སྟག་གཟིག་གི་པགས་རིགས་གྱོན་ན་རྒྱ་གཞུང་གི་སྣང་བར་ཡང་འགྲོ་མེད།

ཉེ་ཆར་བོད་རང་སྐྱོང་ལྗོངས་ཟེར་བའི་ཚོགས་འདུ་ཞིག་ཏུ་སྟག་གཟིག་དང་ཝ་སྲམ་བཅས་ཀྱི་པགས་རིགས་རྒྱན་གོས་གྱོན་པ་མང་པོ་ཞིག་བྱུང་བ་སྤྱི་ཚོགས་བརྒྱུད་ལམ་ཁག་ཏུ་གླེང་སློང་ཆེན་པོ་བྱུང་།

ཟླ་འདིའི་ཚེས་ ༡༦ ཉིན་ནས་བཟུང་ལྷ་སར། བོད་རང་སྐྱོང་ལྗོངས་ཟེར་བའི་སྲིད་གྲོས་སྐབས་བཅུ་པའི་ཚོགས་འདུ་ ཐེངས་གསུམ་པ་དེ་འཚོགས་མགོ་བཙུགས་ཡོད་ཅིང་། ཚོགས་འདུ་དེར་ཞུགས་པའི་བོད་རིགས་ཚོགས་མི་མང་པོ་ཞིག་གིས་སྟག་གཟིག་དང་ཝ་སྲམ་སོགས་ཀྱི་པགས་རིགས་རྒྱན་གོས་གྱོན་ཡོད་པར། རྒྱ་ནག་ནང་ཁུལ་གྱི་སྤྱི་ཚོགས་བརྒྱུད་ལམ་ཁག་དང་། རྒྱ་ནག་ཕྱི་ལོགས་ཀྱི་གསར་འགྱུར་བརྒྱུད་ལམ་ཁག་ཏུ་གླེང་སློང་དང་། དཔར་མང་པོ་ཞིག་བརྒྱུད་འགོད་བྱེད་བཞིན་འདུག

ཚེས་ ༢༠ ཉིན་རྒྱ་ནག་གཞུང་འབྲེལ་དྲ་ཚིགས་ཁག་ཅིག་དང་ཀྲུང་གོའི་བོད་ལྗོངས་དྲ་བ་ཟེར་བ་སོགས་སུའང་། གོང་གི་གནས་ཚུལ་དེ་དག་ལུང་འདྲེན་གྱི་རྣམ་པའི་ཐོག་ནས་སྤེལ་ཏེ། རྒྱལ་ཁབ་ཀྱི་སྲིད་གྲོས་འཐུས་མི་ཚོས་རྒྱ་ནག་གི་རིམ་པ་དང་པོའི་སྲུང་སྐྱོབ་སྲོག་ཆགས་དག་གི་པགས་པ་གྱོན་ན་འགྲིག་གི་ཡོད་མེད་དང་། མི་རེ་ཟུང་གིས་ཁྲིམས་འགལ་གྱི་ཅ་དངོས་དེ་དག་ཁྱིམ་དུ་ཉར་ནའང་ནག་ཉེས་ལ་བརྩི་བ་དང་། འགའ་རེས་ལུས་ལ་གྱོན་དེ་སྲིད་གཞུང་གི་ཚོགས་འདུའི་སྟེང་ཞུགས་ཀྱང་། ཉེན་རྟོག་པ་དང་རི་སྐྱེས་སྲོག་ཆགས་སྲུང་སྐྱོབ་སྡེ་ཁག་དག་གིས་འགོག་སྲུང་དང་རྩད་གཅོད་སོགས་བྱེད་ཀྱིན་མེད་དོན་གང་ཡིན་ཟེར།

ཡང་རྒྱ་ནག་གཞུང་འབྲེལ་གསར་འགྱུར་ནང་འདི་འདྲ་ཞིག་ཀྱང་བཀོད་འདུག “ད་ལོ་ཁམས་ཀྱི་གཉེན་སྟོན་མང་པོ་རུ་གསེར་དངུལ་གཡུ་བྱུར་སོགས་རིན་པོ་ཆེ་དང་སྟག་གཟིག་སྲམ་སོགས་ཀྱི་པགས་པ་རྒྱན་དུ་འདོགས་པ་དང་གོས་སུ་གྱོན་པའི་སྣང་ཚུལ་མང་པོ་མཐོང་རྒྱུ་འདུག་སྟབས། འདིས་རང་རྒྱལ་གྱི་རི་སྐྱེས་སྲོག་ཆགས་སྲུང་སྐྱོབ་ཀྱི་ལས་དོན་ཐད་ད་རུང་མི་འདང་བའི་ཆ་མང་པོ་ཡོད་པ་མཚོན། ལྷག་པར་དུ་ཏང་ཡོན་ནས་མགོ་འཁྲིད་དེ་གཅན་གཟན་གྱི་པགས་པ་གྱོན་པ་ནི་བོད་ལྗོངས་ཚོགས་ཆེན་གཉིས་ཀྱི་དགོངས་པ་དང་འགལ་བ་ཞིག་རེད། རང་རྒྱལ་ལོ་རྒྱུས་སུ་བོད་མི་རིགས་ཀྱིས་གོས་སུ་རི་དྭགས་ཀྱི་པགས་པ་གྱོན་པ་རེད་ཅེས་བཤད་ཡོད་རུང་། སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་ནི་འཕེལ་རྒྱས་ཕྱིན་ཡོད་པ་མ་ཡིན་ནམ། ད་རུང་ངན་པ་རྣམས་དོར་མ་ཐུབ་ཅིང་བཟང་པོ་ཡང་ལེན་མ་ཐུབ་པའི་ཚོད་དུ་གནས་པ་ནི་ཅི་འདྲིའི་ངོ་གནོང་དགོས་པ་ཞིག་རེད་ཨང་། འདི་འདྲ་བ་ནི་ཏག་ཏག་སྤྱི་ཚོགས་རིང་ལུགས་ཀྱི་བོད་ལྗོངས་འཕེལ་རྒྱས་དང་ཀྲུང་ཧྭ་མི་རིགས་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་གྱི་གེགས་སུ་འགྲོ་བས། རང་སྐྱོང་ལྗོངས་དང་རྒྱལ་ཁབ་རི་སྐྱེས་སྲོག་ཆགས་སྲུང་སྐྱོབ་སྡེ་ཁག་དང་ཁོར་སྲུང་ཚན་པ་བཅས་ནས་ངེས་པར་དོ་སྣང་བྱེད་དགོས།” ཞེས་རིས་སྐྱེས་སྲོག་ཆགས་ཀྱི་པགས་རིགས་རྒྱན་གོས་བྱེད་པར་འདོད་པ་མེད་པ་དང་། སྤྱི་ཚོགས་བརྒྱུད་ལམ་ཁག་གི་གནས་ཚུལ་ལ་དོ་སྣང་བྱེད་ཀྱི་ཡོད་པའི་ཚུལ་བརྗོད་འདུག

ཉེ་ལམ་པད་འཕྲིན་དྲ་བའི་སྟེང་། བོད་པའི་གླུ་མ་རིག་འཛིན་སྒྲོལ་མ་ལགས་ཀྱིས་ “རི་སྐྱེས་སྲོག་ཆགས་ནི་རང་རྒྱལ་གྱི་སྐྱེ་ཁམས་ཤེས་ཡོན་གྱི་ལྟེ་བའི་རིན་ཐང་ཡིན་པ་དང་། ཆུ་སྲམ་དང་གཟིག ཝ་མོ་སོགས་ནི་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་སྲོག་ཆགས་དང་རིམ་པ་གཉིས་པའི་སྲུང་སྐྱོབ་སྲོག་ཆགས་ཡིན་པས། སྐྱེ་ཁམས་མ་ལག་སྙོམས་སྒྲིག་བྱེད་པར་མེད་དུ་མི་རུང་བའི་ཡན་ལག་ཡིན། ཏང་ཡོན་ཡིན་པའི་མི་དམངས་འཐུས་མི་རྣམས་ཀྱིས་མགོ་བཟུང་ནས་གཅན་གཟན་གྱི་པགས་པ་ཉོ་འཚོང་བྱེད་པས། རྒྱལ་ཁབ་ཀྱི་ཀྲུའུ་ཞི་ཞིས་ཅིན་ཕིང་གིས་བཏོན་པའི་སྐྱེ་ཁམས་དཔལ་ཡོན་གྱི་རིན་ཐང་ལྟ་བ་གང་དུ་ཡོད། བོད་མི་ཕལ་ཆེ་བས་སྔ་མོ་ནས་རི་དྭགས་ཀྱི་པགས་པ་གོས་སུ་མི་གྱོན་པའི་འབོད་སྐུལ་དང་ལག་ལེན་བྱས་ཡོད” ཅེས་བྲིས་འདུག་པ། སྤྱི་ཚོགས་དྲ་ལམ་ཁག་ཏུ་བརྒྱུད་འགོད་བྱས་འདུག