མའོ་ཡི་ཡང་སྲིད་བཙལ་རྗེས་ང་ལ་ཐེ་གཏོགས་བྱས་ན་འོས།

གཟའ་ཕུར་བུའི་ཉིན་༧གོང་ས་མཆོག་གིས་ལྡི་ལའི་ཏ་ཇེ་མཱ་ཧཱལ་མགྲོན་ཁང་དུ། སིངྒ་ལ་ནས་ཕེབས་པའི་ནང་པའི་དགེ་སློང་ཁག་ཅིག་ལ་མཇལ་འཕྲད་གནང་སྟེ་གནས་བརྟན་སྡེ་བའི་ལུགས་ཀྱི་སྐོར་ལ་བཀའ་སློབ་གནང་འདུག

༧གོང་ས་མཆོག་ཟླ་འདིའི་ཚེས་ ༡༩ ཉིན་ལྡི་ལིའི་ཏ་ཇེ་མཱ་ཧཱལ་གསོལ་མགྲོན་ཁང་དུ། སིངྒ་ལ་ནས་ཕེབས་པའི་གནས་བརྟན་སྡེ་པའི་དགེ་སློང་ཁག་ཅིག་ལ་མཇལ་འཕྲད་གནང་པ་དང་། ཉིན་རྒྱབ་ཨ་རིའི་གཞུང་ཚབ་ཁང་གི་གོ་སྒྲིག་འོག ལྡི་ལིའི་ཨ་རིའི་གཞུང་ཚབ་གཙོས་པའི་རྒྱ་གར་གྱི་ཁྱིམ་མཚེས་རྒྱལ་ཁབ་བརྒྱད་ནང་གི་ཨ་རིའི་གཞུང་ཚབ་པ་ཁག་གི་ཟབ་སྦྱོང་ཞིག་ཏུ་བཀའ་སློབ་གནང་ཡོད་འདུག

སྐབས་དེར་༧གོང་ས་མཆོག་གིས་སིངྒ་ལའི་གནས་བརྟན་སྡེ་པའི་དགེ་སློང་ཁག་ལ་བཀའ་སློབ་བསྩལ་དོན། ང་ཚོ་ཚང་མ་སྟོན་པ་གཅིག་གི་རྗེས་འཇུག་གཅིག་མཚུངས་ཡིན། དེང་སྐབས་རྒྱལ་སྤྱིའི་ཐོག་ཆོས་རབ་ཏུ་རྣམ་པར་འབྱེད་པའི་ཚན་རིག་གི་བསམ་བློ་ཡོད་མཁན་ཁག་གཅིག་གིས། ཆོས་ཟེར་བ་དེ་གང་འདྲ་ཡིན་ནམ་སྙམ་པའི་རྣམ་རྟོག་བྱས་ནས་སྡོད་མཁན་མང་པོ་ཞིག་གིས་སངས་རྒྱས་བཅོམ་ལྡན་འདས་ཀྱིས་གསུངས་པའི་ཆོས་ལ་དོ་སྣང་གསར་པ་ཞིག་བྱེད་བཞིན་ཡོད། སྟོན་པ་བཅོམ་ལྡན་འདས་ཀྱིས་ཆོས་གསུང་སྐབས་སྐྱེ་བ་ཕྱི་མ་ཙམ་མིན་པར་ཚེ་འདིའི་བདེ་བ་བསྒྲུབ་ཐབས་སྐོར་བཀའ་བསྩལ་བར་བརྟེན་ཆོས་ཁས་ལེན་ཞིག་མིན་ཡང་ཚང་མར་འབྲེལ་བ་ཡོད་པ་ཞིག་ཆགས་སྟབས། དེང་རབས་ཀྱི་མཁས་པ་ཁག་གཅིག་གིས་ནང་ཆོས་དེ་འགྲོ་བ་མིའི་བདེ་ཐབས་ལ་ཕན་བདེ་བསྐྲུན་མཁན་གྱི་གྲུབ་ཆ་གལ་ཆེན་ཞིག་ངོས་འཛིན་བྱེད་བཞིན་ཡོད། ངོས་ཀྱིས་མི་སུ་འདྲ་ཞིག་ཐུག་ཀྱང་འགྲོ་བ་མི་རིགས་གཅིག་མཚུངས་ཡིན་པའི་འདུ་ཤེས་བཟུང་སྟེ་ཐུག་འཕྲད་བྱེད་ཀྱི་ཡོད། གལ་ཏེ་ང་ཚོས་རང་ཉིད་གཞན་ལས་ལྷག་པ་དང་དམིགས་བསལ་བ་ཞིག་ཡིན་བསམ་ནས་བསྡད་ཚེ། སོ་སོ་གཅིག་པུ་འཁེར་རྐྱང་དུ་ལྷག་རྒྱུ་ལས་མེད་སྟབས། སུ་དང་འགྲོགས་ཀྱང་འགྲོ་བ་མི་རིགས་གཅིག་མཚུངས་ཡིན་བསམ་པའི་འདུ་ཤེས་འཛིན་རྒྱུ་དེ་གལ་ཆེན་པོ་ཆགས་ཡོད། ཅེས་གསུངས་འདུག

སིངྒ་ལའི་དགེ་སློང་ཚོས་ང་ཚོས་གནས་བརྟན་སྡེ་པ་དང་གཞི་ཐམས་ཅད་ཡོད་པར་སྨྲ་བའི་སྡེ་པའི་བར་མཚུངས་བསྡུར་བྱས་ཏེ་ལྟ་སྐབས། བོད་དུ་དར་བའི་གཞི་ཐམས་ཅད་ཡོད་པར་སྨྲ་བའི་སྡེ་པ་དང་། གནས་བརྟན་སྡེ་པའི་བར་ཁྱད་པར་དེ་ཙམ་ཆེན་པོ་མཐོང་མ་བྱུང་ཞེས་དང་། དེང་སྐབས་སིངྒ་ལའི་མང་ཚོགས་ཀྱིས་༧གོང་ས་མཆོག་ལ་དད་གུས་ཆེན་པོ་ཞུ་བཞིན་ཡོད་པ་ མ་ཟད། ༧གོང་ས་མཆོག་མགྱོགས་མྱུར་ངང་སིངྒ་ལར་ཆིབས་སྒྱུར་བསྐྱངས་རྒྱུར་ངང་སྒུག་ཞུ་བཞིན་ཡོད་པར་བརྟེན། དད་ལྡན་མང་ཚོགས་རྣམས་ཀྱི་རེ་འདུན་བསྐོང་ཆེད་ཡུལ་དེར་ཆིབས་སྒྱུར་བསྐྱང་གནང་ཡོང་བ་ཞུ་ཞེས་གསོལ་འདེབས་ཞུས་ཡོད་སྟབས། ༧གོང་ས་མཆོག་གིས་ངོས་རང་སིངྒ་ལར་འགྲོ་ཐུབ་རྒྱུར་དགའ་ཚོར་ཆེན་པོ་ཡོད། དེ་བཞིན་སིངྒ་ལའི་དགེ་འདུན་པ་ཚོ་བོད་པའི་དགེ་འདུན་པ་དང་ལྷན་ཐུག་ནས་བགྲོ་གླེང་གནང་ཐུབ་ན་ཧ་ཅང་ཡག་པོ་ཡོད་པ་རེད། ཅེས་སོགས་གསུངས་འདུག

དེའི་རྗེས་༧གོང་ས་མཆོག་གིས་ཨ་རིའི་གཞུང་ཚབ་ཁག་གི་ལས་བྱེད་ཚོར་ཨ་རི་དང་རྒྱ་གར། ཉི་ཧོང་བཅས་ཀྱི་འབྲེལ་ལམ་གལ་ཆེན་ཆགས་ཡོད་སྐོར་གསུངས་དོན། ངོས་ཀྱིས་རྒྱ་གར་ནི་མི་རིགས་དང་ཆོས་ལུགས། སྐད་ཡིག རིག་གཞུང་སོགས་འདྲ་མིན་ལ་ལྡན་པ་གང་ཞིག་ཕན་ཚུན་འཆམ་མཐུན་དང་བཟོད་བསྲན་ངང་འཚོ་བཞིན་ཡོད་པའི་དམངས་གཙོའི་རྒྱལ་ཁབ་ཆེ་ཤོས་ཤིག་ཡིན་སྟབས། གཞན་གྱི་མིག་དཔེ་ལྟ་བུར་གྱུར་ཡོད། དེ་བཞིན་ཉི་ཧོང་ནི་ཨེ་ཤི་ཡའི་འཛུགས་སྐྲུན་ཡར་རྒྱས་ཚད་མཐོ་ཤོས་ཕྱིན་པའི་རྒྱལ་ཁབ་ཞིག་ཆགས་ཡོད་སྟབས། ཨ་རི་དང་རྒྱ་གར། ཉི་ཧོང་བཅས་ཀྱི་འབྲེལ་ལམ་ཧ་ཅང་གལ་ཆེན་པོ་ཆགས་ཡོད། དེ་ནི་ངོས་ཀྱིས་རྒྱ་ནག་ལ་ཟུར་ཟ་བྱས་པ་མིན། སྔ་ཕྱི་མ་གཏོགས་རྒྱ་ནག་ཀྱང་རང་དབང་ལྡན་པའི་རྒྱལ་ཁབ་ཅིག་ཆགས་ངེས་ཡིན་ཡང་། ད་དུང་རྒྱ་ནག་རང་དབང་ལྡན་པའི་རྒྱལ་ཁབ་གཅིག་ཆགས་པར་ལོ་ངོ་བཅུ་ཕྲག་འགའ་ཤས་འགོར་སྲིད་པ་རེད། ཅེས་སོགས་གསུངས་འདུག

ད་ལྟ་རྒྱ་ནག་གཞུང་གིས་༧གོང་ས་མཆོག་གི་ཡང་སྲིད་ལ་ཐེ་བྱུས་བྱ་རྒྱུའི་རྣམ་འགྱུར་འདོན་བཞིན་ཡོད་པ་དེར་དགོངས་ཚུལ་ཇི་ཡོད་བཀའ་འདྲི་ཞུས་པའི་ལན་དུ་༧གོང་ས་མཆོག་གིས། རྒྱ་ནག་གཞུང་གིས་ངོས་ཀྱི་ཡང་སྲིད་སྐོར་ལ་ངོས་ལས་ཁོ་ཚོས་སེམས་ཁྲལ་ཆེ་བ་བྱེད་ཀྱི་འདུག ཁོ་ཚོས་ཐོག་མར་མའོ་ཙེ་ཏུང་དང་ཏིང་ཞའོ་ཕིན་གྱི་ཡང་སྲིད་བརྩད་གཅོད་བྱས་རྗེས། ཏཱ་ལའི་བླ་མའི་ཡང་སྲིད་ལ་ཐེ་བྱུས་བྱས་པ་ཡིན་ན་འོས་ཤིང་འཚམ་པ་ཞིག་རེད། དེ་སྔ་ངོས་ཀྱིས་༡༩༦༩ ནང་ཏཱ་ལའི་བླ་མའི་ཡང་སྲིད་ཡོང་དང་མ་ཡོང་ཟེར་བ་དེ་བོད་ཀྱི་རྒྱ་ཆེའི་མང་ཚོགས་ཀྱིས་ཐག་གཅོད་བྱེད་དགོས་པ་ཞིག་ཆགས་ཡོད་ཅེས་བརྗོད་ཡོད་སྟབས། བོད་ཀྱི་རྒྱ་ཆེའི་མང་ཚོགས་ཀྱིས་ཐག་གཅོད་བྱེད་དགོས་པ་ཞིག་ཆགས་ཡོད། ཅེས་བཀའ་ལན་བསྩལ་འདུག

ཡང་དབུ་མ་དང་རང་བཙན་བར་དྲི་བ་བཏོན་པའི་ལན་དུ་༧གོང་ས་མཆོག་གིས། བོད་མི་གཞོན་སྐྱེས་ཤེས་ཡོན་ཅན་མང་ཆེ་བས་དངོས་ཡོད་གནས་ཚུལ་གཞི་རྩར་བཟུང་ནས་དབུ་མའི་ལམ་ལ་རྒྱབ་སྐྱོར་བྱེད་ཀྱི་ཡོད་ཀྱང་། འགའ་རེས་དེར་སོ་སོའི་འདོད་ཕྱོགས་ལྟར་རྒྱབ་སྐྱོར་མེད་པའི་རྣམ་འགྱུར་སྟོན་གྱི་ཡོད། དུས་རབས་ ༧།༨།༩ སྐབས་བོད་རྒྱ་ཧོར་གསུམ་ནི་ཨེ་ཤི་ཡའི་མངའ་ཐང་ཆེ་ཤོས་ཡིན་ཡང་། ཕྱིས་སུ་རྒྱ་རིགས་མཁྲེགས་འཛིན་པ་ཚོས་བོད་དང་རྒྱ་ནག་གི་རྒྱལ་རྒྱུད་བར་གཉེན་སྒྲིག་བྱས་པ་དང་། དུས་རབས་ ༡༣ སྐབས་བོད་རྒྱ་གཉིས་སོག་པོའི་དབང་འོག་ཏུ་ཚུད་པ་བཅས་ལ་བརྟེན་བོད་དེ་རྒྱ་ནག་གི་ཆ་ཤས་སུ་གྱུར་ཚུལ་རྗོད་བཞིན་ཡོད་པ་མ་ཟད། རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་གྱིས་སྐབས་ཤིག་ལ་བོད་དེ་གནའ་སྔ་མོ་ནས་རྒྱ་ཁོངས་ཡིན་པ་བཤད་ཡོད་ཀྱང་། ལོ་རྒྱུས་ཐོག་བོད་རང་བཙན་ཡིན་པ་ནི་དོན་དངོས་ཆགས་ཡོད། ཡིན་ཡང་རྒྱ་ནག་གཞུང་གིས་བོད་མི་ཚོར་དཔལ་འབྱོར་གྱི་ཁེ་ཕན་ཐོག་འགན་ཁུར་བྱས་ ནས་བོད་མིའི་འཚེ་མེད་ཞི་བ་དང་བྱམས་བརྩེར་གཞི་བཅོལ་བའི་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སོར་ཆུད་བྱ་རྒྱུའི་རང་དབང་སྤྲད་པ་ཡིན་ན། བོད་མི་རང་གི་ཁེ་ཕན་ཆེད་ང་ཚོ་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་བསྡད་ན་དགེ་མཚན་ཆེ་བ་ཡོད། ཅེས་སོགས་གསུངས་འདུག

ཁ་སང་ཚེས་ ༢༠ ཉིན་༧གོང་ས་མཆོག་གིས་ཀུན་ཕན་བདེ་རྩ་ཁང་དུ་དགེ་ལས་སློབ་ཕྲུག་ཚོར་བཀའ་སློན་བསྩལ་དོན། ངོས་རང་གཞོན་སྐྱེས་ཁྱེད་ཚོ་དང་ཐུག་པར་ཧ་ཅང་དགའ་པོ་བྱུང་། ཁྱེད་ཚོ་ནི་ལོ་ན་ཆུང་ཞིང་ལང་ཚོ་དར་སྐབས་ཡིན། ངོས་རང་ལོ་ན་ ༨༠ སོན་ཡོད་སྟབས། ཁྱེད་རྣམས་དང་ཐུག་སྐབས་རང་ཉིད་ཀྱང་ཁྱེད་ཚོ་ལྟར་གྲུང་ཤ་དོད་པའི་ཚོར་བ་ཞིག་རང་བཞིན་གྱི་བསླེབ་ཡོང་གི་འདུག དེ་མིན་ལོ་ན་བགྲེས་པ་རྣམས་དང་ཐུག་སྐབས་ངོས་རང་སྔོན་ལ་འཆི་དང་གཞན་དེ་སྔོན་ལ་འཆི་རྒྱུ་ཡིན་སྙམ་པའི་སེམས་ནང་འཆི་རྒྱུ་སུ་མགྱོགས་འགྲན་བསྡུར་བྱེད་པའི་ཚོར་བ་ཞིག་བསླེབས་ཀྱི་འདུག ཆོས་ལུགས་འདྲ་མིན་དང་། ལོ་ན་རྒན་གཞོན། དེ་བཞིན་ལྷོ་ནུབ་ཀྱི་ས་ཕྱོགས་གང་ནས་ཡོང་མིན་དང་། ཆོས་ལ་དད་པ་ཡོད་མེད་སོགས་ཀྱི་ཁྱད་པར་གང་ཡོད་ཀྱང་། ང་ཚོ་ཚང་མ་འགྲོ་བ་མི་རིགས་གཅིག་མཚུངས་ཡིན་སྟབས་ཁྱད་པར་གང་ཡང་མེད། དེར་བརྟེན་ངོས་ཀྱིས་འཛམ་གླིང་ནང་འགྲོ་བ་མི་རིགས་ཐེར་འབུམ་བདུན་ཡོད་པ་རྣམས་འགྲོ་བ་མི་རིགས་གཅིག་ཡིན་པའི་འདུ་ཤེས་འཛིན་རྒྱུ་ཧ་ཅང་གལ་ཆེན་པོ་ཡིན་པའི་ཚོར་བ་དེ་གོང་འཕེལ་གཏོང་ཐབས་བྱེད་བཞིན་ཡོད། ཅེས་གསུངས་འདུག

གསར་འགོད་པ། དོན་གྲུབ།