བྲག་མགོ་འབྲོག་རུ་སྡེ་བའི་བོད་མི་ཚོ་རི་མགོར་བསང་གསོལ་གཏོང་དུ་འགྲོ་སྐབས་རྒྱའི་ཉེན་རྟོག་པས་མེ་མདའ་བརྒྱབ་སྟེ་བོད་པའི་ཕོ་གསར་ཞིག་ལ་རྨས་སྐྱོན་ཕོག་ཡོད་འདུག
འདི་གར་གནས་ཚུལ་ཁོ་སྤྲོད་གནང་བ་ལྟར་ན། ཁ་སང་ཚེས་ ༡༠ ཉིན་གྱི་གསུམ་བཅུའི་དུས་དྲན་ཐེངས་ ༥༦ པ་དང་བསྟུན་ཏེ་དཀར་མཛེས་ཁུལ་བྲག་མགོ་རྫོང་། མདའ་མདོ་ཞིང་འབྲོག་རུ་སྡེ་བའི་ཕོ་གསར་ཁག་ཅིག་སྦག་སྦག་སྟེང་དར་ལྕོག་བཏགས་ཏེ། རི་མགོར་བསང་གསོལ་དུ་འགྲོ་སྐབས་རྒྱ་གཞུང་ཉེན་རྟོག་པས་བཀག་འགོག་བྱས་ཏེ་ཁོང་ཚོའི་བར་ཁ་རྩོད་ཤོར་ཡོད་པ་དང་། ཁོང་ཅག་གིས་བསང་གསོལ་གཏོང་བ་ནི་ཆོས་དང་འབྲེལ་བ་ཡོད་པ་ཞིག་ཡིན་པ་ལས། ཆབ་སྲིད་དང་འབྲེལ་བ་གང་ཡང་མེད་སྐོར་བརྗོད་དེ་མུ་མཐུད་བསྐྱོད་སྐབས། རྒྱའི་ཉེན་རྟོག་པས་རྗེས་འདེད་བཏང་སྟེ་མེ་མདའ་བརྒྱབ་པས་མིང་ལ་རྟ་མགྲིན་ཞུ་བ་ཞིག་གི་རྐང་པའི་གཡས་པའི་བརླ་སྟེང་དུ་མེ་མདའ་ཕོག་ཡོད་འདུག་ལ། མི་གཞན་མང་པོ་ཞིག་གིས་ཉིན་དེར་བསང་གསོལ་ཆེན་པོ་གཏོང་ཐུབ་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཉིན་འགའི་གོང་ནས་བཟུང་ས་གནས་དེ་ཁུལ་གྱི་དགོན་སྡེ་དང་གྲོང་པ་ཁག་ཏུ་རྒྱ་ནག་གཞུང་གི་ལས་བྱེད་དང་ཉེན་རྟོག་པ་དུས་ངེས་མེད་དུ་སྐོར་གཡེང་བྱེད་ཀྱིན་ཡོད་པ་དང་། མཚམས་རེར་སྟེང་དུ་ཉེན་བརྡའི་གློག་དམར་དང་དུང་སྒྲ་རྒྱག་མཁན་གྱི་ཉེན་རྟོག་པ་དང་དམག་མིའི་རླངས་འཁོར་ཡང་འགྲོ་ཚུར་འོང་བྱེད་མཁན་ཇེ་མང་དུ་ཕྱིན་ཡོད་འདུག དེ་བཞིན་ཚེས་ ༡༠ ཉིན་མི་མང་འདུ་འཛོམས་སོགས་བྱེད་དུ་བཅུག་མེད་ཀྱང་མང་ཚོགས་རང་ངོས་ནས་བསང་གཏོང་བ་དང་། གྲྭ་བཙུན་གྱི་དགོན་སྡེ་ཁག་ཏུའང་སྨོན་ལམ་གསུང་འདོན་དོགས་གསུམ་བཅུའི་དུས་དྲན་སྲུང་གཙིའི་རྣམ་པ་བསྟན་ཡོད་སྐོར་བརྗོད་བྱུང་།
ད་དུང་ཁོས། གོ་ཐོས་ལྟར་ན་ཉིན་དེར་བྲག་མགོ་རྫོང་ཐོག་ཏུའང་རྒྱ་ནག་གི་དམག་མི་དང་ཉེན་རྟོག་པ་ཧ་ཅང་མང་པོ་འགྲེམས་འཇོག་བྱས་ཡོད་འདུག བྲག་མགོ་ས་ཁུལ་གྱི་བོད་མི་ཚོས་ ༢༠༠༨ ལོ་ནས་བཟུང་རྒྱ་ནག་གཞུང་ལ་ངོ་རྒོལ་རབས་དང་རིམ་པ་བྱས་ཡོད་པ་དང་། དེ་ལ་རྒྱ་ནག་གཞུང་གི་ཉེན་རྟོག་པ་དང་དམག་མི་ཚོས་དྲག་གནོན་བྱས་ཏེ། ད་སྔ་མིང་དང་ལོ་རྒྱུས་གསལ་བོ་ར་འཕྲོད་པ་སྐྱ་གསེར་ཕོ་མོ་གྲངས་བརྒྱད་དགུ་ཞིག་དམར་གསོད་བཏང་ཡོད་པ་དང་། རྨས་སྐྱོན་ཕོག་པ་དང་བཙོན་འཇུག་བྱས་པ་སོགས་ཧ་ཅང་མང་པོ་བྱུང་ཡོད་ལ། ཁག་ཅིག་ཟླ་བ་ལྔ་དྲུག་དང་ལོ་གཅིག་རེའི་རྗེས་ལ་མ་གཏོགས་ཧ་མ་གོ་བ་དེ་འདྲ་ཡང་མང་པོ་བྱུང་ཡོད་ཅེས་སོགས་བརྗོད་བྱུང་།
ཕྱི་ལོ་ ༢༠༠༨ ནས་ ༢༠༡༢ ལོའི་བར་བྲག་མགོ་ས་ཁུལ་གྱི་བོད་རིགས་མི་མང་གིས་རྒྱ་ནག་གཞུང་ལ་ཞི་བའི་ངོ་རྒོལ་གནང་བར། རྒྱ་གཞུང་ཉེན་རྟོག་པ་དང་དམག་གིས་དྲག་གནོན་བྱས་ཏེ་ཚེ་སྲོག་ཤོར་བ་དང་། རྨས་སྐྱོན་ཕོག་པའི་གནས་ཚུལ་སྐབས་དེར་ཕྱི་ལོགས་སུ་ཐོན་པ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
(༢༠༡༢ ཟླ་ ༡ ནང་གི་གསར་འགྱུར་ཁག་ཅིག)
ཕྱི་ལོ ༢༠༡༢ ཟླ ༡ ཚེས་ ༢༣ ཉིན་སྟེ། རྒྱ་ནག་གི་དཔྱིད་གསར་དུ་ཆེན་གྱི་ཉིན་དང་པོར། མགོན་པོ་རིག་འཛིན་བྲག་མགོ་རྫོང་ཐོག་ཏུ་བྱུང་བའི་བོད་མིའི་ཞི་རྒོལ་དུ་ཞུགས་ཡོད་པ་དང་། ཕྱི་ལོ་ ༢༠༡༢ ཟླ་༣ ཚེས་ ༢༩ ཉིན་བྲག་མགོ་རྫོང་གི་ཉེན་རྟོག་པས་ཁོང་འཇུ་བཟུང་བྱེད་པར་ཡོང་སྐབས། ཁོང་གིས་རྒྱ་དམར་གཞུང་གི་སྡུག་རྩུབ་ཀྱི་དྲག་སྤྱོད་ལ་མ་བཟོད་པར་རང་གིས་རང་ལ་གྲི་བཙུགས་ཏེ་འདས་གྲོངས་སུ་གྱུར་འདུག མགོན་པོ་རིག་འཛིན་ནི། མདོ་ཁམས་ཏྲེ་ཧོར་བྲག་མགོ་རྫོང་གི་གཞི་མདའ་གྲོང་སྡེའི་ཉེ་འདབས་སུ་ཆགས་པའི་ འཕྲང་བར་གྲོང་དུ་ཕ་རིག་པོ་དང་མ་ཡེ་ཤེས་སྒྲོལ་མ་གཉིས་སུ་སྐྱེས་ཤིང། གྲོང་པའི་ནང་གི་རྒན་གཞོན་ཚང་མས་ནམ་རྒྱུན་ཁོང་ཉིད་མི་ཡ་རབས་དང་། ཀུན་ལ་འཆམ་མཐུན་ལ་རྒྱ་ཅན་ཞིག་ཏུ་བརྩི་སྲོལ་ཡོད་པ་དང་ད་ལོར་རང་ལོ་ ༢༥ ལ་སོན་ཡོད་པ་རེད།
ཕྱི་ལོ་ ༢༠༡༢ ཟླ་ ༢ ཚེས་ ༩ ཉིན་རྒྱ་གཞུང་དྲག་ཆས་ཉེན་རྟོག་པ་རྣམས་བྲག་མགོ་ནོར་བ་འབྲོག་སར་ཕྱིན་ཏེ། ཡེ་ཤེས་བསམ་འགྲུབ་ཀྱི་ཁང་ཁྱིམ་གྱི་མཐའ་སྐོར་རྗེས་ནང་མིའི་ཐོག་གང་བྱུང་མེ་མདའ་བརྒྱབ་ནས། དེ་སྔོན་བྲག་མགོའི་ཞི་རྒོལ་ཁྲོད་རྨས་སྐྱོན་ཕོག་མཁན་གྲྭ་ཡེ་ཤེས་རིག་གསལ་དང་། ཁོང་གི་སྤུན་མཆེད་ཡེ་ཤེས་བསམ་འགྲུབ་གཉིས་དམར་གསོད་བྱས་ཡོད། སྐབས་དེར་སྤུན་མཆེད་ཡོན་ཏན་བཟང་པོར་མེ་མདས་བརྒྱབ་སྟེ་རྨས་རྗེས་འཇུ་བཟུང་བཙན་ཁྲིད་ཀྱིས་བཀག་ཉར་དང་། རང་ལོ་ ༧༠ ཙམ་ཡིན་པའི་ཁོ་ཚོའི་ཨ་མ་སངས་ལྷ་དང་བྱིས་པ་ལྔ་ལའང་མེ་མདས་བརྒྱབ་སྟེ་རྨས་ཡོད། ཉིན་ ༡༥ ཙམ་གྱི་རྗེས་སུ་ཡོན་ཏན་བཟང་པོ་མ་ཤི་བར་དར་རྩེ་མདོའི་སྨན་ཁང་ཞིག་ཏུ་ཡོད་རབས་གོ་ཐོས་བྱུང་ཡང་། ཁོང་གི་གཟུགས་པོའི་གནས་སྟངས་ངོ་མ་ཅི་ཡིན་ཤེས་རྟོགས་བྱུང་མེད།
ཕྱི་ལོ་ ༢༠༡༢ ཕྱི་ཟླ་ ༡ པོའི་ཚེས་ ༢༣ ཉིན་བོད་མདོ་ཁམས་བྲག་མགོའི་སེར་སྐྱ་མང་ཚོགས་བརྒྱ་ཕྲག་མང་པོས་བྲག་མགོའི་རྫོང་གི་ཁྲོམ་གཞུང་སུམ་མདོར་རིམ་ཀྱིས་འདུས་ནས། རྒྱ་བ་རིན་པོ་ཆེ་བོད་ལ་གདན་འདྲེན་ཞུ་དགོས། ང་ཚོ་བོད་ལ་རང་དབང་དགོས་ཞེས་པ་སོགས་ཀྱིས་སྐད་འབོད་ཀྱིས་རྒྱ་གཞུང་གི་སྲིད་ ཇུས་ལ་ལ་ཞི་བའི་ངོ་རྒོལ་བྱས་པར་བརྟེན་རྒྱ་གཞུང་གི་དྲག་དམག་དང་ཉེན་རྟོག་པས། མང་ཚོགས་ཁྲོད་དུ་གང་བྱུང་མེ་མདའ་བརྒྱབ་སྟེ་དྲག་གནོན་བྱས་པའི་འོག་རང་ལོ་ ༤༩ ཡིན་པའི་མི་སྐྱ་ཡོན་ཏན་གྱི་མགོར་མེ་མདའ་བརྒྱབ་སྟེ་དེ་གར་དམར་གསོད་བཏང་ཡོད་པ་དང་། ལི་ཁོ་མ་ལོ་བརྒྱ་ཚང་གི་བུ་ཡང་དམར་གསོད་བཏང་ཡོད།