དེ་རིང་སྔ་དྲོར་པེ་ཅིན་མི་མང་ཚོགས་ཁང་ཆེན་མོའི་ནང་རྒྱ་ནག་གི་སྲིད་འཛིན་ཞི་ཅིན་ཕིན་དང་ཐའེ་ཝན་གོ་མིན་ཏང་གི་མགོ་ཁྲིད་ཀྲུའུ་ལི་ལོན་གཉིས་ཐུག་འཕྲད་བྱས་ཡོད་འདུག
ཟླ་འདིའི་ཕྱི་ཚེས་ ༢ ཉིན་ཐའེ་ཝན་གོ་མིན་ཏང་གི་མགོ་ཁྲིད་ཀྲུའུ་ལི་ལོན་རྒྱ་ནག་ཧྲང་ཧེ་གྲོང་ཁྱེར་དུ་འབྱོར་ཏེ། མཚོ་ངོགས་གཉིས་ཀྱི་ཚོང་ལས་རིག་གནས་གླེང་སྟེགས་ཐོག་མཉམ་ཞུགས་དང་། ཧྲང་ཧེ་ཧྥི་དན་སློབ་ཆེན་དང་པེ་ཅིན་སློབ་ཆེན་སོགས་ཀྱི་ནང་སྐོར་སྐྱོད་བྱེད་བཞིན་ཡོད་པ་ལྟར། དེ་རིང་ཕྱི་ཚེས་ ༤ ཉིན་གྱི་སྔ་དྲོར་པེ་ཅིན་མི་མང་ཚོགས་ཁང་ཆེན་མོའི་ནང་། རྒྱ་ནག་གི་སྲིད་འཛིན་ཞི་ཅིན་ཕིན་དང་ཐུག་འཕྲད་བྱས་ཡོད་པ་དང་། དེ་ནི་འདས་པའི་ལོ་ངོ་ ༦༦ ཙམ་གྱི་ནང་གུང་ཁྲན་ཏང་དང་གོ་མིན་ཏང་གི་སྲིད་འཛིན་མགོ་ཁྲིད་གཉིས་ཐུག་འཕྲད་བྱུང་བ་ཐོག་མ་དེ་ཆགས་ཡོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། མགོ་ཁྲིད་གཉིས་ཐུག་འཕྲད་སྐབས་ཞི་ཅིན་ཕིན་གྱིས། ད་ལྟ་མཚོ་ངོགས་གཉིས་ཀྱི་འབྲེལ་བ་གནད་འགག་གི་དུས་སྐབས་གསར་པ་ཞིག་ཏུ་སླེབ་ཡོད་ལ། ཕྱོགས་གཉིས་ཀྱི་འབྲེལ་ལམ་ཇི་ལྟར་འགྲོ་རྒྱུ་དེ་ཆབ་སྲིད་ཏང་ཁག་དང་སྤྱི་ཚོགས་ཁྱོན་ཡོངས་ཀྱི་མདུན་དུ་ལྷག་པའི་གནད་དོན་གལ་ཆེན་ཞིག་སྟེ། ཀྲུང་ཧྭ་མི་རིགས་དང་རྒྱལ་ཁབ་ཀྱི་མ་འོངས་པ། མཚོ་ངོགས་གཉིས་ཀྱི་མི་མང་གི་ཕན་བདེ་བཅས་དང་འབྲེལ་བ་ཡོད་པས་ངེས་པར་དུ་རྣོ་བསམ་གཏོང་དགོས་པ་མ་ཟད། ཏང་ཁག་གཉིས་ཀྱི་འབྲེལ་འདྲིས་ལ་ཤུགས་སྣོན་དང་མཉམ་ལས་གསར་གཏོད་ཀྱི་སྒོ་ནས་འབྲེལ་ལམ་གསར་བསྐྲུན་ལ་འཆར་བཀོད་དགོས་སྐོར་ནན་བརྗོད་བྱས་ཡོད་འདུག
སྐབས་དེར་ཀྲུའུ་ལི་ལོན་གྱིས། མ་འོངས་པར་མཚོ་ངོགས་གཉིས་ཀྱིས་ཕྱི་ལོ་ ༡༩༩༢ ལོའི་མཐུན་མོང་གི་ངོས་འཛིན་རྨང་གཞི་བྱས་ཏེ། མཉམ་འབྲེལ་གྱི་ལག་རྡང་སྦྲེལ་ནས་ཡ་གླིང་དང་ཞི་བདེ་རྒྱ་མཚོའི་ཁུལ་གྱི་ཞི་འཇགས་དང་ཁོར་ཡུག དཔལ་འབྱོར་སོགས་ཀྱི་ཐོག་ནུས་པ་འདོན་པའི་རེ་བ་ཡོད་ལ། མཚོ་ངོགས་གཉིས་ཀྱི་གཞོན་སྐྱེས་ཚོས་མངའ་ཁུལ་ཞི་བདེའི་ཐོག་མཉམ་འབྲེལ་གྱི་ལག་ཟུང་སྦྲེལ་ཐུབ་པའི་ཡིད་ཆེས་ཡོད་སྐོར་བརྗོད་ཡོད་པ་མ་ཟད། ཞི་ཅིན་ཕིན་གྱིས་འཛམ་གླིང་བདེ་ན་ད་གཟོད་ཡ་གླིང་བདེ་བ་དང་། ཡ་གླིང་བདེ་ན་ད་གཟོད་འཛམ་གླིང་བདེ་ཞེས་བཤད་པ་ལྟར། མཚོ་ངོགས་གཉིས་བདེ་ན་ད་གཟོད་ཡ་གླིང་བདེ་བ་དང་། ཡ་གླིང་བདེ་ན་ད་གཟོད་མཚོ་ངོགས་གཉིས་སྔར་ལས་བདེ་སྐོར་བརྗོད་འདུག
ཕྱི་ཚེས་ ༣ ཉིན་གྱི་མཚོ་ངོགས་གཉིས་ཀྱི་ཚོང་ལས་རིག་གནས་གླེང་སྟེགས་ཐོག ཀྲུའུ་ལི་ལོན་དང་རྒྱ་ནག་རྒྱལ་ཡོངས་སྲིད་གྲོས་ཀྱི་མགོ་ཁྲིད་ཡས་ཀྲིན་ཧྲིན་གཉིས་ཐུག་འཕྲད་བྱས་ཏེ། རྒྱ་ནག་གཅིག་ཟེར་བར་མཚོ་ངོགས་གཉིས་ལ་འགྲེལ་བཤད་མ་འདྲ་བ་ཡོད་ཀྱང་། སྤྱི་ཡོངས་ནས་རྒྱ་ནག་གཅིག་ལ་མོས་མཐུན་བྱེད་ཀྱི་ཡོད་སྟབས། མི་རབས་གསར་པ་ཚོའི་འབྲེལ་འདྲིས་བརྒྱུད་ཕྱོགས་གཉིས་ཀྱི་བསམ་བློའི་འགག་བ་རྣམས་རིམ་གྱིས་སེལ་ཐུབ་སྐོར་དང་། རྒྱ་ནག་གིས་གཙོ་གཉེར་བྱས་པའི་ཨེ་ཤ་ཡའི་རྨང་གཞིའི་སྒྲིག་ཆས་དངུལ་གཏོང་དངུལ་ཁང་དང་། རྒྱུད་གཅིག་ལམ་གཅིག་ཟེར་བའི་ཚོང་ལས་སྲིད་བྱུས་གསར་པ་ལག་བསྟར་བྱེད་ཀྱི་ཡོད་ཀྱང་། ཐའེ་ཝན་ལ་སྔར་གྱི་སྲིད་བྱུས་བརྟན་བརླིང་ངང་རྒྱུན་འཁྱོངས་བྱེད་པ་གཙོ་གནད་དུ་འཛིན་རྒྱུ་ཡིན་སྐོར་སོགས་བརྗོད་ཡོད་འདུག
ཕྱི་ལོ་ ༡༩༤༩ ལོར་གོ་མིན་ཏང་དམག་དཔུང་ལ་ཕམ་ཉེས་བྱུང་སྟེ་ཐའེ་ཝན་ནང་བྲོས་བྱོལ་དུ་ཕྱིན་ཡོད་པ་མ་ཟད། འདས་པའི་ལོ་ངོ་ ༦༠ ལྷག་རིང་མཚོ་ངོགས་གཉིས་སུ་གྱེས་ཏེ་ཆབ་སྲིད་ཀྱི་ལམ་ལུགས་ཐ་དད་དུ་གྱུར་ཡོད་ཀྱང་། རྒྱ་ནག་ཕྱོགས་ནས་ཐའེ་ཝན་རྒྱ་ནག་གི་ཆ་ཤས་ཤིག་ཏུ་ངོས་འཛིན་བྱེད་པའི་ལངས་ཕྱོགས་གཏན་ནས་མ་དོར་བར་ཐབས་ལམ་སྣ་མང་འཚོལ་གྱིན་ཡོད་ལ། ཕྱི་ལོ་ ༢༠༠༨ ལོར་མཱ་ཡེན་ཅིག་ལ་ཐའེ་ཝན་གྱི་སྲིད་འཛིན་རྒྱལ་ཁ་ཐོབ་རྗེས། མཚོ་ངོགས་གཉིས་བར་འདས་པའི་ལོ་རྒྱུས་ནང་བྱུང་མ་མྱོང་བའི་འབྲེལ་འདྲིས་ཀྱི་གནས་བབ་ཅིག་གི་མགོ་བརྩམས་ཏེ། ཚོང་ལས་ཀྱི་འབྲེལ་བ་མུ་མཐུད་ཡར་འཕེལ་འགྲོ་བཞིན་ཡོད་འདུག ཡིན་ནའང་། ཕྱོགས་གཉིས་ཀྱི་ཆབ་སྲིད་ཐད་ཀྱི་ཡིད་ཆེས་ད་ལྟའང་ཚད་དམའ་བོ་ཡིན་པ་ལྟར། ཐའེ་ཝན་གྱི་དམངས་གཙོ་ཡར་སྐུལ་ཚོགས་པ་སོགས་ཀྱིས་རྒྱ་ནག་གཅིག་གྱུར་ཟེར་བར་མཐའ་གཅིག་ཏུ་ངོ་རྒོལ་གྱིས་ཐའེ་ཝན་རང་བཙན་གྱི་རྒྱལ་ཁབ་ཅིག་ཏུ་ངོས་འཛིན་བྱེད་ཀྱིན་ཡོད་པ་རེད།
གསར་འགོད་པ། པདྨ་མཚོ།
