དེ་རིང་བོད་མི་མང་སྤྱི་འཐུས་གྲོས་ཚོགས་མགོ་འཛུགས་གནང་ཡོད་ཅིང་། ད་རེབ་ཚོགས་འདུའི་སྟེང་བཙན་བྱོལ་བོད་མིའི་སྔོན་རྩིས་གཏན་འབེབས་དང་། སྤྱི་འཐུས་རྒྱུན་ལས་ཀྱིས་ཆེད་འཛུགས་གནང་བའི་ཚོགས་ཆུང་ཁག་གི་སྙན་ཐོར་བགྲོ་གླེང་། ཇོ་ནང་གི་གནད་དོན་དང་ཨོ་སི་ཊོ་ལེ་ཡ་སོགས་སུ་སྤྱི་འཐུས་དགོས་མིན་ཐག་གཅོད་གནང་རྒྱུ་ཡིན་འདུག
དེ་རིང་སྔ་དྲོའི་ཆུ་ཚོད་ ༩།༣༠ ཐོག་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༩ པ་དེ་གངས་སྐྱིད་སྤྱི་འཐུས་ཚོགས་ཁང་དུ་དབུ་འཛུགས་གནང་ཡོད་པ་དང་། ཚོགས་ཐོག་ཏུ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་དབུས་སྤྱི་འཐུས་རྣམ་པ་དང་། སྲིད་སྐྱོང་བློ་བཟང་སེང་གེ་མཆོག་གིས་དབུས་བཀའ་བློན་རྣམ་པ། དེ་བཞིན་ཟུར་ཉན་དུ་ལྷན་ཁང་ཁག་གི་དྲུང་ཆེ་རྣམ་པ་དང་གྲོས་ཚོགས་ལས་རིམ་ལ་དོ་སྣང་ཡོད་རིགས་བཅས་འཛོམས་སོང་།
ཚོགས་འདུ་དབུ་འཛུགས་ཀྱི་ཚོགས་གཙོའི་གཏམ་བཤད་ལྟར་ན། ཐེངས་འདིའི་གྲོས་ཚོགས་ཐོག་ཕྱི་ལོ་ ༢༠༡༥ ནས་ ༢༠༡༦ བར་གྱི་སྔོན་རྩིས་གཏན་འབེབས་དང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་དང་མང་ཚོགས་རྩིས་ཕྲ་ཚོགས་ཆུང་གི་སྙན་ཐོ། དེ་བཞིན། ཆེས་མཐོའི་སྨན་པའི་ལྷན་ཚོགས་ཀྱི་སྒྲིག་གཞི་དང་འབྲེལ་བའི་ཚོགས་ཆུང་གི་སྙན་ཐོ་དང་། སྦེལ་ཀོབ་འཚོ་བྱེད་སྨན་ཁང་གི་གནད་དོན་སྐོར་གྱི་རྟོག་ཞིབ་སྙན་ཐོ་བཅས་ལ་བགྲོ་གླེང་བསྐྱར་ཞིབ་དང་། བཅའ་ཁྲིམས་བསྐྱར་བཅོས་ཁག་ཅིག་ཡོང་འཆར་ཡོད་པའི་ནང་ཇོ་ནང་ཆོས་བརྒྱུད་ཀྱི་འཐུས་མིའི་སྐོར་དང་། ཨོ་སི་ཊོ་ལི་ཡ་དང་ནེའུ་ཛི་ལན་ཌིའི་ནང་སྤྱི་འཐུས་དགོས་མིན་དགོས་གྲོས་བསྡུར་ཐག་གཅོད་བྱེད་དགོས་ཀྱི་ཡོད་འདུག
བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ཚོགས་འདུ་དབུ་གསུང་བཤད་གནང་དོན། ཉེ་ལམ་གྲོལ་མ་ཐག་པའི་རྒྱ་ནག་རྒྱལ་ཡོངས་འཐུས་མིའི་ཚོགས་ཆེན་ཐོག རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་མཆོག་གིས། བོད་ཁུལ་གྱི་དགོན་པ་ཁག་གི་ནང་དམ་དྲག་བྱེད་ཤུགས་ཆེ་དྲགས་པ་དང་གྲྭ་བའི་གྲངས་འབོར་མང་དུ་གཏོང་དགོས་པ་སོགས་ཀྱི་སྐོར་ནས་དོན་ཚན་ཁག་ཅིག་ཡར་ཞུ་གནང་ཡོད་པ་དང་། མ་འོངས་པར་གྲུབ་འབྲས་འཐོན་མིན་ལ་མ་ལྟོས་པར་ཡར་ཞུ་བྱེད་ས་ཞིག་ཡོད་པ་དེ་ཡག་པོ་རེད་ལ། གྲོས་གཞི་དེ་བརྒྱུད་ནས་བོད་ནང་འགྱུར་བ་ག་ཚོད་ཅིག་གཏོང་ཐུབ་མིན་དེ་མ་འོངས་པར་བལྟ་དགོས་པ་ཞིག་ཆགས་ཡོད་པ་རེད། དེ་བཞིན་ཀྲུག་ཝེ་ཆོན་གྱིས་ཀྱང་བོད་རྒྱ་འབྲེལ་མོལ་ཐོག་སྐད་ཆ་ཁ་ཤས་བཤད་ཡོད་པ་རེད། ༧རྒྱལ་བ་རིན་པོ་ཆེ་མཆོག་ལ་ཟུར་ཟའི་སྐད་ཆའང་བཤད་ཡོད་པ་རེད། དེ་དག་ཚང་མས་མཁྱེན་གསལ་རེད། ཅེས་སོགས་གསུངས་སོང་།
ཚོགས་གཙོ་མཆོག་གིས་མུ་མཐུད་དུ་གསུངས་དོན། ད་རེབ་ཀྱི་གྲོས་ཚོགས་འདུ་གཙོ་བོ་སྔོན་རྩིས་ཆགས་ཡོད་པ་རེད། དུས་ཚོད་མང་ཆེ་བ་སྔོན་རྩིས་ཐོག་གཏོང་དགོས་པ་ཆགས་ཀྱི་ཡོད་པ་རེད། ཡིན་ནའང་སྟབས་མ་ལེགས་པར་ ༢༠༠༨ ནས་བཟུང་གྲོས་ཚོགས་ག་དུས་ཚོགས་ཀྱང་བོད་ནང་གི་གནས་སྟངས་ཐོག གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་ཅིག་འགྲོ་བསྡད་ཡོད་པ་རེད། དེའི་སྟེང་ལ་བགྲོ་གླེང་གནང་བ་ཡིན་ན་གནས་ཚུལ་མང་པོ་ཞིག་མཁྱེན་པར་ཕན་ཐོགས་ཡོང་གི་རེད།
ད་རེབ་སྔོན་རྩིས་ཀྱི་ཚོགས་འདུ་ཡིན་སྟབས། དཔལ་འབྱོར་བཀའ་བློན་མཆོག་གིས་སྔོན་རྩིས་སྐོར་ལ་གཏམ་བཤད་གནང་གི་རེད། དེ་དང་མཉམ་དུ་སྔོན་དཔག་འཆར་རྩིས་ཚོགས་ཆུང་གི་སྙན་ཐོའང་དེ་རིང་འགྲེམ་གྱི་ཡོད་པ་རེད། དེའི་ཐོག་ལ་སྤྱི་འཐུས་རྣམ་པ་ཚོས་ཐུགས་སྣང་གནང་རོགས། བཀའ་ཤག་གི་ངོས་ནས་ ༢༠༡༤ ལོ་དེ་བཀའ་དྲིན་རྗེས་དྲན་གྱི་ལོ་ལ་སྲུང་གཙི་གནང་བ་རེད། ད་རེབ་ཀྱི་གྲོས་ཚོགས་འདིའི་ནང་མཐའ་མའི་ལས་རིམ་ལྟ་བུར། ༧གོང་ས་མཆོག་ལ་བཀའ་དྲིན་རྗེས་དྲན་གྱི་གྲོས་འཆར་ཞིག་ཕེབས་ཀྱི་ཡོད་པ་རེད། དེ་ལའང་སྤྱི་འཐུས་རྣམ་པ་ཚོ་མཉམ་ཞུགས་གནང་གི་རེད།
སྤྱི་འཐུས་ལྷན་ཁང་གི་ལས་འགན་གཙོ་བོ་ཁྲིམས་བཟོ་ཡིན་སྟབས། ད་རེབ་བཅར་ཁྲིམས་དང་སྒྲིག་གཞི་བསྐྱར་བཅོས་ཀྱི་གནས་ཚུལ་གཅིག་གཉིས་ཤིག་ཡོད་པ་རེད། བཅའ་ཁྲིམས་བསྐྱར་བཅོས་ནང་དུ་གཙོ་བོ་ཞིག་འདས་པའི་ལོ་ཁ་ཤས་ནང་དུ་ཇོ་ནང་གིས་རེ་བ་ཞིག་བརྒྱབ་བསྡད་ཡོད་པ་རེད། ང་ཚོས་དམངས་གཙོའི་ལམ་སྲོལ་ཐོག་ནས་ཐག་གཅོད་དགོས་པ་ཞིག་དང་། རྒྱ་བལ་འབྲུག་གསུམ་འཕུད་པའི་ཨོ་སི་ཊོ་ལེའི་ཨེ་ཤཱིན་དང་། ནེའུ་ཛི་ལན་ཌའི་ས་ཁུལ་དུ་སྤྱི་འཐུས་ཀྱི་ས་མིག་གཅིག་གི་གོ་སྐབས་སྤྲད་དང་མ་སྤྲད་ཀྱི་སྐད་ཆ་ཞིག་ཡོད་སྟབས། དེ་དག་ཐོག་ལའང་གུ་ཡངས་པོ་དང་བསམ་བློ་རྒྱ་ཆེན་པོའི་ཐོག་ནས་དགོངས་པ་བཞེས་རྒྱུ་གལ་ཆེན་པོ་རེད། ཅེས་སོགས་གསུངས་སོང་།
ཚོགས་གཙོ་སྤེན་པ་ཚེ་རིང་མཆོག་གིས་ད་རེབ་གྲོས་ཚོགས་ནང་ཆེད་འཛུགས་ཚོགས་ཆུང་ཁག་ཅིག་གི་སྙན་ཐོ་འབྱོར་གྱི་ཡོད་པའི་ཐད། ཚོགས་ཆུང་ཁག་གི་སྙན་ཐོ་གང་ལ་གང་འཚམ་ཞིག་ད་རེབ་གྲོས་ཚོགས་ནང་སླེབ་ཀྱི་ཡོད་པ་རེད། དེ་དག་ཁྲོད་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་དང་། མང་ཚོགས་རྩིས་ཁྲ་ཚོགས་ཆུང་གི་སྙན་ཐོ་ཕེབས་ཡོང་གི་རེད། དེའི་སྐོར་ལ་མཇུག་སྐྱོང་བྱེད་སྟངས་ཐོག་འཛིན་སྐྱོང་བཀའ་ཤག་དང་སྤྱི་འཐུས་རྒྱུན་ལས་ངོས་ནས་ཐུགས་འཁུར་བཞེས་དགོས་པ་ཁག་ཅིག་ཡོང་གི་རེད།
དེ་བཞིན་ལོ་ཁ་ཤས་རིང་ཕྱོགས་སྐྱོད་སྤྱི་འཐུས་ཚོའི་ཕྱག་ལས་གནང་སྟངས་ཐོག་སྐད་ཆ་མང་པོ་ཞིག་ཡོང་གི་ཡོད་པ་རེད། དེའི་ཐད་སྤྱི་འཐུས་རྒྱུན་ལས་ཀྱིས་ཚོགས་ཆུང་ཞིག་བཙུགས་ཡོད་པའི་སྙན་ཐོའང་འབྲེལ་བའི་སྒྲིག་གཞིའི་འཆར་ཟིན་ཞིག་ད་རེབ་ཡོང་གི་རེད།
གྲོས་ཚོགས་སྔ་མའི་མཇུག་སྐྱོང་དགོས་པའི་ཆེས་མཐོའི་སྨན་པའི་ལྷན་ཚོགས་ཀྱི་སྒྲིག་གཞི་དང་འབྲེལ་བའི་ཚོགས་ཆུང་གི་སྙན་ཐོ་ཞིག་ད་རེབ་ཡོང་གི་ཡོད་པ་རེད། དེ་མ་ཕེབས་སྔོན་ལ་ཆེས་མཐོའི་སྨན་པའི་ལྷན་ཚོགས་ཀྱི་གནས་བབ་གང་འདྲ་ཆགས་ཀྱི་ཡོད་མེད་ཀྱི་ཚོགས་ཆུང་ཞིག་དེ་སྔོན་བཀའ་ཤག་གིས་འཕྲོད་བསྟེན་ལ་ཞུས་ཡོད་ཀྱང་སྤྱི་འཐུས་ལྷན་ཚོགས་ཀྱིས་རེ་བ་བརྒྱབ་པ་ལྟ་བུ་ཞིག་ཡོང་ཐུབ་ཡོད་པ་མ་རེད། དེ་དང་འབྲེལ་ནས་གྲོས་ཆོད་ཅིག་ད་རེབ་ཡོང་གི་ཡོད་པ་རེད། དེ་ཕྱིན་པ་ཡིན་ན་སྒྲིག་གཞི་བསྐྱར་བཅོས་དེ་གནས་སྐབས་གྲང་སངས་ལ་གཏོང་རྒྱུ་དང་། གྲོས་ཆོད་མ་ཕྱིན་པ་ཡིན་ན་སྒྲིག་གཞི་བསྐྱར་བཅོས་བྱེད་དགོས་པ་རེད།
སྤྱི་འཐུས་ཚོགས་དྲུང་ལས་ཁུངས་དང་ཁྲིམས་དྲུང་ལས་ཁུངས་ཀྱི་ལས་བྱེད་རྣམས་ལས་བྱེད་སྤྱི་མཚུངས་ལྟར་བསྐོ་བཞག་དང་གནས་སྤོར་བྱེད་ཕྱོགས་སྐོར་ལ་ཚོགས་ཆུང་ཞིག་བཙུགས་ཡོད་པ་རེད། ཚོགས་ཆུང་དེའི་སྙན་ཐོའང་སྒྲིག་གཞི་སོགས་ཀྱང་ད་རེབ་ཡོང་གི་རེད། སྤྱི་འཐུས་རྒྱུན་ལས་ཀྱིས་བཙུགས་པའི་འཕྲོད་བསྟེན་བཀའ་བློན་གྱི་ཕྱག་ལས་གནང་སྟངས་སྐོར་ལ་ཚོགས་ཆུང་ཞིག་བཙུགས་ཡོད་པ་རེད། དེའི་སྙན་ཐོའང་ད་རེབ་གྲོས་ཚོགས་ནང་ཕེབས་ཀྱི་ཡོད་པ་རེད།
གཞན། ད་བར་དྲི་བ་བཅུ་བཞི་བཅོ་ལྔ་ཞིག་འབྱོར་སོང་། དེ་དག་ལ་འཛིན་སྐྱོང་གི་ལན་རྒྱག་དགོས་པ་དང་། དྲི་བ་ཁག་ཅིག་ཞིབ་ཚགས་མོས་ལན་བསྐྱོན་བདེ་དང་མ་བདེ་འཛིན་སྐྱོང་གིས་ཐུགས་འཁུར་བཞེས་རོགས། དེ་བཞིན། སྒྲིག་གཞི་བསྐྱར་བཅོས་ནང་དུ་འཛིན་སྐྱོང་གི་སྒྲིག་གཞི་བསྐྱར་བཅོས་ཁག་ཅིག་ཡོད་པ་རེད། དེ་ནས་ཁྲིམས་ཞིབ་ཁང་ནས་རེ་ཟུང་ཡོང་མདོག་ཁ་བོ་རེད། གལ་ཆེ་ཤོས་ཤིག་འོས་བསྡུའི་སྒྲིག་གཞི་རེད། འོས་བསྡུ་ཡོང་གི་ཡོད་སྟབས་ད་རེབ་གྲོས་ཚོགས་ནང་གཏན་འབེབས་མ་ཐུབ་ན་ཁག་པོ་ཆགས་ཡོད་པ་རེད། ཅེས་སོགས་གསུངས་སོང་།
མཇུག་ཏུ། ང་ཚོའི་གྲོས་ཚོགས་འདིའི་ནང་གནད་དོན་མང་པོ་ཞིག་གི་ཐོག་གླེང་སློང་བྱེད་དགོས་པ་ཡོང་གི་རེད། དེ་སྔ་གྲོས་ཚོགས་ཀྱི་ལས་རིམ་ཁག་ལ་ཚང་མས་བསམ་ཤེས་ཆེན་པོའི་ཐོག་ནས་གནང་ཡོད་པས་ཆ་ཚང་ཞིག་ཡག་པོ་བྱས་ནས་འགྲོ་ཐུབ་ཡོད་པ་དང་། ད་རེབ་ཀྱི་གྲོས་ཚོགས་ནང་དུའང་སྤྱི་འཐུས་རྣམ་པ་དང་མང་ཚོགས་ནང་དགོངས་ཚུལ་ག་རེ་ཡོད་པ་ཡིན་ནའང་ལྷུག་པོ་བྱས་ཏེ། རྒྱུ་མཚན་དང་ལྡན་ཞིང་དགོངས་པ་རྒྱ་ཆེན་པོ་གནང་དགོས་པ་གལ་ཆེན་པོ་རེད། ཚོགས་གཙོས་ད་རེབ་ཀྱི་གྲོས་ཚོགས་འདི་དེ་སྔ་ལྟར་ཡག་པོ་བྱས་ནས་འགྲོ་ཐུབ་པའི་རེ་བ་ཞུ་བཞིན་ཡོད། ང་རང་ཚོ་དམངས་གཙོའི་ལམ་སྲོལ་ཐོག་འགྲོ་བཞིན་ཡོད་སྟབས། དམངས་གཙོའི་ལམ་སྲོལ་ཐོག་ནས་བགྲོ་གླེང་བྱེད་དགོས་པ་དང་། དེ་བཞིན་བཅའ་ཁྲིམས་དང་སྒྲིག་གཞི་བསྐྱར་བཅོས་གང་ཡིན་ཡང་གཏན་འབེབས་བྱེད་པར་བརྒྱ་ཆ་ཞིག་ལོངས་དགོས་པ་དེ་བཞིན་འགྲོ་ཐུབ་རྒྱུ་དང་། གནད་དོན་ག་འདྲ་ཞིག་ཡིན་ནའང་སོ་སོའི་འདོད་པར་མཐུན་པ་དང་མི་མཐུན་གང་ཡིན་ཡང་། གྲོས་ཚོགས་ནང་ལྷིང་པོ་བྱས་ཏེ་གྲོས་བསྡུར་གྱིས་ཐག་གཅོད་དགོས་པ་དེ་གལ་ཆེན་པོ་དང་། སྤྱི་ཚོགས་ནང་བརྡབ་གསིག་མ་ཐེབས་པ་ཞིག་གནང་རྒྱུའང་གནད་འགག་ཆེན་པོ་རེད། ཅེས་གསུངས་སོང་བ་དང་།
ཐེངས་འདིའི་གྲོས་ཚོགས་ནང་། ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ལགས་དང་སྤྱི་འཐུས་སྐལ་བཟང་དགྲ་འདུལ་ལགས་རྣམ་གཉིས་སྐུ་གཟུགས་བདེ་མིན་གྱིས་ཕེབས་ཐུབ་མེད་པ་དང་། གཞན། ཡུ་རོབ་སྤྱི་འཐུས་གཉིས་ཡུ་རོབ་ལས་འགུལ་གྱི་དབང་གིས་ཐོག་མའི་ཉིན་གཉིས་རིང་བཅར་ཐུབ་མེད་པ་ལས་གཞན་སྤྱི་འཐུས་ཚང་མ་ངོ་བཅར་ཞུས་ཡོད་འདུག
ད་ལྟའི་ཆོས་བརྒྱུད་ལ་སྤྱི་འཐུས་དགོས་མིན་གྱི་གནད་དོན་ལ་གཞིག་ན། བཙན་བྱོལ་གྱི་སྤྱི་ཚོགས་ནང་ལ་ཆོས་བརྒྱུད་ཁག་ཕན་ཚུལ་ལ་ཕྱོགས་རིས་ཞེན་གོག་ཚད་ལ་འདས་པ། མངོན་པ་གསལ་བའི་སྒོ་ནས་དང་། མངོན་པ་མི་གསལ་བའི་སྒོ་ནས་ཡོད་སྡད་པའི་རྩ་བ་གཞུང་གི་སྲིད་ཇུས་ནོར་འཁྲུལ་གྱིས་བཟོས་ཡོད་པའི་ཟོལ་རེད། དཔེར་ན་ཇོ་ནང་ལ་སྤྱི་འཐུས་དགོས་མིན་གྱི་སྐད་ཆ་འདི་ཐོན་ནས་བཟུང་། ཇོ་ནང་དང་ས་སྐྱའི་ནང་ཁུལ་ལ་ཡང་ཕྱོགས་རིས་འཐེན་འཁྱེར་དེ་སྔོན་ལོ་རྒྱུས་ནང་ལ་བྱུང་མ་མྱོང་བ་ཞིག་བྱུང་སྡད་ཀྱི་འདུག འདས་པའི་ལོ་རྒྱུས་ལ་ཞིབ་གཟིགས་བྱས་ན། དགེ་ལུགས་དང་གཏན་ནས་མ་འདྲ་བ། ཇོ་ནང་པའི་ཆོས་ཀྱི་སྣེ་ཁྲིད། སྲིད་ཀྱིས་འཛིན་སྐྱོང་ཤུགས་ཆེར་ས་སྐྱའི་གདན་ས། ལྷག་པར་ས་སྐྱ་གོང་རང་ནས་གནང་ནས། དཔེར་ན་དཔལ་ལྡན་ས་སྐྱ་པའི་གདུང་རབ་ལས་ཧ་ཅང་གི་སྙན་གྲགས་ཆེ་བ་ཙམ་དུ་མ་ཟད། ས་བཀའ་རྙིང་གསུམ་གྱི་མཁས་གྲུབ་ཡོངས་ཀྱི་ངོར་ཚད་མར་གྲགས་ཤིང་གྲུབ་པའི་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་ལྟ་བུ་ཞིག་ལ་མཚོན་ནའང་། ཇོ་ནང་པའི་བསྟན་པ་འཛིན་པའི་སྲོག་ཤིང་དུ་ཆགས་ཡོད་པས་མཚོན། འབྲེལ་འདྲིས་ཐུན་མིན་ཟབ་ནའང་། དེང་སྐབས་ས་ཇོའི་བར་ལ་གནམ་སའི་ཁྱད་པར་ཡོད་མདོག་གིས་ཆབ་སྲིད་ཀྱི་གོ་གནས་ཤིག་འཚོལ་སྟངས་འདིས། ཇོ་ནང་གི་བསྟན་པར་ཐུགས་ཁུར་ཆེར་བཞེས་མ་ཡིན་པ། ཆབ་སྲིད་ཀྱི་རྐུབ་སྟེག་ཆེད་དུ་ཡིན་པ་གསལ་བ་འདིས་ཞལ་གྲགས་ཡོད། ཆབ་སྲིད་རྐུབ་སྟེག་ལ་ཆོས་བརྒྱུད་ཀྱི་རྐུབ་སྟེག་སོ་སོར་བཞག་པ་འདིས། ཆོས་བརྒྱུད་ཁག་གི་ནང་ཁུལ་ལ་ཁྱད་པར་ཤུགས་ཆེན་ཡོད་པ་ལྟ་བུ་ཞིག་མངོན་པ་རེད། དོན་ལ་ཆོས་བརྒྱུད་ཁག་གི་ལོ་རྒྱུས་ལ་ཞིབ་གཟིགས་ཤིང་གནང་དང་། གསེར་གྱི་ཨ་ལོང་གི་ཐག་པ་ལྟར་ཕན་ཚུན་མ་འབྲེལ་བ་གཏན་ནས་མེད། ཁྱད་པར་འདི་འདྲ་ཕྱེས་པ་འདི་འང་ཕུག་གཏུག་ན། རང་ལུགས་མཆོག་འཛིན་གྱིས་ལྟ་ངན་གྱིས་སླད་ནས་བཟོས་པ་རེད་འདུག དེས་ན། ཆོས་བརྒྱུད་ཀྱི་སྤྱི་འཐུས་གཏན་ནས་མེད་པར་བཟོས་ན། ནུབ་ཕྱོགས་པའི་ཆོས་དང་མ་འདྲེས་པའི་སྲིད་ཇུས་ངོ་མ་སླེབས་ཐུབ། གཞན་དུ་ནུབ་ཕྱོགས་ཆབ་སྲིད་ཀྱི་མིང་། ཆེད་དུ་ནོར་བསྒྱུར་རིས་མེད་ཨམ་ཞིག་བྱས་པ་འདི་དང་། རིས་སུ་བཅད་ནས་སྤྱི་འཐུས་སོ་སོར་བཟོས་པ་འདི་ལས་འགལ་བ་ཚབ་ཆེན་ཅི་ཡོད།
ཞིས་ཅིན་ཕིང་གཞུང་གིས་༼དབུ་མའི་ལམ་ནི་མི་ལ་མགོ་བསྐོར་བྱེད་ཅིག་རེད༽ཅེས་པ་དང་༼གོང་སའི་ཡང་སྲིད་ཐག་གཅོད་དབང་ཆ་རྒྱ་གཞུང་ལ་ཡོད་༽ཟེར་བ་གཉིས་ཐད་ཛ་དྲག་གྲོས་ཆོད་འཇོག་རན་ཡོད།
ཨ་མའི་བུ། ཡག་པོ་ལབ་སོང་། བསམ་ཚུལ་དེ་ལ་འཐད་པ་ཡིན། ཆོས་རྒྱུད་འདི་དག་འདྲ་མཉམ་བྱས་ནས། ཆོས་རྒྱུད་དག་གི་འཐུས་མིའི་མིང་མང་ཙམ་ཡང་གྲོོས་ཚོགས་ནང་མེད་པ་བཟོས་ན། ད་ཆོལ་ཁའི་རྩོད་པ་ལས་ལྷག་ཡོད་མ་རེད། ང་ཚོས་ངེས་པར་དུ་དེའི་ཕྱོགས་ལ་རྩོམ་ཡིག་མང་པོ་འབྲི་དགོས་རེད། དེ་མིན་དྲང་བདེན་གྱི་འདྲ་མཉམ་མ་རེད།
ཨོ་སི་ཊོ་ལི་ཡ་དང་ནེའུ་ཛི་ལན་ཌིའི་ནང་སྤྱི་འཐུས་གང་མྱུར་བཀོད་ཐུབ་ན་བཟང་། ཇོ་ནང་པའི་སྤྱི་འཐུས་བཀོད་རྒྱུ་གྲོས་ཚོགས་འཐུས་མི་ཚོས་བསམ་བློ་བཏང་ན་བཟང་། ཆོས་བརྒྱུད་ཁག་གི་སྤྱི་འཐུས་དགོས་གལ་ཆེ་བ་མ་མཐོང་། ད་ལྟ་བར་དུ་སྤྱི་འཐུས་གྲོས་ཚོགས་ནང་གི་དགྲ་དགའ་གཉེན་སྡུག་གི་ཟིང་ཆ་དེ་ཚོ་ཆོས་བརྒྱུད་སྤྱི་འཐུས་ཚོས་ཐག་ཆོད་སྐབས་རང་ཉིད་ཆོས་བརྒྱུད་སྤྱི་འཐུས་ཀྱི་སར་མ་སྡད་པར་ཆོལ་ཁའི་སྟེང་དུ་བབ་པའི་རྐྱེན་གྱི་བཟོས་པ་རྐྱང་ཡིན། གྲོས་ཚོགས་ཞི་བདེ་དགོས་ན། ཆོས་བརྒྱུད་སྤྱི་འཐུས་མི་དགོས།
དེ་རིང་ཕྲན་གྱིས་རིག་པ་དང་པོ་དེ་འདོན་ན་འདོད་སོང་། ད་ལོའི་གྲོས་གཞི་འདི་དག་གི་ནང་གི་ཆེས་གལ་ཆེན་ཞིག་ཡོད་པ་དེ་ནི། ཇོ་ནང་བ་དག་ཆོས་པ་འདྲ་མཉམ་ཞིག་ཏུ་ངོས་འཛིན་བྱེད་མིན་དེ་རེད། ད་ལོའི་གྲོས་ཆོད་འདིས་སྐབས་འདིའི་གངས་ཅན་པའི་བསམ་བློ་དང་། མ་འོངས་བའི་ལས་དོན་ཤེས་ནུས་པས། བྲོ་བ་ཡོད་རྒྱུ་རེད། གལ་ཏེ་ད་དུང་བོད་མི་ཇོ་ནང་བ་འབུམ་ཕྲག་མང་པོའི་རེ་འདོད་དེ། སྔར་བཞིན་སྣང་མེད་དང་མཐོང་ཆུང་ངང་ཐག་གཅོད་བྱེད་ན། དུས་བབ་གསར་ཁང་གི་གསར་འགོད་པ་དག་ལ་ཡིད་སྐྱོ་བའི་ལས་ཀ་མང་དུ་འགྲོ་ངེས་རེད། སྐབས་དེར་ཤུགས་རྒྱ྄ོབས་འ།