད་པ་དང་། ཝང་ལིའི་ཅུན་གྱི་གྱོད་གཞི་ཐག་གཅོད་སྐབས་ཀྲུའུ་ཡོང་ཁང་གིས་གསང་བའི་ཡིག་ཆ་པའོ་ཞི་ལེ་ལ་སྤྲད་ཡོད་མེད་ཀྱི་གནས་ཚུལ་ཞིབ་བཤེར་བྱས་འདུག

 ༢༠༡༢ ལོ་ཟླ་ ༣ ཚེས་ ༡༥ ཉིན། རྒྱ་ནག་སྲིད་འཛིན་ཧུའུ་ཅིན་ཐོ་ཡིས་དམག་ཁག་ ༣༨ བའི་དམག་དཔོན་ཝང་ཞའེ་ཞིན་ (Wang Xuxin) དམག་དཔོན་གྱི་གོ་གནས་ཕབ་སྟེ། དམག་སྤྱི་ཆུང་བ་ཞོའི་ལིན་ཕིན་ (Xu Linping) ལ་དམག་དཔོན་ཆེན་མོའི་གོ་གནས་སྤྲད། ཉིན་དེར་པའོ་ཞི་ལེ་ལ་འབྲེལ་འདྲིས་ཟབ་མོ་ཡོད་པའི་ཚོང་པ་དང་རྒྱ་ནག་གི་ཕྱུག་བདག་ཆེན་མོ་ཞའོ་མིན་ (Xu Ming)ལ་དཔལ་འབྱོར་གྱོད་དོན་དོགས་གཞི་ཡོད་པའི་བཀག་ཉར་བྱས།

རྒྱ་ནག་གི་ཕྱི་ལོགས་ཀྱི་གསར་ལམ་ཁག་ཏུ་གནས་ཚུལ་སྤེལ་བར། ༢༠༡༢ ལོ་ཟླ་ ༣ ཚེས་ ༡༩ ཉིན་ཀྲུའུ་ཡོང་ཁང་གི་དྲག་ཆས་དམག་མིས་པའོ་ཞི་ལེ་ཡི་གལ་ཆེའི་དཔང་མི་ཞའོ་མིན་བཙན་འཁྲིད་བྱས། ཧུའུ་ཅིན་ཐོ་ཡིས་གསར་དུ་བསྐོ་བཞག་བྱས་མ་ཐག་པའི་དམག་སྤྱི་ཞོའི་ལིན་ཕིན་གྱིས་ཧོ་པེ་ཡི་དམག་ཁག་ ༣༨ པེ་ཅིན་ལ་སྤོར་ཡོད་པ་དང་། དམག་མི་ཚོས་སྲིད་འཛིན་ཧུའུ་ཅིན་ཐོ་ཡི་བཀའ་དང་ལེན་བྱས་ཏེ། ཀྲུའུ་ཡོང་ཁང་གི་དྲག་ཆས་དམག་མི་ལ་ཁ་གཏད་གཏོག་ཐབས་བྱས་ཡོད་འདུག ཀྲུའུ་ཡོང་ཁང་གི་དྲག་ཆས་དམག་མིས་ཧོ་པེ་ནས་ཡོང་བའི་ཞོ་ལིན་ཕིན་གྱི་དམག་མི་ཕྱིར་འཐེན་བྱ་དགོས་པའི་འཇིགས་སྐུལ་བྱས་ཡོད་ཀྱང་། ཅུང་མ་འགོར་བར་ཞོ་ལིན་ཕིན་གྱི་དམག་མིས་ཀྲུའུ་ཡོང་ཁང་གི་དྲག་ཆས་དཔུང་དམག་ལ་དབང་སྒྱུར་བྱས་ཐུབ་ཡོད་འདུག

༢༠༡༢ ལོ་ཟླ་ ༨ ཚེས་ ༢༩ ཉིན། རྒྱ་ནག་ཏང་གི་ཚོགས་ཆེན་བཅོ་བརྒྱད་པའི་སྟེང་སྲིད་ཁྲིམས་ཀྱི་མགོ་གཙོ་འཛུལ་བཞུགས་མི་ཆོག་པ་བཟོས་ཡོད་པ་དང་། དེ་སྔོན་ཆབ་སྲིད་སྡེ་ཚན་གྱི་མགོ་གཙོ་མི་དགུ་ཚང་དགོས་པའི་གྲོས་ཚོགས་དེ་མི་བདུན་དུ་བཟོས་ཏེ་སྲིད་ཁྲིམས་ཨུ་ཡོན་ལྷན་ཁང་གི་གོ་གནས་དེ་མེད་པ་བཟོས་ཡོད་འདུག

༢༠༡༢ ལོ་ཟླ་ ༡༡ ཚེས་ ༡༩ ཉིན། ཀྲུའུ་ཡོང་ཁང་རྒྱ་ནག་དབུས་སྲིད་ཁྲིམས་མགོ་གཙོའི་གོ་གནས་ནས་ཕབ།

༢༠༡༣ ལོ་ཟླ་ ༡༢ ཚེས་ ༡ ཉིན། རྒྱ་ནག་དབུས་ཆབ་སྲིད་རྒྱུན་ལས་ཨུ་ཡོན་ཚོགས་འདུའི་སྟེང་། དབུས་སྒྲིག་ཁྲིམས་ཨུ་ཡོན་ལྷན་ཁང་གིས་ཀྲུའུ་ཡོང་ཁང་གི་ནག་ཉེས་ཚོགས་ཐོག་ཏུ་སྙན་སེང་ཞུས་རྗེས། དེ་དག་གསལ་བོ་རྩད་ཞིབ་བྱ་རྒྱུའི་ཐག་གཅོད་བྱུང་།

༢༠༡༤ ལོ་ཟླ་ ༧ ཚེས་ ༢༩ ཉིན་རྒྱ་ནག་དབུས་ཆབ་སྲིད་ལྷན་ཁང་གི་ཚོགས་འདུའི་སྐབས། དབུས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས། ཀྲུའུ་ཡོང་ཁང་གི་གྱོད་དོན་ཞིབ་བཤེར་བརྒྱུད་རིམ་སྙན་སེང་ཞུས་རྗེས། ཀྲུའུ་ཡོང་ཁང་ལ་འདྲི་གཅོད་བྱ་རྒྱུ་གཏན་ཁེལ་བྱས།

༢༠༡༤ ལོ་ཟླ་ ༡༢ ཚེས་ ༦ ཉིན་གྱི་ཞོགས་པར་རྒྱ་ནག་གཞུང་གིས་ཀྲུའུ་ཡོང་ཁང་ཏང་ནས་ཕྱིར་ཕུད་བྱས་ཚུལ་བསྒྲགས་པ་དང་། ཀྲུའུ་ཡོང་ཁང་ཉིན་དེར་འཛིན་བཟུང་བྱས་ཡོད་འདུག ཁོའི་ནག་ཉེས་ཁྲིམས་འཛིན་ཁང་ནས་ཐག་གཅོད་བྱ་དགོས་ཀྱང་། ཆེས་མཐོ་ཁྲིམས་ཞིབ་པས་ལྐོག་ནས་ཞིབ་བཤེར་བྱས་ཟིན་སྟབས། ཁོ་ལ་ལྐོག་ཟ་རུལ་སུངས་དང་དབང་ཆ་སྒེར་སྤྱོད། རྒྱ་ནག་གཞུང་དང་ཏང་གི་གསང་བ་ཕྱིར་བསྒྲགས། བུད་མེད་མང་པོར་ཆགས་སྲེད་ཀྱིས་ལྐོག་འབྲེལ་བྱས་པ་སོགས་ཀྱི་ནག་ཉེས་དང་། དེ་མིན་གྱི་ནག་ཉེས་གཞན་ལའང་དོགས་གཞི་ཡོད་པ་བཅས་ཀྱི་ཉེས་མིང་བགྲང་སྟེ་ཕྱི་བསྒྲགས་བྱས་འདུག