དེ་རིང་སྔ་དྲོར་དྷ་སའི་གླིང་སྐོར་ལམ་ནས་ཅ་དངོས་ཤིག་རྙེད་ཡོད་པ་དེ་འབར་རྫས་ཡིན་པའི་དོགས་གཞིའི་འོག་རྒྱ་གར་བདེ་སྲུང་ལས་ཁུངས་ལ་སྤྲད་ཡོད་འདུག
དེ་རིང་སྔ་དྲོར་དྷ་རམ་ས་ལའི་བཞུགས་སྒར་ཕོ་བྲང་གི་ཉེ་འགྲམ་གླིང་སྐོར་ལམ་དུ་ཨ་ཅག་གད་སྙིགས་སྒྲུག་མཁན་ཞིག་གིས་འབར་རྫས་ཤིག་རྙེད་ཡོད་པའི་པར་དང་གནས་ཚུལ་ངོ་དེབ་སོགས་སྤྱི་ཚོགས་བརྒྱུད་ལམ་ཁག་ཏུ་ཁྱབ་བཞིན་ཡོད་སྟབས། འདི་གའི་གསར་འགོད་པས་ཁ་པར་བརྒྱུད་བོད་མིའི་སྒྲིག་འཛུགས་བདེ་སྲུང་ལས་ཁུངས་སུ་སྐད་ཆ་དྲིས་པར། ཅ་དངོས་དེ་འདྲ་ཞིག་རྙེད་དེ་ང་ཚོར་སྤྲད་པ་བདེན་པ་རེད། ང་ཚོས་དེ་མ་ཐག་རྒྱ་གར་བདེ་སྲུང་ལས་ཁུངས་ལ་སྤྲད་ཚར་ཡིན། ཅ་དངོས་དེ་ག་རེ་ཡིན་མིན་ང་ཚོས་གསལ་བོ་ཤེས་ཡོད་པ་མ་རེད། ད་ཆར་རྒྱ་གར་ལས་ཁུངས་སུ་ཞིབ་འཇུག་བྱེད་བཞིན་ཡོད་པ་རེད། ཅེས་བརྗོད་བྱུང་།
གསར་འགོད་པ། པདྨ་མཚོ།
ཅ་ལག་འདི་གད་སྙིགས་ཡིན་སྲིད་ཀྱང་བལྟས་ཚོད་ཀྱིས་དོགས་འདྲོགས་ཡོང་བ་ཞིག་འདུག་་་་གང་ལྟར་གནས་ཚུལ་ད་རུང་གསལ་བོ་མི་འདུག
༄༅། །ཕྱི་ལོ་ ༢༠༡༤ ཟླ་ ༡ ཚེས་ ༡༤ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བདེ་སྲུང་དྲུང་འཕར་ཀརྨ་རིན་ཆེན་ལགས་ཀྱིས་གསར་འགོད་པར་འགྲེལ་བརྗོད་གནང་དོན། ཁ་སང་ཕྱི་ཚེས་ ༡༣ ཉིན་གྱི་སྔ་དྲོར་སྤྱི་ཚོགས་དྲ་ལམ་ཁག་གི་ནང་བཞུགས་སྒར་རྡ་སའི་གླིང་སྐོར་ལམ་དུ་འབར་རྫས་རྙེད་པ་རེད། ཅེས་དོགས་འདྲོག་ཡོང་བའི་གནས་ཚུལ་ཐོན་ཡོད། ཅ་དངོས་དེར་བལྟས་པ་ཙམ་གྱི་དངངས་སྐྲག་དང་དོགས་འདྲོག་ཡོང་རྒྱུ་ཞིག་བརྒྱུད་ལམ་ཁག་གི་ནང་སྤེལ་བཞིན་འདུག་པ་མ་ཟད། གསར་འགྱུར་བརྒྱུད་ལམ་ཁག་གཅིག་གི་ནང་དུའང་གནས་ཚུལ་དེ་བཀོད་འདུག་པས་གནད་དོན་དེའི་ཐད་བདེ་སྲུང་ལས་ཁུངས་ནས་ཅ་དངོས་དེ་གང་ཡིན་ཞིབ་འཇུག་བྱ་ཆེད་འབྲེལ་ཡོད་ས་གནས་སྐོར་སྲུང་ལས་ཁུངས་སུ་རྩིས་སྤྲོད་བྱས་ཡོད། ས་གནས་སྐོར་སྲུང་ལས་ཁུངས་ནས་ཀྱང་ཛ་དྲག་ཐོག་ཆེད་ལས་པ་སྐད་བཏང་ནས་ཞིབ་འཇུག་མཐིལ་ཕྱིན་གནང་བར་བརྟེན་ཅ་དངོས་དེ་ནི་རྫས་རིགས་སོགས་ཉེན་ཚབས་ཅན་གང་ཡང་མིན་སྐོར་གསལ་པོ་གསུངས་བྱུང་།
ངས་མི་དམངས་ཡོངས་ལ་ཞུ་རྒྱུར། སྤྱི་ཚོགས་ཀྱི་དྲ་ལམ་ཁག་གི་ནང་གནས་ཚུལ་ཞིབ་ཕྲ་མ་བརྟག་མ་དཔྱད་པར་གང་དྲན་བཀོད་རྒྱུ་དེ་རྩ་བ་ནས་ཡག་པོ་མིན་འདུག གནས་ཚུལ་ཆ་ཚང་རྟོགས་པའི་རྗེས་སུ་མང་ཚོགས་ལ་བརྒྱུད་བསྒྲགས་གནང་བ་ཡིན་ན་འོས་པ་ཞིག་རེད། དེ་མིན་གང་བྱུང་བརྒྱུད་བསྒྲགས་གནང་བ་ཡིན་ན་སྤྱི་ཚོགས་ནང་དོགས་འདྲོག་ཡོང་རྒྱུ་དང་། དེ་ཡང་འབར་རྫས་རིགས་དང་། ལྷག་པར་བཞུགས་སྒར་གླིང་སྐོར་ཉེ་འཁོར་དུ་རྙེད་པ་རེད་ཅེས་ཧ་ལམ་ཆ་ཚང་ཧ་གོ་གི་ཡོད་པ་ལྟ་བུ་བྱས་ཏེ་སོ་སོའི་ངོས་ནས་ཞིབ་འཇུག་མཐིལ་ཕྱིན་བྱས་པ་ལྟ་བུ་གནང་ན་རྩ་བ་ནས་ཡག་པོ་མིན་འདུག དེས་ང་ཚོའི་སྤྱི་ཚོགས་ལྷིང་འཇགས་ལ་གནོད་པ་མ་ཟད། དོ་བདག་རང་ཉིད་ལ་ཁྲིམས་ཐོག་ནས་དཀའ་ངལ་འཕྲད་སྲིད་པ་ཞིག་རེད། གང་ཡིན་ཞེ་ན་གནས་ཚུལ་འདི་རིགས་ཧ་ཅང་ཉེན་ཚབས་ཆེན་པོ་ཡིན་པར་བརྟེན། མ་འོངས་པར་ཚང་མས་ཐུགས་གཟབ་གནང་རོགས་ཞུ་རྒྱུ་ཡིན། ལྷག་པར་མི་དམངས་ཡོངས་ལ་ཞུ་རྒྱུར་ཅ་དངོས་དེ་ནི་གད་སྙིགས་ཙམ་ལས་གཞན་གང་ཡང་རེད་མི་འདུག་པས་ཚང་མ་བློ་བདེ་པོ་གནང་རོགས་ཞུ་རྒྱུ་ཡིན། ཞེས་འགྲེལ་བརྗོད་གནང་སོང་། །
འདི་དཀྲོག་གཏམ་རེད།
གཙུག་ལག་ཁང་ཉེ་འགྲམ་ནས་ཅ་དངོས་རྙེད་སོན་བྱུང་བ་དེ་འབར་རྫས་ཀྱི་མིང་ཐོག་ཏུ་ཁྱབ་སྤེལ་བྱས་པ་ལས་བོད་ཕྱི་ནང་གཉིས་ལ་ཡོད་པའི་བོད་རིགས་སྤུ་ཟླ་མང་དག་ཅིག་ལ་བློ་འཚབ་ཐད་པ་ཞིག་བཟོས་ཡོད།
མདང་ནུབ་ཐག་རིང་གི་དགའ་ཉེ་སྤུན་མཆེད་མང་པོ་ཞིག་གིས་ཁ་པར་ཡོང་ནས་དེའི་སྐོར་ལ་བློ་འཚབ་ཆེན་པོ་བྱེད་ཀྱི་འདུག ཡག་སྙིང་རྩ་མ་ཚང་བ་སུ་འདྲ་ཞིག་གིས་དེ་ལྟར་ཉེན་ཁ་ཆེན་པོ་བཟོས་པ་ཡིན་ནམ།
དོགས་གཞི་ཅན་གྱི་ཅ་དངོས་ཞིག་རྙེད་སོན་བྱུང་འདུག་ཅེས་ཁྱབ་བསྒྲགས་བྱས་ན་འོས་ཤིང་མཚམས་མོད་ཀྱང་ཅ་དངོས་རྙེད་སོན་བྱུང་བ་དང་ལམ་སེང་འབར་རྫས་ཀྱི་མིང་ཐོག་ཏུ་ཁྱབ་བསྒྲགས་བྱེད་དགོས་པའི་དམིགས་ཡུལ་ག་རེ་ཡིན་ནམ།
འདི་དཀྲོག་གཏམ་རེད་ཟེར། གད་སྙིགས་ནང་ནས་ཅ་ལག་འདི་ལྟ་བུ་ཞིག་རྙེད་པ་གྲྭ་པ་ཞིག་གིས་ལམ་སང་པར་བརྒྱབ་ནས་དྲ་ལམ་ཁག་ཏུ་དཀྲོག་གཏམ་སྤེལ་བ་ཞིག་ཡིན་འདུག་ཅིང་། རྒྱ་གར་དང་བོད་པའི་བདེ་སྲུང་མི་སྣས་བརྟག་དཔྱད་བྱས་པས་འགད་རྫས་མིན་པ་གསལ་བོར་ར་འཕྲོད་ཅིང་། ད་ལྟ་གྲྭ་པ་དེ་གར་ཡོད་རྩད་གཅོད་བྱེད་བཞིན་འདུག་ཅེས་སྐུ་སྲུང་བ་ཞིག་ལས་གསལ་བོར་དགེ་བཤེས་ཤིག་གི་ཐོས་འདུག
་་་་་་་་་་་་གལ་སྲིད་འགད་རྫས་ཡིན་ན་དེ་སྦས་སྐུང་བྱེད་ས་དེ་ག་བ་ཡོད་མེད་བཅས་གསལ་བོ་ཞིག་བསྐྱར་དུ་འགོད་རོགས་གནང་འབོད་སྐུལ་ཞུས་པ་ཡིན། ་་་་་་་་་
གསར་འགྱུར་འདིས་ཀྱོག་ཀྱོག་ཆགས་བཞིན་པའི་གླེང་གཞི་ཞིག་ཡོ་བསྲང་བྱས་སོང་། དེ་རིང་གནས་ཚུལ་འདི་ཐོག་མ་སླེབས་སྐབས་རྡ་སུའི་གཙུག་ལག་ཁང་གུ་གླིང་སྐོར་ལམ་ཁ་ཞིག་ཅེས་བརྗོད་བཞིན་འདུག རིམ་གྱིས་སྐད་འཕྲིན་སོགས་སུ་གཙུག་ལག་ཁང་གི་སྒོ་རའི་ནང་གི་བརྩུགས་པའི་འོག་ཏུ་ཞེས་བཞིན་འདུག འདུག ཡང་གཞན་པ་ཞིག་ན་ཕོ་བྲང་རྒྱབ་ལོག་གི་བྲག་གསེབ་ཅིག་ཏུ་ཞེས་བརྗོད་བཞིན་འདགུ་ལ། ཁག་ཅིག་གིས་ལག་འབམ་གྲངས་བདུན་ཟེར་བ་དང་། ཁག་ཅིག་གིས་ཚད་མཐོ་བའི་འགད་རྫས་ལྕི་ཁོག་ཆེན་པོ་ཞིག་ཟེར་བ་སོགས་གནས་ཚུལ་མ་འདྲ་བ་ན་འདྲ་བ་གཅིག་རྗེས་གཉིས་མཐུད་དུ་གླེང་སློང་བྱེད་བཞིན་འདུག མ་འོངས་པར་རྒྱ་གར་ཉེན་རྟོག་པས་ཞིབ་འཇུག་གི་མཇུག་འབྲས་གང་འདྲ་ཡིན་མིན་དང་གལ་སྲིད་འགད་རྫས་ཡིན་ན་དེ་སྦས་སྐུང་བྱེད་ས་དེ་ག་བ་ཡོད་མེད་བཅས་གསལ་བོ་ཞིག་བསྐྱར་དུ་འགོད་རོགས་གནང་འབོད་སྐུལ་ཞུས་པ་ཡིན།