གྲོས་སྟོན་པ་མ་བསྐོས་ཐབས་མེད་ཆཊ་སོང་།

བཀའ་ཤག་གིས་ཕྱི་རྒྱལ་སྐུ་ཚབ་དོན་གཅོད་ཁང་ཁག་ཅིག་དང་བོད་མིའི་སྒྲིག་འཛུགས་ལྷན་ཁང་ཁག་ཅིག་བཅས་སུ་གྲོས་སྟོན་པ་ ༩ བསྐོ་བཞག་བྱས་ཡོད་འདུག

དེ་རིང་སྐབས་བཅོ་ལྔ་པའི་གྲོས་ཚོགས་ཚོགས་དུས་དགུ་བའི་ཉིན་བཅུ་བའི་སྔ་དྲོར་གྲོས་ཚོགས་ནང་སྐར་རྟགས་ཅན་གྱི་དྲི་བ་དྲིས་ལན་གནང་སྐབས། སྤྱི་འཐུས་འཇིགས་མེད་འབྱུང་གནས་ལགས་ཀྱིས་སྲིད་སྐྱོང་བློ་བཟང་སེང་གེ་མཆོག་ལ། བོད་མིའི་སྒྲིག་འཛུགས་ཀྱི་ཕྱི་ལོ་ ༢༠༡༥ དང་ ༢༠༡༦ ལོའི་སྔོན་རྩིས་ནང་ཕོགས་འབབ་ཞུ་དགོས་པའི་ཁོངས་སུ། གྲོས་འདྲི་བའམ་གྲོས་སྟོན་པ་ཟེར་བའི་ལས་བྱེད་ཁག་ཅིག་བསྐོ་བཞག་གནང་བཞིན་ཡོད་པ་ལྟར། དེ་ཚོ་བོད་མིའི་སྒྲིག་འཛུགས་ཀྱི་ལས་བྱེད་བསྐོ་བཞག་གནང་ཕྱོགས་ཀྱི་ཁྲིམས་སྒྲིག་དོན་ཚན་གང་གི་འོག་ནས་བསྐོ་བཞག་བྱས་པ་དང་། དེ་དག་ལ་ལས་བྱེད་ཡོད་བཞིན་པ་དང་མི་འདྲ་བའི་གྲོས་སྟོན་དང་གྲོས་འདྲི་བྱ་རྒྱུའི་དམིགས་བསལ་གྱི་ཁྱད་ཆོས་གང་ཡོད་བཀའ་འདྲི་ཞུས་པའི་ལན་དུ་སྲིད་སྐྱོང་མཆོག་གིས། གྲོས་འདྲི་བྱ་ཡུལ་དང་གྲོས་སྟོན་པ་གཉིས་དོན་གཅིག་མིང་གི་རྣམ་གྲངས་ཡིན་པ་དང་། ལས་བྱེད་དེ་རིགས་བཙན་བྱོལ་བོད་མིའི་བཅའ་ཁྲིམས་དོན་ཚན་ ༣༠ པ་དང་བོད་མིའི་སྒྲིག་འཛུགས་ཀྱི་འཛིན་སྐྱོང་སྒྲིག་གཞི་དོན་ཚན་ ༧ པ་གཉིས་ཀྱི་འོག ༢༠༠༤ ཟླ་ ༡༢ ཚེས་ ༢ ཉིན་བཀའ་ཤག་གིས་གནང་བའི་རྩ་འཛིན་བཀོད་ཁྱབ་དང་། ༢༠༡༤ ཟླ་ ༧ ཚེས་ ༢༩ ཉིན་བཀའ་ཤག་གིས་གནང་བའི་རྩ་འཛིན་བཀོད་ཁྱབ་གཉིས་ཀྱི་དགོངས་དོན་གཞིར་བཟུང་བསྐོ་བཞག་གནང་བ་ཞིག་ཡིན་པ་དང་། རྩ་འཛིན་བཀོད་ཁྱབ་ནང་ཁ་གསལ་འཁོད་ཡོད་པ་ལྟར། དམིགས་བསལ་གནས་སྟངས་དང་དགོས་གལ་གྱི་འོག་ནས་བསྐོ་ཉར་མི་བྱེད་ཐབས་མེད་བྱུང་བ་རེད། ཅེས་སོགས་གསུངས་སོང་།

དེའི་རྗེས་སྤྱི་འཐུས་སྒྲོལ་མ་ཚེ་རིང་ལགས་ཀྱི་འཕྲོས་དོན་དྲི་བར། ལས་བྱེད་དེ་ཚོ་ལས་བྱེད་འདེམས་བསྐོ་ལྷན་ཁང་ནང་ཞབས་གཡར་དང་ཆོད་གན་གྱི་ས་མིག་ཡོད་བཞིན་དུ་ལོགས་སུ་བསྐོ་དགོས་པའི་རྒྱུ་མཚན་ཅི་ཡིན་དང་། བཀའ་ཤག་གིས་ལས་བྱེད་དེ་ཚོ་རྒྱུན་རིང་པོར་འཇོག་འཆར་ཡོད་མེད་དྲིས་པའི་ལན་དུ་སྲིད་སྐྱོང་མཆོག་གིས། འཛིན་སྐྱོང་གི་ངོས་ནས་ལས་བྱེད་འདེམས་བསྐོ་ལྷན་ཁང་བརྒྱུད་དེ་ཆོད་གན་བསྐོ་བ་དང་ཞབས་གཡར་ཡོད་པ་རེད། དཔེར་ན། སྦལ་ཛིལ་དོན་གཅོད་ཁང་ལ་མཚོན་ན། ཆོད་གན་ལ་བསྐོ་བཞག་བྱས་པ་ཞིག་ཆོད་གན་དུས་ཡུན་རྫོགས་ཚར་ཡོང་དུས་ཁོ་རང་ནས་བློ་ཕམ་གནང་གི་འདུག་ལ། སྦལ་ཛིལ་དོན་གཅོད་ནས་ཀྱང་ང་ཚོར་ཧྥ་རན་སིའི་སྐད་ཤེས་མཁན་ཞིག་མེད་པ་ཡིན་ན། དོན་གཅོད་ནང་ཕྱག་ལས་གནང་བར་ཁག་པོ་ཡོང་གི་འདུག་ཅེས་གསུངས་ཡོད་ཀྱང་། སྒྲིག་གཞིའི་དགོངས་དོན་ལྟར་ཕྱིན་པ་རེད། ཡིན་ནའང་མཐའ་མ་དེར་སྦལ་ཛིལ་དོན་ཁང་གིས་གསལ་བསྒྲགས་བྱས་ཀྱང་ལས་བྱེད་མ་རག་པ་རེད། དེ་བཞིན། སུད་སི་དོན་གཅོད་ཡིན་ནའང་སུད་སིར་རྒྱུས་མངའ་ཡོད་པའི་ལས་བྱེད་ཅིག་དགོས་ཀྱི་འདུག་ཅེས་གསལ་བསྒྲགས་བྱས་ཡོད་ཀྱང་ལས་བྱེད་མ་རག་པར་དྷ་རམ་ས་ལ་ནས་ལས་བྱེད་ཅིག་ཕར་གཏོང་དགོས་བྱུང་བ་རེད།

ལས་བྱེད་བསྐོ་བ་དེ་ཕུགས་རྒྱང་རིང་པོའི་ཐོག་ནས་བསྐོ་དགོས་པ་དེ་ཤིན་ཏུ་གལ་ཆེན་པོ་ཡིན་སྟབས། བོད་མིའི་སྒྲིག་འཛུགས་ནང་དུའང་ད་ལྟ་ཡོད་པའི་ལས་བྱེད་ཀྱི་བརྒྱ་ཆ་ ༩༥ ཕུགས་རྒྱང་རིང་པོར་བསྐོ་ཡི་ཡོད་པ་རེད། ཞབས་གཡར་དང་ཆོད་གན། དེ་བཞིན་གྲོས་སྟོན་པ་སོགས་བརྒྱ་ཆ་གཉིས་གསུམ་རེ་ལུང་པ་ཚང་མར་དམིགས་བསལ་ཐོག་ནས་བསྐོ་སྟངས་ཡོད་པ་ལྟར། ང་ཚོ་བཀའ་ཤག་ནས་ཀྱང་དམིགས་བསལ་གྱི་གནས་སྟངས་གཞིར་བཞག་ཐོག་གྲོས་སྟོན་པ་བསྐོས་པ་ཡིན། ཞེས་གསུངས་སོང་།

སྤྱི་འཐུས་པདྨ་འབྱུང་གནས་ལགས་ཀྱིས་བཀའ་ཤག་གིས་གནང་བའི་རྩ་འཛིན་བཀོད་ཁྱབ་དེ་ཁྲིམས་དང་སྒྲིག་གཞི་གང་ཡིན་དང་། དེ་དག་ནང་གྲོས་སྟོན་པ་བསྐོ་སྟངས་གསལ་བོ་ཡོད་དམ་ཞེས་སོགས་དྲིས་པའི་ལན་དུ་སྲིད་སྐྱོང་མཆོག་གིས། བཀའ་ཤག་གི་ངོས་ནས་རྩ་ཁྲིམས་དོན་ཚན་ ༣༠ དང་སྒྲིག་གཞི་དོན་ཚན་ ༧ པའི་ནང་དོན་ལ་གོ་བ་ལེན་སྟངས་དེ་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་ཀྱི་འགན་དེ་བཀའ་ཤག་ལ་ཡོད་པ་དང་། ས་མིག་གཏན་འབེབས་དང་ལས་བྱེད་བསྐོ་བའི་འགན་དེའང་བཀའ་ཤག་ལ་ཡོད་པར་བརྟེན། གྲོས་སྟོན་པ་ཡིན་ནའང་དམིགས་བསལ་རང་གི་གནས་སྟངས་གཞིར་བཞག་ཐོག་ནས་བསྐོ་བར་འབད་བརྩོན་བྱེད་ཀྱིན་ཡོད། བཅའ་ཁྲིམས་དང་སྒྲིག་གཞིའི་ནང་གྲོས་སྟོན་པ་བསྐོ་ཆོག་གི་མ་རེད་ཅེས་འཁོད་མེད་སྟབས་བསྐོས་པ་དང་། བསྐོས་པ་དེའང་ཉུང་ཤས་ཤིག་ཡིན་སྟབས། མ་འོངས་པར་སྐྱོན་གནད་ག་རེ་ཡོང་མིན་ཐོག་བཀའ་ཤག་ནས་བཀའ་བསྡུར་གནང་གི་ཡོད། ཅེས་གསུངས་སོང་།

བཀའ་ཤག་གིས་གྲོས་ཚོགས་ལ་ཕུལ་བའི་ཡིག་ཆའི་ནང་བཀོད་པ་ལྟར་ན། བཀའ་དྲུང་ཡིག་ཚང་གི་དྲུང་འཕར་གནས་རིམ་ཐོག་རང་ལོ་ ༦༦ ཡིན་པའི་གྲོས་སྟོན་པ་ཚེ་རིང་དབང་ཕྱུག་ལགས་དང་། བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་འཕར་གནས་རིམ་ཐོག་རང་ལོ་ ༦༦ ཡིན་པ་ཨ་ཅཱརྱ་བློ་བཟང་། རུ་སོག་དོན་གཅོད་ཁང་དུ་དྲུང་གཞོན་གནས་རིམ་ཐོག་རང་ལོ་ ༤༧ ཡིན་པ་གྲོས་འདྲི་བྱ་ཡུལ་ངག་དབང་རིགས་ལམ། སུད་སི་དོན་གཅོད་ཁང་གི་ལས་དྲུང་གནས་རིམ་ཐོག་རང་ལོ་ ༤༡ ཡིན་པ་གྲོས་སྟོན་པ་བློ་བཟང་ཉི་མ། ཨོ་སི་ཊོ་ལི་ཡ་དོན་ཁང་དུ་རང་ལོ་ ༣༥ ཡིན་པ་གྲོས་འདྲི་བྱ་ཡུལ་ཟླ་སྒྲོན། དཔལ་འབྱོར་ལས་ཁུངས་ཀྱི་དྲུང་ལས་གནས་རིམ་ཐོག་རང་ལོ་ ༢༩ ཡིན་པ་བསྟན་འཛིན་ནོར་བཟང་། སྦལ་ཛིལ་དོན་ཁང་དུ་དྲུང་གཞོན་གནས་རིམ་ཐོག་རང་ལོ་ ༣༥ ཡིན་པ་གྲོས་འདྲི་བྱ་ཡུལ་རིག་འཛིན་ཆོས་སྒྲོན། དཔལ་འབྱོར་ལས་ཁུངས་ནང་དྲུང་གཞོན་གནས་རིམ་ཐོག་གྲོས་འདྲི་བྱ་ཡུལ་བསྟན་འཛིན་སྟོབས་ཆེན། ཤེས་རིག་ལས་ཁུངས་ནང་ཟུང་དྲུང་གནས་རིམ་ཐོག་གྲོས་འདྲི་བྱ་ཡུལ་ཨ་ཅཱརྱ་ཀརྨ་སྨོན་ལམ་བཅས་བསྐོ་བཞག་གནང་ཡོད་འདུག