ཉེ་སྔོན་ནས་རྒྱ་ནག་གཞུང་གིས་ཤིན་ཅང་ཡུ་གུར་མི་རིགས་རང་སྐྱོང་ལྗོངས་ཀྱི་ནང་གློག་རྡུལ་ཐོན་རྫས་རིགས་ཉོ་ཚོང་བྱེད་པར་དམ་དྲག་ཤུགས་ཆེ་རུ་བཏང་ཡོད་འདུག
ཁ་སང་ཤིན་ཅང་གཞུང་འབྲེལ་དྲ་བའི་ཐོག་གནས་ཚུལ་སྤེལ་བ་ལྟར་ན། ཉེ་སྔོན་ནས་ཤིན་ཅང་ཡུ་གུར་མི་རིགས་རང་སྐྱོང་ཁུལ་བཟོ་ཚོང་ཁང་དང་རིག་གནས་ཁང་། ཉེན་རྟོག་ཁང་། གསར་འགྱུར་དཔེ་སྐྲུན་ཁང་། མི་རིགས་ལས་དོན་ཨུ་ཡོན་ལྷན་ཁང་སོགས་ལྷན་ཁང་ཁག་ ༦ མཉམ་འབྲེལ་གྱིས། ༼ཤིན་ཅང་ཡུ་གུར་རིགས་རང་སྐྱོང་ལྗོངས་ཀྱི་ཁ་པར་དང་འབྲེལ་ཡོད་གློག་རྡུལ་ཐོན་རྫས་ཚོང་རའི་ལྟ་རྟོག་དོ་དམ་བྱེད་ཐབས༽ཞེས་པའི་སྲིད་བྱུས་ལག་བསྟར་བྱས་ཏེ། ཁ་པར་དང་དྲ་རྒྱའི་བརྒྱུད་ལམ་ལ་སྔར་ལས་དམ་དྲག་བྱེད་མགོ་བརྩམས་ཡོད་འདུག
ཕྱིར་བསྒྲགས་བྱས་པའི་དོ་དམ་བྱེད་ཐབས་ཀྱི་ནང་། ཁ་པར་དང་གློག་ཀླད། དེ་བཞིན་རྒྱུན་སྤྱོད་གློག་རྡུལ་ཐོན་རྫས་རིགས་ཉོ་ཚོང་བྱེད་སྐབས། ངེས་པར་དུ་འཛད་སྤྱོད་པ་དང་ཐོན་རྫས་ཕྱིར་ཚོང་བའི་དངོས་མིང་ཐོ་འགོད་བྱེད་དགོས་པ་མ་ཟད། ཁ་པར་གྱི་མིང་དང་ཚོང་རྟགས། ཐོན་རྫས་ཨང་གྲངས། དེ་བཞིན་ཚོང་གཉེར་བ་དང་འཛད་སྤྱོད་པའི་ཐོབ་ཐང་དཔང་ཡིག་སོགས་ཞིབ་བཤེར་ཐོ་འགོད་ཆ་ཚང་མ་བྱས་ཚེ། གློག་རྡུལ་ཐོན་རྫས་རིགས་ཕྱིར་ཚོང་བྱེད་མི་ཆོག་ལ། གློག་རྡུལ་ཐོན་རྫས་ཚོང་ཁང་ཚང་མས་ས་གནས་ཀྱི་རྫོང་རིམ་པའི་ཉེན་རྟོག་ལས་ཁུངས་སུ་ཡར་ཞུ་ཐོ་འགོད་བྱེད་དགོས་པ་མ་ཟད། ཚོང་ཁང་སྒོ་བརྒྱབ་པའམ་མིང་དང་ས་གནས། དེ་བཞིན་ཚོང་གཉེར་འགན་འཁུར་བ་བརྗེ་བསྒྱུར་བྱུང་ཚེ། ངེས་པར་དུ་བཟོ་ཚོང་སྲིད་འཛིན་དོ་དམ་སྡེ་ཁག་ལ་ཡར་ཞུ་དགོས་པ་དང་། གློག་རྡུལ་ཚོང་ཁང་ཚང་མའི་ནང་ལྟ་ཞིབ་བརྙན་ལེན་འཕྲུལ་ཆས་འཛུགས་དགོས་སྐོར་བརྗོད་འདུག
ཁྲིམས་འགལ་ཆ་འཕྲིན་རིགས་སྤེལ་མཁན་ཐེར་འདོན་བྱས་ན་བྱ་དགའ་སྤྲོད་རྒྱུ་ཡིན་པའི་ཐད། ཤིན་ཅང་རང་སྐྱོང་ལྗོངས་ཡོངས་སུ། ལས་ཁུངས་དང་མི་སྒེར་གང་གིས་ཀྱང་སྤྱི་ཚོཊ་ཀྱི་སྒྲིག་ལམ་ལ་གཏོར་སྐྱོན་བཟོ་བ་དང་སྤྱི་ཚོགས་བརྟན་ལྷིང་ལ་གནོད་སྐྱོན་བཟོ་བ། གཏམ་ཡན་བཟོ་བ་སོགས་རིགས་བཅུ་ཡོད་པའི་ཡི་གེའམ་བརྙན་རིས་སྤེལ་བ་དང་ཉར་བ། ཕབ་ལེན་བྱེད་པ། བརྒྱུད་སྐུར་གཏོང་བ་སོགས་མི་ཆོག་ལ། དེ་རིགས་ཀྱི་ནང་དོན་ཡོད་པའི་ཁ་པར་དང་གློག་རྡུལ་ཐོན་རྫས་རིགས་སྤྱོད་པའམ་ཕྱིར་ཚོང་བྱེད་མི་ཆོག་པས། རིམ་པ་སོ་སོའི་མི་དམངས་སྲིད་གཞུང་གིས་རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་གཏན་འབེབས་ལྟར། གོང་གསལ་ཁྲིམས་འགལ་ཆ་འཕྲིན་རིགས་ཐེར་འདོན་བྱེད་མཁན་ལ་བྱ་དགའ་སྤྲོད་འོས་པ་གཏན་འབེབས་བྱས་ཡོད་སྐོར་བརྗོད་འདུག
གོང་གི་གནས་ཚུལ་ཐད་འཇར་མན་དུ་རྟེན་གཞི་བྱས་པའི་འཛམ་གླིང་ཡུ་གུར་མི་རིགས་མཐུན་ཚོགས་ཀྱི་མགྲིན་ཚབ་པ་ཌི་ལི་ཞཱ་ཡིས། རྒྱ་གཞུང་གིས་ཡུ་གུར་བ་ཚོར་དམ་དྲག་གི་བྱེད་ཐབས་འདི་འདྲ་ལག་བསྟར་བྱེད་བཞིན་པར་དམིགས་ཡུལ་ཡོད་པ་རེད། བརྒྱུད་ལམ་ལ་དམ་དྲག་བྱེད་པའི་བྱ་འགུལ་འོག ཡུ་གུར་བ་ཚོས་འཇིགས་སྐུལ་དང་དྲག་སྤྱོད་ཀྱི་གནས་ཚུལ་བརྒྱུད་སྐུལ་བྱེད་ཀྱི་ཡོད་ཚུལ་བསྒྲགས་པ་དེས། ཡུ་གུར་མི་རིགས་དང་དེའི་བརྒྱུད་ལམ་ལ་སྔར་ལས་དམ་དྲག་བྱེད་པའི་ལྐོག་ཇུས་འཐེན་གྱི་ཡོད་པ་གསལ་པོ་མཚོན་ཡོད་ལུགས་བརྗོད་ཡོད་པ་རེད།
ཉེ་སྔོན་རྒྱ་ནག་གཞུང་འབྲེལ་དྲ་བ་གོ་ལའི་དུས་བབ་ཀྱིས། ཤིན་ཅང་ཉེན་རྟོག་ལས་ཁུངས་ཀྱིས་ཞིབ་བཤེར་བྱས་པ་བརྒྱུད། རྒྱལ་ཁབ་ཁ་བྲལ་གཏོང་ཐབས་དང་ཆོས་ལུགས་ཀྱི་ལྟ་གྲུབ་འུར་སྒྲོག་བྱེད་པ་སོགས་ཁྲིམས་འགལ་གྱི་ཆ་འཕྲིན་རིགས་བརྒྱུད་སྤེལ་བྱས་པའི་ཉེས་དོན་ ༢༢༢༩ རྩད་ཆོད་དེ། ཉེས་ཅན་ ༢༣༢ ལ་རྒོལ་རྡུང་བཏང་ཡོད་སྐོར་བསྒྲགས་ཡོད་པ་རེད།
གསར་འགོད་པ། པདྨ་མཚོ།
