བཞུགས་སྒར་དུ་བོད་གཞུང་དམངས་གཉིས་ནས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༦ པ་སྲུང་གཙི་གནང་བའི་ཐོག་སྲིད་སྐྱོང་མཆོག་གིས། བོད་ནང་གི་གནད་དོན་རྣམས་ལ་གདོང་ལེན་བྱ་རྒྱུར་དཀའ་ཚེགས་ཡོད་ཀྱང་། ང་ཚོས་མུ་མཐུད་མཉམ་རུབ་ཐོག་ཆོད་སེམས་བརྟན་པོས་འབད་བརྩོན་བྱས་ན་དཀའ་ངལ་མཐའ་དག་གདོང་ལེན་བྱེད་ཐུབ་པའི་ཡིད་ཆེས་ཡོད་གསུངས་སོང་།
དེ་རིང་སྔ་དྲོའི་ཆུ་ཚོད་ ༩ པ་ཐོག དྷ་ས་ཐེག་ཆེན་གཙུག་ལག་ཁང་དུ། བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༦ པ་གཞུང་འབྲེལ་སྲུང་གཙི་གནང་ཡོད་པ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་གཞན་གཉིས། སྲིད་སྐྱོང་དང་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཙོ་གཞོན་གྱིས་དབུས་སྤྱི་འཐུས་རྒྱུན་ལས་རྣམ་པ། དམིགས་བསལ་སྐུ་མགྲོན་འཇར་མན་གྲོས་ཚོགས་ཀྱི་ཚོགས་གཙོ་གཞོན་པ་ལྕམ་ཁ་ལོ་ཌི་ཡ་(Claudia Roth)མཆོག་དང་། འཇར་མན་ཌ་ཅེ་ལན་ཌི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མཆོག དེ་བཞིན། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་ཆུང་དང་སྲི་ཞུ་ལས་བྱེད། དྷ་ས་ཉེ་ཁུལ་གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན་དང་། སློབ་གྲྭ་ཁག་གི་སློབ་ཕྲུག་དང་དགོན་སྡེ་ཁག་གི་གྲྭ་བཙུན། དྷ་སའི་སེར་སྐྱ་མི་མང་བཅས་ཁྱོན་མི་གྲངས་ ༢༠༠༠ ཡས་མས་འདུ་འཛོམས་གནང་སོང་།
མཛད་སྒོའི་ཐོག་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོག་སྦྱངས་གནང་བའི་ནང་། འདས་པའི་ལོ་ཤས་ནས་བཟུང་རྒྱ་གཞུང་གི་མགོ་ཁྲིད་གསར་པ་ཚོས་དབང་བསྒྱུར་བྱས་རིང་རྒྱལ་ཁབ་སྐྱོང་བར་མཐའ་མཚམས་སྐྱོང་དགོས་པ་དང་། མཐའ་མཚམས་སྐྱོང་བར་བོད་ཁུལ་བརྟན་ལྷིང་དགོས་སྐོར་སོགས་ལ་བསྙད་དེ་བོད་རང་སྐྱོང་ལྗོངས་ཟེར་བའི་གཙོས་བོད་མི་གནས་ཡུལ་ས་ཕྱོགས་གང་སར་བཅའ་སྡོད་ལས་དོན་རུ་ཁག་ཁྲི་ཚོ་མང་པོ་དང་། དགོན་སྡེ་ཁག་ཏུ་བཅའ་སྡོད་ལས་དོན་རུ་ཁག་སོགས་གཏན་སྡོད་བྱས་ནས་བོད་མི་རྣམས་ལ་ཉིན་མཚན་དུས་དྲུག་ཏུ་སོ་ལྟ་བྱས་ཏེ་རྒྱུན་ལྡན་ཆོས་ལུགས་ཀྱི་བཤད་སྒྲུབ་ཉམས་བཞེས་ལ་སུན་གཙེར་དང་། ཆབ་སྲིད། སྨྲ་བརྗོད་རང་དབང་། ཉིན་རེའི་འཚོ་བའི་སྤྱོད་སྒོ་ཁག འགྲུལ་བསྐྱོད་ཀྱི་རང་དབང་སོགས་ལའང་དམ་བསྒྲགས་ཤུགས་ཆེ་བྱས་དང་བྱེད་བཞིན་པ་དང་། ད་དུང་རུལ་སུངས་ལ་རྟོག་ཞིབ་ཅེས་པ་དང་འབྲེལ་ནས་བོད་མི་མང་པོར་ཏཱ་ལའི་ཁ་བྲལ་རིང་ལུགས་པ་ཟེར་བ་སོགས་ཉེས་འགེལ་སྣ་ཚོགས་བྱས་ཏེ་བོད་ཀྱི་བདེན་དོན་དང་འབྲེལ་བའི་ལས་དོན་ཏིལ་འབྲུ་ཙམ་ཡང་བྱ་དབང་མེད་པར། ༢༠༡༤ ལོའི་ནང་དུ་ཡང་མུ་མཐུད་ཛ་དྲག་ངང་གནས་མུས་སུ་ཡོད་ཐོག་བོད་མིས་རང་ལུས་མེར་བསྲེགས་སོགས་ཀྱི་ངོ་རྒོལ་གནང་དགོས་ཆགས་ཡོད་ལ། གཏེར་ཁ་སྔོག་འདོན་དང་ཁོར་ཡུག་གཏོར་སྐྱོན་མཚམས་ཆད་མེད་ཅིང་། མ་མཐའ་བདུན་ཕྲག་རེ་རེ་ལའང་བོད་མི་འཛིན་བཟུང་དང་བཙོན་འཇུག་མཚམས་ཆད་མེད་པ། བོད་ཀྱི་དངོས་བྱུང་ལོ་རྒྱུས་རྫུན་བཟོ་བྱས་པའི་བརྙན་འཕྲིན་བརྒྱུད་སྟོན། དམིགས་བསལ་དྲག་དམག་གི་མེ་མདའི་འོག་བོད་མི་ཁག་ཅིག་དམར་བསད་བཏང་བ་བཅས་མེས་རྒྱལ་ཁྱིམ་ཚང་ཆེན་མོ་ཞེས་གྲགས་པ་དེའི་ནང་མི་རིགས་དབྱེ་འབྱེད་སོགས་ཀྱི་བྱེད་ཕྱོགས་ཆ་མ་སྙོམས་པ་དེས་བོད་ཁུལ་བརྟན་ལྷིང་ཡོང་ཐབས་མེད་པ་ལྟ་བུ་ཆགས་ཡོད། ༢༠༡༤ ལོའི་རྒྱལ་སྤྱིའི་འགྲོ་བ་མི་ཡི་རྟོག་ཞིབ་ཚོགས་པ་ཁག་མང་པོའི་སྙན་ཐོའི་ནང་བོད་ནང་གི་ཛ་དྲག་གནས་སྟངས་མུ་མཐུད་ཡོད་གནས་གསལ་ཡོད་པས་རྒྱ་ནག་གི་དཔོན་རིགས་ཚོས་དངོས་ཐོག་བདེན་འཚོལ་དང་། ཁ་བཤད་དོན་གནས་ཀྱི་སྲིད་བྱུས་ལག་བསྟར་བྱ་རྒྱུའི་དུས་ལ་བབ་པ་ནན་སྐུལ་བྱེད་ཀྱི་ཡོད། ཅེས་འཁོད་འདུག
གསུང་བཤད་ནང་མུ་མཐུད་དུ་འཁོད་དོན། རང་རེ་བཙན་བྱོལ་བོད་མི་རྣམས་ཀྱིས་བོད་དོན་དང་འབྲེལ་བའི་ལས་འགུལ་རིགས་མཚམས་མ་ཆད་པ་སྤེལ་དགོས་པ་གལ་ཆེ་དོན་ཆེན་ལ་སོང་། འདས་པའི་ཕྱི་ལོ་ ༢༠༡༤ ནང་བོད་མི་མང་སྤྱི་འཐུས་ཚོགས་གཙོ་གཉིས་ཀྱིས་གཙོས་པའི་སྤྱི་འཐུས་ཁག་ཆ་བགོས་ཀྱིས་ཤར་ནུབ་རྒྱལ་ཁབ་མང་པོར་ཆེད་བསྐྱོད་ཀྱིས་རྒྱལ་ཁབ་སོ་སོའི་གྲོས་ཚོགས་འཐུས་མི་སོགས་གནད་ཡོད་མི་སྣ་ཁག་ལ་ཐུག་འཕྲད་ཀྱིས་བོད་ནང་གི་རང་ལུས་མེར་བསྲེགས་གཙོས་ད་ལྟའི་ཛ་དྲག་གནས་སྟངས་སྐོར་ངོ་སྤྲོད། མ་འོངས་བོད་དོན་ལ་རྒྱབ་སྐྱོར་ཡོང་ཐབས་སོགས་ཀྱི་ཞུ་གཏུག་རིམ་བྱས་ལ་དོན་འབྲས་གང་ལེགས་སོན་ཐུབ་པ་བྱུང་ཡོད་པ་དང་། ལྷག་དོན་རྒྱ་གར་གྱི་སྐབས་ ༡༦ པའི་གྲོས་ཚོགས་འོག་མའི་འཐུས་མིའི་གསར་ཕེབས་དང་འབྲེལ་གྲོས་ཚོགས་གོང་འོག་གི་འཐུས་མི་ ༡༠༠ ལྷག་ལ་ཐུག་འཕྲད་ཀྱིས་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་ཞུས་ཏེ་ལས་དོན་མགོ་འཛུགས་ཞུས་ཟིན་ཡོད། ད་ལྟའི་བོད་ནང་གི་ཛ་དྲག་གནས་སྟངས་ཞི་འཇམ་ཡོང་ཐབས་དང་། བོད་དོན་གྱི་དཀའ་རྙོག་སེལ་ཐབས་ཆེད་ང་ཚོའི་ངོས་ནས་བོད་རྒྱ་གཉིས་སྨན་དབུ་མའི་ལམ་གྱི་ཐོག་ནས་གྲོས་མོལ་ཡོང་ཐབས་བྱ་རྒྱུའི་ཆོད་སེམས་ལ་འགྱུར་བ་གང་ཡང་མེད་པར་བརྟེན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མགོ་ཁྲིད་ཚོས་ཀྱང་གཡས་ཁག་གཡོན་དཀྲི་མེད་པར་དུས་ཚོད་ལ་དམ་འཛིན་གྱིས་བོད་རྒྱ་འབྲེལ་མོལ་མྱུར་དུ་མཐུད་དགོས་པའི་ནན་སྐུལ་བྱེད་ཀྱི་ཡོད། ཅེས་གསུངས་སོང་།
དེ་རྗེས་བོད་དོན་རྒྱབ་སྐྱོར་བ་ལྕམ་ཁ་ལོ་ཌི་ཡ་མཆོག་གིས་དུས་དྲན་དང་འབྲེལ་བའི་གསུང་བཤད་གནང་དོན། རྒྱ་ནག་གི་མགོ་ཁྲིད་ཚོས་བོད་མིའི་རང་དབང་གི་གཏམ་བཤད་ཐོས་རྒྱུ་མ་བྱུང་ན་བསམ་གྱི་ཡོད་པ་མ་ཟད། རྒྱལ་སྤྱིའི་ཐོག་བོད་མིའི་རང་དབང་ཁྱབ་སྤེལ་གཏོང་མཁན་གྱི་སྐུ་ཚབ་དག་གིས་རྒྱ་ནག་དང་བོད་ནང་གི་དངོས་ཡོད་གནས་ཚུལ་ཕྱིར་བསྒྲགས་བྱེད་ཀྱི་རེད་བསམ་སྟེ་ནག་ཉེས་འཛུགས་ཀྱི་ཡོད། ང་ཚོས་རྒྱ་ནག་ནི་རྒྱལ་སྤྱིའི་ཐོག་སྟོབས་ཤུགས་ཆེ་ཤོས་གྲས་ཤིག་ཡིན་སྟབས་མཐོང་ཆུང་བྱ་མི་སྲིད་ཀྱང་། ད་ལྟ་རྒྱལ་སྤྱིའི་དཔལ་འབྱོར་འཕེལ་འགྲོས་ནི་རྟེན་འབྱུང་ཞིག་ཆགས་ཡོད་སྟབས། རྒྱ་ནག་གཞུང་གིས་རྒྱལ་སྤྱིའི་སྤྱི་ཚོགས་ལ་བསྟུན་དགོས་པ་ཆགས་ཡོད། རྒྱ་ནག་གཞུང་གིས་རྒྱལ་སྤྱིའི་ཐོག་སྟོབས་ཆེ་ཤོས་ཀྱི་རྒྱལ་ཁབ་དེ་ཆགས་རྒྱུར་བརྩོན་ལེན་བྱེད་བཞིན་ཡོད་པ་མ་ཟད། རྒྱལ་སྤྱིའི་ཐོག་ཨ་རི་ཕུད་པའི་དཔལ་འབྱོར་སྟོབས་ཆེ་ཤོས་དང་། དམག་དོན་འགྲོ་གྲོན་མང་ཤོས་གཏོང་མཁན་གྱི་རྒྱལ་ཁབ་ཨང་གཉིས་པ་ཆགས་ཡོད་ཀྱང་། ད་ལྟ་རྒྱ་ནག་གཞུང་གིས་རྒྱལ་སྤྱིའི་མགོ་ཁྲིད་ཀྱི་ཆ་ཤས་ལེན་དགོས་ཚེ་ཁོ་ཚོས་རིག་གཞུང་གི་སྣེ་འཁྲིད་ཐུབ་པ་བྱེད་དགོས། ངས་པེ་ཅིན་གྱི་མགོ་ཁྲིད་ཚོར་སྐད་ཆ་འདྲི་རྒྱུ་ཞིག་ཡོད་པ་ནི། རྒྱ་ནག་གཞུང་གིས་སོ་སོའི་མི་རིགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ། དྲག་གནོན་དང་བྲན་གཡོག་དུ་བཀོལ་བ་སོགས་བྱས་ནས་རྒྱལ་ཡོངས་ནང་བརྟན་ལྷིང་དང་ཕན་ཚུན་བསམ་ཤེས་བྱེད་མ་ཐུབ་ཚེ། རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་དེ་ཕྱོགས་གང་ཐད་ནས་རྒྱལ་སྤྱིའི་སྣེ་ཁྲིད་མཁན་ཞིག་ཆགས་རྒྱུར་དགའ་མོས་བྱེད་སྲིད་དམ་ཞེས་བརྡ་ལན་སྤྲོད་རྒྱུ་མ་ཟད། ངས་རྒྱ་ནག་གཞུང་གི་ཆབ་སྲིད་པ་ཚོས་བོད་དོན་བདེན་མཐའ་སེལ་ཆེད་བོད་མི་དང་གྲོས་མཐུན་འཇོག་དགོས་པ་མ་ཟད། བོད་ནང་གི་བཙོན་པ་ཀློད་གྲོལ་གཏོང་དགོས་ཞུ་རྒྱུ་ཡིན། ཞེས་སོགས་གསུངས་སོང་།
མཇུག་ཏུ་སྲིད་སྐྱོང་བློ་བཟང་སེང་གེ་མཆོག་གིས་ཡིག་ཐོག་གི་གསུང་བཤད་སྒྲོག་སྦྱངས་གནང་སྐབས། དེ་རིང་གི་ཉིན་མོ་འདི་ནི་བོད་རིགས་སྤྱི་བོ་གནམ་བསྟན་ཡོངས་ནས་ཇི་སྲིད་བོད་དོན་བདེན་མཐའ་མ་གསལ་གྱི་བར་བློ་སྟོབས་ཆེན་པོའི་སྒོ་ནས་བོད་མིའི་བདེན་དོན་འཐབ་རྩོད་མུ་མཐུད་བྱ་རྒྱུའི་ཆོད་སེམས་བསྐྱར་ནན་དང་། ༸གོང་ས་མཆོག་གིས་འདོན་གནང་མཛད་པའི་འཚེ་མེད་ཞི་བའི་ལྟ་གྲུབ་ལ་ཡིད་ཆེས་བརྟན་པོའི་སྒོ་ནས་འཇུག་རྒྱུའི་དམ་བཅའ་དྲན་གསོ་ཞུ་བའི་ཉིན་མོ་ཞིག་ཀྱང་རེད། སྔ་ལོ་རྒྱ་ནག་དབུས་གཞུང་ནས་གཞིས་ཀ་རྩེ་དང་ཆབ་མདོ་གཉིས་གྲོང་ཁྱེར་གྱི་ངོ་བོར་བསྒྱུར་རྒྱུའི་གསལ་བསྒྲགས་བྱས་པ་ནི་སེམས་འཚབ་སྐྱེ་གཞིར་སྣང་། དཔལ་འབྱོར་གོང་འཕེལ་དང་དེང་རབས་ཀྱི་ཡར་རྒྱས་ལ་དགའ་བསུ་ཞུ་འོས་པ་ཞིག་ཡིན་ནའང་། ད་བར་གྱི་ཉམས་མྱོང་ལ་གཞིགས་ན་དེ་འདྲའི་ཡར་རྒྱས་ཀྱིས་བོད་མིའི་ཐོག་ཁེ་ལས་གྱོང་ཆེ་བ་བྱུང་ཡོད། གྲོང་ཁྱེར་གྱི་རྣམ་པ་གསར་པ་འཛུགས་སྐྲུན་བྱས་པའི་འབྲས་བུར། བོད་མིར་དཔལ་འབྱོར་གྱི་གོ་སྐབས་འདྲ་མཉམ་མ་ཐོབ་པ་མ་ཟད། ཡུལ་གྱི་བདག་པོ་ངོ་མ་རྣམས་རིམ་བཞིན་སྤྱི་ཚོགས་ཀྱི་གྲལ་ནས་མཐའ་ལ་འཕུད་འགྲོ་ཡི་ཡོད། དེའི་དཔེ་མཚོན་གསལ་ཤོས་ནི་ལྷ་ས་གྲོང་ཁྱེར་ཡིན།
ལྷ་སའི་ཉེ་ཁོར་དུ་གྲོང་ལག་གསར་པ་འཛུགས་སྐྲུན་ཤུགས་ཆེན་བྱས་ཏེ་རྒྱ་ནག་གི་ཞིང་ཆེན་མང་པོ་ནས་མི་འབོར་ཕོན་ཆེན་གནས་སྤོས་བྱས་རྐྱེན། བོད་མི་ལས་ཕྱི་ནས་སླེབས་པའི་ཕྱོགས་མིའི་གྲངས་འབོར་ལྡབ་ཁ་ཤས་ཀྱིས་མང་བ་ཆགས་ཏེ་ལོ་རྒྱུས་ཐོག་སྙན་གྲགས་ཆེ་བའི་བོད་མིའི་ཆོས་རིག་ཀྱི་ལྟེ་གནས་ལྷ་ས་གྲོང་ཁྱེར་དེ་ཡང་རྒྱ་ནག་གི་གྲོང་ཁྱེར་གཞན་དང་འདྲ་བར་གྱུར་ཟིན་པ་རེད། དེར་བརྟེན་གཞིས་ཀ་རྩེ་དང་ཆབ་མདོ་གཉིས་ཀྱང་ལྷ་ས་དང་འདྲ་བར་བོད་མིའི་ཆོས་རིག་གོམས་སྲོལ་སྲུང་སྐྱོབ་བྱ་ཡུལ་མེད་པར་འགྱུར་ཉེན་ཆེ་བ་དང་། དེ་བཞིན་བོད་ཀྱི་གནའ་བོའི་ཞིང་འབྲོག་གི་འཚོ་བར་ཡང་དོ་ཕོག་ཤུགས་ཆེ་ཐེབས་བཞིན་པར་ཡང་སེམས་འཚབ་ཡོད། གོང་གསལ་བོད་ནང་གི་གནད་དོན་རྣམས་གདོང་ལེན་བྱ་རྒྱུར་དཀའ་ཚེགས་ཡོད་ཀྱང་། ང་ཚོས་མུ་མཐུད་མཉམ་རུབ་ཐོག་ཆོད་སེམས་བརྟན་པོའི་སྒོ་ནས་འབད་བརྩོན་བྱས་ན་དཀའ་ངལ་མཐའ་དག་གདོང་ལེན་བྱེད་ཐུབ་པའི་ཡིད་ཆེས་ཡོད། ཅེས་གསུངས་སོང་།
ཡང་ཁོང་གིས། ད་ལྟའི་ཆར་བོད་ནང་ཆབ་སྲིད་ཀྱི་གོ་རྟོགས་དང་མི་རིགས་ཀྱི་ལར་ཞེན་ཆེ་རུ་འགྲོ་བཞིན་པ་ནི་བློ་སྤོབས་སྐྱེ་གཞིར་སྣང་། དེ་ཡང་བོད་ནང་གཞི་རིམ་མང་ཚོགས་ཀྱི་བསམ་པའི་འཁྱེར་ཕྱོགས་དང་། སྙན་ངག་མཁན་ཚོའི་སྙན་རྩོམ་གྱི་ནང་དོན་དང་གླུ་གཞས་ཀྱི་ཚིག་དོན། རི་མོ་བས་བྲིས་པའི་རི་མོའི་མཚོན་དོན་སོགས་ཕྱོགས་གང་ནས་བལྟས་ཀྱང་བོད་མིའི་གཅིག་སྒྲིལ་གྱི་ནུས་སྟོབས་ཆེ་རུ་འགྲོ་བཞིན་ཡོད། རི་ཁར་དབྱར་རྩ་དགུན་འབུ་འཐུ་མཁན་གྱི་མི་མང་དཀྱུས་མ་ནས་སྣུམ་འཁོར་གཏོང་མཁན་དང་དེ་བཞིན་ཞིང་པ་དང་འབྲོག་པ། མཁས་པ་དང་སྒྱུ་རྩལ་བ། དགེ་འདུན་པ་དང་བཙུན་མ་སོགས་ཚང་མས་བོད་མི་རིགས་ཀྱི་ཆེ་མཐོང་དང་། བོད་མིའི་ཐུན་མོང་མ་ཡིན་པའི་ངོ་བོ་སྲུང་སྐྱོབ་དར་སྤེལ་ཡོང་ཐབས་ལ་སེམས་ཁུར་བྱེད་བཞིན་ཡོད། བཟང་ཕྱོགས་ཀྱི་འགྱུར་བ་འདི་དག་གིས་རིམ་བཞིན་བོད་མིའི་མངོན་འདོད་སྒྲུབ་པར་ཕན་ཐོགས་ངེས་ཅན་ཡོང་རྒྱུ་ཡིན། ཞེས་སོགས་གསུངས་སོང་།
སྲིད་སྐྱོང་མཆོག་གི་གསུངས་བཤད་ནང་མུ་མཐུད་དུ། ལོ་འདིར་རྒྱ་ནག་གཞུང་ནས་བོད་རང་སྐྱོང་ལྗོངས་ཟེར་བ་དབུ་བརྙེས་ནས་ལོ་ ༥༠ འཁོར་བའི་བྱེད་སྒོ་སྤེལ་འཆར་ཡོད་པ་དང་། བོད་ནང་རང་ཁྱིམ་རང་བདག་ཡོད་ཚུལ་གྱི་དྲིལ་བསྒྲགས་ཤུགས་ཆེ་བྱེད་བཞིན་ཡོད་རུང་། དྲིལ་བསྒྲགས་བྱས་པ་ལྟར་གྱི་རང་ཁྱིམ་རང་བདག་ཡོང་བར་བོད་ཀྱི་འཛིན་སྐྱོང་འགན་དབང་བོད་མིར་སྤྲོད་དགོས་པ་ཡིན། དེ་མཚུངས་སྲིད་འཛིན་ཞི་ཅིན་ཕིན་གྱིས་གྲངས་ཉུང་མི་རིགས་ཀྱི་ས་ཁུལ་དུ་ཡོད་པའི་རྒྱ་རིགས་ལས་བྱེད་པ་ཚོས་གྲངས་ཉུང་མི་རིགས་ཀྱི་སྐད་ཡིག་སློབ་སྦྱོང་བྱེད་དགོས་ཚུལ་བཤད་འདུག་ཀྱང་། ཉེ་སྔོན་མདོ་སྨད་ཁུལ་དུ་ས་གནས་དཔོན་རིགས་ཀྱིས་དོན་ཚན་ཉི་ཤུ་ཅན་གྱི་བརྡ་ཁྱབ་ཅིག་བཏང་བའི་ནང་བོད་མིའི་ཆོས་རིག་དང་སྐད་ཡིག་གཉིས་ཀའི་ཐོག་སྔར་ལྷག་དམ་བསྒྲགས་བྱ་རྒྱུ་ཡིན་པ་གསལ་པོར་འཁོད་འདུག་པར་ཚང་མས་ཡིད་གཟབ་བྱ་དགོས། དེ་མཚུངས་ཕ་མེས་ནས་བརྒྱུད་པའི་བོད་མིའི་ཆོས་རིག་གོམས་གཤིས་དང་ཡ་རབས་བཟང་སྤྱོད་རྣམས་མི་ཐོག་ནས་མི་ཐོག་བར་རྒྱུན་འཛིན་ཐུབ་པ་དགོས་གཤིས། དེང་གི་ཆར་བོད་ནང་སྤྱི་སྒེར་གཉིས་ཀར་གྱོང་གུན་ཆེ་བའི་བག་མེད་པའི་ཀུན་སྤྱོད་ནང་ཁུལ་ཤ་ལན་སློག་རེས་དང་། གང་བྱུང་ཤོ་སྦག་རྒྱན་རྩེད་དང་ཆང་རག་རིགས་ལ་སྤྱོད་མཁན་ཉུང་དུ་འགྲོ་ཡི་ཡོད་འདུག་པར་བསྔགས་བརྗོད་ཞུ་རྒྱུ་དང་། མ་འོངས་པར་ཡང་དེ་རིགས་མི་ཡོང་བ་བྱ་དགོས་པའི་འབོད་སྐུལ་བྱ་རྒྱུ་ཡིན། ལྷག་པར་ཤེས་ཡོན་ཐོག་ནུས་ཤུགས་བསྒྲིལ་རྒྱུ་ནི་གལ་ཆེ་ཤོས་ཡིན་སྟབས། བོད་མི་ཚང་མས་གལ་ཆེ་དོན་ཆེར་བརྩིས་ཏེ་མུ་མཐུད་ཕྱར་གྲུ་མཉམ་འདེགས་གནང་རོགས་ཞུ་རྒྱུ་ཡིན། ཞེས་གསུངས་སོང་།
གསུང་བཤད་ནང་མུ་མཐུད་དུ་བཀོད་དོན། བཀའ་ཤག་གི་ངོས་ནས་བོད་དོན་དཀའ་རྙོག་སེལ་ཐབས་སུ་ཁ་བྲལ་མ་ཡིན་པར་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་གཉིས་སྨན་དབུ་མའི་ལམ་གྱི་སྲིད་བྱུས་མུ་མཐུད་ལག་བསྟར་བྱས་དང་བྱེད་མུས་ཡིན། འདི་ལོ་ཕྱི་ཟླ་ ༡ པོའི་ནང་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་བསྐོང་ཚོགས་ཞུས་ཏེ་བོད་ནང་གི་གནས་སྟངས་དང་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་བཅས་ལ་གཞིགས་ཏེ་འབྲེལ་མོལ་སྐོར་བསམ་ཞིབ་གྲོས་བསྡུར་ཞིབ་ལྷུག་བྱས་ཡོད་ཅིང་། བོད་མིའི་མགོ་ཁྲིད་ཀྱིས་༸གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་མགོ་ཁྲིད་བར་འབྲེལ་མོལ་གྱི་ལམ་ནས་བོད་དོན་དཀའ་རྙོག་སེལ་ཐབས་བྱ་རྒྱུ་དེ་ཉིད་ཐབས་ལམ་བཟང་ཤོས་ཡིན་པའི་ཡིད་ཆེས་བརྟན་པོ་བྱེད་བཞིན་ཡོད།
འདིའི་ཐད་ཉེ་སྔོན་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པས་༸གོང་ས་མཆོག་གི་སྐུ་ཚབ་དང་རྒྱ་ནག་མགོ་ཁྲིད་བར་འབྲེལ་མོལ་བྱ་རྒྱུར་རྒྱབ་སྐྱོར་གྱི་གསལ་བསྒྲགས་སྤེལ་འདུག་པར་རྗེས་སུ་ཡི་རངས་ཞུ་རྒྱུ་ཡིན། དེ་ཡང་གསལ་བསྒྲགས་ནང་འབྲེལ་མོལ་གྱི་འབྲས་བུ་བཟང་པོ་འདིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་ཡོད་པའི་མི་རིགས་ཚང་མར་ཁེ་ཕན་ཡོང་རྒྱུ་ཡིན་པར་ང་ཚོས་ཡིད་ཆེས་བྱེད་ཀྱི་ཡོད་པས་རྒྱ་ནག་གཞུང་གིས་༸གོང་ས་མཆོག་དང་འབྲེལ་མོལ་བྱ་རྒྱུའི་གོ་སྐབས་དམ་འཛིན་བྱ་དགོས་ཞེས་འཁོད་ཡོད་པ་དང་། དེ་མཚུངས་སྲིད་འཛིན་ཨོ་བྷ་མ་མཆོག་ནས་ཀྱང་། ཨ་རིའི་རྒྱལ་ཡོངས་སྔ་དྲོའི་སྨོན་ལམ་གསོལ་འདེབས་མཛད་སྒོའི་སྐབས་༸གོང་ས་མཆོག་ནི་བྱམས་བརྩེ་ཉམས་ལེན་གནང་མཁན་གྱི་དབུ་ཁྲིད་རླབས་ཆེན་ཞིག་ཡིན་པ་དང་། ཁོང་ལ་བརྟེན་ནས་ང་ཚོར་འགྲོ་བ་མིའི་ཆེ་མཐོང་དང་རང་དབང་སྐོར་གླེང་སློང་བྱེད་དགོས་པའི་སེམས་སྐུལ་ཐེབས་ཀྱི་འདུག ཅེས་གསུངས་པར་ཡང་དགའ་བསུ་ཞུ་རྒྱུ་ཡིན། ཞེས་སོགས་བཀོད་འདུག
ཁོང་གིས་མུ་མཐུད་དུ། རྒྱ་གར་ནང་ལ་ཆ་མཚོན་ནའང་བོད་དོན་གལ་འགངས་ཆེན་པོ་ཡིན་པའི་ངོས་འཛིན་ཇེ་ཆེར་འགྲོ་བཞིན་པ་དང་། བོད་དོན་སྐོར་གླེང་སློང་བྱ་རྒྱུའི་སྡིངས་ཆ་དང་གོ་སྐབས་མང་དུ་འགྲོ་མུས་ཡིན་པ་མ་ཟད། བོད་མིའི་སྒྲིག་འཛུགས་ནི་ཡང་དག་པའི་མང་གཙོའི་ལམ་ལུགས་ལག་བསྟར་བྱེད་མཁན་གྱི་སྒྲིག་འཛུགས་ནུས་པ་ལྡན་པ་ཞིག་ཡིན་པའི་ངོས་འཛིན་དང་གདེང་འཇོག་འཐོབ་བཞིན་ཡོད། མང་ཚོགས་ཀྱི་མཉམ་ཞུགས་ལ་བརྟེན་ནས་བཙན་བྱོལ་བོད་མིའི་དམངས་གཙོ་ཚགས་ཚུད་པོ་བྱུང་བ་ཡིན་སྟབས་མ་འོངས་པར་ཡང་དམངས་གཙོའི་ལས་རིམ་ནང་མང་ཚོགས་ནས་མུ་མཐུད་ཆ་ཤས་མང་ཙམ་བླང་རྒྱུའི་སྐུལ་མ་བྱ་རྒྱུ་ཡིན། འདི་ལོ་འཛམ་གླིང་གང་སར་བོད་མི་དང་བོད་དོན་རྒྱབ་སྐྱོར་བ་རྣམས་ནས་༸གོང་ས་མཆོག་ཕྱི་ལུགས་དགུང་གྲངས་བརྒྱད་ཅུར་ཕེབས་པའི་གྱ་སྟོན་མཛད་སྒོ་རྒྱས་པ་སྲུང་བརྩི་ཞུ་བཞིན་ཡོད། དེ་ཉིན་ང་ཚོས་༸གོང་ས་མཆོག་སྐུ་ཚེ་ཞབས་པད་བརྟན་པ་དང་ཐུགས་བཞེད་མ་ལུས་ལྷུན་གྱིས་འགྲུབ་པ་ཡོང་ཆེད་སྨོན་ལམ་གསོལ་འདེབས་ཞུ་རྒྱུ་དང་། བོད་མི་རིགས་ཀྱི་ཁྱད་ནོར་ཕ་མེས་ནས་བརྒྱུད་པའི་ཡ་རབས་བཟང་པོའི་གཤིས་སྤྱོད་དང་གོམས་སྲོལ་རྣམས་རྒྱུན་འཛིན་ཐུབ་པ་བྱ་རྒྱུའི་ཆོད་སེམས་སྐྱེད་དགོས། ཞེས་གསུངས་སོང་།
གཞུང་འབྲེལ་མཛད་སྒོ་གྲུབ་རྗེས། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གི་སྣེ་ཁྲིད་འོག སེར་སྐྱ་མི་མང་གིས་བོད་དོན་ཞི་བའི་འཐབ་རྩོད་ཀྱི་འབོད་ཚིག་སྒྲོག་བཞིན་དྷ་ཤོད་ཀ་ཅ་རི་བར་གོམ་བགྲོད་གནང་ཡོད་པ་རེད།
གསར་འགོད་པ་དོན་འགྲུབ་དང་པདྨ་མཚོ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སེམས་འཚབ་ཡོད་ན། བོད་མི་ཚོ་བེད་སྤྱད་ནས་རང་དབང་གིས་ཆེད་དུ་འབད་དགོས། དོན་ཆེན་སྒྲུབ་པར་ཕྱག་ལས་གནང་གལ་ཆེ་ལ། ལྷག་པར་བོད་རིགས་ཡོད་དོ་ཅོག་བེད་སྤྱད་ནས་འཐབ་རྩོད་ནང་འཛུལ་དགོས། མི་གཅིག་དང་གཉིས་ཀྱིས་འཐབ་རྩོད་ཀྱི་བདེན་མཐལ་སེལ་མི་ཐུབ། དེས་ན་གོང་མ་ཚོས་བོད་མི་རྩམ་གཟན་རྣམས་གཉིད་ལས་སད་ནས་མདུན་བསྐྱོད་བྱེད་དགོས།
་་་་་་་་་་ རྒྱ་ནག་གཞུང་གིས་སོ་སོའི་མི་རིགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ། དྲག་གནོན་དང་བྲན་གཡོག་དུ་བཀོལ་བ་སོགས་བྱས་ནས་རྒྱལ་ཡོངས་ནང་བརྟན་ལྷིང་དང་ཕན་ཚུན་བསམ་ཤེས་བྱེད་མ་ཐུབ་ཚེ། རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་དེ་ཕྱོགས་གང་ཐད་ནས་རྒྱལ་སྤྱིའི་སྣེ་ཁྲིད་མཁན་ཞིག་ཆགས་རྒྱུར་དགའ་མོས་བྱེད་སྲིད་དམ་ཞེས་བརྡ་ལན་སྤྲོད་རྒྱུ་མ་ཟད།
ངས་རྒྱ་ནག་གཞུང་གི་ཆབ་སྲིད་པ་ཚོས་བོད་དོན་བདེན་མཐའ་སེལ་ཆེད་བོད་མི་དང་གྲོས་མཐུན་འཇོག་དགོས་པ་མ་ཟད། བོད་ནང་གི་བཙོན་པ་ཀློད་གྲོལ་གཏོང་དགོས་ཞུ་རྒྱུ་ཡིན། ་་་་་་་་་་་་་་