ཞི་བའི་འཐབ་རྩོད་པ་ཞིག་གི་བཞུད་ལམ།

གླིང་ཚ་ཚེ་བརྟན་རྡོ་རྗེ་ལཊ་ཀྱི་དཔེ་དེབ་དབུ་འབྱེད་སྟེང་སྤྱི་འཐུས་ཚོགས་གཙོ་མཆོག་གིས་གླིང་ཚའི་བློས་གཏོང་དང་མི་རིགས་ཀྱི་ལར་ཞེན་ལ་བོད་མི་ཚང་མས་ཡིད་སྨོན་དང་རྗེས་སུ་ཡི་རངས་བྱེད་དགོས་གསུངས།

དེ་རིང་སྔ་དྲོའི་ཆུ་ཚོད་ ༩།༣༠ ཐོག་དྷ་ས་མེག་གྷན་གྱི་དབུས་གཙང་ཆོལ་ཁའི་མགྲོན་ཁང་དུ། སྤྱི་འཐུས་རྨོག་རུ་བསྟན་པ་ལགས་ཀྱིས་བརྩམས་པའི་རི་ངོགས་གཏམ་རྒྱུད་དེབ་ཕྲེང་གཉིས་པ་སྟེ། ཞི་བའི་གོམ་བགྲོད་པ་གླིང་ཚ་ཚེ་བརྟན་རྡོ་རྗེ་ལགས་ཀྱི་སྐོར་༼ ཞི་བའི་འཐབ་རྩོད་པ་ཞིག་གི་བཞུད་ལམ།༽ཅེས་པའི་དཔེ་དེབ་ཅིག་དབུ་འབྱེད་གནང་ཡོད་པ་དང་། སྐབས་དེར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་དབུས་བོད་ཀྱི་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ་བཅས་ཕེབས་ཡོད་འདུག

དཔེ་དེབ་དབུ་འབྱེད་དང་འབྲེལ་སྤྱི་འཐུས་ཚོགས་གཙོ་མཆོག་གིས་གསུང་བཤད་གནང་དོན། དེ་རིང་འཐབ་རྩོད་པ་ཞིག་གི་བཞུད་ལམ་ཞེས་པའི་ནང་གི་ཞི་བའི་འཐབ་རྩོད་པ་དེ་གླིང་ཚ་ཚེ་བརྟན་རྡོ་རྗེ་ཆགས་ཡོད་པ་རེད། ཁོང་ཡིན་ན་དངོས་གནས་དྲང་གནས་སོ་སོའི་མི་རིགས་ལ་ལ་རྒྱ་དང་ཞེན་རྒྱ་ཆེན་པོ་ཡོད་པ་ཙམ་དུ་མ་ཟད། སྙིང་སྟོབས་ཆེན་པོ་དང་ནམ་རྒྱུན་ནས་བློ་ཐག་ཆོད་པོ་ཞེ་དྲག་ཞིག་ཡིན་པ་དེ་ཤེས་གསལ་རེད། ད་ལྟའི་གནས་སྟངས་འདི་མ་ཆགས་གོང་ལ་ཁོང་གིས་ལས་འགུལ་སྤེལ་སྐབས་ང་ཡོང་རོགས་བྱོས་གསུངས་ནས་ཁོང་མཇལ་བའི་གོ་སྐབས་བྱུང་། ཁོང་ཀ་ལིན་སྤུང་སྲད་རྒྱུད་དགོན་པ་བར་བསླེབས་ཡོད་པ་ང་ཚོ་ཚང་མས་ཤེས་ཀྱི་ཡོད་ཀྱང་། དེའི་རྗེས་ལམ་ཀ་ག་འདྲ་ཞིག་ལ་ཕྱིན་པ་དང་ག་བར་འབྱོར་ཡོད་པ་སོགས་ཀྱི་གནས་སྟངས་ང་ཚོ་སུ་གཅིག་གིས་ཀྱང་ཤེས་ཀྱི་ཡོད་པ་མ་རེད། ང་ཚོས་ཚོད་དཔག་བྱས་པ་ཡིན་ན། ཁོང་རྒྱ་གར་གྱི་ས་ཐོག་ཏུ་མེད་པ་དེ་གསལ་བོ་འདྲ་བོ་ཆགས་ཡོད། གཅིག་བྱས་ན་ཁོང་ལམ་ཁ་གཞན་ཞིག་ནས་འགྲོ་ཐབས་བྱས་ཏེ་ལམ་བར་ནས་འདས་གྲོངས་སུ་ཕྱིན་སྲིད་ལ། ཡང་ན་ས་མཚམས་ནས་རྒྱའི་མཐའ་སྲུང་བས་འཛིན་བཟུང་བྱས་ཏེ་ད་ལྟ་བཙོན་ཁང་ཞིག་ཏུ་ལྷག་ཡོད་ཀྱང་སྲིད་པ་རེད། གང་ལྟར་སུ་གཅིག་གིས་ཞུ་ཤེས་ཀྱི་མ་རེད། གང་ལྟར་ཁོང་རང་གིས་བོད་བསྟན་སྲིད་མི་རིགས་ཀྱི་ཆེད་དུ་བློས་གཏོང་གནང་བ་དེར་ང་ཚོ་བོད་མི་ཚང་མས་ཡིད་སྨོན་དགོས་པ་ཞིག་རེད། སྤྱི་པ་དང་སྒྲིག་འཛུགས་ཁག་གིས་ལས་འགུལ་སྤེལ་བའི་རིམ་པ་མང་པོ་ཞིག་ཡོང་གི་ཡོད་ཀྱང་། གང་ཟག་མི་སྒེར་གཅིག་གི་ཐོག་ནས་སོ་སོའི་བཟའ་ཟླ་དང་ཕྲུ་གུ། ཕ་མ་སྤུན་མཆེད་བཅས་ཚང་མ་བློས་བཏང་ནས་ལས་འགུལ་སྤེལ་ཐུབ་པ་དེ་ཚང་མས་བྱེད་ཐུབ་པ་ཞིག་མ་རེད། ཁོང་གིས་བོད་བསྟན་སྲིད་མི་རིགས་ཀྱི་ཆེད་དུ་ཞི་བའི་ལས་འགུལ་སྤེལ་བ་དེར་ང་ཚོ་བོད་མི་མང་སྤྱི་འཐུས་ལྷན་ཚོགས་དང་བོད་མི་ཡོད་དོ་ཅོག་གིས་ཡིད་སྨོན་དགོས་པ་ཞིག་དང་། ཁོང་ལ་རྗེས་སུ་ཡི་རངས་ཞུ་དགོས་པའི་གནས་སྟངས་ཤིག་རེད་བསམ་གྱི་ཡོད། ཅེས་གསུངས།

ཡང་ཁོང་གིས། རྒྱ་ནག་ལ་དམག་དང་དཔལ་འབྱོར། ཆབ་སྲིད་བཅས་ཀྱི་སྟོབས་ཡོད་ཀྱང་། མེད་པ་གཅིག་པུ་དེ་བཟང་སྤྱོད་ཀྱི་སྟོབས་ཡོད་པ་མ་རེད། བཟང་སྤྱོད་ཀྱི་སྟོབས་ཡོང་ཐབས་བྱེད་པར་རྒྱ་མི་རིགས་ཙམ་དུ་མ་ཟད། བོད་དང་ཡུ་གུར། སོག་པོའི་མི་རིགས་བཅས་ཚང་མའི་བདེ་སྡུག་ལ་བལྟས་ཏེ་ཁོང་ཚོའི་མངོན་འདོད་འགྲུབ་པ་བྱས་ཚེ། རང་བཞིན་གྱིས་རྒྱལ་ཁབ་གཅིག་གྱུར་ཡོང་གི་རེད་ལ། རྒྱལ་ཁབ་སྲུང་སྐྱོབ་དང་བདེ་འཇགས་ལའང་དེས་ཕན་ངེས་རེད། བོད་མིའི་མངོན་འདོད་དེ་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་དབུ་མའི་ལམ་གྱི་ཐོག་ནས་སེལ་པར་ད་ལྟ་ནས་གོམ་པ་མདུན་སྐྱོད་བྱེད་དགོས་པའི་གནས་སྟངས་ཤིག་ཆགས་བསྡད་ཡོད་ལ། དེའི་ཐོག་རྒྱ་ནག་གཞུང་གི་མགོ་ཁྲིད་ཚོས་ཀྱང་དགོངས་པ་ཞིག་བཞེས་དགོས་ཀྱི་འདུག་ཞུ་རྒྱུ་ཡིན། ཞེས་གསུངས་པ་དང་འབྲེལ། རྒྱ་ནག་གཞུང་གིས་བསམ་ཤེས་ཡོད་པའི་ཐོག་ནས་པཎ་ཆེན་ཆུང་སྲིད་རིན་པོ་ཆེས་དབུས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ། དེ་བཞིན་བྱ་བྲལ་རིན་པོ་ཆེ་སོགས་བཙོན་འོག་ཏུ་ཡོད་པ་ཚང་མ་ཀློད་གྲོལ་གཏོང་དགོས་པའི་འབོད་སྐུལ་གནང་།

གསར་འགོད་པས་དཔེ་དེབ་རྩོམ་པ་པོ་སྤྱི་འཐུས་རྨོག་རུ་བསྟན་པ་ལགས་སུ་བཅར་འདྲི་ཞུས་པར། རི་ངོགས་གཏམ་རྒྱུད་གཉིས་པ་ཞི་བའི་འཐབ་རྩོད་པ་ཞིག་གི་བཞུད་ལམ་སྟེ། གླིང་ཚ་ཚེ་བརྟན་རྡོ་རྗེ་ཡི་བཞུད་ལམ་ཞེས་པའི་ནང་གླིང་ཚ་ཁོང་གིས་སྔ་ཕྱི་གཉིས་ཀྱི་ཞི་བའི་གོམ་བགྲོད་ཀྱི་བརྒྱུད་རིམ་གླེང་ཡོད་ལ། ཁོང་གི་ཞི་བའི་གོམ་བགྲོད་ལས་འགུལ་དང་འབྲེལ་བའི་སྐོར་གྱི་ལྟ་ཚུལ་བརྗོད་ཡོད། ངས་གླིང་ཚ་གླེང་དོན་ནི་ཕ་ཡུལ་གཅིག་པ་དང་གྲོགས་པོའི་འབྲེལ་ལམ་གྱི་ཆེད་དུ་མིན་ལ། ཁོང་རང་གི་ལས་འགུལ་དེ་ཆབ་སྲིད་ལྟ་གྲུབ་ག་གེ་མོ་དང་འབྲེལ་བ་ཡོད་པའི་དབང་གིས་ཀྱང་མིན། རི་ངོགས་འདི་ནས་ཡོད་ཚད་བློས་གཏོང་ཐུབ་པའི་ཁོང་ལྟ་བུ་ཞིག་བྱུང་བ་དངོས་བྱུང་གི་ལོ་རྒྱུས་ཡིན་ལ། ལོ་རྒྱུས་འདི་འབྲི་དགོས་པ་ལས་འགན་ཞིག་ཏུ་བསམ་གྱི་ཡོད། ཅེས་དང་། ཁོང་གིས་མུ་མཐུད་དུ། གླིང་ཚ་ཚེ་བརྟན་རྡོ་རྗེ་ཡི་ལོ་རྒྱུས་ལ་རིན་ཐང་ཅི་ཙམ་ཡོད་མེད་ངེད་ཀྱིས་ཁ་ཚོན་གཅོད་དཀའ་ནའང་། གླིང་ཚའི་དཀའ་སྡུག་གི་ཟིན་ཐོ་ནི་ས་ལེ་བར་སྟོང་ཕྲག་མང་པོར་རྒྱང་བསྐྱོད་བྱས་པའི་གཏམ་རྒྱུད་ངོ་མ་ཞིག་ཡིན་སྟབས། གཏམ་རྒྱུད་འཚོལ་མཁན་གྱི་ཕྱི་རབས་པ་ཚོར་སྟབས་བདེ་ཡོང་ཕྱིར་གསར་ལམ་ཁག་ཅིག་ནས་དྲི་བ་དྲིས་ལན་སོགས་འདྲེན་འགོད་བྱས་པ་དང་། རྩོམ་པ་པོ་རང་གི་གང་མཐོང་བ་དང་ཤེས་པ་དག་བཀོད་ཡོད། ཅེས་བརྗོད་འདུག

གསར་འགོད་པ། པདྨ་མཚོ།