འཕྲོད་བསྟེན་བཀའ་བློན་མཆོག་གི་ལས་དོན་བྱེད་ཕྱོགས་ཐོག་ནོར་འཁྲུལ་ཡོད་པ་ར་འཕྲོད་ཡོད།

སྤྱི་འཐུས་རྒྱུན་ལས་ཀྱིས་ཞིབ་འཇུག་གནང་བ་ལྟར་ན། འཕྲོད་བསྟེན་བཀའ་བློན་མཆོག་གི་ཕྱག་ལས་གནང་ཕྱོགས་ཐོག་ནོར་བ་ཡོད་པ་དང་། བཀའ་ཤག་གིས་ཀྱང་གྲོས་ཚོགས་ཀྱི་ལམ་སྟོན་ལྟར་ཕྱག་ལས་གནང་མེད་པ་མ་ཟད། རང་གི་ཐག་གཅོད་རང་གིས་ཕྱག་བསྟར་མཇུག་སྐྱོང་གནང་མེད་པ་བཅས་ཀྱི་སྐྱོན་གནས་ཡོད་ཚུལ་བགྲང་འདུག

སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་བའི་ལས་ཉིན་དགུ་པ་སྟེ། དེ་རིང་སྔ་དྲོར་སྐར་རྟགས་ཅན་གྱི་དྲི་བ་དྲིས་ལན་ཁག་གྲུབ་རྗེས། སྦེལ་ཀོབ་འཚོ་བྱེད་སྨན་ཁང་གི་རྙོག་གླེང་ཐད་འཕྲོད་བསྟེན་བཀའ་བློན་མཆོག་གི་ལས་དོན་བྱེད་ཕྱོགས་ཐོག སྤྱི་འཐུས་རྒྱུན་ལས་ཀྱིས་བཙུགས་པའི་ཞིབ་འཇུག་ཚོགས་ཆུང་གི་སྙན་ཐོ་གྲོས་ཚོགས་ནང་སྙན་སྒྲོན་ཞུས་སོང་།

གནད་དོན་དེའི་ཐད་ཞིབ་འཇུག་ཚོགས་ཆུང་སྔ་ཕྱི་གསུམ་བཙུགས་པ་ལས། འཕྲོད་བསྟེན་ལས་ཁུངས་ཀྱི་ཞིབ་འཇུག་ཚོགས་ཆུང་གི་སྙན་ཐོའི་ནང་། སྦེལ་ཀོབ་འཚོ་བྱེད་སྨན་ཁང་གི་འགན་འཛིན་གྱིས་ལྐོག་ཟ་རུལ་སུངས་བྱས་མེད་སྟབས། ཞུ་གཏུག་བྱེད་མཁན་གཉིས་གནས་དབྱུང་གཏོང་དགོས་སྐོར་བཀོད་ཡོད་པ་དང་། བཀའ་ཤག་གི་ཞིབ་འཇུག་སྙན་ཐོའི་ནང་། ལྷག་པ་ཚེ་རིང་ལ་ལྐོག་ཟ་རུལ་སུངས་ཀྱི་གནས་ཚུལ་མེད་ཀྱང་སྤྱི་དངུལ་ཧིན་སྒོར་ ༣༠༤༨༣༠།༠༠ ཙམ་གྱོང་གུན་བཏང་ཡོད་པ་ཕྱིར་སློག་བྱེད་དགོས་པ་དང་། གནད་དོན་དེའི་ཐད་འཕྲོད་བསྟེན་བཀའ་བློན་མཆོག་གི་ལས་དོན་གནང་ཕྱོགས་ལའང་ནོར་འཛོལ་ཤོར་ཡོད་པར་ངོས་འཛིན་གནང་ཡོད། དེ་བཞིན་ཐེངས་འདིའི་སྤྱི་འཐུས་རྒྱུན་ལས་ཀྱི་ཞིབ་འཇུག་སྙན་ཐོའི་ནང་འཕྲོད་བསྟེན་བཀའ་བློན་མཆོག་གི་ལས་དོན་ཐོག་ནོར་འཁྲུལ་ཁ་ཤས་བྱུང་ཡོད་པ་གསལ་སྟོན་གནང་འདུག

སྙན་ཐོ་གྲོས་ཚོགས་ནང་སྒྲོགས་སྦྱང་གནང་རྗེས་སྤྱི་འཐུས་ཚོས་དགོངས་ཚུལ་གསུངས་སྐབས། སྤྱི་འཐུས་ཁག་ཅིག་གིས་གནད་དོན་དེར་བསྐྱར་དུ་ཞིབ་འཇུག་གནང་སྟེ་གནས་ཚུལ་ཁ་གསལ་བཟོ་དགོས་ཚུལ་དང་། ཁག་ཅིག་གིས་བཀའ་བློན་ཞིག་གི་ཕྱག་ལས་གནང་སྟངས་ཐོག་ནོར་འཁྲུལ་ཆེན་པོ་ཤོར་ཡོད་སྟབས་ཐག་གཅོད་ནན་པོ་གནང་དགོས་སྐོར། ཡང་ཁག་ཅིག་གིས་དེ་སྔོན་བཀའ་ཤག་གིས་སྦེལ་ཀོབ་སྨན་ཁང་ལ་ཉེས་པ་ཞིག་བཏང་བ་དང་། འཕྲོད་བསྟེན་བཀའ་བློན་ལའང་ཉེན་བརྡའི་ཚུལ་དུ་སློབ་གསོའི་ཡི་གེ་ཞིག་ཕུལ་ཡོད་པ་དེས་འཐུས་པ་བྱེད་དགོས་ཚུལ་སོགས་ཀྱི་དགོངས་ཚུལ་བརྗོད་སོང་།

སྤྱི་འཐུས་རྒྱུན་ལས་ཀྱི་ཞིབ་འཇུག་ཚོགས་ཆུང་གིས། འཕྲོད་བསྟེན་ལས་ཁུངས་ཀྱིས་བཙུགས་པའི་ཞིབ་འཇུག་ཚོགས་ཆུང་དང་བཀའ་ཤག་གིས་བཙུགས་པའི་ཞིབ་འཇུག་ཚོགས་ཆུང་གཉིས་ཀྱི་སྙན་ཐོ་དང་། མེལ་སོར་རྒྱ་གར་ཚོང་བདག་གིས་འཕྲོད་བསྟེན་བཀའ་བློན་དང་འཕྲོད་བསྟེན་ལས་ཁུངས་ཀྱིས་བཙུགས་པའི་ཞིབ་འཇུག་ཚོགས་ཆུང་གཉིས་ལ་ནང་དོན་མི་མཐུན་པའི་ཡིག་ཆ་རིགས་གཉིས་སྤྲད་པ་བཅས་ལ་ཞིབ་འཇུག་གནང་བ་བརྒྱུད་ཚོགས་ཆུང་གི་མཐོང་ཚུལ་དང་། འཕྲོད་བསྟེན་བཀའ་བློན་མཆོག་གི་ལས་དོན་བྱེད་ཕྱོགས་ཐོག་གི་སྐྱོན་ཆ། དེ་བཞིན། བཀའ་ཤག་གི་ཞིབ་འཇུག་ཚོགས་ཆུང་གི་སྐྱོན་གནས་ཁག་ཅིག་བཅས་འདིར་བསྡུ་སྒྲིག་གིས་བཀོད་ཡོད།

སྔར་ལོའི་ཕྱི་ཟླ་ ༢ པའི་ནང་། སྦེལ་ཀོབ་འཚོ་བྱེད་སྨན་ཁང་གི་ལས་བྱེད་བསོད་ནམས་ཚེ་རིང་དང་བསྟན་འཛིན་བཀྲ་ཤིས་གཉིས་ཀྱིས་འཚོ་བྱེད་སྨན་ཁང་གི་འགན་འཛིན་ལྷག་པ་ཚེ་རིང་ལ་ལྐོག་ཟ་རུལ་སུངས་སོགས་ཀྱི་སྐྱོན་བརྗོད་ ༡༠ ཙམ་བྱས་ཡོད་པ་ལས་ ༡ ནས་ ༥ བར་ལྷག་པ་ཚེ་རིང་གིས་གློག་རྫས་ཉོ་སྐབས་གློག་རྫས་ཀྱི་རིན་གོང་མཐོ་བ་ཡོད་སྐོར་གསལ་བའི་ཐད། འཕྲོད་བསྟེན་ལས་ཁུངས་ཀྱི་ཚོགས་ཆུང་གིས་གློག་རྫས་ཉོས་པའི་རིན་འབབ་ནང་ལོ་དྲུག་བར་བཟོ་བཅོས་དང་ཚབ་སྒྲིག དབོར་གླ་བཅས་ཚུད་ཡོད་པ་དངོས་འབྲེལ་ཡིན་པའི་ཚོང་ཁང་གི་ས་རྟགས་དང་ལས་ཐམ་བཀོད་པའི་དན་རྟགས་ཡོད་པ་དང་། ཚོང་ཁང་གཞན་ཞིག་ནས་ལོ་ལྔའི་ལོ་འཁོར་བཟོ་བཅོས་ཀྱི་གན་ཡིག་(AMC)ཡོད་པའི་རིན་གོང་འགྲན་ཤོག་བླངས་ཏེ། ལྷག་པ་ཚེ་རིང་གིས་གློག་རྫས་དང་། AMC གླ་ཡོན་ཁག་ཁག་ཆགས་མ་བཟོས་པའི་སྐྱོན་གནད་མཐོང་ཡོད་ནའང་ AMC ཡོད་པར་ངོས་འཛིན་གྱིས་ལྷག་པ་ཚེ་རིང་གིས་དངུལ་བར་ཟས་བྱས་པའི་གཞི་རྩལ་གང་ཡང་མཐོང་མི་འདུག

བཀའ་ཤག་ཚོགས་ཆུང་གིས་གློག་རྫས་ལ་བཟོ་གྲྭ་རང་ནས་ལོ་གཉིས་ཀྱི་བཟོ་བཅོས་དང་ཚབ་སྒྲིག་གན་ཡིག་(Warranty)ཡོད་བཞིན་དུ་ལོ་དྲུག་གི་གན་ཡིག་འཕར་མ་དགོས་གནད་མེད་པ་དང་། རིན་གོང་འགྲན་ཤོག་དུས་ཚོད་ཕྱིར་བཤིགས་ཀྱིས་ལེན་པ། AMC ཚད་ལྡན་ཡིན་ན་སྦིལ་འཛིན་ནང་གློག་རྫས་ཀྱི་མ་གནས་དང་ལོ་དྲུག་གི་བཟོ་བཅོས་གླ་ཡོན་དབྱེ་གསེས་མེད་པར་རྩིས་ཁུར་ཞུས་པ་ལམ་ལུགས་དང་མ་མཐུན་པ། སུ་གང་ལའང་གོ་བསྡུར་མེད་པར་ཐད་ཉོ་བྱས་པ། འཕྲོད་བསྟེན་ལས་ཁུངས་དང་རོགས་ཚོགས་ལ་དངོས་འབྲེལ་གནས་ཚུལ་སྙན་སེང་མ་ཞུས་པ་ལ་སོགས་པའི་སྐྱོན་གནད་ཀྱིས་དངུལ་འབོར་ ༡༤༧༠༤༣ སྤྱི་གུན་བྱུང་འདུག་པ་ལྷག་པ་ཚེ་རིང་གིས་སྨན་ཁང་ལ་ཕྱིར་སློག་དགོས་པའི་མཐོང་ཚུལ་བྱུང་འདུག

འཕྲོད་ལས་ཚོགས་ཆུང་གིས་བསོད་ནམས་ཚེ་རིང་དང་བསྟན་འཛིན་བཀྲ་ཤིས་གཉིས་ཀྱི་སྐྱོན་བརྗོད་ཁག་གཞི་རྩ་མེད་ཐོག་ལས་བྱེད་བླང་དོར་སྒྲིག་གཞི་དང་འགལ་བ། གྲོས་ཚོགས་དང་འཛིན་སྐྱོང་། མང་ཚོགས་ལ་དབུ་སྐོར་ཞུས་པ་ལ་སོགས་པའི་རྒྱུ་མཚན་ལ་བརྟེན་ནས་ལས་བྱེད་ནས་གནས་དབྱུང་གཏོང་དགོས་པ་དང་། ལྷག་པ་ཚེ་རིང་གིས་ལྐོག་ཟ་བྱས་མེད་རུང་ལས་དོན་བྱེད་ཕྱོགས་འགྲིག་མེད་པས་ཉེན་བརྡ་དང་ལུས་སེམས་ལ་དཀའ་ངལ་འཕྲད་ཡོད་པར་སེམས་གསོའི་དར་དཀར་གནང་ན་སྙམ་པའི་རྒྱབ་གཉེར་ཞུས་འདུག

བཀའ་ཤག་ཚོགས་ཆུང་ནས་ལྷག་པ་ཚེ་རིང་གིས་གློག་རྫས་བཟོ་བཅོས་ལོ་དྲུག་ལུགས་མཐུན་མེད་པར་བཞག་པ་དང་། སྦིལ་འཛིན་ནང་གློག་རྫས་དང་བཟོ་བཅོས་དབྱེ་གསེས་མེད་པ། བཟོ་བཅོས་གན་ཡིག་ཚད་ལྡན་མེད་པ། རིན་གོང་འགྲན་ཤོག་དུས་ཚོད་ཕྱིར་བཤིགས་ཀྱིས་བླངས་པ། འཕྲོད་བསྟེན་ལས་ཁུངས་ཀྱི་བཀའ་འཁྲོལ་ལྟར་མ་ཡིན་པ་རོགས་ཚོགས་ནས་རོགས་དངུལ་ཐད་ལེན་བྱས་པ་བཅས་ཀྱིས་སྤྱི་གུན་བཏང་བའི་དངུལ་འབབ་ཁྱོན་བསྡོམས་སྒོར་ ༣༠༤༨༣༠ སྨན་ཁང་ལ་ཕྱིར་སློག་དགོས་པ་དང་། ཀླན་ཀ་དང་འབྲེལ་བ་ཡོད་པའི་ལས་བྱེད་ཡོངས་རྫོགས་ཛ་དྲག་གི་འཕོ་འགྱུར་གྱིས་སླད་སྨན་ཁང་འདི་བཞིན་མིང་དོན་མཚུངས་པའི་མང་ཚོགས་ཀྱི་འཕྲོད་བསྟེན་བདེ་རྩའི་ངོ་བོར་འགྱུར་ཐབས་གནང་གལ་ཞེས་རྒྱབ་གཉེར་མི་འདྲ་བ་ཞུས་འདུག་པ་བཅས་ཀྱི་མཐོང་ཚུལ་བྱུང་།

གནད་དོན་འདིའི་ཐད་གསལ་པོ་བཟོ་དགོས་པ་ཞིག་ལ་འཕྲོད་ལས་ཚོགས་ཆུང་ནས་ལྷག་པ་ཚེ་རིང་གིས་ལྐོག་ཟ་བྱས་མེད་པ་མ་ཟད། ཁོ་རང་གི་སྤྱི་སེམས་ལ་བསྔགས་བརྗོད་བྱས་འདུག ཚོགས་ཆུང་གཉིས་པས་ལྷག་པ་ཚེ་རིང་གིས་ལས་དོན་བྱེད་ཕྱོགས་ཀྱི་རྐྱེན་པས་ཁྱོན་སྒོར་ ༣༠༤༨༣༠ སྤྱི་གུན་བཏང་བ་ལས་ལྐོག་ཟ་བྱས་པའི་གནས་སྟངས་བཏོན་མི་འདུག རྩིས་ཞིབ་སྙན་ཐོའི་ནང་དོགས་གཞི་མང་དག་གླེང་ཐོག་འཛིན་སྐྱོང་ནས་ཞིབ་འཇུག་ནན་པོ་གནང་དགོས་པའི་བསམ་ཚུལ་བཏོན་འདུག་ཅེས་བརྗོད་འདུག ཅེས་སོགས་བཀོད་འདུག

འཕྲོད་བསྟེན་བཀའ་བློན་མཆོག་གིས་བསྐོ་བཞག་གནང་བའི་འཕྲོད་བསྟེན་ལས་ཁུངས་ཀྱི་ཚོགས་ཆུང་གི་སྙན་ཐོ་རྩིས་མེད་གཏོང་ཕྱོགས་སྐོར་འཁོད་པའི་ནང་།  འཕྲོད་བསྟེན་བཀའ་བློན་མཆོག་ནས་ཚོགས་ཆུང་ལ་བཀོད་ཁྱབ་གནང་སྐབས་ཚོགས་ཆུང་གི་ཚོགས་མི་བསྐོ་འཛུགས་ཀྱི་བཀོད་ཁྱབ་ཙམ་ལས་ལས་དོན་བྱེད་ཕྱོགས་ཀྱི་ལམ་སྟོན་གསལ་པོ་མེད་པའི་སྐྱོན་ཆ་དང་། ཕྱིའི་ལབ་གླེང་མང་པོ་ཞིག་ལ་བརྟེན་ཏེ་འཕྲོད་བསྟེན་བཀའ་བློན་མཆོག་རང་གིས་བཙུགས་པའི་ཞིབ་འཇུག་ཚོགས་ཆུང་གི་ཚོགས་གཙོར་དོགས་གཞི་མང་དག་ཅིག་བྱུང་ཡོད་ཀྱང་། དེའི་སྐབས་རང་ཉིད་འཕྲོད་བསྟེན་བཀའ་བློན་གྱི་འགན་དབང་གི་ཐོག་ནས་ཐུགས་ཐག་ཆོད་པོས་ཚོགས་ཆུང་གི་མི་འགྲོར་འགྱུར་བ་བཏང་མ་གནང་བའི་སྐྱོན་ཆ། འཕྲོད་བསྟེན་བཀའ་བློན་མཆོག་གིས་ཞིབ་འཇུག་འགྲོ་བཞིན་པའི་སྐབས་སུའང་བསོད་ནམས་ཚེ་རིང་ལ་ཐད་ཀར་འབྲེལ་བ་མུ་མཐུད་གནང་བས་མཚོན་ཐེ་བྱུས་མང་དག་ཅིག་གནང་བའི་སྐྱོན་ཆ། ཚོགས་ཆུང་གི་སྙན་ཐོ་ཕྱི་ལོ་ ༢༠༡༤ ཟླ་ ༥ ཚེས་ ༣༠ ཉིན་ཕུལ་ཟིན་འདུག་ཀྱང་། ཕྱི་ལོ་ ༢༠༡༤ ཟླ་ ༨ ཚེས་ ༡༢ བར་ཚོགས་ཆུང་གི་ངོས་ནས་ཡིག་ཐོག་ཐེངས་གཉིས་དང་། ངག་ཐོག་ནས་ཐེངས་ལྔ་དྲུག་ཞུ་བསྐུལ་ཞུས་འདུག་ཀྱང་ཐག་གཅོད་མ་བྱུང་བར། ཚོགས་ཆུང་གི་ཚོགས་མི་རྣམ་པར་བློ་ཕམ་ཚད་མེད་བྱུང་ཡོད་པ་དང་སྤྱི་ཚོགས་ནང་གླེང་གཞི་མང་པོ་ཆགས་པའི་སྐྱོན་ཆ། ཚོགས་ཆུང་གི་སྙན་ཐོ་རྩིས་མེད་པ་མ་བཏང་སྔོན་བཀའ་བློན་རང་གི་ངོས་ནས་བཀའ་བློན་གྱི་མཚན་གནས་དང་མ་མཐུན་པའི་འདྲི་རྩད་དང་། རྒྱ་གར་ཚོང་པ་ཁག་ལ་ཐད་ཀར་ཡིག་འབྲེལ་གནང་བའི་སྐྱོན་གནད་སོགས་འཕྲོད་བསྟེན་བཀའ་བློན་མཆོག་གི་སྐྱོན་ཆ་སོགས་བགྲང་འདུག   

ཡང་རྒྱུན་ལས་ཀྱི་སྙན་ཐོའི་ནང་། མའེ་སོར་རྒྱ་གར་ཚོང་བདག་གིས་ཡིག་ཆ་སྔ་ཕྱི་མི་མཐུན་པ་སྤྲད་པའི་ཐད། འཕྲོད་བསྟེན་བཀའ་བློན་མཆོག་གིས་ངོ་ཤེས་རྒྱ་གར་བ་ཞིག་དང་། ཀར་ན་ཀྲ་ཀའི་མངའ་སྡེའི་སྐོར་སྲུང་བ་ (PSO)ལྷན་བཅར་སོང་བའི་ཐད། བཀའ་ཤག་གི་བཅད་ཁྲའི་ནང་འཕྲོད་བསྟེན་བཀའ་བློན་མཆོག་གིས་ “ཡུལ་མི་མཉམ་འཁྲིད་བྱེད་དགོས་དོན་ནི། ས་བབ་རྒྱུས་མངའ་ཡོད་པའི་ལམ་འཁྲིད་དང་ཀར་ན་ཀྲ་ཀའི་ཡུལ་སྐད་ཀྱི་གསུང་སྒྱུར་ཕྱག་རོགས་ཆེད་ལྷན་ཁྲིད་གནང་བ་ཞིག་རེད་འདུག”ཅེས་འཁོད་ཡོད་ཀྱང་། ལྷག་པ་ཚེ་རིང་གི་གློག་རྫས་ཉོ་ས་རྒྱ་གར་ཚོང་པར་བཀའ་བློན་གྱིས་དྲི་བ་བཏང་བའི་སྒྲ་འཇུག་ལ་ཉན་སྐབས་དབྱིན་སྐད་ནང་ཐད་ཀར་བཀའ་མོལ་གནང་འདུག་པ་དང་།  འཕྲོད་བསྟེན་བཀའ་བློན་མཆོག་སྤེལ་ཀོབ་འཚོ་བྱེད་ཁང་གསར་སྨན་ཁང་ནང་ལོ་གཉིས་ཙམ་སྨན་པའི་ཕྱག་ལས་གནང་སྐབས་མའི་སོར་དུ་ཡང་ཡང་ཕེབས་མྱོང་ཡོད་སྟབས་ལམ་འཁྲིད་པ་ཞིག་དགོས་དོན་མེད་པ་དང་། ལྷག་པར་དུ་རྒྱ་གར་སྐོར་སྲུང་བ་(PSO)མཉམ་འཁྲིད་བྱས་པ་དེ་འགལ་འཛོལ་ཆེན་པོ་ཡིན་པ།

སྙན་ཐོའི་ནང་མུ་མཐུད་དོན། འཕྲོད་བསྟེན་བཀའ་བློན་ཁོང་རང་གི་ངོས་ནས་རྒྱ་གར་བ་ཚོང་པ་དེ་ལ་དཀོན་མཆོག་དཔང་བཙུགས་ཀྱིས་སྡིགས་ར་བསྐུལ་མེད་གནས་ལན་མང་གསུངས་བ་དང་། མཉམ་འཁྲིད་རྒྱ་གར་བ་དེས་བཀའ་བློན་ངོ་སྤྲོད་བྱས་པ་ཙམ་ལས་སྡིགས་ར་བསྐུལ་ཡོད་མེད་ཤེས་རྟོགས་མེད་སྐོར་བརྗོད་ཀྱང་། བཀའ་ཤག་ཚོགས་ཆུང་གི་སྙན་ཐོ་ཇི་མ་ཇི་བཞིན་བཀའ་ཤག་གིས་ངོས་བཞེས་གནང་ཡོད་པ་དང་། ཞིབ་འཇུག་ཚོགས་ཆུང་གི་སྙན་ཐོ་ཤོག་གྲངས་ ༥༨ པའི་ནང་”འབྲེལ་ཆགས་ཚོང་ཁང་ Seon Tehonologies གི་བདག་པོ་ Shanta Mahesh ལ། ཁྱེད་རང་གིས་སྔ་རྗེས་མ་མཐུན་པའི་ཞུ་སྙན་ཁག་གཉིས་སྤྲད་པ་ནས་བདེན་རྫུན་གང་ཡིན་འགྲེལ་བཤད་ཁ་གསལ་དགོས་སྐོར་བརྗོད་ལན་དུ། Seon Technologies གི་བདག་པོས། ཕྱི་ལོ་ ༢༠༡༤ ཟླ་ ༧ ཚེས་ ༣༡ འཁོད་དཔལ་ལྡན་འཕྲོད་བསྟེན་བཀའ་བློན་མཆོག་ལ་སྤྲད་པའི་ཡིག་ཆུང་དེ་དག་སྤྲད་དགོས་དོན་གཙོ་བོ་དེ་ནུབ་འཕྲོད་བསྟེན་བཀའ་བློན་དང་Shri Hari Pharmaསྨན་ཚོང་ཁང་གི་བདག་པོ་Ramesh གཉིས་ཁོ་པའི་ཚོང་ཁང་དུ་ཕེབས་ཏེ། Ramesh ཡིས་ཀ་ན་ཌའི་ཡུལ་སྐད་ནང་། སྐོར་སྲུང་བས་ཕྱི་ལོགས་ན་སྒུག་བསྡད་ཡོད། བཀའ་བློན་གྱི་དགོས་འདུན་ལྟར་གནས་ཚུལ་ཡིག་ཐོག་སྤྲོད་དགོས་བསུན་གཙེར་བཏང་བར་བརྟེན་དངངས་འཚབ་ཀྱིས་སྤྲོད་དགོས་བྱུང་བའི་ཡིག་ཆ་དེ་བདེན་པ་མིན་ལུགས་ཡིག་ངག་གཉིས་ཐོག་ནས་གསལ་བཤད་དང་འབྲེལ། ཁོ་བས་ཕྱི་ལོ་ ༢༠༡༤ ཟླ་ ༨ ཚེས་ ༡ འཁོད་ཞིབ་འཇུག་ཚོགས་ཆུང་དང་པོའི་མིང་ཐོག་སྤྲད་པའི་ཡིག་ཆ་དེ་བཞིན་ངོ་མ་དང་མཐའ་མ་དེ་ཡིན་ལུགས་ལན་འདེབས་བྱས་སོང་བས་མ་ཚད། ཕྱི་ལོ་ ༢༠༡༤ ཟླ་ ༧ ཚེས་ ༣༡ དགོང་དྲོར་འཕྲོད་བསྟེན་བཀའ་བློན་དང་ལྷན་དུ་བསླེབས་པའི་ཡུལ་མི་དེ་སུ་ཡིན་སྐབས་དེར་ངོ་ཤེས་ཡོད་ན་གོང་ཚེས་འཁོད་པའི་ཡིག་ཆུང་དེ་བཞིན་བཀའ་བློན་ལ་ཐོབ་ཀྱི་མ་རེད་ཅེས་འགྲེལ་བརྗོད་བྱས་བྱུང་།”ཞེས་བཀོད་ཡོད་པར་བརྟེན། འཕྲོད་བསྟེན་བཀའ་བློན་གྱིས་རང་ངོས་ནས་སྡིགས་ར་བསྐུལ་མེད་ནའང་། མཉམ་འཁྲིད་བྱས་པའི་རྒྱ་གར་བས་སྡིགས་ར་བསྐུལ་བར་བརྟེན་ནས་རང་འདོད་ཀྱིས་ཡིག་ཆ་བླངས་བ་དང་སྒྲ་འཇུག་བྱས་པར་ངོས་འཛིན་བྱེད་ཐུབ།

འཕྲོད་བསྟེན་བཀའ་བློན་གྱིས་རྒྱ་གར་བ་ཞིག་དང་སྐོར་སྲུང་བ་མཉམ་འཁྲིད་བྱས་པ་དེ་ཀུན་སློང་ལ་སྐྱོན་མེད་ཀྱང་ལས་དོན་བྱེད་ཕྱོགས་ཀྱི་ཐོག་ནས་མ་འགྲིག་པ་ཆགས་པར་ངོས་ལེན་ཞུས་ཐོག དགོངས་དག་ཀྱང་ཞུ་འདོད་འདུག དེ་འབྲེལ་སྤྱི་འཐུས་རྒྱུན་ལས་ནས་ཞིབ་འཇུག་ཚོགས་ཆུང་འཛུགས་རྒྱུ་ཐག་གཅོད་ཟིན་པ་དང་། བཅད་ཁྲ་བཏང་སྟེ་ཉིན་ ༡༧ གྱི་རྗེས་ཕྱི་ལོ་ ༢༠༡༤ ཟླ ༡༢ ཚེས་ ༡༢ ཉིན་བཀའ་ཤག་ནས་ཉེན་བརྡའི་ཚུལ་དུ་སློབ་གསོའི་ཡིག་ཆུང་ཞིག་ཀྱང་འཕྲོད་བསྟེན་བཀའ་བློན་མཆོག་ལ་བཏང་གནང་འདུག

སྙན་ཐོའི་ནང་། “བཀའ་ཤག་གི་ཞིབ་འཇུག་ཚོགས་ཆུང་གིས་རྒྱ་གར་བ་ Shanta Ramesh ལ་འདྲི་རྩད་ཞུས་པ་ལས། འཕྲོད་བསྟེན་བཀའ་བློན་ལ་གནད་དོན་འདིའི་ཐད་འདྲི་རྩད་གང་ཡང་གནང་མི་འདུག་ལ། བཀའ་བློན་གྱིས་ཡི་གེ་བླངས་བ་དང་སྒྲ་འཇུག་འཁོར་ཐག་ལའང་གཞི་གང་ཡང་བཅོལ་མི་འདུག ཞིབ་འཇུག་ཚོགས་ཆུང་གི་གསུང་དོན་ལྟར་ན་བཀའ་བློན་ལ་འདྲི་རྩད་དགོས་པ་ལམ་སྟོན་ནང་གསལ་བཀོད་མེད་པའི་འགྲེལ་བརྗོད་བྱུང་།” ཞེས་བཀོད་འདུག

སྙན་ཐོའི་མཇུག་བསྡོམས་ནང་། རྒྱུན་ལས་ཀྱི་ལམ་སྟོན་དོན་ཚན་གཉིས་ཀའི་ཐོག་དཔལ་ལྡན་འཕྲོད་བསྟེན་བཀའ་བློན་མཆོག་གིས་ལས་དོན་གནང་ཕྱོགས་ལ་ནོར་འཁྲུལ་ཡོད་པ་གསལ་པོ་ར་འཕྲོད་ཀྱི་འདུག དཔལ་ལྡན་འཕྲོད་བསྟེན་བཀའ་བློན་མཆོག་གིས་དུས་རྒྱུན་ལས་ཁུངས་ནང་ཕྱག་ལས་གནང་ཕྱོགས་ཐད་ལའང་ལས་བྱེད་ཚོར་བསམ་ཚུལ་ཤུགས་ཆེན་ཡོད་ཀྱང་བཀའ་བློན་ལ་དེ་ཙམ་ཚོར་སྣང་མེད་པ། བཀའ་ཤག་གི་ཞིབ་འཇུག་ཚོགས་ཆུང་གིས་འཕྲོད་བསྟེན་བཀའ་བློན་མཆོག་ལ་འདྲི་རྩད་མ་ཞུས་པ་དེ་གྲོས་ཚོགས་ནང་སྤྱི་འཐུས་རྣམ་པས་ཐུགས་འཚབ་བཏོན་པ་ལྟར་དངོས་ཡོད་དུ་གྱུར་བ། བཀའ་ཤག་གི་བཅད་ཁྲའི་ནང་ལྷག་པ་ཚེ་རིང་གི་སྤྱི་གུན་བཏང་བ་ཁྱོན་བསྡོམས་སྒོར་ ༣༠༤༨༣༠ བཅད་ཁྲ་ཐོན་ཉིན་ནས་ཟླ་བ་གཅིག་གི་ནང་ཚུན་སྨན་ཁང་ལ་ཕྱིར་སློག་དགོས་པ་དང་། གལ་ཏེ་དུས་ཐོག་ཕྱིར་སློག་མ་བྱས་ཚེ་སྤྱི་དངུལ་སྒེར་ཟས་བྱས་པའི་གསལ་བསྒྲགས་དང་འབྲེལ། བོད་མིའི་སྒྲིག་འཛུགས་ནས་བོད་མི་སྤྱི་འགྲེ་ལྟར་ཕན་གྲོགས་ལྟ་སྐྱོང་བྱ་སྒོ་ཡོངས་རྫོགས་བཀག་བསྐྱིལ་བྱ་རྒྱུ་ཡིན་གསལ་ཡང་། སྙན་ཐོ་འདི་གཏན་འབེབས་བྱེད་སྐབས་བཅད་ཁྲ་བཏང་ཉིན་ནས་ཟླ་བ་ ༢ དང་ཉིན་གྲངས་ ༡༠ ཕྱིན་ཟིན་པའི་རྗེས་སུའང་དངུལ་བསྒྲུབ་འབུལ་ཞུས་མེད་པ་དང་། གསལ་བསྒྲགས་ཀྱང་བཏང་མེད་པར་བརྟེན་བཅད་ཁྲར་མཇུག་སྐྱོང་ཚད་ལྡན་བྱུང་མི་འདུག་པས་མ་འོངས་པར་བཀའ་ཤག་གི་བཅད་ཁྲར་མཐོང་མེད་པ་ཆགས་ཉེན་འདུག ཅེས་སོགས་བཀོད་འདུག

གནས་ཚུལ་འདི་ནི། ༢༠༡༤ ཟླ་ ༢ ཚེས་ ༢༦ ཉིན་སྦེལ་ཀོབ་འཚོ་བྱེད་སྨན་ཁང་གི་ལས་བྱེད་བསོད་ནམས་ཚེ་རིང་དང་བསྟན་འཛིན་བཀྲ་ཞུ་བ་གཉིས་ཀྱིས་ཁོང་ཚོའི་སྨན་ཁང་གི་འགན་འཛིན་ལྷག་པ་ཚེ་རིང་ལ་སྐྱོན་འཛུགས་ཡི་གེ་ཞིག་ས་གནས་མགོ་འཛིན་དང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་བཅས་ལ་བཏང་ཡོད་འདུག ཡི་གེ་དེའི་ནང་དོན་སྦེལ་ཀོབ་འཚོ་བྱེད་སྨན་ཁང་གི་འགན་འཛིན་གྱིས་སྨན་ཁང་ལ་གློག་གསོག་སྣོད་(Battery)དང་སྟངས་འཛིན་འཕྲུལ་ཆས་(UBS)དངོས་འགའ་ཉོས་པའི་རྩིས་ཁྲ་ཏག་ཏག་བསྡད་མེད་སྐོར་དང་འབྲེལ་ནས་ལྐོག་ཟ་རུལ་སུངས་ཀྱི་གནས་ཚུལ་ཞིག་བཀོད་ཡོད་འདུག

དེ་ལ་འཕྲོད་བསྟེན་བཀའ་བློན་མཆོག་གི་ངོས་ནས་འཕྲོད་བསྟེན་དྲུང་ཆེ་སོགས་ལས་གྲུབ་པའི་ཞིབ་འཇུག་ཚོགས་ཆུང་ཞིག་བཙུགས་ཏེ། ཟླ་གཅིག་ལྷག་ལ་ཞིབ་འཇུག་བྱས་པ་བརྒྱུད་དེ་ཕྱི་ཟླ་ ༥ ཚེས་ ༣༠ ཉིན་ཞིབ་འཇུག་སྙན་ཐོ་འཕྲོད་བསྟེན་ལས་ཁུངས་སུ་ཕུལ་ཡོད་ཀྱང་། འཕྲོད་བསྟེན་བཀའ་བློན་མཆོག་གིས་ཞིབ་འཇུག་སྙན་ཐོར་གཟིགས་ཞིབ་གནང་རྗེས་སྙན་ཐོ་དེར་ངོས་ལེན་བྱེད་ཐུབ་མེད་སྐོར་གསུངས་ཏེ། སླར་ཡང་བཀའ་ཤག་གིས་ནང་སྲིད་དྲུང་ཆེ་སོགས་ལས་གྲུབ་པའི་ཞིབ་འཇུག་ཚོགས་ཆུང་ཞིག་བཙུགས་ཏེ་བསྐྱར་དུ་རྟོག་ཞིབ་མགོ་འཛུགས་གནང་ཡོད་པ་རེད།

འཕྲོད་བསྟེན་ལས་ཁུངས་ཀྱི་ཞིབ་འཇུག་ཚོགས་ཆུང་གི་སྙན་ཐོའི་ནང་དོན་ཡོངས་བསྒྲགས་བྱས་མེད་ཀྱང་། འཕྲོད་བསྟེན་བཀའ་བློན་མཆོག་གིས་སྔར་ལོའི་ཕྱི་ཟླ་ ༩ པའི་གྲོས་ཚོགས་ནང་། “སྙན་ཐོའི་ནང་གི་གནས་ཚུལ་མང་པོ་ཞིག་གི་ཐོག་སོ་སོར་དོགས་པ་བསླེབས་སོང་། སོ་སོའི་ནང་མིའི་ཐོག་ནས་གནས་ཚུལ་གང་འཚམ་ཞིག་བསྡུ་རུབ་བྱས་པ་ཡིན།” ཞེས་དང་། “ ཡིག་ཆ་མང་པོ་ཞིག་གི་ནང་དུ་སྨན་ཁང་འགན་འཛིན་གྱིས་ལྐོག་ཟ་རུལ་སུངས་བྱས་སོང་ཟེར་ནས་སྐྱོན་འཛུགས་ཤིག་བྱེད་ཀྱི་ཡོད་པ་རེད། ཞིབ་འཇུག་སྙན་ཐོའི་ནང་དེ་དང་འགལ་ཟླ་ཞིག་ཆགས་ཡོང་གི་འདུག” ཅེས་སོགས་གསུངས་ཡོད།

ཕྱི་ཟླ་ ༧ ཚེས་ ༣༡ ཉིན་འཕྲོད་བསྟེན་བཀའ་བློན་མཆོག་རྒྱ་གར་ལྷོ་ཕྱོགས་གཞིས་ཆགས་ཁག་ཏུ་གཞུང་འབྲེལ་ཕྱོགས་སྐྱོད་ཅིག་དང་བསྟུན་ཏེ། ཁོང་གི་ངོ་ཤེས་རྒྱ་གར་བ་ཞིག་དང་ཀར་ན་ཀྲ་ཀའི་མངའ་སྡེ་སྐོར་སྲུང་བ་ཞིག་བཅས་ཁྲིད་ནས་དེ་སྔོན་འཚོ་བྱེད་སྨན་ཁང་གི་འགན་འཛིན་ལྷག་པ་ཚེ་རིང་གིས་བཅའ་དངོས་ཉོ་ཡུལ་རྒྱ་གར་ཚོང་བདག་དེའི་སར་སྐྱོད་དེ་སྐད་ཆ་དྲིས་སྐབས། ཐོག་མ་རྒྱ་གར་བ་དེས་ལྷག་པ་ཚེ་རིང་གིས་བཅའ་དངོས་ཉོས་པའི་ཡིག་ཆ་རྫུན་བཟོ་བྱས་ཚུལ་བཤད་ཡོད་པ་དང་། སྐད་ཆ་དེ་འཕྲོད་བསྟེན་བཀའ་བློན་མཆོག་གིས་སྒྲ་འཇུག་བྱས་ཡོད་ཀྱང་། རྗེས་སུ་རྒྱ་གར་བ་དེའི་སྐད་ཆར་འགྱུར་བ་ཐེབས་ཡོད་པ་མ་ཟད། ཉིན་དེར་འཕྲོད་བསྟེན་བཀའ་བློན་གྱིས་འཇིགས་སྐུལ་བྱས་སྟབས་དེ་ལྟར་བརྗོད་ཚུལ་ལབ་ཡོད།

སྔ་ལོའི་ཕྱི་ཟླ་ ༡༡ ཚེས་ ༢༥ ཉིན་བཀའ་ཤག་གིས་ཞིབ་འཇུག་གནང་བའི་གྲུབ་དོན་སྙན་ཐོ་དང་། གནད་དོན་དེའི་ཐད་བཀའ་ཤག་གིས་ཐག་གཅོད་གནང་བའི་བཅད་ཁྲའི་ངོ་བཤུས་བཅས་སྤྱི་འཐུས་རྒྱུན་ལས་ལ་འབྱོར་ཡོད་འདུག སྤྱི་འཐུས་རྒྱུན་ལས་ནང་གནད་དོན་དེའི་ཐོག་བཀའ་བསྡུར་བྱུང་བར། གནས་ཚུལ་དེ་ནི་འཛིན་སྐྱོང་གི་ལས་དོན་བརྒྱུད་རིམ་ཞིག་ལ་ངོས་འཛིན་དང་། བཀའ་ཤག་གི་བཅད་ཁྲ་དེ་དྲང་བདེན་བྱུང་ཡོད་མེད་ཐོག་ཞུ་གཏུག་དགོས་མིན་དམངས་གཙོའི་འགྲོ་ལུགས་ལྟར་བརྒྱུད་རིམ་གཞན་གྱི་ཐོག་ནས་འགྲོ་མིན་དོ་བདག་རང་ཉིད་ཀྱིས་ཐག་གཅོད་དགོས་པ་ཞིག་ལ་ངོས་འཛིན་གནང་ཡོད་འདུག

བཀའ་ཤག་གིས་ཞིབ་འཇུག་སྙན་ཐོར་ཞིབ་འཇུག་གནང་བ་བརྒྱུད། ལྷག་པ་ཚེ་རིང་གིས་ཅ་དངོས་ཉོས་པ་དང་བཟོ་བཅོས་ཡིག་ཆ་ཁག་ཚད་ལྡན་མིན་པ་དང་། འཕྲོད་བསྟེན་ལས་ཁུངས་ཀྱི་བཀའ་འཁྲོལ་མིན་པར་རོགས་དངུལ་བླངས་པ་བཅས་ཀྱིས་སྤྱི་དངུལ་གྱོང་གུན་བཏང་བར་ངོས་འཛིན་ཐོག་ཧིན་སྒོར་ ༣༠༤༨༣༠།༠༠ ཙམ་འཕྲོད་བསྟེན་སྨན་ཁང་ལ་ཕྱིར་སློག་བྱེད་དགོས་པ་དང་། ཉེས་འཛུགས་དེ་དང་འབྲེལ་བ་ཡོད་པའི་ལས་བྱེད་ཡོངས་རྫོགས་ཛ་དྲག་གིས་འཕོ་འགྱུར་འགྲོ་དགོས་པ་ཐག་གཅོད་གནང་ཡོད་འདུག

སྤྱི་འཐུས་རྒྱུན་ལས་ཀྱིས་བཀའ་ཤག་ལ་དྲི་བ་གསུམ་བཏོན་པར་བཀའ་ཤག་གིས་ཞིབ་འཇུག་སྐབས་འཕྲོད་བསྟེན་བཀའ་བློན་མཆོག་ལ་འདྲི་རྩིད་གནང་ཐུབ་མེད་པ་དང་། བཀའ་ཤག་གི་བཅད་ཁྲ་དང་སྤྱི་འཐུས་རྒྱུན་ལས་ཀྱི་དྲི་བར་ལན་འདེབས་གནང་བ་གཉིས་མ་མཐུན་བཅས་ལ་བརྟེན་ཏེ། སྤྱི་འཐུས་རྒྱུན་ལས་ཀྱིས་ཞིབ་འཇུག་ཚོགས་ཆུང་འཛུགས་རྒྱུའི་ཐག་གཅོད་གནང་ཡོད་པ་དང་། ཞིབ་འཇུག་ཚོགས་ཆུང་གི་ཚོགས་མིར་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་སྤྱི་འཐུས་ཀརྨ་ཆོས་འཕེལ། སྤྱི་འཐུས་ག་ཟི་དགེ་བཤེས་ཚེ་རིང་པོ་བཅས་བསྐོ་འཛུགས་གནང་སྟེ་ ༢༠༡༥ ཟླ་ ༡ ཚེས་ ༡༩ ཉིན་ནས་ལས་དོན་མགོ་འཛུགས་གནང་དང་། ཟླ་སྔོན་མའི་ཚེས་ ༢ ཉིན་ཞིབ་འཇུག་གྲུབ་དོན་སྤྱི་འཐུས་རྒྱུན་ལས་ལ་ཕུལ་ཡོད་འདུག

གསར་འགོད་པ། པདྨ་མཚོ།