སྐུའི་གྱ་སྟོན་གྱི་ལོ་གསར་ལ་རོལ།

མདོ་སྨད་རྔ་པ་ཁུལ་གྱི་དགོན་གྲོང་གཉིས་ནས་ད་ལོའི་ལོ་གསར་སྐབས་༧གོང་ས་མཆོག་དགུང་ལ་༨༠ ཕེབས་པའི་སྐུའི་གྱ་སྟོན་ཆེད་རྟེན་འབྲེལ་ཆེད་བྱེད་སྒོ་སྣ་ཚོགས་སྤེལ་ཡོད་འདུག

དེ་རིང་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་གི་གྲྭ་བློ་བཟང་བསམ་འཕེལ་ལགས་ཀྱིས་འདི་གར་གནས་ཚུལ་ངོ་སྤྲོད་གནང་བ་ལྟར་ན། ཕྱི་ཟླ་ ༢ པའི་ཚེས་ ༡༨ ཉིན་ཏེ། ལུགས་རྙིང་གི་བོད་ལོའི་གནམ་གང་དགོང་མོའི་བོད་ནང་གི་ཆུ་ཚོད་ ༡༢།༠༠ སྟེང་། བོད་མདོ་སྨད་རྔ་ཡུལ་སྒོ་མང་དགོན་བཤད་སྒྲུབ་འཕེལ་རྒྱས་གླིང་གི་དགེ་འདུན་པ་ཡོངས་དགོན་པའི་མདུན་ཐང་དུ་འཛོམས་ཏེ། རྒྱ་སྒོར་ཁྲི་ ༤ ལྷག་གི་ཤོག་སྦག་སྒྲོན་པ་དང་ལྷ་ཁང་འདུ་ཁང་སྟེང་གློག་སྒྲོན་སྤར་བ་སོགས་བྱས་ཏེ་༧གོང་ས་མཆོག་དགུང་གྲངས་ ༨༠ བཞེས་པའི་གྱ་སྟོན་གྱི་ལོ་གསར་སྲུང་གཙི་གནང་ཡོད་འདུག

ཚེས་ ༡ ཉིན་གྱི་ཐོ་རངས་ཆུ་ཚོད་ ༣ པ་ཡས་མས་ལ་དགོན་པའི་བླ་མ་ལས་སྣེ་ཚོས་འདུ་ཁང་ཡང་སྟེང་གི་༧གོང་ས་མཆོག་གི་གཟིམ་ཆུང་གི་བཞུགས་ཁྲིའི་སྟེང་དུ། ༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་གདན་འདྲེན་ཞལ་འབྱེད་གནང་སྟེ། གྲྭ་མང་ཡོངས་ཀྱིས་ཁ་བཏགས་སྒྲོན་འབུལ་དང་མཇལ་ཁ་ཞུས་ཏེ་རྟེན་འབྲེལ་གྱི་མཛད་སྒོ་རྒྱ་ཆེན་བྱས་ཡོད་འདུག

གནས་ཚུལ་མཁོ་སྤྲོད་པས་བརྗོད་པར། དེ་ནི་ ༢༠༠༨ ལོར་བོད་ནང་ཞི་རྒོལ་བྱུང་བ་ནས་ད་བར་བོད་ཕྱི་ནང་གཉིས་སུ་ཛ་དྲག་གི་གནས་ཚུལ་མུ་མཐུད་ལྷག་པར་བརྟེན་ཏེ། འདས་པའི་ལོ་ངོ་དྲུག་རིང་རྔ་པ་ས་ཁུལ་ཡོངས་ཀྱི་བོད་མི་ཚོས་ལོ་གསར་བཏང་མེད་ཀྱང་། ད་ལོ་༧གོང་ས་མཆོག་དགུང་གྲངས་ ༨༠ ལ་ཕེབས་པའི་སྐུའི་གྱ་སྟོན་ལ་འཁེལ་ཡོད་སྟབས། ཁོང་ཉིད་སྐུ་ཚེའི་བསྐལ་བརྒྱབ་བརྟེན་ཞིང་ཐུགས་ཀྱི་བཞེད་དགོངས་ལྷུན་གྱིས་འགྲུབ་པའི་བརྟེན་འབྲེལ་མཚོན་ཆེད་དུ། སྒོ་མང་དགོན་པའི་གྲྭ་མང་ཡོངས་ཀྱིས་མ་སྐུལ་དང་བླངས་ཐོག་དེ་ལྟ་བུའི་བྱེད་སྒོ་རྒྱ་ཆེན་པོ་ཞིག་སྤེལ་བ་ཡིན་འདུག

ལོ་གསར་ཚེས་ ༢ ཉིན་སྒོ་མང་དགོན་པའི་གནས་ཆུང་སྒོ་རྭའི་ནང་དུ་ལྷ་སྡེ་ཚོ་བ་དྲུག་གིས་བསང་གསོལ་ཆེན་པོ་ཞིག་བྱས་ཡོད་པ་དང་། སྐབས་དེར་ཚོ་དཔོན་གྱིས་མང་ཚོགས་འདུ་འཛོམས་ཀྱི་དབུས་སུ་ད་ལོ་ནི་གོང་ས་ལྷ་མིའི་རྣམ་འདྲེན། འཛམ་གླིང་ཞི་བདེ་དེད་དཔོན། ༧རྒྱལ་དབང་བསྟན་འཛིན་རྒྱ་མཚོ་དགུང་གྲངས་བརྒྱ་ཅུར་ཕེབས་པའི་བཀྲ་ཤིས་པའི་ལོ་གསར་ཁྱད་པར་ཅན་ཞིག་ཡིན་པ་ཚང་མས་མཁྱེན་གསལ་རེད། ཅེས་བརྟེན་འབྲེལ་བསྒྲིགས་ཏེ་ཁ་གཡང་བརྗོད་ཡོད་འདུག

གནས་ཚུལ་ཁོ་སྤྲོད་པས་བརྗོད་པ་ལྟར་ན། ཀུན་མཁྱེན་བསྟན་པའི་རྒྱལ་མཚན་མཆོག་གིས་སྲོལ་གཏོད་མཛད་པ་ལྟར། སྔོན་ཆད་ལོ་ལྟར་ལོ་གསར་ཚེས་པ་ ༢ ཉིན་ལྷ་སྡེ་ཚོ་བ་དྲུག་གིས་གནས་ཆུང་ར་བའི་ནང་དུ་བསང་གསོལ་ཆེན་པོ་ཞིག་བྱས་རྗེས། སྒོ་མང་དགོན་པའི་རྒྱབ་ལོགས་ཀྱི་ཐང་ཆེན་དུ་རྟ་རྒྱུག་བྱེད་སྲོལ་ཡོད་པ་དང་། དེ་དང་འབྲེལ་ནས་ཚེས་ ༣ ཉིན་ནས་བཟུང་ཚེས་ ༡༦ ཉིན་བར་སྒོ་མང་དགོན་པའི་སྨོན་ལམ་ཆེན་མོ་ཚོགས་སྲོལ་ཡོད་ཀྱང་། ༢༠༠༨ ལོ་ནས་བསང་གསོལ་དང་རྟ་རྒྱུག་གཉིས་ཀ་མཚམས་འཇོག་བྱས་ཡོད་ཀྱང་། ད་ལོ་༧གོང་ས་མཆོག་གི་སྐུའི་གྱ་སྟོན་ལ་བརྟེན་འབྲེལ་ཆེད་བསང་གསོལ་ཆེན་མོ་བསྐྱར་དུ་དབུ་འཛུགས་གནང་ཡོད་ནའང་རྟ་རྒྱུག་ད་ལོར་ཡང་མེད་པ་བྱས་ཡོད་འདུག  

སྒོ་མང་དགོན་པའི་སྨོན་ལམ་ཆེན་མོ་དེར་ཚོ་བ་དྲུག་གིས་རེས་མོས་ཀྱིས་འགན་འཁུར་ཏེ་བསྟན་པའི་སྦྱིན་བདག་གནང་གི་ཡོད་པ་ལྟར་ད་ལོ་བསུ་བ་མཚོ་བའི་གཙོ་འགན་འཁུར་ཡོད་འདུག རྔ་པ་སྒོ་མང་དགོན་དུ་གྲྭ་ཚང་གཉིས་དང་ད་ལྟ་དགེ་འདུན་པ་ཞལ་གྲངས་ཆིག་སྟོང་ལྷག་ཡོད་འདུག ལྷ་སྡེ་ཚོ་བ་དྲུག་ཅེས་པ་ནི་སྣ་ཤུལ་ལྷ་སྡེ་དང་བསུ་བ་ལྷ་སྡེ། སྔོན་ཤུལ་ལྷ་སྡེ། རྒྱ་སྟོད་ལྷ་སྡེ། འཚམས་རིང་ལྷ་སྡེ། ཞིང་ངེ་ལྷ་སྡེ་བཅས་ཡིན་འདུག

གཞན། ལོ་གསར་ཚེས་གཅིག་ཉིན་རྔ་པ་ས་ཁུལ་གྱི་ཇོ་ནང་བསེྭ་དགོན་པ་དང་ཀིརྟི་དགོན་པ། གཉེན་རྩེ་དགོན། མགོ་ལོག་ཁང་གསར་ཁང་རྒན། བླ་བྲང་དང་རེབ་གོང་། གཅན་ཚ་སོགས་སུའང་དགོན་སྡེ་ཁག་ནང་༧གོང་ས་མཆོག་གི་སྐུ་པར་བསྒྲིག་ཤོམ་དང་། གྲོང་པའི་སྐྱ་བོ་ཚོས་བསང་གསོལ་དར་འཛུགས་སོགས་ཀྱི་ལམ་ནས་༧གོང་ས་མཆོག་དགུང་གྲངས་ ༨༠ ལ་ཕེབས་པར་རྟེན་འབྲེལ་མཚོན་པའི་བྱེད་སྒོ་སྣ་ཚོགས་སྤེལ་ཡོད་འདུག

མདོ་སྨད་ཕྱོགས་སུ་བླ་སྤྲུལ་དགེ་བཤེས་དང་མི་ཆེན་དཔོན་ཆེན་ཚོ་དགུང་ལོ་ ༨༠ ལ་ཕེབས་སྐབས། ‘བརྒྱད་ཅུའི་གྱ་སྟོན’ཞེས་དགུང་ལོ་མཐོན་པོའི་བར་སྐུ་འཚོ་བཞུགས་གནང་བའི་དགའ་སྟོན་ཆེད། ཆོས་ཕྱོགས་དང་འབྲེལ་བའི་བྱེད་སྒོ་སྣ་ཚོགས་སྤེལ་བའི་ལམ་སྲོལ་ཡོད་འདུག