སྟག་རྒན་ཀྲུའུ་ཡོང་ཁང་གི་འཆར་གཞི་འདི་རེད་ཟེར།

ཀྲུའུ་ཡོང་ཁང་ཕྱོགས་ཁག་གིས་གསང་བའི་གྲོས་མོལ་བྱས་ཏེ་ཏིན་ཞོ་ཕིན་རིག་པའི་གཞུང་ལུགས་རྩིས་མེད་དང་། ཞི་ཅིན་ཕིན་རྩ་མེད་བཏང་སྟེ་རྒྱ་ནག་གི་སྲིད་དབང་ཐལ་སྤྱོད་ཀྱི་ལམ་དུ་བསྐྱོད་རྒྱའི་འཆར་གཞི་སྒྲིག་ཡོད་འདུག

ཁ་སང་ཀྲུང་གོར་ལྟ་བ་ཞེས་པའི་དྲ་ཚིགས་ཀྱིས་ཧོང་ཀོང་རྨ་བྱ་དུས་དེབ་ (Fenghuang Zhoukan)སྟེང་གི་གནས་ཚུལ་ལུང་འདྲེན་བྱས་པ་ལྟར་ན། ཀྲུའུ་ཡོང་ཁང་དང་པའོ་ཞི་ལེ་གཉིས་ཀྱིས་ཁྲོན་ཆིན་ནས་གསང་བའི་གྲོས་མོལ་ཞིག་བྱས་ཡོད་པ་དང་། གྲོས་མོལ་གྱི་ནང་དོན་ཞི་ཅིན་ཕིན་མེད་པར་བཟོ་འཆར་དང་ཏིན་ཞའོ་ཕིན་གྱི་རིག་པའི་གཞུང་ལུགས་དང་བཅོས་བསྒྱུར་སྒོ་འབྱེད་སྲིད་བྱུས་སོགས་རྩིས་མེད་གཏོང་རྒྱུའི་འཆར་གཞི་སྒྲིག་ཡོད་འདུག

གསར་འགོད་པ་ཚོད་དབྱེ་ཞིབ་བྱས་པ་ལྟར་ན། པའོ་ཞི་ལེ་ཡིས་གནད་དོན་དེར་བསམ་གཞིགས་རྒྱུན་རིང་པོ་བྱས་ཡོད་ཀྱང་། ཀྲུའུ་ཡོང་ཁང་དང་པའོ་ཞི་ལེ་གཉིས་ཀྱི་ཆབ་སྲིད་ལངས་ཕྱོགས་དང་རིན་ཐང་ལྟ་ཚུལ་གཅིག་ཡིན་སྟབས། གལ་སྲིད་ཁོ་གཉིས་ཀྱིས་འདོད་པ་ལྟར་ལག་བསྟར་བྱས་ཐུབ་ཡོད་ན་ཁོ་གཉིས་ཀྱིས་རྒྱ་ནག་གི་ཆབ་སྲིད་སྒྲོམ་གཞི་ལ་འགྱུར་བ་ཆེན་པོ་ཞིག་གཏོང་འཆར་ཡོད་ཚུལ་འཁོད་ཡོད།

གནས་ཚུལ་དེའི་ནང་། ལོ་སྔོན་མའི་ཟླ་ ༧ པའི་ནས་གསར་ལམ་ཁག་ཏུ། དེ་སྔའི་ཁྲོན་ཆེན་གྲོང་ཁྱེར་ཉེན་རྟོག་མགོ་བ་ཝང་ལིའི་ཅུན་ཁྲིན་ཏུའི་ཨ་རིའི་གཞུང་ཚབ་ཡན་ལག་ཁང་དུ་བྲོས་བྱོལ་བྱས་ཏེ་ཁོས་ཨ་རིའི་གཞུང་ཚབ་ཁང་ལ་སྤྲད་པའི་ཡིག་ཆ་ཕྱི་གྱར་བྱུང་བའི་ནང་། ཀྲུའུ་ཡོང་ཁང་དང་པའོ་ཞི་ལེ་གཉིས་ཀྱིས་གསང་བའི་ཐོག་ནས་རྒྱ་ནག་གི་སྲིད་ཇུས་ལ་འགྱུར་བ་གཏོང་རྒྱུའི་འཆར་གཞི་བཟོས་ཡོད་ཚུལ་འཁོད་ཡོད་སྟབས། རྒྱ་ནག་གི་ཆབ་སྲིད་དཔྱད་ཞིབ་པ་ཚོས་པའོ་ཞི་ལེ་དང་ཀྲུའུ་ཡོང་ཁང་གཉིས་ལ་ “སྲིད་བསྒྱུར་ཚོགས་ཁག་” ཅེས་མིང་འདོག་བྱས་ཡོད།

ཚིན་ཆེ་ཧོན་དང་ཀྲུའུ་ཡོང་ཁང་གཉིས་ཀྱི་གནས་ཚུལ་འཁོད་པའི་ནང་། ༢༠༡༡ ལོར་ཧོང་ཀོང་གི་གསར་ལམ་ཁག་ཅིག་ཏུ་ཅང་ཙེ་མིན་འདས་གྲོངས་སུ་ཕྱིན་པའི་གནས་ཚུལ་ཞིག་ཁྱབ་ཡོད་ཀྱང་། དོན་དངོས་སུ་སྐབས་དེར་ཅང་ཙེ་མིན་འདས་གྲོངས་སོང་བ་མིན་པར་ཁོ་ལ་ནད་གཞི་ཚབས་ཆེན་ཞིག་ཕོག་ཡོད་འདུག སྐབས་དེ་དང་བསྟུན་ཏེ་ཀྲུའུ་ཡོང་ཁང་དང་ལས་གནས་ནས་དགོངས་པ་ཞུས་ཟིན་པའི་ཚིན་ཆེ་ཧོན་གཉིས་ཀྱིས་པེ་ཅིན་དུ་གསང་བའི་གྲོས་མོལ་ཞིག་བྱས་ཡོད་པ་དང་། ཉེ་ཆར་ཀྲུའུ་ཡོང་ཁང་འཛིན་བཟུང་བྱས་རྗེས། ཁོས་སྔོན་ཆད་ཚིན་ཆེ་ཧོན་དང་གྲོས་མོལ་བྱས་པ་དང་། གྲོས་མོལ་ནང་དོན་ཅང་ཙེ་མིན་འདས་རྗེས་པའོ་ཞི་ལེ་ཁྲོན་ཆེན་ནས་པེ་ཅིན་དུ་གནས་སྤོར་བྱ་རྒྱུའི་སྐོར་སོགས་ཡིན་པ་ངོས་ལེན་བྱས་ཡོད་འདུག

དེ་གའི་གསར་འགོད་པས་བརྗོད་རྒྱུར། ཀྲུའུ་ཡོང་ཁང་འཛིན་བཟུང་བྱས་པའི་ཉིན་གཅིག་གི་རྗེས་སུ་ཚིན་ཆེ་ཧོན་ལ་ཐུག་འཕྲད་བྱས་པའི་གནས་ཚུལ་གཞུང་ལ་ངོས་ལེན་བྱས་པའི་རྒྱུ་མཚན་གཙོ་བོ་ཚིན་ཆེ་ཧོན་ཡང་ཁོ་རང་དང་མཉམ་དུ་འཁྲིད་འདོད་པ་དེ་ཡིན་ལ། ཚིན་ཆེ་ཧོན་ནི་རྒྱ་གཞུང་གི་རྡོ་སྣུམ་ཚོགས་ཁག་དང་ཧྲང་ཧེ་ཚོགས་ཁག སྐུ་སྲས་ཚོགས་ཁག་བཅས་མགོ་གཙོ་ཡིན་སྟབས་ཚིན་ཆེ་ཧོན་ལ་ལག་པ་འཆིང་དགོས་ན། ཞི་ཅིན་ཕིན་དང་ཝང་ཆི་ཧྲན་གཉིས་ཀྱིས་བསམ་གཞིགས་ཟབ་མོ་བྱ་དགོས་པ་ཞིག་ཆགས་ཡོད་འདུག

རྒྱ་ནག་གི་ཆབ་སྲིད་དཔྱད་ཞིབ་པ་ཁག་ཅིག་གིས། ཀྲུའུ་ཡོང་ཁང་དང་ཚིན་ཆེ་ཧོན་སོགས་ཀྱིས་རྒྱ་ནག་གི་ཆབ་སྲིད་དེ་མཁྲེགས་འཛིན་ཐལ་སྤྱོད་ཀྱི་ལམ་དུ་བཅོས་བསྒྱུར་བྱས་ཏེ། རྒྱ་ནག་གི་ལོ་རྒྱུས་ལ་འགྱུར་བ་ཆེན་པོ་ཞིག་གཏོང་འཆར་ཡོད་ཀྱང་། ཁོ་གཉིས་བློ་ཕམ་དགོས་པ་ཞིག་ལ་ཅང་ཙེ་མིན་ད་དུང་ཚེ་ལས་འདས་མེད་སྟབས་ཁོ་གཉིས་ཀྱི་འཆར་གཞི་དེ་ལེགས་འགྲུབ་བྱུང་མེད་པ་མ་ཟད། ཁྲིན་ཆིན་གྲོང་ཁྱེར་སྤྱི་བདེ་ལས་ཁང་གི་མགོ་གཙོ་ཟུར་བ་ཝང་ལི་ཅིན་ཨ་རིའི་གཞུང་ཚབ་ཁང་དུ་བྲོས་ཏེ་ཅང་ཙེ་མིན་ཤོག་ཁག་གི་གསང་བ་ཕྱི་གྱར་བྱུང་བ་དང་། ཅང་ཙེ་མིན་ཤོག་ཁག་གི་སྟག་རྒན་པའོ་ཞི་ལེ་དང་ཀྲུའུ་ཡོང་ཁང་། ཞི་ཚད་ཧོ་སོགས་རིམ་པ་བཞིན་རྙི་ནང་དུ་ཚུད་ཡོད་སྟབས། ད་ལྟ་ཞི་ཅིན་ཕིན་གྱིས་ཅང་ཙེ་མིན་ཤོག་ཁག་གི་མཐར་ཐུག་གི་སྟག་རྒན་འཛིན་རྒྱུའི་དུས་ལ་བསླེབ་ཡོད་པ་སོགས་བརྗོད་ཡོད་འདུག

ཞ་ཞོ་ཆང་ (Xia Xiaoqiang)གིས་ཀྲུང་གོར་ལྟ་བའི་གསར་འགོད་པར། ཀྲུའུ་ཡོང་ཁང་ནི་ཅང་ཙེ་མིན་གྱི་བློ་འཁེད་སའི་རྒྱུག་ཁྱི་དེ་ཡིན་སྟབས། ཀྲུའུ་ཡོང་ཁང་དང་པའོ་ཞི་ལེ་གཉིས་ཀྱི་སྲིད་བསྒྱུར་ཚོགས་ཁག་དེ་ཅང་ཙེ་མིན་དང་ཁ་ཁ་ཞིག་མིན་པ་མ་ཟད། དོན་དངོས་ཐོག་ཅང་ཙེ་མིན་གྱིས་གསང་བ་དེ་དག་འགེབ་སྲུང་བྱེད་དགོས་པ་ཞིག་ཡིན་ཡང་། ད་ལྟ་གསར་འགྱུར་བརྒྱུད་ལམ་ཁག་ཏུ་ཀྲུའུ་དང་པའོ་གཉིས་ཀྱི་སྲིད་བསྒྱུར་ཚོགས་ཁག་སྐོར་ཕྱི་རུ་ཁྱབ་བཞིན་པ་དེ། ཞི་ཅིན་ཕིན་གྱིས་ཅང་ཙེ་མིན་མེད་པར་བཟོ་རྒྱུ་ཡིན་པའི་མཚོན་རྟགས་ཤིག་ཡིན་སྐོར་བརྗོད་འདུག