བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༥༨ སྟེང་གི་རྩོམ་སྒྲིག་པའི་གཏམ།
སྐབས་བཅོ་ལྔ་པའི་གྲོས་ཚོགས་ཚོགས་དུས་དགུ་པ་ཡར་ཚོགས་པ་སུ་དང་གང་གིས་མ་ཤེས། མར་གྲོལ་བ་གཞིས་བྱེས་གཉིས་ནང་སྐད་གྲགས་ཆགས་སོང་། བརྡ་འཕྲིན་བརྒྱུད་ལམ་སྟབས་ཇེ་བདེར་སོང་བ་དང་བསྟུན་ཏེ། ཆབ་སྲིད་པ་ཚོའི་འཁྲབ་སྟོན་ལེགས་འགྲུབ་ཆེ་ཤོས་ཀྱི་སྡིངས་ཆ་དེ་གངས་སྐྱིད་སྤྱི་འཐུས་ཚོགས་ཁང་ཆགས་ཡོད། སྤྱི་འཐུས་ཚོགས་ཁང་དེ་འཁྲབ་སྟེགས་དང་། གྲོས་ཚོགས་འཐུས་མི་ཚོ་འཁྲབ་སྟོན་པ་ཆགས་ཡོད་ལ། འདིའི་རྒྱབ་ན་ཁ་རྗེ་དབང་ཐང་ཅན་གྱི་འཁྲབ་འཁྲིད་པ་དང་། གཡས་གཡོན་མདུན་རྒྱབ་ན་འཁྲབ་གཞུང་རྩོམ་པ་པོ་དང་སྐྱོ་གར་ཧྲིལ་བོའི་སྦྱིན་བདག་སོགས་བང་སྒྲིག་ཡོད།
ཕྱི་ཟླ་གསུམ་པའི་གྲོས་ཚོགས་འདི་འཆར་ཅན་ལྟར་ན་བཙན་བྱོལ་བོད་མིའི་སྔོན་རྩིས་གཏན་འབེབས་ཀྱི་ཚོགས་འདུ་རེད། ཞོར་དུ་དུས་ཀྱི་དགོས་མཁོ་ལྟར་བཅའ་སྒྲིག་བསྐྱར་བཅོས་དང་། གནས་ཚུལ་གལ་ཆེན་ཐོག་གྲོས་ཆོད་སྣོན་འཇོག་བྱེད་པ། བཀའ་ཤག་ལ་ཚ་འདྲི་གཏོང་བ་དང་། སྤྱི་འཐུས་རྒྱུན་ལས་ཀྱི་ཆེད་འཛུགས་ཞིབ་འཇུག་ཚོགས་ཆུང་ཁག་གི་སྙན་ཐོར་བགྲོ་གླེང་གནང་བ་སོགས་ཡིན་ལ། ལས་རིམ་འདི་དག་དང་བསྟུན་ཏེ་སྤྱི་འཐུས་ཤེས་འཇོན་ཅན་ཚོས་རྣམ་དཔྱོད་ངོམ་པ་དང་། བླུན་པོ་གཡག་སྙིང་ཅན་ཚོས་བློ་ཁོག་ངོམ་པ། རྒྱུ་ཆེན་དབང་ཆེན་དག་གིས་དཔུང་ཤུགས་འགྲན་པ་སོགས་ཀྱང་གྲོས་ཚོགས་ནང་གི་ལམ་སྲོལ་ཆགས་ཡོད།
འདས་པའི་ལོ་ཤས་གོང་ནས་གྲོས་ཚོགས་ནང་གི་སྔོན་རྩིས་གཏན་འབེབས་ཐད། དཔལ་འབྱོར་ལས་ཁུངས་ལ་བྱུང་སོང་ཁ་འཐབ་ཀྱི་བསྔཊ་བརྗོད་རག་མེད་ལ། ད་ལོའི་ཚོགས་གཙོའི་མཇུག་བསྡོམས་གསུང་བཤད་ནང་དུའང་སྔོན་རྩིས་སྐོར་ལ་རབ་རུབ་ཅིག་གིས་འཐུས་པ་བྱས་སོང་། ཐེངས་འདིའི་གྲོས་ཚོགས་ཀྱིས་ངོམ་སོ་བྱེད་ཡུལ་ཞིག་ནི། བོད་ནང་གི་ཛ་དྲག་གནས་སྟངས་དང་༧གོང་ས་མཆོག་ལ་བཀའ་དྲིན་རྗེས་དྲན་ཆེད་སྤྱི་མོས་གྲོས་ཆོད་གཉིས་བཞག་པ་དེ་རེད་ལ། དེ་མིན་ཨེ་ཤ་ཡ་ཁུལ་དུ་སྤྱི་འཐུས་གཅིག་གི་ས་མིག་གསར་གཏོད་དང་། ཕྱི་རྒྱལ་ཁག་གི་དཔྱ་ཁྲལ་འབུལ་ཕྱོགས་ལ་བཅོས་བསྒྱུར་ཕྲན་ཙམ་བཏང་བ་སོཊ་ཀྱང་རིན་ཐང་གི་རྩིས་ཐང་མེད་ཀྱང་གྲངས་ཀ་ཡི་རྩིས་གྲངས་ཡོད།
བཙན་བྱོལ་སྤྱི་ཚོགས་ནང་དྷ་སའི་གྲོས་ཚོགས་ནང་གི་རྔ་རྡུང་སྟངས་ལ་ཉན་ཏེ། ས་གནས་མང་ཚོགས་ཚོས་འཆམ་འཁྲབ་སྟངས་ཤིག་དར་ཡོད། ལྷག་པར་དུ་ཉིས་སྟོང་དགུ་ལོར་གྲོས་ཚོགས་སྒོ་བརྒྱབ་པའི་གནས་ཚུལ་ལ་བརྟེན་ཏེ། ད་ཆར་བོད་ནང་དུའང་གངས་སྐྱིད་སྤྱི་འཐུས་གྲོས་ཚོགས་ནང་གི་འཁྲབ་སྟོན་ལ་ལྟ་མཁན་དང་ཉན་མཁན་ཇེ་མང་དུ་འགྲོ་བཞིན་ཡོད་ཚོད་འདུག་ཀྱང་། གྲོས་ལ་དབང་བའི་འཁྲབ་སྟོན་པ་འདི་དག་གིས་ཁ་ཕྱི་ལ་འཁོར་ནས། ཁོ་ཚོ་གཞིས་སྲུང་སྤུན་ཟླའི་མགྲིན་ཚབ་དང་ཕྱི་ནང་གཉིས་ཀྱི་སྐུ་ཚབ་ཡིན་ཚུལ་བརྗོད་ཀྱང་། ཁ་ནང་ལ་འཁོར་ནས་མ་མཐར་སོ་སོའི་ཀུན་སྤྱོད་ཙམ་ལའང་འགན་འཁུར་གྱི་མེད།
འདས་པའི་ལོ་ཤས་རིང་སྤྱི་འཐུས་གྲོས་ཚོཊ་ནང་རྙོག་གླེང་ཆེན་པོ་གཉིས་བྱུང་ཡོད་པ་དང་། རྙོག་གླེང་སྔ་ཕྱི་གཉིས་ཀའི་སྣེ་འདྲེན་པ་དག་རབ་བྱུང་གྲྭ་བའི་གཟུགས་ཀྱི་སྤྱི་འཐུས་ཚོ་ཆགས་ཡོད། ལྷག་པར་དུ་ད་ལོར་ཇོ་ནང་ཚང་ལ་ཆོས་བརྒྱུད་སྤྱི་མཚུངས་ཀྱི་ཐོབ་ཐང་མ་རག་པར་གྲོས་ཚོགས་སྒོ་ཁར་ཞི་འབོད་ལས་འགུལ་སྤེལ་བ་སོགས་ལ་བརྟེན་ཏེ། སྤྱི་ཚོགས་ནང་ངུར་སྨིག་གྲྭ་བའི་སྡེ་ལ་ཁྱོན་ཡོངས་ནས་ལྟ་ཚུལ་ཞིག་ཡོང་གི་ཡོད་ལ། ཡང་སྒོས་ཆོས་སྲིད་བཟུང་འབྲེལ་གྱི་དགེ་སྐྱོན་དང་། སྤྱི་འཐུས་གྲོས་ཚོགས་ནང་ཆོས་བརྒྱུད་སྤྱི་འཐུས་དགོས་མིན་གྱི་རྩོད་གླེང་ཡང་ལོ་རེ་བཞིན་སྐད་ཤུགས་ཇེ་ཆེ་རེད།
