བྱ་བྲལ་བྱམས་པ་འཕྲིན་ལས་རིན་པོ་ཆེ་ད་ལྟ་སྐུ་འཚོ་བཞུགས་ཨེ་ཡིན།

པཎ་ཆེན་སྐུ་ཕྲེང་བཅུ་བའི་ཡང་སྲིད་འཚོལ་ཞིབ་ཚོགས་ཆུང་གི་ཚོགས་གཙོ་བྱ་བྲལ་རིན་པོ་ཆེ་མཆོག་རྒྱ་གཞུང་གིས་འཛིན་བཟུང་བྱས་རྗེས་ཁོང་གར་ཡོད་ཅི་ཆགས་ཀྱི་གནས་ཚུལ་དང་། ད་ལྟ་སྐུ་འཚོ་བཞིགས་ཡོད་མེད་ཙམ་ཡང་ཤེས་རྟོགས་མ་ཐུབ་པར་ལོ་ངོ་ ༢༠ འགྲོ་བཞིན་ཡོད་པའི་སྐབས་འདིར་ཁོང་བསྐྱར་དུ་གླེང་སློང་བྱས།

ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག་ ༡༩༨༩ ཟླ་ ༡ ཚེས་ ༢༨ ཉིན་གློ་བུར་དགོངས་པ་རྫོགས་རྗེས། དེ་སྔའི་སྐུ་བཅར་བ་བྱ་བྲལ་བྱམས་པ་འཕྲིན་ལས་མཆོག་གིས་ཕ་ཤུལ་བུས་འཛིན་གྱི་དཔེ་ལྟར་ཐུགས་འགན་ཡོངས་རྫོགས་བཞེས་ཏེ་སྐུ་ངལ་བསྐྱོན་ཡོད་པ་དང་། ཕྱིས་སུ་༧གོང་ས་མཆོག་གིས་ཐུགས་འཁུར་ཆེ་བཞེས་ཀྱིས་ཡང་སྲིད་འཚོལ་ཞིབ་ཚོགས་ཆུང་ཞིག་བོད་དུ་ཆེད་གཏོང་ཐུབ་པར་འབད་བརྩོན་གནང་ཡོད་ཀྱང་། རྒྱ་གཞུང་གིས་མོས་མཐུན་མ་བྱས་པར་བྱ་བྲལ་རིན་པོ་ཆེ་མཆོག་ཡང་སྲིད་འཚོལ་ཞིབ་ཚོགས་ཆུང་གི་ཚོགས་གཙོར་བསྐོ་བཞག་བྱས་ཏེ། གང་མགྱོགས་ཀྱིས་ཡང་སྲིད་འཚོལ་ཞིབ་བྱས་ཏེ་རྒྱལ་སྲིད་སྤྱི་ཁྱབ་ཁང་ལ་སྙན་གསེང་ཆོག་མཆན་ཞུ་དགོས་པའི་བཙན་སྐུལ་ཡང་ཡང་བྱས་ཡོད་པ་རེད།

བྱ་བྲལ་རིན་པོ་ཆེ་མཆོག་དང་འབྲེལ་བའི་གནས་ཚུལ་ལྟར་ན། བོད་གཞིས་བྱེས་གཉིས་ཀྱི་རེ་འདོད་ལྟར་ཡང་སྲིད་འཁྲུལ་མེད་ངོས་འཛིན་ཡོང་ཆེད། ༧གོང་ས་མཆོག་ལ་པར་རིས་དང་ཕྱག་བྲིས་སོགས་ཀྱི་ཐད་ནས་སྔ་ཕྱིར་གསང་བའི་འབྲེལ་བ་ཐེངས་ ༡༦ ཙམ་ཞུས་ཏེ། ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་བཞུགས་སྒར་དྷ་རམ་ས་ལར་༧གོང་ས་མཆོག་གིས་ཆུང་སྲིད་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་ངོས་འཛིན་གསལ་བསྒྲགས་གནང་ཡོད་སྟབས། རྒྱ་གཞུང་གིས་རྒྱལ་ཁབ་ཀྱི་གསང་བ་ཕྱི་གྱར་བྱས་པའི་ཉེས་མིང་འོག ལོ་དེའི་ཕྱི་ཟླ་ ༥ ཚེས་ ༡༥ ཉིན་བྱ་བྲལ་རིན་པོ་ཆེ་དང་ཁོང་གི་དྲུང་ཡིག་བྱང་པ་གཅུང་ལགས། ཞབས་ཞུ་བ་བཀྲ་ཤིས་བཅས་པེ་ཅིན་དུ་བསྐྱོད་དེ་ཕྱིར་ལོག་སྐབས་ཁྲིན་ཏུའུ་གནམ་ཐང་ནས་འཛིན་བཟུང་བྱས།

༡༩༩༧ ཟླ་ ༤ ཚེས་ ༢༢ ཉིན་གཞིས་ཀ་རྩེ་འབྲིང་རིམ་མི་དམངས་ཁྲིམས་ཁང་ཟེར་བས་གསང་བའི་ཐོག་ནས་ལོ་ངོ་ ༦ བཙོན་འཇུག་ཁྲིམས་ཐག་བཅད་པ་དང་། ༢༠༠༢ ལོར་བཙོན་འཇུག་དུས་ཡུན་རྫོགས་ཡོད་ནའང་ཀློད་གྲོལ་མ་བཏང་བར་གར་ཡོད་ཅི་བྱུང་མེད་པར་གྱུར་ཡོད་ཀྱང་། ཕྱི་ལོ་ ༢༠༡༡ ཟླ་ ༡ པོའི་ནང་བྱ་བྲལ་རིན་པོ་ཆེ་མཆོག་དང་ཐུགས་འདྲིས་ཆེ་བའི་བོད་ལྗོངས་ནང་བསྟན་མཐུན་ཚོགས་ཀྱི་གནད་ཡོད་མི་སྣ་ཞིག་བརྒྱུད་དེ་བྱ་བྲལ་རིན་པོ་ཆེ་ལོ་ཤས་གོང་ནས་གྲོངས་ཚར་བ་རེད་ཟེར་བ་ཞིག་དང་། རིན་པོ་ཆེར་དུག་དྲངས་ཏེ་བཀྲོངས་པ་རེད་ཟེར་བ་བཅས་ཀྱི་གནས་ཚུལ་ཞིག་ཀྱང་ཐོན་ཡོད།

འདི་གའི་གསར་འགོད་པས་བྱ་བྲལ་རིན་པོ་ཆེའི་སློབ་མ་ཡིན་པ་སཱ་ར་མཐོ་སློབ་ཀྱི་ནང་ཆོས་སློབ་དཔོན་དགེ་བཤེས་བློ་བཟང་བསྟན་འཕེལ་ལགས་སུ་བཅར་འདྲི་ཞུས་པར་ཁོང་གིས། རིན་པོ་ཆེ་རྒྱ་ནག་ནང་ཕེབས་ཏེ་གང་འཚམ་ཕྱིན་རྗེས། པཎ་ཆེན་རིན་པོ་ཆེའི་ཡང་སྲིད་ངོས་འཛིན་གནང་ཟིན་པའི་གནས་ཚུལ་དེ་ཕྱི་ཕྱོགས་ཀྱི་རླུང་འཕྲིན་ནང་ནས་བསྒྲགས་སོང་། དེ་ནས་ཉིན་གཉིས་ཙམ་ཕྱིན་རྗེས་རྒྱ་ནག་གཞུང་གི་ལས་དོན་ཚོགས་ཆུང་དགོན་པར་བསླེབས་ཏེ། ༧རྒྱལ་བ་རིན་པོ་ཆེས་རྒྱ་ནག་གི་ནང་སྲིད་ལ་ཐེ་གཏོགས་བྱས་རབས་བརྗོད་དེ་ཁ་ལུང་པ་གང་བཏང་སོང་། སྐབས་དེར་བྱ་བྲལ་རིན་པོ་ཆེར་ཡག་སྡུག་གང་ཡང་ལབ་ཀྱི་མི་འདུག ༡༩༩༥ ལོའི་ཕྱི་ཟླ་ ༥ པའི་ནང་རྒྱ་ནག་གཞུང་གིས་རིན་པོ་ཆེ་པེ་ཅིན་ནས་ཁྲིན་ཏུའུ་གནམ་ཐང་དུ་འབྱོར་སྐབས། རིན་པོ་ཆེ་དང་ཕྱག་རོགས་བཅས་འཛིན་བཟུང་བྱས་པའི་གནས་ཚུལ་ཐོན་པ་རེད། དེ་ནས་ཟླ་བ་གཅིག་གཉིས་ཤིག་ལ་རིན་པོ་ཆེའི་སྐོར་གོ་ཐོས་ཁྱོན་ནས་མེད་པ་དང་། ཡང་སྲིད་སྐོར་ནས་ང་ཚོའི་དགོན་པའི་ནང་ཟང་ངེ་ཟིང་ངེ་ཞེ་དྲག་ཆགས་སོང་། རིམ་གྱིས་རྒྱ་ནག་གཞུང་གིས་བྱ་བྲལ་རིན་པོ་ཆེར་ཁ་གཏོང་བའི་མགོ་བཙུགས་ཏེ་རྒྱལ་ཁབ་ཀྱི་གསང་བ་ཕྱི་གྱར་མཁན་རེད་ཟེར་བ་དང་། དག་མ་ཡིན་མིན་གང་ཤས་ཏེ། ཁོང་གི་དྲུང་ཡིག་བྱམས་པ་ཆུང་ལགས་ཀྱིས་༧གོང་ས་མཆོག་ལ་འབྲེལ་བ་ཞུས་བའི་སྐོར་ངོས་ལེན་གནང་པའི་བརྙན་ཐུང་ཞིག་ཀྱང་གྲྭ་བ་ཚོར་བསྟན་པ་སོགས་རིན་པོ་ཆེར་སྐྱོན་འཛུགས་མང་པོ་བྱས་པ་རེད། ༡༩༩༧ ལོར་གསང་བའི་ཐོག་ནས་རིན་པོ་ཆེར་ལོ་ ༦ ཁྲིམས་ཐག་བཅད་པ་མ་ཟད། ༢༠༠༢ ལོར་བཙོན་འཇུག་དུས་ཡུན་རྫོགས་ཀྱང་ད་ལྟའི་བར་གར་སོང་ཆ་མེད་ཆགས་བསྡད་ཡོད་པ་རེད། ཅེས་བརྗོད་སོང་།

ཐོག་མར་རིན་པོ་ཆེ་དང་ཁོང་གཉིས་བར་འབྲེལ་བ་ཇི་ལྟར་བྱུང་བའི་སྐོར་དྲིས་པར་ཁོང་གིས། རིན་པོ་ཆེ་ང་ཚོའི་དབེན་དགོན་གྱི་བླ་མ་རེད། ཕྱི་ལོ་ ༡༩༨༦ ལོར་ང་དབེན་དགོན་དུ་གྲྭ་བ་བྱས་ཤིང་སྐབས་དེར་ང་ཚོ་གྲྭ་བ་གསར་པ་ ༧ ཡོད། ང་ཚོ་རིག་གནས་གསར་བརྗེ་བྱུང་རྗེས་ཀྱི་གྲྭ་བ་དང་པོའི་གྲས་རེད། རིན་པོ་ཆེས་ང་ཚོའི་དགོན་པ་རུ་པཎ་ཆེན་སྐུ་ཕྲེང་གསུམ་པ་དབེན་ས་པ་བློ་བཟང་དོན་འགྲུབ་མཆོག་གི་སྒྲུབ་ཕུག་ཡག་པོ་ཞིག་གསར་བཞེངས་གནང་ཡོད། རིན་པོ་ཆེ་མཆོག་དབེན་དགོན་དེར་བཞུགས་རྒྱུའི་འདོད་པ་ཆེན་པོ་ཡོད་ཀྱང་། རྗེས་སུ་རྒྱ་ནག་གཞུང་གིས་པཎ་ཆེན་རིན་པོ་ཆེའི་ཡང་སྲིད་འཚོལ་ཞིབ་ཀྱི་འགན་དེ་ཁོང་ལ་སྤྲད་པ་ཡིན་སྟབས། ཁོང་བཞུགས་མ་ཐུབ་པར་ཕེབས་དགོས་བྱུང་པ་རེད། ང་རང་ལྟ་བུར་ཆ་བཞག་ན། སང་ཉིན་རབ་བྱུང་བསྒྲུབ་རྒྱུ་ཡིན་ན་དེ་རིང་འདྲ་བོར་རིན་པོ་ཆེས་ང་ལ་གྲྭ་ཆས་གྱོན་སྟངས་དང་ཕྱག་འཚལ་སྟངས་ནས་བསླབས་གནང་སྟེ་བཀའ་དྲིན་ཆེན་པོ་ཞེ་དྲག་ཡིན།

༡༩༩༥ ལོའི་ཉིན་ཞིག་རིན་པོ་ཆེ་མཆོག་གིས་ང་དང་ང་ཚོའི་དགོན་པའི་འགན་འཛིན་གཟིམས་སྦུག་རིན་པོ་ཆེ། འགན་འཛིན་གཞོན་པ་བྱམས་པ་གསུམ་བཀྲ་ཤིས་ལྷུན་པོ་དགོན་པར་ཤོག་གསུངས་སོང་། ང་དེ་དུས་ང་ཚོའི་དགོན་པའི་དབུ་མཛད་དང་རྩིས་པ་ཡིན། ང་ཚོ་ཡར་བཅར་སྐབས་རིན་པོ་ཆེས་ཁོང་པཎ་ཆེན་རིན་པོ་ཆེའི་ཡང་སྲིད་སྐོར་དང་སྐུ་ཆས་ཀྱི་ཆེད་དུ་ཕྱི་ཉིན་རྒྱ་ནག་ལ་ཕེབས་དགོས་ལུགས་གསུངས་སོང་། མཚན་མོ་དེར་ཆུ་ཚོད་ ༢ པ་མ་ཟིན་ཙམ་བར་རིན་པོ་ཆེས་ང་ཚོར་དགོན་པ་བསྐྱར་བཞེངས་གནང་ཕྱོགས་དང་དགོན་པའི་སྒྲིག་གཞི་སོགས་ཀྱི་ཐོག་ཞེ་དྲག་མང་པོ་གསུངས་སོང་། དེ་ཚོར་ཕྱིས་སུ་བསམ་བློ་བཏང་དུས་ཕལ་ཆེར་གནས་སྐབས་རིང་ཁོང་ཕེབས་མི་ཐུབ་པའི་དགོངས་གཞི་ཡོད་ས་རེད་དྲན་གྱི་འདུག ཕྱི་ཉིན་ཉིན་གུང་ཙམ་ལ་རིན་པོ་ཆེ་དང་ཞབས་ཞུ་བཀྲ་ཤིས་ལགས། དྲུང་ཡིག་བྱང་པ་གཅུང་ལགས་བཅས་པེ་ཅིན་དུ་ཕེབས་པ་ནས་བཟུང་རིན་པོ་ཆེ་ཁྱོན་ནས་མཇལ་རྒྱུ་བྱུང་ཡོད་པ་མ་རེད། ཅེས་བརྗོད་བྱུང་།

ཁོང་གིས་རིན་པོ་ཆེ་བཀྲ་ཤིས་ལྷུན་པོ་དགོན་དུ་ཞུགས་པའི་བརྒྱུད་རིམ་ངོ་སྤྲོད་གནང་དོན། བྱ་བྲལ་རིན་པོ་ཆེ་པཎ་ཆེན་སྐུ་ཕྲེང་གསུམ་པས་ཕྱག་བཏབ་པའི་གཙང་དབེན་དགོན་དུ་དགུང་ལོ་ཆུང་ཆུང་སྐབས་ནས་བཞུགས་ཡོད་པ་དང་། ཕྱིས་སུ་བཀྲ་ཤིས་ལྷུན་པོ་དགོན་དུ་སློབ་གཉེར་གནང་བར་ཕེབས་པ་རེད། སྐབས་དེར་པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་གིས་ཁོང་བཀྲ་ཤིས་ལྷུན་པོ་དགོན་དུ་གྲྭ་ཞུགས་གནང་དགོས་པའི་བཀའ་ཕེབས་ཡོད་ཀྱང་། དང་ཐོག་རིན་པོ་ཆེས་གྲྭ་ཞུགས་གནང་མ་དགོས་ན་དགོངས་ཏེ་ཕེབས་ཡོད་པ་ན་རེད། ཕྱིས་སུ་པཎ་ཆེན་རིན་པོ་ཆེ་མཆོག་གིས་ཡང་བསྐྱར་གྲྭ་ཞུགས་དགོས་པའི་བཀའ་ཕེབས་སྐབས། རིན་པོ་ཆེས་བྱུང་ན་གྲྭ་ཞུགས་བྱེད་མི་དགོས་པ་གནང་རྒྱུ་དང་། གལ་སྲིད་དེ་མ་བྱུང་ནའང་གྲྭ་བ་དཀྱུས་མའི་གཏོང་སྒོ་བཏང་སྟེ་འཛུལ་ཞུགས་ཆོག་པ་གནང་རོགས་ཞེས་ཞུས་ཡོད་ཀྱང་། པཎ་ཆེན་རིན་པོ་ཆེ་མཆོག་གིས་འགྲིག་གི་མ་རེད། ངེས་པར་དུ་བླ་སྤྲུལ་རང་གི་གཏོང་སྒོ་གཏོང་དགོས་ཀྱི་ཡོད་གསུངས་བ་རེད། ཡིན་ནའང་། དེ་ནས་བཟུང་བཀྲ་ཤིས་ལྷུན་པོ་དགོན་པའི་གཏོང་སྒོ་གཏོང་རྒྱུ་ཏོག་ཙམ་མར་ཆག་སྟེ་གྲྭ་ཞུགས་ཀྱི་ཡིག་ཚད་ཐོག་དོ་ནན་ཆེ་རུ་ཕྱིན་ཡོད་འདུག ༡༩༥༩ ལོར་དུས་འགྱུར་བྱུང་རྗེས་རིན་པོ་ཆེ་རྒྱ་ནག་ནང་ཕེབས་ཏེ་རྒྱ་ཡིག་དང་དེང་དུས་ཀྱི་སློབ་སྦྱོང་གནང་ཡོད་པ་དང་། ཕྱིས་སུ་རྒྱ་ནག་གཞུང་གི་ལྟ་རྟོག་འོག་རིན་པོ་ཆེ་གཞིས་ཀ་རྩེ་ཆབ་སྲིད་གྲོས་ཚོགས་ནང་དུ་བཞག་པ་དང་། བཀྲ་ཤིས་ལྷུན་པོ་དགོན་པར་ཆོས་སྒོ་ཕྱེས་རྗེས་སླར་ཡང་རིན་པོ་ཆེ་དགོན་པར་ཕེབས་ཏེ་ དམངས་གཙོ་བདག་གཉེར་ཨུ་ཡོན་ལྷན་ཁང་གི་རྒྱུན་ལས་གནང་བ་དང་། རིམ་གྱིས་གོ་གནས་འཕར་ཏེ་ལྷན་ཁང་དེའི་འགན་འཛིན་གཞོན་པ་དང་འགན་འཛིན་བཅས་གནང་ཡོད་པ་རེད། ཅེས་བརྗོད་བྱུང་།

ཁོང་གིས་མུ་མཐུད་དུ། པཎ་ཆེན་རིན་པོ་ཆེའི་ཞབས་ཞུའི་ནང་ངའི་སྤུན་མཆེད་ཅིག་ཡོད། ཁོང་གིས་བཤད་པ་ལྟར་ན། བཀྲ་ཤིས་ལྷུན་པོ་དགོན་པའི་ནང་འཇམ་དབྱངས་ཟེར་བའི་གྲྭ་བ་ཞིག་ཡོད་པ་དང་། སྔོན་མ་རིག་གནས་གསར་བརྗེ་སྐབས་ཁོས་རྒྱ་ནག་གཞུང་གི་ཕྱོགས་གཏོགས་བྱས་ཏེ་བཀྲ་ཤིས་ལྷུན་པོ་དགོན་པའི་མགོ་ཁྲིད་བྱས་པ་དང་། རྗེས་སུ་ཁོ་ཕྱིར་འཕུད་གཏོང་མ་ཐུབ་པར་དཀའ་ངལ་ཞེ་དྲག་ཕྲད་པ་རེད། རིན་པོ་ཆེ་དམངས་གཙོ་བདག་གཉེར་ཨུ་ཡོན་ལྷན་ཁང་གི་འགན་འཛིན་གཞོན་པ་ཡིན་སྐབས། ཁོང་ གིས་བཀྲ་ཤིས་ལྷུན་པོ་དགོན་པའི་ནང་ཆོས་ཕྱོགས་ཀྱི་བྱེད་སྒོ་བསྐྱར་གསོ་གནང་གི་ ཡིན་གསུངས་དུས་འཇམ་དབྱངས་ཀྱིས་དགག་པ་བརྒྱབ་སྟེ་ཁོང་གཉིས་མང་པོ་ཐུག་ཡོད་པ་མ་ ཟད། བཀྲ་ཤིས་ལྷུན་པོ་དགོན་པའི་རྡོ་བཀྱག་ཆེན་མོའི་ཐོག་རིན་པོ་ཆེ་མང་པོར་བཤུམས་པའི་ལོ་རྒྱུས་ཡང་འདུག སྐབས་ དེར་པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་ཞལ་བཞུགས་ཡོད་ཀྱང་རྒྱ་ནག་གཞུང་ གིས་རྒྱབ་རྩ་བྱས་ཏེ་འཇམ་དབྱངས་ཟེར་བ་དེ་ཧ་ཅང་གི་དབང་ཤུགས་ཆེན་པོ་ཡོད་པ་རེད། འཇམ་དབྱངས་ཀྱི་སྟངས་འཛིན་འོག་གྲྭ་བ་རྒན་གྲས་རྣམས་ཞེད་སྣང་གིས་བཞུགས་དགོས་ཀྱི་ཡོད་ཀྱང་། ཕྱིས་སུ་གྲྭ་བ་ལོ་གཞོན་ཚོ་ཡར་བསླེབས་ཡོང་དུས་ཏོག་ཙམ་བློ་ཁོག་ཆེན་པོ་ཡོད་སྟབས། རིམ་གྱིས་རིན་པོ་ཆེ་ལ་རྒྱབ་རྩ་བྱེད་མཁན་མང་དུ་ཕྱིན་ནས་འཇམ་དབྱངས་ཟེར་བ་དེ་ཕྱིར་འཕུད་བཏང་སྟེ། རིན་པོ་ཆེ་དམངས་གཙོ་བདག་གཉེར་ཨུ་ཡོན་ལྷན་ཁང་གི་འགན་འཛིན་དུ་བསྐོས་བ་རེད། སྐབས་དེར་པཎ་ཆེན་རིན་པོ་ཆེ་མཆོག་གིས་བཀྲ་ཤིས་ལྷུན་པོ་དགོན་པའི་གྲྭ་བ་དེ་ཚོ་ལྐུག་པ་རེད་བསམས་སོང་ཡང་ལྐུག་པ་རང་རེད་མི་འདུག་ཅེས་གསུངས་ཡོད་པ་མ་ཟད། པཎ་ཆེན་རིན་པོ་ཆེ་མཆོག་གིས་རིན་པོ་ཆེར་ཁོང་གི་ཚབ་བྱས་ཏེ་གངས་རྒྱན་དར་འཕེལ་སྤྱི་བསྡོམས་ཐོན་གཉེར་ཁང་གི་སྤྱི་གཉེར་བར་བཞུགས་དགོས་པའི་བཀའ་གནང་བ་ལྟར། རིན་པོ་ཆེས་ཚོང་གཉེར་ཁང་དེའི་སྤྱི་གཉེར་བའི་འགན་ཡང་འཁུར་བ་རེད། ཡིན་ནའང་། ལོ་གཅིག་གཉིས་རྗེས་སུ་པཎ་ཆེན་རིན་པོ་ཆེ་མཆོག་སྐུ་གཤེགས་ཏེ། ཚོང་གཉེར་ཁང་དང་བཀྲ་ཤིས་ལྷུན་པོ་དགོན་པའི་དམངས་གཙོ་བདག་གཉེར་ཨུ་ཡོན་ལྷན་ཁང་གི་འགན་ཚང་མ་རིན་པོ་ཆེའི་ཐོག་ལ་བབས་པ་དང་། ད་དུང་དེའི་ཐོག་གཞིས་ཀ་རྩེ་ས་གནས་ཀྱི་ཆབ་སྲིད་གྲོས་མོལ་དང་བོད་རང་སྐྱོང་ལྗོངས་འཐབ་ཕྱོགས་གཅིག་འགྱུར་ཁང་ཟེར་བ་སོགས་དང་། རྒྱ་ནག་དབུས་གཞུང་གི་ནང་དུའང་འགན་གནས་ཡོད་པ་རེད། ཅེས་བརྗོད་བྱུང་།

ཁོང་ལ་ད་ལྟའི་ཆར་རིན་པོ་ཆེའི་ནང་དུ་སུ་ཡོད་པ་དང་། ཁོ་ཚོའི་གནས་སྟངས་ག་འདྲ་ཡིན་དྲིས་པར་ཁོང་གིས། རིན་པོ་ཆེའི་ཡབ་ཡུམ་གཉིས་སྔོན་མ་ནས་སྐུ་གྲོངས་ཚར་བ་རེད། ངས་ཐག་རིང་པོ་བསྐོར་ནས་སྐད་ཆ་དྲིས་པ་ལྟར་ན། རིན་པོ་ཆེ་བཙོན་ཁང་དུ་ཡོད་སྐབས་ཁོང་གི་གཅུང་པོ་ཚེ་རིང་རྡོ་རྗེ་ཞུ་བར་འཁྱུག་ཙམ་མཇལ་བཅུག་པ་དང་། ཕྱིས་སུ་ཚེ་རྡོ་ལགས་ཀྱིས་ཐུགས་ཁྲལ་ཆེན་པོ་གནང་ནས་འདས་གྲོངས་ཕྱིན་པ་རེད་ཟེར་བ་ཞིག་གོ་ཐོས་བྱུང་བ་ཙམ་ལས་གཞན་རྒྱུས་གང་ཡང་མེད། རིན་པོ་ཆེ་སྒེར་གྱི་ཞབས་ཞུ་བཀྲ་ཤིས་ལགས་བཞུགས་ཡོད་པ་རེད། ཅེས་བརྗོད་བྱུང་།

ཕྱི་ཚེས་ ༨ ཉིན་གསར་འགོད་པས་དྷ་རམ་ས་ལར་གནས་སྡོད་བྱ་བྲལ་རིན་པོ་ཆེ་མཆོག་གི་འཁྲུངས་ཡུལ་མང་ར་ཤང་ནས་ཡིན་པའི་གྲྭ་བློ་བཟང་དོན་འགྲུབ་ལགས་སུ་བཅར་འདྲི་ཞུས་པར། རིན་པོ་ཆེ་མཆོག་དང་ཁོ་གཉིས་ཤང་གཅིག་པ་ཡིན་ཞིང་། བྱ་བྲལ་རིན་པོ་ཆེ་མཆོག་ཆུང་ངུའི་སྐབས་སུ་སྡིངས་མ་དགོན་དུ་བཞུགས་མྱོང་ཡོད་པ་མ་ཟད། རྗེས་སུའང་ཡང་ཡང་ཕེབས་ཏེ་ཁོང་གི་མདུན་ནས་བཀའ་དབང་སོགས་ཀྱང་ཞུ་མྱོང་ཡོད་འདུག རིན་པོ་ཆེ་མཆོག་གི་ཨ་མའི་གཉེན་འབྲེལ་དོན་འགྲུབ་ནོར་བུ་ཞུ་བ་ཞིག་མང་ར་ཤང་སྲིད་གཞུང་གི་མགོ་ཁྲིད་མཐོ་ཤོས་དེ་ཡིན་པ་དང་། པེ་ཅིན་ཨོ་རྩེད་འགྲན་ཚོགས་བསླེབ་ལ་ཉེ་སྐབས་ ༢༠༠༧ ལོར་རྒྱ་ནག་གཞུང་གིས་ཁོང་རྒྱ་ནག་ནན་ཅིན་དུ་འཁྲིད་དེ་བྱ་བྲལ་རིན་པོ་ཆེ་མཆོག་ལ་ཐེངས་གཅིག་ཐུག་འཕྲད་བྱེད་དུ་བཅུག་ཡོད་འདུག དོན་འགྲུབ་ནོར་བུ་ཕྱིར་ལོག་སྟེ་ས་གནས་མང་ཚོགས་ཚོར། ཁོ་བྱ་བྲལ་རིན་པོ་ཆེ་ལ་ཐུག་སྐབས་རིན་པོ་ཆེ་མཆོག་གི་ཨོག་ཚོམ་རིང་པོ་བྲང་དཀྱིལ་དུ་བསླེབས་ཡོད་པ་དང་། སྐུ་གཟུགས་ཀྱང་ཧ་ཅང་སྐྱོ་བོ་ཆགས་ཡོད་སྐོར་བརྗོད་འདུག ང་རང་གིས་ཚོད་དཔག་བྱས་ན། སྔོན་ཆད་ཀྱི་གཟུགས་པོའི་གནས་སྟངས་དང་དགུང་ནའི་བབ་གང་ཐད་ནས། རིན་པོ་ཆེ་མཆོག་ད་དུང་སྐུ་གྲོངས་ཡོད་རྒྱུ་མ་རེད་བསམ་གྱི་འདུག ཅེས་སོགས་བརྗོད་སོང་།

ཟླ་འདིའི་ཕྱི་ཚེས་ ༥ ཉིན་གྱི་ཕྱི་དྲོར་འདི་གའི་གསར་འགོད་པས་ཆོས་རིག་བཀའ་བློན་པདྨ་ཆོས་འབྱོར་མཆོག་ལ། བྱ་བྲལ་རིན་པོ་ཆེ་གར་ཡོད་ཅི་བྱུང་མ་ཤེས་པར་ལོ་ ༡༩ ལྷག་འགྲོ་བཞིན་ཡོད་སྟབས། བོད་མིའི་སྒྲིག་འཛུགས་ཀྱི་ངོས་ནས་རིན་པོ་ཆེ་མཆོག་གི་སྐོར་ལ་གནས་ཚུལ་མཁྱེན་རྟོགས་གང་འདྲ་ཡོད་མེད་སོགས་བཀའ་འདྲི་ཞུས་པར། ཁོང་གིས། ད་ལྟའི་བར་བྱ་བྲལ་རིན་པོ་ཆེ་བརླགས་ནས་ལོ་ ༡༩ ཕྱིན་པ་དང་། པཎ་ཆེན་རིན་པོ་ཆེ་ཡང་ ༡༩༩༥ ལོ་ནས་བརླགས་པ་རེད། དེ་བཞིན་གྱིས་སྤྲུལ་སྐུ་བསྟན་འཛིན་བདེ་ལེགས་དང་། དཀར་མཛེས་ནས་ཡིན་པའི་སྤྲུལ་སྐུ་དགུང་ལོ་ཆེན་པོ་ཞིག་བཅས་རྒྱ་གཞུང་གི་འཛིན་བཟུང་འོག་ཡོད་པ་རེད། བྱ་བྲལ་རིན་པོ་ཆེ་མཆོག་གི་སྐོར་ནས་གནས་ཚུལ་གསར་པ་གང་ཡང་ང་ཚོས་གོ་ཐོས་བྱུང་ཡོད་པ་མ་རེད། ད་ང་ཚོར་ག་རེ་བྱ་རྒྱུ་ཡོད་པ་རེད་ཟེར་ན། ལོ་རེའི་གསུམ་བཅུའི་དུས་དྲན་དང་འཛམ་གླིང་ཞི་བདེའི་གཟེངས་རྟགས་འབུལ་བཞེས་ཀྱི་ཉིན་མོ་ལྟ་བུའི་གསལ་བསྒྲགས་ནང་པཎ་ཆེན་ཆུང་སྲིད་རིན་པོ་ཆེ་དང་བྱ་བྲལ་རིན་པོ་ཆེ། དེ་བཞིན་སྤྲུལ་སྐུ་བསྟན་འཛིན་བདེ་ལེགས་སོགས་བཙོན་ཁང་ནང་ཡོད་པའི་ཆབ་སྲིད་བཙོན་པ་ཚང་མ་ཀློད་གྲོལ་དགོས་ཟེར་ནས་འབོད་སྐུལ་ཡང་ཡང་ཞུ་བཞིན་ཡོད་པ་རེད། དེ་ལས་ལྷག་གི་མངོན་གསལ་དོད་པོ་ཞེ་དྲག་བྱས་ན་ཕན་གནོད་ག་འདྲ་ཡོང་མིན་བཤད་ཐུབ་ཀྱི་མི་འདུག ཅེས་གསུངས་སོང་།

པཎ་ཆེན་ཨིར་ཏི་ཎི་ཞབས་ཞུ་ལས་དོན་ལྟེ་གནས་ཁང་གི་ལས་བྱེད་ཟུར་བ་བོད་ཀྱི་སྨན་རྩིས་མཐོ་སློབ་ཀྱི་དགེ་རྒན་བློ་བཟང་བཀྲ་ཤིས་ལགས་སུ། བཀྲ་ཤིས་ལྷུན་པོ་དགོན་པས་རྒྱ་ནག་གཞུང་ལ་ཡང་སྲིད་སྐོར་གྱི་སྙན་ཞུ་དོན་ཚན་གསུམ་ཕུལ་བ་དེར། རྒྱ་ནག་གིས་ལན་འདེབས་ག་འདྲ་བྱས་ཡོད་དྲིས་པར་ཁོང་གིས། སྤྱིར་བཏང་བཀྲ་ཤིས་ལྷུན་པོ་དགོན་གྱིས་ཕུལ་བའི་སྙན་ཞུ་དོན་ཚན་གསུམ་སྟེ་དབུས་གཞུང་གིས་འགྲོ་སོང་བཏང་སྟེ་གདུང་རྟེན་བཞེངས་དགོས་པ་དང་། སྐུ་གདུང་སྲུང་སྐྱོབ་ཞུ་ཕྱོགས། ཡང་སྲིད་ངོས་འཛིན་ཞུ་ཕྱོགས་བཅས་ཚང་མ་རྒྱ་ནག་དབུས་གཞུང་གིས་ཁས་ལེན་བྱས་ཡོད་པ་མ་ཟད། དོན་ཚན་དང་པོའི་ལས་འགན་བོད་རང་སྐྱོང་ལྗོངས་མི་དམངས་སྲིད་གཞུང་དང་བཀྲ་ཤིས་ལྷུན་པོ་དགོན་པ་ཐུན་མོང་ལ་སྤྲད་པ་རེད། དོན་ཚན་གཉིས་པའི་ལས་འགན་བཀྲ་ཤིས་ལྷུན་པོ་དགོན་པར་སྤྲད་དེ་སྲོལ་རྒྱུན་ལྟར་སྐུ་གདུང་གཅེས་ཚགས་བྱེད་དགོས་ཞེས་བཤད་ཡོད། རྗེས་སུ་གསེར་གདུང་བཞེངས་མི་བཞེངས་སྐོར་ལ་རྩོད་གླེང་ཆེན་པོ་བྱུང་ཡོད་ཀྱང་ མཐའ་མར་གསེར་གདུང་བཞེངས་ཐུབ་ཡོད། དོན་ཚན་གསུམ་པ་དེར། རྒྱ་ནག་དབུས་གཞུང་གིས་སྐབས་དེར་ག་རེ་བཤད་ཡོད་ཟེར་ན། ཡང་སྲིད་ངོས་འཛིན་ཞུ་རྒྱུའི་འགན་བཀྲ་ཤིས་ལྷུན་པོ་དགོན་པས་འཁུར་དགོས་པ་དང་། དགོས་ངེས་སྐབས་དབུས་ནང་བསྟན་ཐུན་ཚོགས་དང་། བོད་ནང་བསྟན་ཡན་ལག་ཐུན་ཚོགས་གཉིས་ནས་གཞོགས་འདེགས་གནང་རོགས་ཞེས་ཞུས་ཏེ། ཡང་སྲིད་འཁྲུལ་བྲལ་ངོས་འཛིན་བྱེད་དགོས་པ་དང་། མཐའ་མའི་ཆོག་མཆན་རྒྱལ་སྲིད་སྤྱི་ཁྱབ་ཁང་ལ་ཞུ་དགོས་ཞེས་བཤད་འདུག གནད་འགག་ཐུག་ས་ཡང་སྲིད་ངོས་འཛིན་ཞུ་ཕྱོགས་དང་འབྲེལ་བའི་ཡིག་ཆ་ཞིག་ཏུ་ཡང་སྲིད་ རྒྱལ་ནང་དུ་ངོས་འཛིན་ཞུ་རྒྱུ་ཞེས་འཁོད་ཡོད་པ་རེད། དེར་གླེང་ཕྱོགས་ཧ་ཅང་ཆེན་པོ་བྱུང་བ་རེད། ག་རེ་ཡིན་ཞེ་ན། འདས་པའི་༸པཎ་ཆེན་སྐུ་ཕྲེང་རིམ་བྱོན་ཚང་མ་བོད་དུ་འཁྲུངས་ཡོད་ཀྱང་། བླ་མའི་ཡང་སྲིད་ནི་ལས་དང་སྨོན་ལམ་དབང་གིས་ས་གནས་གང་དུ་ཡང་འཁྲུངས་སྲིད་པ་དང་། ལྷག་པར་སྔོན་དང་མི་འདྲ་བར་ང་ཚོ་བོད་པ་གཞིས་བྱེས་གཉིས་སུ་གནས་ཡོད་སྟབས། སྐབས་དེར་གནས་ཚུལ་དེ་ཁས་ལེན་ཐུབ་པ་ཧ་ཅང་དཀའ་པོ་བྱུང་བ་རེད། ད་ དུང་གལ་ཆེ་ཤོས་དེ་བོད་ཀྱི་ལོ་རྒྱུས་དང་ཆོས་ལུགས་ཀྱི་སྲོལ་རྒྱུན་དང་མཐུན་པར་ ཡང་སྲིད་རིན་པོ་ཆེའི་མཐའ་མའི་ཐག་གཅོད་གནང་རྒྱུ་༸གོང་ས་མཆོག་ལ་སྐྱབས་འཇུག་ ཞུ་དགོས་ཞེས་ཚང་མས་རེ་ཞུ་བྱས་ཡོད་པ་རེད། ཅེས་དང་།

ཡང་སྲིད་ངོས་འཛིན་ཞུ་ཕྱོགས་ཐད་རྒྱ་ནག་གཞུང་དང་རྩོད་རྙོག་ཇི་ལྟར་བྱུང་བའི་སྐོར་ ལ་ཁོང་གིས།༸པཎ་ཆེན་རིན་པོ་ཆེའི་ཡང་སྲིད་ངོས་འཛིན་གྱི་མཐའ་མའི་ཐག་གཅོད་༸གོང་ ས་མཆོག་གིས་གནང་དགོས་པ་དེ་བཀྲ་ཤིས་ལྷུན་པོ་དགོན་པའི་དབུ་དམངས་ཡོངས་ཀྱི་རེ་ འདོད་གཅིག་པུ་མ་རེད། དད་ལྡན་བོད་མི་ཡོངས་རྫོགས་ཀྱི་རེ་བ་ཡང་རེད། སྐབས་ དེར་བོད་ས་སྟོད་སྨད་ཡོངས་ནས་ཡང་སྲིད་ཚོགས་ཆུང་ལ་ཡང་སྲིད་ངོས་འཛིན་ཞུ་རྒྱུ་ ༸གོང་ས་མཆོག་ལ་སྐྱབས་འཇུག་ཞུ་དགོས་པའི་སྐུལ་ལྕགས་རྒྱུན་མི་ཆད་པ་གནང་ཡོད་པ་ དང་། ཡང་སྲིད་ཚོགས་ཆུང་གིས་ཀྱང་མཐའ་གཅིག་ཏུ་ཡར་ཞུ་གནང་ཡོད་པ་རེད། ཞུ་སྟངས་གང་འདྲ་ཞུ་གི་ཡོད་རེད་ཟེར་ན། ཆོས་ཕྱོགས་ནས་བཤད་ན་རྒྱལ་མཆོག་ཡབ་སྲས་གཉིས་སྐུ་ཕྲེང་རིམ་བྱོན་བླ་སློབ་ཚུལ་དུ་ཕེབས་ཀྱི་ཡོད་པ་དང་། ལོ་རྒྱུས་ནང་དུ་ཡང་ཕན་ཚུན་ངོས་འཛིན་གནང་སྲོལ་ཡོད་པ་བཞིན༸གོང་ས་མཆོག་ལ་སྐྱབས་འཇུག་ཞུ་ཆོག་པའི་ཆོག་མཆན་གནང་རོགས་ཞེས་ཞུས་ཡོད་ཀྱང་། རྒྱ་གཞུང་གིས་ལོ་རྒྱུས་ཐོག་གསེར་བུམ་དཀྲུགས་ནས་ངོས་འཛིན་ཞུ་བ་ལྟར་ངོས་འཛིན་དགོས་ཞེས་བཤད་དེ། དེ་འདྲའི་ངང་ལ་ས་གནས་སྲིད་གཞུང་གིས་ཐག་མ་ཆོད་པར་དུས་ཚོད་རིང་པོར་ལྷག་རྗེས། མཐའ་མར་བྱ་བྲལ་རིན་པོ་ཆེས་དབུས་གཞུང་ལ་ཐད་ཞུ་གནང་བ་ལས་ས་གནས་སྲིད་གཞུང་ལ་འབྲེལ་བ་གནང་གི་མེད་བའི་གནས་ཚུལ་ཐོན་ཡོད། རྒྱུ་མཚན་ག་རེ་ཡིན་ཞེ་ན། ༡༩༩༣ ལོའི་ལོ་གསར་ལ་སྲིད་འཛིན་ཅང་ཙེ་མིན་དང་། བོད་རང་སྐྱོང་ལྗོངས་ཀྲུའུ་ཞི་རྒྱལ་མཚན་ནོར་བུས་ཐད་ཀར་བྱ་བྲལ་རིན་པོ་ཆེར་ལོ་གསར་གྱི་འཚམས་འདྲིའི་ཁ་པར་བཏང་ཡོད་པ་མ་ཟད། རྒྱལ་མཚན་ནོར་བུས་ལོ་འདིའི་ནང་༸པཎ་ཆེན་རིན་པོ་ཆེའི་ཡང་སྲིད་གསེར་བུམ་དཀྲུགས་ནས་ངོས་འཛིན་ཐུབ་པ་དགོས་ཞེས་བཤད་འདུག ཁོང་གཉིས་དེ་སྔོན་ནས་དེའི་ཐོག་མ་མཐུན་པ་བྱུང་འདུག གང་ལྟར་བྱ་བྲལ་རིན་པོ་ཆེས་ལན་འདེབས་ག་རེ་གནང་ཡོད་རེད་ཟེར་ན། ༸པཎ་ཆེན་རིན་པོ་ཆེ་ངོས་འཛིན་ཐུབ་མཁན་༸རྒྱལ་བ་རིན་པོ་ཆེ་མ་གཏོགས་མེད། དེའི་ཐོག་ངས་དབུས་གཞུང་ལ་ཐད་ཞུ་བྱེད་བཞིན་པ་ཡིན། ཁྱོད་རང་གིས་ཇུས་གཏོགས་བྱེད་དགོས་དོན་མེད་ཅེས་ལན་འདེབས་གནང་འདུག གནས་ཚུལ་དེ་བྱ་བྲལ་རིན་པོ་ཆེ་འཛིན་བཟུང་རྗེས་རིན་པོ་ཆེར་དགག་རྒྱག་གི་དེབ་ཅིག་བཏོན་ཡོད་པ་དེར་བཀོད་ནས་ནག་ཉེས་ཆེན་པོར་བརྩིས་འདུག ཅེས་བརྗོད་བྱུང་།

རྒྱ་གཞུང་གིས་སྐབས་དེར་བཀྲ་ཤིས་ལྷུན་པོས་གཙོས་བོད་ས་ཡོངས་སུ་ཆབ་སྲིད་ཀྱི་ཐབས་ཇུས་ཇི་ལྟར་སྤེལ་ཡོད་པའི་སྐོར་ལ་ཁོང་གིས། ༸པཎ་ཆེན་ཆུང་སྲིད་རིན་པོ་ཆེ་ཡབ་ཡུམ་དང་བཅས་པ་དང་། བྱ་བྲལ་རིན་པོ་ཆེ་འཛིན་བཟུང་བྱས་རྗེས། བྱ་བྲལ་རིན་པོ་ཆེའི་དྲུང་ཡིག་བྱང་པ་ཅུང་ལགས་དང་། གངས་རྒྱན་དར་སྤེལ་སྤྱི་སྡོམ་ལས་གཉེར་ཁང་གི་ལག་བསྟར་སྤྱི་ཁྱབ་པ་ཕུན་ཚོགས། ༸པཎ་ཆེན་སྐུ་ཕྲེང་བཅུ་པའི་ཞབས་ཕྱི་བ་སྦྱར་པ་སྐལ་བཟང་། གངས་རྒྱན་དར་སྤེལ་སྤྱི་སྡོམ་ལས་གཉེར་ཁང་གི་འགན་འཛིན་གཞོན་པའི་གྲས་ལྷ་རྩེ་བ་བསམ་གྲུབ་སོགས་གནད་ཡོད་མི་སྣ་དང་དགེ་འདུན་ ༢༧ སྔ་རྗེས་སུ་འཛིན་བཟུང་བྱས་ཡོད་པ་མ་ཟད། བཀྲ་ཤིས་ལྷུན་པོ་དགོན་པར་ལས་དོན་རུ་ཁག་ཆེད་འཛུགས་བྱས་ཏེ། སྐབས་དེའི་བོད་རང་སྐྱོང་ལྗོངས་ཟེར་བའི་མགོ་ཁྲིད་རག་སྡིས་དང་རྒྱལ་མཚན་ནོར་བུ་བཅས་དགོན་པར་ཡོང་སྟེ། ཟླ་བ་ ༢ ལྷག་ཙམ་རིང་རྒྱུན་ལྡན་གྱི་ཆོས་ལུགས་བྱེད་སྒོ་རྣམས་འཚོགས་མ་བཅུག་པར་འཇམ་རྩུབ་ཅི་རིགས་ཀྱི་སློབ་གསོའི་ལས་འགུལ་སྤེལ་བ་དང་། དགོན་པའི་མགོ་ཁྲིད་རྙིང་པ་རྣམས་གནས་དབྱུང་བཏང་སྟེ་གསར་པ་བསྐོས་པ་མ་ཟད། ཡང་སྲིད་ཚོགས་ཆུང་བཅོས་སྒྲིག་ཆེད་རྒྱ་ནག་དབུས་གཞུང་གིས་པེ་ཅིང་དུ་ཛ་དྲག་གིས་བོད་ཆོལ་ཁ་གསུམ་གྱི་བླ་སྤྲུལ་ཚོགས་འདུ་བསྐོངས་ཏེ། སྲིད་འཛིན་ཅང་ཙེ་མིན་གྱིས་བླ་སྤྲུལ་རྣམས་ལ་ཁྱོད་ཚོས་རྒྱལ་ཁབ་དང་མི་མང་གི་གཟིགས་ མཐོང་ཆུད་ཟོས་དང་དྲིན་ལན་ལོག་འཇལ་བྱེད་མཁན་མི་ངན་བྱ་བྲལ་གྱི་རྗེས་སུ་འབྲང་ རྒྱུ་མེད། ཅེས་གཏམ་བཤད་བྱས་ཡོད་ཀྱང་། སྐབས་དེར་རྒྱ་གཞུང་ལས་བྱེད་བོད་རིགས་མང་པོས་བྱ་བྲལ་རིན་པོ་ཆེར་རྒྱབ་སྐྱོར་ཤུགས་ཆེ་བྱས་ཡོད་པ་རེད། ཅེས་བརྗོད་བྱུང་།

བྱ་བྲལ་རིན་པོ་ཆེ་འཛིན་བཟུང་བྱས་ཏེ་ལོ་ངོ་ ༡༩ ལྷག་ཕྱིན་པའི་རིང་བརྒྱུད་ལམ་ཁག་ཏུ་ཁོང་གི་སྐོར་ལ་གནས་ཚུལ་ག་རེ་ཐོན་ཡོད་དྲིས་པར། ༡༩༩༧ ཟླ་ ༤ ཚེས་ ༢༢ ཉིན་གཞིས་རྩེ་འབྲིང་རིམ་མི་དམངས་ཁྲིམས་ཁང་ཟེར་བས་གསང་བའི་ཐོག་ནས་རིན་པོ་ ཆེར་བཙོན་འཇུག་ཁྲིམས་ཐག་ལོ་ ༦ ཡོད་པ་དང་། བར་ སྐབས་ཤིག་ལ་རིན་པོ་ཆེས་སི་ཁྲོན་ཞིང་ཆེན་གྱི་གྲུང་ཆིང་བཙོན་ཁང་ཨང་གསུམ་པ་ ཟེར་བ་དེའི་ནང་ཟས་བཅད་ངོ་རྒོལ་གནང་གི་ཡོད་པའི་གནས་ཚུལ་ཞིག་ཐོན་ཡོད་པ་དང་། ༢༠༠༤ ལོར་བོད་ལྗོངས་དམག་ཁུལ་ཁང་གི་བཙོན་ཁང་ནང་ཡོད་ལུགས་དང་། ༢༠༠༧ ལོར་པེ་ཅིན་ཉེ་འགྲམ་གྱི་བཙོན་ཁང་ཞིག་ཏུ་ཡོད་པ། ༢༠༡༡ ལོར་སྐུ་འདས་ཟིན་པའི་གནས་ཚུལ་ཞིག་བཅས་ཐོན་ཡོད་པ་རེད། ཡིན་ནའང་དེ་དག་ལ་བདེན་པའི་ཆ་ག་ཚོད་ཡོད་མིན་ཞུ་ཐུབ་མ་སོང་ཟེར།

མ་འོངས་པར་བྱ་བྲལ་རིན་པོ་ཆེ་འཚོལ་ཞིབ་ཐད་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ངོས་ནས་ནུས་པ་ཇི་ལྟར་འདོན་དགོས་ཀྱི་ཡོད་དྲིས་པར། སྤྱིར་བཏང་བྱ་བྲལ་རིན་པོ་ཆེའི་གནས་ཚུལ་དེ་ཆོས་དད་རང་མོས་ཡོད་མེད་ཀྱི་གནས་ཚུལ་ཞིག་ཡིན་པ་དང་། ལྷག་པར་དུ་བཙོན་ཆད་ཀྱི་ཉེས་པ་ཚང་ཡོད་དུས་ཤོད་ས་གཅིག་དང་། ཞུ་ས་གཅིག་ཡོད་རེད་དྲན་གྱི་འདུག རིན་པོ་ཆེ་འཛིན་བཟུང་བྱས་ནས་ད་བར་ལོ་ངོ་ཉི་ཤུ་འགྲོ་ལ་ཉེ་བ་དང་། བཙོན་ཆད་ཚང་ནས་ལོ་ངོ་བཅུ་གཉིས་འགྲོ་ལ་ཉེ་བ་རེད། འདི་ལྟར་གར་ཡོད་ཁ་ཕྱོགས་ཙམ་ཡང་གསལ་ཁ་མེད་པ་ནི་བོད་ཀྱི་གྲགས་ཅན་བཙོན་པ་གཞན་དང་གནས་སྟངས་མི་འདྲ་བ་རེད། རྒྱ་ནག་གི་གདུག་རྩུབ་གཅིག་པུ་རེད་དམ་ང་ཚོའི་ངོས་ནས་ལས་འགུལ་གྱི་ནུས་པས་མ་འདང་བ་རེད། གནས་ཚུལ་འདི་ལ་ང་ཚོས་ཞིབ་འཇུག་ཅིག་བྱེད་དགོས་ཀྱི་འདུག ཅེས་བརྗོད་སོང་།

བྱ་བྲལ་བྱམས་པ་འཕྲིན་ལས་རིན་པོ་ཆེ་མཆོག་ནི། ཕྱི་ལོ་ ༡༩༤༧ ཙམ་ལ་བོད་རང་སྐྱོང་ལྗོངས་གཞིས་རྩེ་ས་ཁུལ། གནམ་གླིང་རྫོང་མང་ར་ཤང་རྒྱ་ཆུང་ཚང་ཞེས་པའི་འབྲོག་ཁྱིམ་ཞིག་ཏུ་སྐུ་འཁྲུངས་ཤིང་། ཡབ་ཀྱི་མཚན་ལ་རྟ་མགྲིན་ཚེ་དབང་དང་ཡུམ་གྱི་མཚན་ལ་རྡོ་རྗེ་ལྷ་མོ་ཞུ་བ་དང་། ཁོང་ལ་གཅུང་པོ་ཞིག་དང་སྲིང་མོ་གསུམ་ཡོད་འདུག རིན་པོ་ཆེ་ཆུང་དུས་ནས་བྱ་བྲལ་རིན་པོ་ཆེ་སྐུ་ཕྲེང་གཉིས་པའི་ཡང་སྲིད་དུ་ངོས་འཛིན་གནང་ཡོད་འདུག ཕྱིས་སུ་པཎ་ཆེན་པོ་ཆེ་སྐུ་ཕྲེང་བཅུ་པ་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་མཆོག་གི་བཀའ་ལྟར། བཀྲ་ཤིས་ལྷུན་པོ་དགོན་དུ་ཞུགས་ཏེ་སློབ་གཉེར་གནང་ཡོད་པ་མ་ཟད། པཎ་ཆེན་རིན་པོ་ཆེ་མཆོག་གི་བཀའ་དགོངས་བཞིན་གདན་ས་བཀྲ་ཤིས་ལྷུན་པོ་དགོན་དམངས་གཙོ་བདག་གཉེར་ཨུ་ཡོན་ལྷན་ཁང་གི་འགན་འཛིན་དང་། གངས་ཅན་དར་འཕེལ་སྤྱི་སྡོམ་ཐོན་གཉེར་ཁང་གི་སྤྱི་གཉེར་བའི་ཐུགས་འགན་བཅས་གཅིག་ལྕོགས་བཞེས་ཡོད་འདུག

གོང་འཁོད་པར་དག་གི་འགྲེལ།

༡ ༽  བྱ་བྲལ་སྐུ་ཕྲེང་གསུམ་པ་བྱམས་པ་འཕྲིན་ལས་རིན་པོ་ཆེ་མཆོག

༢ ༽ འདི་གས་བཅར་འདྲི་ཞུ་ཡུལ་བྱ་བྲལ་རིན་པོ་ཆེའི་སློབ་མ་བློ་བཟང་བསྟན་འཕེལ།

༣ ༽ ཀུན་གཟིགས་པཎ་ཆེན་སྐུ་ཕྲེང་བཅུ་བའི་གདུང་མདུན་དུ་བྱ་བྲལ་རིན་པོ་ཆེ་མཆོག་དང་ཁོང་གི་སྐུ་ཞབས་པ་ཁག་ཅིག

༤ ༽ ཡང་སྲིད་འཚོལ་ཞིབ་སྐབས་བྱ་བྲལ་རིན་པོ་ཆེ་མཆོག་དང་སྔགས་ཆེན་རིན་པོ་ཆེ་རྣམ་གཉིས་ལྷ་མོའི་བླ་མཚོར་མཚོ་གཟིགས་སུ་ཕེབས་སྐབས།

༥ ༽ སྡིངས་མ་དགོན་པའི་མདུན་དུ་བྱ་བྲལ་རིན་པོ་ཆེ་མཆོག་དང་ཁོང་གི་སློབ་མ་འདི་གས་བཅར་འདྲི་ཞུ་ཡུལ་གྲྭ་བློ་བཟང་དོན་འགྲུབ་སོགས།

༦ ༽ འདི་གས་བཅར་འདྲི་ཞུ་ཡུལ་བོད་མིའི་སྒྲིག་འཛུགས་ཆོས་རིག་བཀའ་བློན་པདྨ་ཆོས་འབྱོར་མཆོག

༧ ༽ འདི་གས་བཅར་འདྲི་ཞུ་ཡུལ་བོད་ཀྱི་སྨན་རྩིས་མཐོ་སློབ་ཀྱི་དགེ་རྒན་བློ་བཟང་བཀྲ་ཤིས་ལགས།

༨ ༽ བྱ་བྲལ་རིན་པོ་ཆེ་མཆོག་དང་འདི་གས་བཅར་འདྲི་ཞུ་ཡུལ་བློ་བཟང་བསྟན་འཕེལ་སོགས་ཁོང་གི་སློབ་མ་སྐོར་ཞིག

༩ ༽ བྱ་བྲལ་རིན་པོ་ཆེ་ཕེབས་བཞུགས་གནང་ཡུལ་གཙང་དབེན་ས་དགོན་པ།

གསར་འགོད་པ། པདྨ་མཚོ།