འཕཊ་མོ་བསམ་འགྲུབ།
ཕྱི་ཟླ་ ༢ པའི་ཚེས་ ༥ ཉིན་གྱི་བོད་ནང་གི་དགོང་དྲོའི་ཆུ་ཚོད་ ༩།༣༠ ཙམ་ལ། རྨ་ལྷོ་ཁུལ་རྩེ་ཁོག་རྫོང་རྡོ་དཀར་མོ་ཡུལ་ཚོའི་བན་ཆེན་ཉིན་སློབ་གྲྭ་གཉིས་པའི་ཉེ་འདབས་སུ། མགོན་ཤུལ་སྒར་བའི་རང་ལོ་ ༢༧ ཡིན་པའི་འཕགས་མོ་བསམ་འགྲུབ་ལགས་ཀྱིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེཊ་གནང་ཡོད་ཅིང་། དེ་མ་ཐག་རྒྱ་གཞུང་ཉེན་རྟོག་པ་བསླེབས་ཏེ་བཙན་ཁྲིད་བྱས་ཡོད་ཅིང་། ཕྱིས་སུ་ཁོང་འདས་གྲོངས་ཏུ་ཕྱིན་ཏེ་སྐུ་ཕུང་མེར་བསྲེགས་བཏང་བའི་རུས་ཐལ་ཞིག་ནང་མིར་སྤྲད་ཡོད་འདུག
བློ་བཟང་རྡོ་རྗེ།
ཕྱི་ཟླ་ ༢ པའི་ཚེས་ ༡༣ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༦།༣༠ ཙམ་ལ། རྔ་པ་རྫོང་གཅའ་རུ་མ་ཡུལ་ཚོའི་ཕྱུགས་ལས་གོང་མིའི་ཕ་ཚེ་དཔག་དང་མ་མ་ནེ་སྐྱིད་གཉིས་ཀྱི་བུ་རང་ལོ་ ༢༥ ཡིན་པ་བློ་བཟང་རྡོ་རྗེ་ལགས་ཀྱིས། རྔ་པ་ཀིརྟི་དགོན་པའི་ཉེ་འཁྲིས་སུ་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེཊ་གནང་ཡོད་པ་དང་། མེར་བསྲེགས་བཏང་མ་ཐག་ཉེན་རྟོག་པས་ཁོའི་ལུས་ཀྱི་མེ་བསད་དེ་བཙན་ཁྲིད་བྱས་ཡོད་ཀྱང་། ཉིན་གསུམ་གྱི་རྗེས་སུ་འབར་ཁམས་སྨན་ཁང་དུ་ཁོང་འདས་གྲོངས་སུ་ཕྱིན་ཡོད་འདུག
གྲྭ་བློ་བཟང་དཔལ་ལྡན།
ཕྱི་ཟླ་ ༣ པའི་ཚེས་ ༡༦ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༡༡།༤༠ ཙམ་ལ་རྔ་པ་ཀིརྟི་དགོན་གྱི་རང་ལོ་ ༢༠ ཡིན་པའི་གྲྭ་བློ་བཟང་དཔལ་ལྡན་ལགས་ཀྱིས། རྔ་པ་རྫོང་དཔའ་བོའི་སྲང་ལམ་དུ་སྐད་རྒྱ་གཞུང་ལ་ངོ་རྒོལ་འབོད་གནང་བཞིན་རང་ལུས་མེར་བསྲེགས་གནང་སྐབས། རྒྱ་ནག་ཉེན་རྟོག་པས་བཙན་ཁྲིད་བྱས་ཡོད་ཀྱང་ཕྱིས་སུ་སྐུ་གྲོངས་ཡོད་འདུག གྲྭ་བློ་བཟང་དཔལ་ལྡན་ལགས་ནི་རྔ་པ་རྫོང་རྨེའུ་རུ་མ་ཡུལ་ཚོ་རུ་ཆེན་གསུམ་པའི་ཨ་ཤེར་ཚང་ནས་ཡིན་པ་དང་། མ་མིང་ལ་ནམ་ཁོ་དང་། ཕ་གཡར་གྱི་མིང་ལ་ཤེས་རབ་ཟེར་བ་དང་། སྤུན་མཆེད་གཉིས་རྔ་པ་ཀིརྟི་དགོན་གྱི་གྲྭ་བ་ཡིན་འདུག ཁོང་གིས་རང་སྲེག་མ་གནང་གོང་སྐད་འཕྲིན་ནང་། བོད་མི་ཚོས་ཀུན་ལ་འཆམ་མཐུན་དང་ལྷག་བསམ་རྣམ་དག་གིས་བྱ་བ་བསྒྲུབ་དགོས་ལ། ཕ་མ་རྒན་འཁོགས་ལ་བདག་སྐྱོང་དང་། བྱིས་པ་ཚོས་སློབ་སྦྱོང་ལ་འབད་བརྩོན་བྱེད་དགོས་སྐོར་གྱི་ཞལ་ཆེམས་ཞིག་བཞག་ཡོད་འདུག
གྲྭ་འཇིཊ་མེད་བསྟན་འཛིན།
ཕྱི་ཟླ་ ༣ པའི་ཚེས་ ༡༦ ཉིན་གྱི་སྔ་དྲོར། རྨ་ལྷོ་རྩེ་ཁོག་རྫོང་བྱ་དར་ཡུལ་ཚོ་བྱ་དར་དགོན་པའི་གྲྭ་འཇིགས་མེད་བསྟན་འཛིན་ལགས་ཀྱིས། སོ་ནག་དགོན་པའི་གླིང་གི་ཕྱི་རོལ་དུ་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེཊ་གནང་ཡོད་པ་དང་། དེ་མ་ཐག་དགོན་པའི་དགེ་འདུན་པ་ཚོས་མཐོང་སྟེ་དགོན་པའི་ནང་དུ་གདན་འདྲེན་ཞུས་ཡོད་ཀྱང་ཅུང་ཙམ་རྗེས་འདས་གྲོངས་སུ་གྱུར་ཡོད་འདུག འཇིགས་མེད་བསྟན་འཛིན་ལགས་ནི་རྨ་ལྷོ་ཁུལ་རྩེ་ཁོག་རྫོང་སོ་ནག་ཚོ་བ་ལྔ་ཡོད་པ་ལས་ངག་རིགས་འཚོ་བ་ནས་ཡིན་ཞིང་། ད་ལྟ་རང་ལོ་ ༢༩ ཡིན་པ་དང་། དེ་སྔོན་རེབ་གོང་རོང་བོ་དགོན་ཆེན་ཐོས་བསམ་ནོར་གླིང་གྲྭ་ཚང་དུ་ཆོས་ཞུགས་ཀྱིས་ལོ་བཅུའི་རིང་ཕྱག་དཔེ་ཚུལ་བཞིན་གཟིགས་ནས་འཛིན་གྲྭ་སྐབས་དང་པོའི་བར་དུ་ སླེབས་ཡོད་ཅིང་། ཕྱིས་སུ་སོ་ནག་དགོན་པར་ཕེབས་ཡོད་འདུག
བཙུན་མ་སྒྲོལ་མ།
ཕྱི་ཟླ་ ༣ པའི་ཚེས་ ༢༩ ཉིན་གྱི་ཕྱི་དྲོའི་བོད་ནང་གི་ཆུ་ཚོད་ ༣།༠༠ ཙམ་ལ། འབའ་ཐང་རྫོང་འབའ་ཆོས་སྡེ་དགོན་པའི་ཉེ་འགྲམ་དུ་རང་ལོ་ ༣༡ ཡིན་པའི་བཙུན་མ་སྒྲོལ་མ་ལགས་ཀྱིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེཊ་གནང་ཡོད་པ་དང་། དེ་མ་ཐག་སྐོར་བར་འགྲོ་བཞིན་པའི་བོད་མི་ཚོས་ཁོ་མོ་འབའ་ཐང་རྫོང་མི་མང་སྨན་ཁང་དུ་བསྐྱལ་ཏེ་སྲོག་ཉེན་ལས་ཐར་ཡོད་འདུག བཙུན་མ་སྒྲོལ་མ་ལགས་ནི་འབའ་ཐང་སྤྱི་སྲུང་སྒང་ཞོག་གྲོང་སྡེ་ནས་ཡིན་པ་དང་། ཕ་མིང་ལ་ཉི་མ་དང་མ་མིང་ལ་དབང་མོ། སྤུན་ཆུང་བའི་མིང་ལ་ཨ་ཆུབ་ཟེར་གྱི་ཡོད་འདུག
འཕྲིན་ལས་རྣམ་རྒྱལ།
ཕྱི་ཟླ་ ༤ པའི་ཚེས་ ༡༥ ཉིན་གྱི་བོད་ནང་གི་ཉིན་གུང་ཆུ་ཚོད་ ༡༢ ཙམ་ལ། དཀར་མཛེས་ཁུལ་རྟའུ་རྫོང་ཁང་སར་ཤང་གི་ཉེ་འགྲམ་དུ་རང་ལོ་ ༣༢ ཡིན་པའི་བོད་མི་འཕྲིན་ལས་རྣམ་རྒྱལ་ལགས་ཀྱིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་གནང་ནས་སྐུ་གྲོངས་ཡོད་པ་དང་། དེ་མ་ཐག་ས་གནས་མི་མང་གིས་ཁོང་གི་སྐུ་ཕུང་རང་ཁྱིམ་དུ་གདན་འདྲེན་ཞུས་ཡོད་ཀྱང་། ཕྱིས་སུ་ཉེན་རྟོག་པས་བཙན་འཁྱེར་བྱས་ཡོད་མེད་ཀྱི་གནས་ཚུལ་ཤེས་རྟོགས་ཐུབ་མེད་པ་རེད། འཕྲིན་ལས་རྣམ་རྒྱལ་ལགས་ནི་རྟའུ་རྫོང་ཁང་སར་ཤང་རྒན་ནད་སྡེ་བའི་ཕ་བདུད་ལོ་དང་མ་དཔལ་ལྷ་གཉིས་ཀྱི་བུ་ཡིན་འདུག
དཀོན་མཆོག
ཕྱི་ཟླ་ ༩ པའི་ཚེས་ ༡༧ ཉིན་མགོ་ལོག་དགའ་བདེ་རྫོང་གཙང་སྐོལ་བཤོལ་མ་གྲོང་ཚོའི་ཉེན་རྟོག་ཁང་གི་ཉེ་འཁྲིས་སུ། རང་ལོ་ ༤༢ ཙམ་ཡིན་པའི་བོད་མི་དཀོན་མཆོག་ཞུ་བ་ཞིག་གིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་གནང་ཡོད་པ་དང་། སྐབས་དེར་གནས་ཚུལ་གསལ་བོ་ཤེས་རྟོགས་ཐུབ་མེད་ཀྱང་ཕྱིས་སུ་ཁོང་ཟི་ལིང་གི་སྨན་ཁང་ཞིག་ཏུ་གསང་བའི་ངང་མྱུར་སྐྱོབ་སྨན་བཅོས་བྱེད་བཞིན་པའི་གནས་ཚུལ་དང་འདྲ་པར་བཅས་འབྱོར་ཡོད་པ་མ་ཟད། གནས་ཚུལ་ཡོང་ཁུངས་ནས་ཁོང་ལ་གསོན་རེ་ཆེན་པོ་མེད་ལུགས་བརྗོད་ཡོད་པ་རེད།
སློབ་བུ་ལྷ་མོ་བཀྲ་ཤིས།
ཕྱི་ཟླ་ ༩ ཚེས་ ༡༧ པའི་ཉིན་གྱི་མཚན་མོའི་བོད་ནང་གི་ཆུ་ཚོད་ ༡༢ སྟེང་། ཀན་ལྷོ་ཁུལ་གཙོད་གྲོང་ཁྱེར་ཉེན་རྟོག་ཁང་གི་སྒོ་ཁར། རང་ལོ་ ༢༢ ཡིན་པའི་ལྷ་མོ་བཀྲ་ཤིས་ལགས་ཀྱིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་གནང་སྟེ་འདས་གྲོངས་སུ་གྱུར་ཡོད་པ་དང་། ཉེན་རྟོག་པས་ཁོང་གི་སྐུ་ཕུང་བཙན་འཁྱེར་གྱིས་མེར་བསྲེགས་བཏང་སྟེ་ཁྱིམ་མི་ཚོར་རུས་ཐལ་ཞིག་སྤྲད་ཡོད་ཅིང་། ལྷ་མོ་བཀྲ་ཤིས་ལགས་ནི་བསང་ཆུ་རྫོང་འབོ་རྭ་ཡུལ་ཚོ་ཨ་མཆོག་སྒྲོག་མདོ་སྡེ་བའི་ཕ་གཅོད་པ་ཚེ་རིང་དང་མ་གདུགས་དཀར་མཚོ་གཉིས་ཀྱི་བུ་ཡིན་ལ། དེ་སྔ་གཙོད་གྲོང་ཁྱེར་དུ་སློབ་གྲྭར་སྐྱོད་བཞིན་ཡོད་འདུག
སངས་རྒྱས་མཁར།
ཕྱི་ཟླ་ ༡༢ པའི་ཚེས་ ༡༦ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༩ ཙམ་ལ་བླ་བྲང་ཨ་མཆོག་ཡུལ་ཚོའི་ཉེན་རྟོག་ཁང་གི་མདུན་དུ། བོད་མི་སངས་རྒྱས་མཁར་ལགས་ཞུ་བས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་པ་དང་། དེ་མ་ཐག་ཉེན་རྟོག་པ་བསླེབས་ཏེ་ཁོང་གི་སྐུ་ཕུང་བཙན་འཁྱེར་བྱས་ཡོད་འདུག སངས་རྒྱས་མཁར་ལགས་ད་ལྟ་རང་ལོ་ ༣༤ ཡིན་པ་དང་ཁོང་ནི་བུ་མོ་གཉིས་ཀྱི་ཨ་ཕ་ཡིན་འདུག
ཚེ་པེ་སྐྱིད།
ཕྱི་ཟླ་ ༡༢ ཚེས་ ༢༢ ཉིན་རྔ་པ་རྫོང་རྨེའུ་རུ་མ་ཡུལ་ཚོའི་སྟེང་དུ། རང་ལོ་ ༢༠ ཡིན་པའི་བོད་རིགས་བུ་མོ་ཚེ་པེ་སྐྱིད་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་པ་དང་། ཕྱིས་སུ་ཉེན་རྟོག་པ་བསླེབས་ཏེ་ཁོང་མོའི་སྐུ་ཕུང་བཙན་ཁྱེར་བྱས་ཡོད་འདུག ཚེ་པེ་སྐྱིད་ལགས་རྨེའུ་རུ་མ་ཡུལ་ཚོའི་རུ་ཆེན་བཞི་པའི་ཕ་ཆུ་རྡོ་རིན་ཆེན་དང་མ་ཅན་དཔའ་གཉིས་ཀྱི་བུ་མོ་ཡིན་ལ། མིང་སྲིང་དྲུག་ཡོད་པའི་བཞི་པ་ཡིན་འདུག
གྲྭ་སྐལ་བཟང་ཡེ་ཤེས།
ཕྱི་ཟླ་ ༡༢ ཚེས་ ༢༣ ཉིན་གྱི་སྔ་དྲོའི་བོད་ནང་གི་ཆུ་ཚོད་ ༡༡།༢༠ ཙམ་ལ། དཀར་མཛེས་ཁུལ་རྟའུ་རྫོང་ཉ་མཚོ་དགོན་གྱི་གྲྭ་སྐལ་བཟང་ཡེ་ཤེས་ལགས་ཀྱིས་ས་གནས་ཉེན་རྟོག་ཁང་གི་སྒོ་འགྲམ་དུ། “༧རྒྱལ་དབང་བསྟན་འཛིན་རྒྱ་མཚོ་བོད་ནང་གདན་འདྲེན་ཞུ་དགོས། བོད་མི་རིགས་ལ་རང་དབང་སྤྲོད་དགོས།” ཞེས་སྐད་འབོད་གནང་བཞིན་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་པ་དང་། ཅུང་ཙམ་ནས་ས་གནས་ཉེན་རྟོག་པ་བསླེབས་ཏེ་སྐུ་ཕུང་བཙན་འཁྱེར་བྱས་ཡོད་འདུག སྐལ་བཟང་ཡེ་ཤེས་ལགས་རྟའུ་ཐེ་ཝ་ཡལ་ཚོ་རུ་སྐྱེས་ཤིང་ད་ལྟ་རང་ལོ་ ༣༨ ཡིན་པ་དང་། ཕ་མིང་ལ་བྱམས་པ་དང་མ་མིང་ལ་རྡོ་རྗེ་ཟེར་གྱི་ཡོད་འདུག
གསར་འགོད་པ། པདྨ་མཚོ།
བོད་ཀྱི་དུས་བབ་ཚང་གི་གསར་འགྱུར་འགོད་སྟངས་འདི་ཧ་ཅང་ཡག་པོ་འདུག སྤྱི་ལོ་གསར་པའི་ནང་དུས་བབ་ཀྱི་ལས་བྱེད་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་གྲངས་མེད་ཞུ།།