ཀན་ལྷོ་ཁུལ་ཀླུ་ཆུ་རྫོང་ཁོངས་ཀྱི་སློབ་ཆེན་མཐར་ཕྱིན་པའི་སློབ་མ་ཚོའི་ལས་འཚོལ་རྒྱུགས་ཤོག་སྲིད་གཞུང་གི་འབྲེལ་ཡོད་མི་སྣས་གཞན་ལ་ལྐོག་ཚོང་བྱས་པར་བརྟེན། འབྲེལ་ཡོད་སློབ་མ་དང་ཁྱིམ་བདག་མང་པོས་སྲིད་གཞུང་ལ་ཞུ་གཏུག་བྱས་ཏེ་ཉིན་གྲངས་ ༡༣ འགྲོ་བཞིན་འདུག
བརྒྱུད་ལམ་དུ་གནས་ཚུལ་ཐོན་པ་ལྟར་ན། ཀན་ལྷོ་ཁུལ་ཀླུ་ཆུ་རྫོང་ཁོངས་ཀྱི་སློབ་ཆེན་མཐར་ཕྱིན་པའི་སློབ་མ་ཚོའི་ལས་འཚོལ་རྒྱུགས་ཤོག་སྲིད་གཞུང་གི་འབྲེལ་ཡོད་མི་སྣས་གཞན་ལ་ལྐོག་ཚོང་བྱས་ཏེ་རྒྱ་སྒོར་ཁྲི་ ༢༠༠ ལྷག་ཧམ་ཟ་བྱས་ཡོད་སྟབས། ཉེ་སྔོན་ཕྱི་ཟླ་ ༡༢ བའི་ཚེས་ ༢༨ ཉིན་ནས་བཟུང་འབྲེལ་ཡོད་སློབ་མ་དང་ཁྱིམ་བདག་མང་པོ་རྫོང་སྲིང་གཞུང་གི་སྒོ་ཁར་འདུ་འཛོམས་ཀྱིས། ང་ཚོར་སྐར་གྲངས་ཇི་ལྟར་མཐོ་ན་ཁྱེད་ཚོར་སྒོར་མོ་དེ་ལྟར་མང་བས་ང་ཚོ་འབྱོར་མེད་ཚོར་གོ་སྐབས་མི་འདུག་ཅེས་ཞུ་གཏུག་གི་ལས་འགུལ་སྤེལ་ཏེ་ཉིན་གྲངས་ ༡༣ འགྲོ་བཞིན་ཡོད་འདུག
ཟླ་འདིའི་ཕྱི་ཚེས་ ༧ ཉིན་སློབ་མ་དང་ཁྱིམ་བདག་ཕ་མ་བརྒྱ་ཕྲག་བརྒལ་བ་རྫོང་དཔོན་ལས་ཁུངས་མདུན་དུ་འཛོམས་ཏེ། དྲང་བདེན་དང་འདྲ་མཉམ་དགོས་བའི་ཞུ་འབོད་བྱས་ནས་རྫོང་དཔོན་ལས་ཁུངས་སུ་ཡོང་རྒྱུར་ཉིན་གང་བོར་བསྒུགས་ཡོད་ཀྱང་། ཉིན་དེར་རྫོང་དཔོན་ལས་ཁུངས་སུ་ཡོང་མེད་པར་བརྟེན། བོད་མི་ཞུ་འབོད་པ་ཚོས་དྲང་བདེན་གྱི་ཐག་གཅོད་མ་བྱུང་བར་རྫོང་དཔོན་ལས་ཁུངས་སུ་ཡོང་རྒྱུར་སྒུག་རྒྱུ་ཡིན་པ་མ་ཟད། སྲིད་གཞུང་གིས་དྲང་བདེན་གྱི་ཐག་གཅོད་མ་བྱས་ཚེ། ཞིང་ཆེན་དང་དབུས་གཞུང་ལ་ཞུ་གཏུག་བྱ་རྒྱུ་ཡིན་ལུགས་བརྗོད་ཡོད་འདུག
ས་གནས་བོད་མི་ཞིག་གིས་ཀླུ་ཆུ་རྫོང་སྲིད་གཞུང་གིས་ས་གནས་མང་ཚོགས་ཀྱི་བདེ་སྡུག་ལ་ལྟ་རྟོག་ཡག་པོ་མི་བྱེད་པའི་དཀའ་ངལ་འདི་རིགས་ཡང་ཡང་ཡོང་གི་ཡོད་པ་དང་། ད་ཐེངས་འབྲེལ་ཡོད་མི་སྣས་རྒྱུགས་ཤོག་མང་པོ་ལྐོག་ཚོང་བྱས་ཏེ་རྒྱ་སྒོར་ཁྲི་ ༢༠༠ ལྷག་ཧམ་ཟ་བྱས་ཡོད་པ་ས་གནས་བོད་མིས་ཤེས་རྟོགས་བྱུང་ཡོད་ལུགས་བརྗོད་འདུག
གསར་འགོད་པ། པདྨ་མཚོ།
