བོད་རང་བཙན་དང་འབྲེལ་བའི་ཁྲིམས་འགལ་བྱ་སྤྱོད་ཉི་ཤུ།

ཉེ་སྔོན་རེབ་གོང་ཐུན་རིན་རྫོང་སྲིད་གཞུང་གིས་བོད་རང་བཙན་དང་འབྲེལ་བའི་ཁྲིམས་འགལ་བྱ་སྤྱོད་ ༢༠ ཟེར་བ་ཞིག་བཀྲམ་ཡོད་འདུག

ཕྱི་ཚེས་ ༢ ཚེས་ ༡༢ ཉིན་རེབ་གོང་ཐུན་རིན་རྫོང་སྲིད་གཞུང་གིས་བོད་རང་བཙན་དང་འབྲེལ་བའི་ཁྲིམས་འགལ་གྱི་བྱ་སྤྱོད་ཉི་ཤུ་ཟེར་བའི་ཡིག་ཆ་ཞིག་བཀྲམ་ཏེ། རང་ལུས་མེར་བསྲེག་ལ་ངན་སྐུལ་དང་གདུང་སེམས་མཉམ་སྐྱེད། བོད་རང་བཙན་དྲིལ་བསྒྲགས། ཕྱི་ཕྱོགས་ཀྱི་ཁ་བྲལ་བར་ལྐོག་འབྲེལ་བྱེད་པ། དེ་བཞིན། བོད་རང་བཙན་གྱི་ཁ་བྲལ་སིམ་འཛུལ་བྱ་འགུལ་དང་བསྟུན་ནས་གཞན་གྱིས་དུས་ཆེན་ལ་རོལ་བ་དང་། གཉེན་སྟོན་དང་དགའ་སྟོན་བྱ་འགུལ་ལ་ཐེ་གཏོགས་བྱེད་པ། བཙན་ཤུགས་ཀྱིས་བོད་སྐད་རྐྱང་མ་བཤད་པ་དང་ཚེ་ཐར་གཏོང་དུ་འཇུག་པ། ༸གོང་ས་མཆོག་ལ་སྨོན་ལམ་གསོལ་འདེབས་ཀྱི་འདུ་ཚོགས་བསྡུ་བ་སོགས་སྤྱི་ཚོགས་སྒྲིག་ལམ་ལ་ཟིང་ཆ་བཟོ་བའི་ཁྲིམས་འགལ་བྱ་སྤྱོད་འདི་རིགས་བྱེད་མཁན་ཚོ། གཏན་ནས་གུ་ཡངས་མི་གཏོང་བར་བྱ་འགུལ་སྣེ་འཁྲིད་པར་ཐག་གཅོད་ནན་མོ་དགོས་པ་མ་ཟད། དེའི་ཁྱིམ་མིར་དམངས་ཕན་སྲིད་བྱུས་ལོངས་སུ་སྤྱོད་པ་མེད་པར་བཟོ་རྒྱུ་དང་། ཁྲིམས་འགལ་བྱ་སྤྱོད་ནང་འཛུལ་ཞུགས་བྱེད་མཁན་ཚང་མར་འཛིན་གྲྭ་བཙུགས་ཏེ། བོད་རང་བཙན་ལས་འགུལ་ནང་ཞུགས་པའི་གནོད་འཚེ་རང་བཞིན་ངོས་ཟིན་དུ་འཇུག་དགོས་ལུགས་དང་། ཁྲིམས་འགལ་བྱེད་མཁན་གྱི་ཏང་ཡོན་ལས་བྱེད་པར་ཏང་སྒྲིག་ལྟར་ཐག་གཅོད་ནན་མོ་དགོས་པ་མ་ཟད། ཟླ་ཕོགས་སྤྲོད་རྒྱུ་མཚམས་འཇོག་དགོས་སྐོར་སོགས་བརྗོད་འདུག

ཁྲིམས་འགལ་བྱ་སྤྱོད་རིགས་ཉི་ཤུ་བསྒྲགས་པའི་གཅིག་ནི་རང་སྲེག་སོགས་ཐལ་དྲགས་བྱ་སྤྱོད་ལ་ངན་སྐུལ་དང་འུད་སྒྲོག་མཛེས་བསྒྱུར་བྱེད་པ། གཉིས་ནི་བོད་རང་བཙན་གྱི་དར་ཆ་འགེལ་བ་དང་སྦྱར་ཡིག་སྦྱོར་བ། བསྒྲགས་ཡིག་འགྲེམ་པ་དང་གཏམ་གླེང་སྤེལ་བ། གསུམ་ནི་མི་རིགས་ཁ་བྲལ་རིང་ལུགས་དང་མི་རིགས་ཐལ་དྲགས་རིང་ལུགས་ཀྱི་བསམ་བློ་ལྡན་པའི་དཔེ་དེབ་དང་རི་མོ། སྒྲ་བརྙན་ཐོན་རྫས་བཅས་གསར་རྩོམ་སྒྲིག་བཟོ། ཕྱིར་འཚོང་དང་སྒྲོག་སྤེལ་བཅས་བྱེད་པ། བཞི་ནི་ཕ་སྐད་སྲུང་སྐྱོབ་དང་སྐྱེས་ཁམས་སྲུང་སྐྱོབ། རྨོངས་སེལ་འཛིན་གྲྭ་སོགས་ལ་ཁ་གཡར་ནས་ཁྲིམས་འགལ་གྱི་ཚོགས་པ་རྩ་འཛུགས་བྱེད་པ་དང་ཁྲིམས་འགལ་གྱི་བྱ་འགུལ་སྤེལ་བ། ལྔ་ནི་སྐད་ཡིག་འདྲ་མཉམ་དང་ཟས་རིགས་བདེ་འཇགས། སྲོག་ཆགས་སྲུང་སྐྱོབ་ལ་སོགས་པའི་མིང་གཡར་ཏེ་ཁྲིམས་འགལ་གྱི་འདུ་ཚོགས་དང་རྔམ་སྟོན་ཁྲོམ་སྐོར། དེ་ལས་གཞན་པའི་ཁྲིམས་འགལ་གྱི་བྱ་འགུལ་ཅི་རིགས་སྤེལ་བར་རྩ་འཛུགས་དང་། སྣེ་ཁྲིད། ངན་སྐུལ་བཅས་བྱེད་པ།

དྲུག་ནི་ཁུའུ་ཁུའུ་དང་སྐད་འཕྲིན་སོགས་ཀྱི་དྲ་ལམ་སྤྱད་ནས་བོད་རང་བཙན་གྱི་ནང་དོན་ལྡན་པའི་བརྡ་འཕྲིན་དང་རི་མོ། བརྙན་ཟློས་ཕབ་ལེན་བྱས་ཏེ་ཉན་པ་དང་བལྟ་བ། བརྒྱུད་སྤེལ་བཅས་བྱེད་པ་དང་ཡང་ན་མི་རིགས་མཐུན་སྒྲིལ་ལ་གནོད་པ་ཡོད་པའི་བརྡ་འཕྲིན་འབྱོར་རྗེས་བརྒྱུད་བསྐུར་མ་བྱས་མོད། འོན་ཀྱང་ལག་ཁྱེར་དང་གློག་ཀླད་སོགས་ཀྱི་ནང་ནས་ཉར་ཚགས་བྱེད་པ་དང་དུས་ལྟར་མ་གསུབ་པར་མི་གཞན་ལ་དྲིལ་སྒྲོག་དང་བལྟ་རུ་འཇུག་པ། བདུན་ནི་མངའ་ཁོངས་ཕྱིའི་ཁ་བྲལ་སྟོབས་ཤུགས་དང་ངན་འབྲེལ་བྱས་ཏེ་མངའ་ཁོངས་ཕྱིའི་དགྲར་འཛིན་སྟོབས་ཤུགས་ལ་བརྡ་འཕྲིན་ཅི་རིགས་འདོན་སྤྲོད་བྱེད་པ། བརྒྱད་པ་ནི་མངའ་ཁོངས་ཕྱིའི་དགྲར་འཛིན་སྟོབས་ཤུགས་ཀྱིས་བོད་རང་བཙན་གྱི་བསམ་བློ་འུད་སྒྲོག་བྱེད་པའི་རླུང་འཕྲིན་དང་བརྙན་འཕྲིན་གྱི་ལེ་ཚན་ལ་ཉན་པ་དང་བལྟ་བ། དགུ་ནི་མངའ་ཁོངས་ཕྱི་ལ་འགྲོ་བ་དང་ཁྲིམས་འགལ་གྱིས་མངའ་ཁོངས་ཕྱི་ལ་སོང་ནས་ཆོས་ལུགས་ཀྱི་བྱེད་སྒོ་གང་རུང་ལ་ཞུགས་པ། བཅུ་ནི་མི་ཚོགས་འདུ་ས་ནས་ཏཱ་ལའི་བླ་མ་སྐུ་ཕྲེང་བཅུ་བཞི་པའི་འདྲ་པར་དང་བོད་རང་བཙན་པའི་འདྲ་པར་འགེལ་བ།

བཅུ་གཅིག་ནི་རླངས་འཁོར་སོགས་འགྲིམ་འགྲུལ་ཡོ་བྱད་ཀྱི་ནང་དུ་བོད་རང་བཙན་གྱི་ནང་དོན་འདུས་པའི་རི་མོ་སྦྱོར་བ་དང་སྒྲ་ཟློས་གཏོང་བ། བཅུ་གཉིས་ནི་རང་སྲེག་རྒྱག་མཁན་གྱི་རྗེས་སུ་བསང་ཕུད་པ་དང་ཆོས་འདོན་པ། ཚེ་ཐར་གཏོང་བ་མཆོད་མེ་འཇོག་པ་སོགས་རང་སྲེག་རྒྱག་མཁན་ལ་སྨོན་ལམ་ཞུ་བ་དང་ཡང་ན་དེའི་ཁྱིམ་མིར་འཚམས་འདྲི་བྱེད་པ། བཅུ་གསུམ་ནི་མངའ་ཁོངས་ཕྱིའི་མི་རིགས་ཁ་བྲལ་སྟོབས་ཤུགས་དང་མི་སྒེར་གྱི་དོན་དུ་ཞལ་འདེབས་བསྡུ་བ་དང་ཞལ་འདེབས་བསྡུ་བར་རྩ་འཛུགས་བྱེད་པ། བཅུ་བཞི་ནི་སློབ་གྲྭའི་ནང་དུ་བོད་རང་བཙན་གྱི་གཏམ་གླེང་སྤེལ་བ་དང་མི་རིགས་ཐལ་དྲགས་རིང་ལུགས་ཀྱི་བསམ་བློ་སྒྲོག་སྤེལ་བྱེད་པ། བཅོ་ལྔ་ནི་ཆོས་ལུགས་དང་གྲུབ་མཐའ། རུས་རྒྱུད་བཅས་ཀྱི་སྟོབས་ཤུགས་བེད་སྤྱད་དེ་ཁྲིམས་འཛིན་དང་སྲིད་འཛིན། སྤྱི་ཚོགས་ཀྱི་ལས་དོན་ལ་ཐེ་གཏོགས་དང་མི་རིགས་ལས་དོན་གྱི་མིང་གཡར་ཏེ་ལས་བྱེད་མང་ཚོགས་ལ་འཇིགས་སྐུལ་བ་དང་འཁོན་ལན་སློག་པ། དགྲ་རུ་འཛིན་པ།

བཅུ་དྲུག་ནི་མངའ་ཁོངས་ཕྱིའི་མི་རིགས་ཁ་བྲལ་སྟོབས་ཤུགས་དང་འབྲེལ་བ་རྒྱུན་འཁྱོངས་བྱེད་པ་དང་བོད་རང་བཙན་དང་འབྲེལ་བའི་སྤྱི་ཚོགས་བརྟན་འཇགས་སྲུང་སྐྱོབ་ཀྱི་བྱ་བའི་ཐག་གཅོད་ལ་མི་བསྟུན་པ་དང་། མི་གཞན་ལ་བཙན་སྐུལ་དང་རྩ་འཛུགས་བྱས་ནས་སྲིད་གཞུང་ལ་ངོ་རྒོལ་བྱེད་པ། བཅུ་བདུན་ནི་དུས་ཆེན་དང་ཡང་ན་ཚོར་སྐྱེན་གྱི་དུས་སུ་དགོན་པ་དང་ཡང་ན་སྤྱི་སྤྱོད་ར་བ་ནས་མངོན་གསལ་སྒོས་མི་གཞན་ལ་ངན་སྐུལ་དང་རྩ་འཛུགས་བྱས་ཏེ་འདུ་ཚོགས་བརྒྱབ་ནས་ཏཱ་ལའི་བླ་མ་སྐུ་ཕྲེང་བཅུ་པའི་གསོལ་འདེབས་སྨོན་ལམ་གྱི་བྱ་འགུལ་སྤེལ་བ། བཅོ་བརྒྱད་ནི་ཆོས་ལུགས་དང་དམངས་སྲོལ་བྱ་འགུལ་བེད་སྤྱད་ནས་མི་གཞན་ལ་ངན་སྐུལ་དང་། རྩ་འཛུགས་བྱས་ནས་འདུ་ཚོགས་བརྒྱབ་ཏེ་ཏཱ་ལའི་བླ་མ་སྐུ་ཕྲེང་བཅུ་བཞི་པར་བསང་ཕུད་པ་དང་། མཆོད་མེ་སྒྲོན་པ། གསོལ་འདེབས་སྨོན་ལམ་ཞུ་བ། བཅུ་དགུ་ནི་ངན་སེམས་བཅངས་ནས་རང་ཁུལ་གྱི་རྒྱུན་ལྡན་ཆོས་དོན་བྱ་འགུལ་དང་ཡང་ན་དམངས་སྲོལ་བྱ་འགུལ་སྣ་ཚོགས་དེ། བོད་རང་བཙན་དང་འབྲེལ་བའི་བརྡ་འཕྲིན་དང་། བརྙན་ཟློས་སུ་འཁྱོག་བཟོ་བྱས་ནས་བརྒྱུད་སྒྲོག་དང་དཀྲོག་གཏམ་དུ་བསྒྱུར་བ། དྲིལ་སྒྲོག་སློབ་གསོ་དང་། གཙོ་གནད་འབྲེལ་གཏུག་བྱ་ཡུལ་གྱི་སློབ་གསོར་རོགས་སྐྱོར། གནད་སའི་ཞང་ད་གྲོང་རྡལ་གྱི་སྡེ་བ་དང་དགོན་པ་ཕྱོགས་བསྡུས་དག་ཐེར་བཅོས་སྐྱོང་། ཁྲིམས་འགལ་གྱི་རྩ་འཛུགས་དག་ཐེར་དང་ཁྲིམས་འགལ་སྒྲིག་འགལ་གྱི་མི་སྣ་ཐག་གཅོད་སོགས་ཀྱི་བྱ་བར་ངན་སེམས་བཅངས་ནས་འཁྱོག་བཤད་བྱས་ཏེ་མངའ་ཁོངས་ཕྱི་ལ་བསྐུར་བ་དང་། དགྲར་འཛིན་སྟོབས་ཤུགས་ཀྱིས་འུད་སྒྲོག་བྱེད་པར་རྒྱུ་ཆ་འདོན་སྤྲོད་བྱེད་པ།ཉི་ཤུ་ནི་མངའ་ཁོངས་ཕྱིའི་བོད་རང་བཙན་གྱི་ཁ་བྲལ་སིམ་འཛུལ་བྱ་འགུལ་དང་བསྟུན་ནས་གཞན་གྱིས་དུས་ཆེན་ལ་རོལ་བ་དང་། གཉེན་སྟོན་དང་དགའ་སྟོན་བྱ་འགུལ་བཅས་ལ་ཐེ་གཏོགས་བྱེད་པ། བཙན་ཤུགས་ཀྱིས་བོད་སྐད་རྐྱང་མ་བཤད་པ་དང་། ཕྱུགས་ཟོག་གསོད་པ་དང་ཡང་ན་ཕྱིར་བཙོང་བ་བཀག་འགོག་བྱས་ཏེ། བཙན་གྱིས་ཚེ་ཐར་གཏོང་དུ་འཇུག་པ། ཁོར་ཡུག་སྲུང་སྐྱོབ་སོགས་ལ་ཁ་གཡར་ནས་སྤྱི་ཚོགས་སྒྲིག་ལམ་ལ་ཟིང་ཆ་བཟོ་བ་བཅས་རེད།