ཉེ་ལམ་རྒྱ་ནག་ནང་མི་བཞིའི་ཤོག་ཁག་ཕམ་ཉེས་སྐོར་གྱི་ཟིན་ཐོའི་དེབ་ཅིག་དཔར་འགྲེམས་བྱས་པ་དང་བསྟུན་ཏེ་སྤྱི་ཚོགས་ནང་གླེང་སློང་དང་ཚོད་དཔག་སྣ་ཚོགས་ཡོང་གི་ཡོད་པ་དང་། ཁག་ཅིག་གིས་དེ་ནི་སྲིད་འཛིན་ཟུར་བ་ཅང་ཙེ་མིན་སྲོག་ཤིང་ཡིན་པའི་མི་བཞིའི་ཤོག་ཁག་གསར་པ་རྩ་མེད་གཏོང་རྒྱུའི་སྔོན་བརྡ་ཞིག་ཡིན་སྐོར་གླེང་གི་འདུག
ཟླ་སྔོན་མའི་ཚེས་མགོར་རྒྱ་ནག་གཞོན་ནུའི་དཔེ་སྐྲུན་ཁང་གིས་ ༼ མི་བཞི་ཤོག་ཁག ཧྲང་ཧེ་ངན་རོགས་གཏོར་སྐྱོན་ཟིན་ཐོ། ༽ ཞེས་པའི་དེབ་ཅིག་བཏོན་ཡོད་པ་དང་། རྒྱ་ནག་གི་བརྒྱུད་ལམ་ཁག་ཏུ་དེབ་དེ་ཤུགས་ཆེན་པོ་ཁྱབ་བསྒྲགས་བྱེད་བཞིན་ཡོད་ཀྱང་། ཕྱིའི་རང་དབང་གི་བརྒྱུད་ལམ་ཁག་ཏུ་རྒྱ་ནག་གིས་གནས་ཚུལ་དེ་ཤུགས་ཆེན་པོ་ཁྱབ་བསྒྲགས་བྱེད་པའི་དམིགས་ཡུལ། ཅང་ཙེ་མིན་ལ་ཁ་གཏད་གཅོག་ཆེད་ཡིན་པ་དང་། ཞི་ཅིན་ཕིན་གྱིས་སྟག་རྒན་མཐའ་ནས་སྐོར་བའི་འཐབ་ལུགས་ཤིག་ཡིན་པ་མ་ཟད། ཅང་ཙེ་མིན་གྱི་མལ་ཚང་གཏོར་རྒྱུའི་སྔོན་བརྡ་ཞིག་ཀྱང་ཡིན་ཚུལ་སོགས་རྗོད་བཞིན་འདུག
ཉེ་ཆར་རྒྱ་ནག་གི་སྲིད་འཛིན་ཟུར་བ་ཅང་ཙེ་མིན་གྱི་བུ་ཆེ་བ་ཅང་མིན་ཧིན་(Jiang Mianheng)གྱི་སྟངས་འཛིན་འོག་ཡོད་པའི་རྒྱ་ནག་དྲ་འབྲེལ་བརྒྱུད་ལམ་སྤྱིའི་འགན་འཛིན་གཞོན་པ་ཟུར་བ་ལིན་རོན་ཆཱན་ (Leng Rongquan)ལ་རྒྱ་ནག་གཞུང་གིས་ཞིབ་བཤེར་བྱས་ཡོད་པ་མ་ཟད། ཅང་མིན་ཧིན་གྱིས་བཟོ་སྐྲུན་བྱས་པའི་ ‘གསེར་ཕུབ་ལས་འཆར་’ ཞེས་པའི་སྤྱིའི་འཆར་འགོད་པ་མཱ་ཞོ་ཏོན་ (Ma Xiaodong) འཛིན་བཟུང་བྱས་པའི་ཐད། རྒྱ་ནག་གི་ཆབ་སྲིད་དབྱེ་ཞིབ་པ་ཚོས་ད་ནི་ཅང་མིན་ཧིན་གྱི་འཚོ་བའང་ཡག་པོ་ཡོང་རྒྱུ་མིན་པ་མགོ་བཙུགས་ཟིན་པ་མ་ཟད། ཅང་ཙེ་མིན་གྱི་བདེ་སྐྱིད་ཀྱི་འཚོ་བའང་མཇུག་བསྡུ་རན་བསླེབ་ཡོད་སྐོར་བརྗོད་འདུག
ཟླ་སྔོན་མའི་ཚེས་ ༢༡ ཉིན་རྒྱ་ནག་གསར་འགྱུར་དྲ་བས་གནས་ཚུལ་སྤེལ་བ་ལྟར་ན། ཉེ་ཆར་རྒྱ་ནག་གཞོན་ནུའི་དཔེ་སྐྲུན་ཁང་གིས་དཔར་བསྐྲུན་བྱས་པའི་ <<མི་བཞི་ཤོག་ཁག ཧྲང་ཧེ་ངན་རོགས་གཏོར་སྐྱོན་ཟིན་ཐོ།>> ཞེས་པའི་དེབ་དེ་ནི་རིག་གསར་རྗེས་ཀྱི་མི་བཞི་ཤོག་ཁག་གཏོར་སྐྱོན་དང་འབྲེལ་བའི་ཟིན་ཐོ་ཞིག་ཡིན་པ་དང་། དེའི་ནང་ལོ་ངོ་ ༣༩ སྔོན་ཏེ་ ༡༩༧༦ ལོའི་ཟླ་ ༡༠ ཚེས་ ༦ ཉིན་གྱི་དགོང་མོའི་ཆུ་ཚོད་ ༨ པ་ཡས་མས་ལ་ཧྭ་གོ་ཧྥིན་ (Hua Guofen) དང་། ཡད་ཅན་དབྱིན་ (Ye Jiangying) གཉིས་ཀྱིས་ཀྲུང་ནན་ཧེ་ཡི་ཧེད་རིན་ཚོམས་ཁང་དུ། ཅང་ཆིན་(Jiang Qing) དང་། ཀྲང་ཁྲོན་ཆའོ་(Zhang Chunqiao)། ཡའོ་ཝན་ཡོན་ (Yao wenYuan) ཝང་ཧོན་ཝེན་ (Wang Hongwen) སོགས་ལ་ལོགས་སུ་ཞིབ་བཤེར་ལག་བསྟར་བྱ་རྒྱུའི་ཁྱབ་བསྒྲགས་བྱས་པ་བཀོད་ཡོད་འདུག
ཀོང་མིན་དྲ་བས་གནས་ཚུལ་སྤེལ་བ་ལྟར་ན། དེབ་དེའི་མགོ་ནས་བཟུང་ཧྭ་གོ་ཧྥིན་དང་ཡད་ཅན་དབྱིན་སོགས་ཀྱིས་ཇི་ལྟར་མི་བཞི་ཤོག་ཁག་ཧྲང་ཧེ་རྐང་འཛིན་པའི་གནད་དོན་གསང་བས་ཐག་གཅོད་བྱས་པ་དང་། མི་བཞི་ཤོག་ཁག་ཧྲང་ཧེ་ངན་རོགས་ལྷག་འཕྲོ་རྣམས་ཇི་ལྟར་མཇུག་བསྡུ་བའི་ལམ་ཁར་བསྐྱོད་ཚུལ་སོགས་བྲིས་ཡོད་འདུག་ལ། ཟིན་ཐོ་དེ་རྒྱ་ནག་ཏང་གི་ལོ་རྒྱུས་ཉམས་ཞིབ་པ་རྒན་པ་དང་། སྔོན་ཆད་ <<རྒྱ་ནག་ཏང་གི་ལོ་རྒྱུས་དཀྱོག་མཚམས་ཀྱི་མི་སྣ་དང་དོན་རྐྱེན་>> ཞེས་པའི་རྩོམ་པ་པོ་ལི་ཧེ་ཝིན་ (Li Haiwen) དང་། ༡༩༧༦ ལོར་རྒྱ་གཞུང་གིས་ཧྲང་ཧེ་ལ་བཏང་བའི་གཞུང་དོན་ཚོགས་མི་ཝང་ཧྲོ་ཅཱ་ (Wang Shoujia) གཉིས་ཀྱིས་མཉམ་འབྲེལ་ཐོག་བརྩམས་པ་ཞིག་ཡིན་འདུག
ཆབ་སྲིད་དཔྱད་ཞིབ་པ་ཧྥང་ལིན་ཏཱ་ (Fang Linda) ཡིས། སྲིད་གཞུང་གིས་ཆབ་སྲིད་ལྷན་ཁང་ནང་གི་ལྐོག་ཟ་རུལ་སུངས་ལ་རྒོལ་རྡུང་གཏོང་བཞིན་པའི་སྐབས་འདིར་མི་བཞི་ཤོག་ཁག ཧྲང་ཧེ་ངན་རོགས་གཏོར་སྐྱོན་ཟིན་ཐོ་ཞེས་པ་དཔར་བསྐྲུན་བྱས་ཏེ་རྒྱ་ནག་གི་བརྒྱུད་ལམ་ཁག་ཏུ་ཤུགས་ཆེན་པོ་ཁྱབ་བསྒྲགས་འགྲོ་བཞིན་པ་ནི་སྟབས་འཁེལ་བ་ཞིག་རྩ་བ་ནས་མ་རེད། དེ་ནི་ཚད་མཐོའི་ཆབ་སྲིད་ཀྱི་བརྡ་ལན་ཞིག་དང་། དེའི་ནང་གི་ ‘མི་བཞི་ཤོག་ཁག’ དང་། ‘ཧྲང་ཧེ་ངན་རོགས་ལྷག་འཕྲོ།’ ‘ཤོག་ཚོགས་རྐང་འཛིན།’ ‘མཇུག་བསྡུའི་ལམ་ཁ།’ ཞེས་པའི་ཚིག་དེ་དག་ནི་རྒྱ་ནག་གཞུང་གིས་ཅང་ཙེ་མིན་ཤོག་ཁག་སྐོར་བཅོམ་གཏོང་སྟངས་ཤིག་ཡིན་སྐོར་བརྗོད་འདུག
ད་དུང་འདས་པའི་ལོ་རྒྱུས་ཁྲོད་ཀྱི་མི་བཞི་ཤོག་ཁག་དང་། ད་ལྟའི་མི་བཞི་ཤོག་ཁག་གསར་བ་གཉིས་ལ་འདྲ་བའི་ཆ་ཁག་ཅིག་ཡོད་པ་ནི། ཐོག་མ་ལོ་རྒྱུས་ཀྱི་མི་བཞི་ཤོག་ཁག་དང་། ད་ལྟ་སྲིད་གཞུང་གི་འཛིན་བཟུང་འོག་ཡོད་པའི་ཀྲུའུ་ཡོན་ཁཱང་དང་ཞི་ཚད་ཧོ། པའོ་ཞི་ལེ། ལིན་ཅི་ཧྭ་བཅས་མི་བཞི་ཤོག་ཁག་གསར་བ་གཉིས་ནི་མི་གྲངས་ཀྱི་ཆ་ནས་འདྲ་མཚུངས་ཡིན་པ་དང་། གཉིས་ནས་ད་ལྟ་བརྒྱུད་ལམ་ཁག་ཏུ་འགྲོ་བཞིན་པའི་ནང་། ‘ཧྲང་ཧེ་ངན་རོགས་ལྷག་འཕྲོ’ ཟེར་བའི་མི་བཞི་ཤོག་ཁག་རྙིང་པའི་ལྟེ་གནས་ཧྲང་ཧེ་ཡིན་པ་གང་ཞིག་ལ། ད་ལྟའི་ཅང་ཙེ་མིན་གྱི་ཚང་མལ་ཡང་ཧྲང་ཧེ་ཡིན་པ་མ་ཟད་དེ་གཉིས་ཀྱི་དབང་ཤུགས་ཀྱང་འདྲ་བོ་ཡིན་པ། གསུམ་ནས་རྒྱ་ནག་གི་བརྒྱུད་ལམ་ཁག་ཏུ། སྔོན་ཆད་ཀྱི་མི་བཞི་ཤོག་ཁག་གི་གནད་དོན་གསང་བའི་སྒོ་ནས་ཐག་བཅོད་བྱས་ཏེ་ཧྲང་ཧེ་ངན་རོགས་ཇི་ལྟར་མཇུག་བསྡུས་པ་སོགས་ཀྱི་ཚིག་འབྲུ་དེ་དག་ཉེ་ཆར་ཞི་ཅིན་ཕིན་སྲིད་གཞུང་གིས་ཧྲང་ཧེ་དཔོན་རིགས་ཚོའི་གོ་གནས་གཙང་ཕྱག་བྱས་པ་དང་འདྲ་བོ་ཡོད་སྟབས། ད་རེབ་དེབ་དྲིལ་བསྒྲགས་བྱེད་པ་དེ་ཅང་ཙེ་མིན་དང་ཅང་ཤོག་ཁག་གི་དབང་ཤུགས་ཐག་གཅོད་བྱེད་པའི་དུས་ལ་བསླེབ་པ་བསྟན་ཡོད་ཟེར།
ཁོང་གིས་མུ་མཐུད་དུ། ཞི་ཚད་ཧོ་འདས་གྲོངས་སུ་ཕྱིན་རྗེས་ཀའོ་པོ་ཞོན་གོ་གནས་ནས་ལྷུང་གྲབས་ཡོད་པ་མ་ཟད། ཞི་ཅིན་ཕིན་གྱིས་དམག་དོན་དང་ཆབ་སྲིད། དྲིལ་བསྒྲགས་སོགས་ཕྱོགས་ཡོངས་ནས་དབང་ཆ་སྟངས་འཛིན་ཤུགས་ཆེ་རུ་གཏོང་གི་ཡོད་ལ། དེ་དང་འབྲེལ་ནས་དྲིལ་བསྒྲགས་གཙོ་གཉེར་བྱས་པའི་ཅང་ཤོག་ཁག་གི་ཆབ་སྲིད་རྒྱུན་ལས་ལིའུ་ཡོན་ཧྲན་ (Li Yunshan) ཡང་ཟུར་དུ་འཕུད་བཞིན་ཡོད། ཞི་ཅིན་ཕིན་གྱིས་རུལ་སུངས་ལ་རྒོལ་རྡུང་བཏང་སྟེ་སྟག་ལ་འཐབ་འཛིང་བྱེད་བཞིན་པ་དེ་ནི། ཚིན་ཆིན་ཧོན་དང་ཅང་ཙེ་མིན་གཉིས་ཀྱི་འགྲམ་ལ་བཅར་ནས་བཙིར་བ་དང་འདྲ་ལ། ཉེ་ཆར་ཞི་ཅིན་ཕིན་གྱིས་གོ་རིམ་ལྡན་པའི་ཐོག་ནས་ཕྱི་ཕྱོགས་སུ་ཅང་ཙེ་མིན་ལ་ཁ་གཏད་ཀྱི་གླེང་སློང་སྤེལ་བ་སོགས་ནི། རྗེས་ཕྱོགས་ཅང་ཙེ་མིན་གྱི་གྱོད་དོན་དངོས་སུ་ཁྱབ་སྤེལ་བྱེད་རྒྱུའི་ལམ་ཁ་བཟོས་པ་རེད། ཅེས་བརྗོད་འདུག
ལོ་འདིའི་ཕྱི་ཟླ་ ༡ ཚེས་ ༡༦ ཉིན་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་ཀྲུའུ་ཡོན་ཁཱང་དང་པོ་ཞི་ལེ་གཉིས་ཀྱིས་བྱ་བ་ཚབ་ཆེན་ཞིག་བཟོ་འཆར་ཡོད་སྐོར་བསྒྲགས་ཡོད་པ་ལས་བྱ་བ་ཚབ་ཆེན་ཅི་ཞིག་བྱས་ཡོད་མེད་ཁ་གསལ་མེད་ཀྱང་། ཕྱི་ཕྱོགས་ཀྱི་བརྒྱུད་ལམ་ཁག་ཏུ་ཀྲུའུ་ཡོན་ཁཱང་དང་པའོ་ཞི་ལེ་གཉིས་ནི་ཅང་ཙེ་མིན་གྱི་མི་ཡིན་པ་དང་། ཁོ་གཉིས་ཀྱིས་རྒྱ་གཞུང་ལ་གྱེན་ལོག་བྱ་འཆར་ཡོད་སྐོར་བཀོད་ཡོད། ཕྱི་ཟླ་ ༢ པའི་ཚེས་ ༢༣ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་དྲ་ཐོག་ཏུ། ཀྲུའུ་ཡོན་ཁཱང་དང་ཞི་ཚད་ཧོ་སོགས་མཉམ་འབྲེལ་བྱས་པའི་ནག་ཉེས་བཀོད་ཡོད་པའི་ནང་། “མི་ཁ་ཤས་ཤིག་ཀྲུང་གོའི་ཏང་ནང་ཡིབ་ནས་བསྡད་ཡོད་པ་མ་ཟད། ཡིབ་སྟངས་ཀྱང་ཧ་ཅང་གཏིང་ཟབ་མོ་རེད། ཁོ་ཚོས་ཤོག་ཁག་ཡར་འཐེན་དང་ངན་རོགས་དཔུང་སྒྲིག་བྱས་ཏེ། རུལ་སུངས་མཉམ་སྤྱོད་ཀྱི་འབྲེལ་བའི་ར་བ་བཟོས་པ་དང་། ལྐོག་ཟ་རུལ་སུངས་དང་ཆབ་སྲིད་ཀྱི་གནད་དོན་ཕན་ཚུན་ངོ་བོ་འདྲེས་སུ་བཅུག་པ། ཆབ་སྲིད་སྟེང་ལ་ལྐོག་གཡོ་ངན་ཇུས་བྱས་པ།” ཅེས་སོགས་འཁོད་འདུག
ཕྱི་ཟླ་ ༣ ཚེས་ ༡༥ ཉིན་རྒྱ་ནག་ཚད་ཅིན་དྲ་བའི་སྟེང་། མི་དམངས་ཉིན་རེ་གསར་ཤོག་གི་རྩོམ་སྒྲིག་འགན་འཛིན་ཀྲུའུ་རོའུ་ཅིན་ (Zhou Ruijin) ཡིས་ཧོང་ཧྥོ་ཞིན་ཕིན་ (Huangfu Xinping) ཞེས་པའི་སྨྱུག་མིང་འོག་རྩོམ་ཡིག་ཅིག་སྤེལ་བའི་ནང་། ཀྲུའུ་ཡོན་ཁཱང་དང་པའོ་ཞི་ལེ། ཞི་ཚད་ཧོ། ལིན་ཅི་ཧྭ་བཅས་ཀྱི་གྱོད་དོན་ཕན་ཚུན་འབྲེལ་བ་ཡོད་པ་དང་། ཁོ་ཚོའི་རོགས་པ་ལིས་ཏོན་ཧྲིན་ (Li dongsheng) དང་། ཅང་ཅད་མིན་ (Jiang Jiemin) སོགས་དང་འབྲེལ་ཏེ་རུལ་སུངས་ཀྱི་དྲ་བ་ཆེན་པོ་ཞིག་གྲུབ་ཡོད་པ་དེ་གནམ་འོག་ལ་ཤོང་དཀའ་བ་ཞིག་ཆགས་ཡོད་ཅེས་བཀོད་འདུག
ཉིན་དེར་ཧོང་ཀོང་རྨ་བྱ་བརྙན་འཕྲིན་ཁང་གིས་རྒྱ་ནག་འཕྲོད་བསྟེན་ལས་ཁུངས་ཀྱི་འགན་འཛིན་གཞོན་པ་ཟུར་བ་ཧོང་ཅེད་ཧྥོ་ (Huang Jiefu) ལ་བཅའ་འདྲི་ཞིག་བྱས་པའི་ནང་དུའང་། ཀྲུའུ་ཡོན་ཁཱང་གོ་གནས་ཕབ་པ་དང་མཉམ་དུ་རྒྱ་ནག་སྲོག་ཆད་བཙོན་པའི་དབང་བོ་སྤོ་འཛུགས་ཀྱི་ཁེ་ལས་ཀྱང་མེད་པ་བཟོས་ཡོད། ཅེས་བརྗོད་པ་དེ་ནི་རྒྱ་ནག་གཞུང་ཕྱོགས་ཀྱི་མི་སྣ་ཞིག་གིས་ཀྲུའུ་ཡོན་ཁཱང་སྲོག་ཆད་བཙོན་པའི་དབང་བོ་སྤོ་འཛུགས་ཀྱི་ཚོང་ལས་ནང་འཛུལ་ཡོད་པ་རྗོད་མཁན་ཐོག་མ་དེ་ཆགས་ཡོད་འདུག
ཕྱི་ཟླ་ ༣ ཚེས་ ༡༨ ཉིན་རྒྱ་ནག་ཆེས་མཐོའི་ཁྲིམས་ཁང་གིས་ཁྱབ་བསྒྲགས་བྱས་པའི་ནང་། ཀྲུའུ་ཡོན་ཁཱང་དང་པའོ་ཞི་ལེ་སོགས་ཀྱི་ཁྲིམས་འགལ་ཚོགས་པས་ ‘ཆབ་སྲིད་ཀྱི་བྱེད་སྒོ་སྤེལ་པ’ ཞེས་འཁོད་དེ། ཚིག་དེའི་ཟུར་དུ་ཀྲུའུ་ཡོན་ཁཱང་དང་པའོ་ཞི་ལེ་གཉིས་ཕྱོགས་མཐུན་ཡིན་པ་དང་། ཁོ་གཉིས་ཀྱིས་སྲིད་གཞུང་གི་ལས་དོན་གང་རུང་ཐོག་གནོན་སྐྱོན་ཚབ་ཆེན་བཟོ་རྒྱུའི་འཆར་གཞི་སྒྲིག་ཡོད་པ་སོགས་བསྟན་ཡོད། དེ་བཞིན། ཕྱི་ཟླ་ ༣ ཚེས་ ༣༡ ཉིན་རྒྱ་ནག་དམག་དོན་ཕྱོགས་ནས་གནས་ཚུལ་བསྒྲགས་པའི་ནང་། རྒྱ་ནག་དམག་དོན་ལྷན་ཁང་གི་འགན་འཛིན་གཞོན་པ་ཟུར་བ་ཞི་ཚད་ཧོ་ཡིས་ ‘སྒེར་གྱི་ཕྱོགས་ཁག་སྒྲིག་པ’ དང་། ‘དབང་ཆ་ཉོ་ཚོང་བྱས་པ’ སོགས་བརྗོད་དེ། ཞི་ཚད་ཧོ་སྒེར་ལ་ཤོག་ཁག་གི་ཚོགས་པ་ཡོད་ཚུལ་སོགས་བསྟན་ཡོད།
ཕྱི་ཟླ་ ༡ ཚེས་ ༡༨ ཉིན་ཏྭ་ཅི་ཡོན་དྲ་བས་ཀྲོའོ་ཙི་ཡཱང་ (Zhao Ziyang) གི་བཅའ་འདྲི་ཞིག་ལུང་འདྲེན་བྱས་པའི་ནང་། ཀྲོའོ་ཙི་ཡཱང་གིས་ཀྲུའུ་ཡོན་ཁཱང་དང་ལིན་ཅི་ཧྭ། པའོ་ཞི་ལེ། ཞི་ཚད་ཧོ་བཅས་ལས་གྲུབ་པའི་ ‘མི་བཞི་ཤོག་ཁག་གསར་བ’ ཡི་རུལ་སུངས་ཚོགས་ཁག་གི་རྩ་བ་ཅང་ཙི་མིན་ཡིན་པ་དང་། དེང་སྐབས་ཀྲུའུ་ཡོན་ཁཱང་གི་གྱོད་དོན་རྒྱ་ཆེ་རུ་ཕྱིན་པ་དང་བསྟུན་ཏེ། ཞི་ཅིན་ཕིན་གྱིས་ཞིབ་ཚགས་པོས་ཅང་ཤོག་ཁག་གི་གྱེན་ལོག་དང་དབང་བོ་གསོན་ལེན་གྱི་ནག་ཉེས་གཉིས་ཕྱིར་བཏོན་པ་དང་མཉམ་དུ། ནག་ཉེས་དེ་ལ་འབྲེལ་བ་ཡོད་པའི་ཚིན་ཆིན་ཧོན་དང་ཅང་ཙེ་མིན་སོགས་ལའང་སྔོན་བརྡ་བཏང་པ་རེད། ཅེས་བརྗོད་འདུག
ཧྲང་ཧེ་ནི་རྒྱ་ནག་གི་སྲིད་འཛིན་ཟུར་བ་ཅང་ཙེ་མིན་གྱི་ཚང་མལ་ཡིན་པ་དང་། ཞི་ཅིན་ཕིན་གྱིས་གོ་རིམ་ལྡན་པའི་ཐོག་ནས་ཧྲང་ཧེ་ནང་གི་ཅང་ཤོག་ཁག་གི་དཔོན་ས་བསྐོར་བཅོམ་བྱེད་བཞིན་ཡོད་པ། ད་ཆར་ཧྲང་ཧེ་དཔོན་རིགས་ཚོ་མུ་མཐུད་དུ་གོ་གནས་ནས་ཕབ་པའི་ནང་། ཕྱི་ཟླ་ ༤ ཚེས་ ༡༧ ཉིན་ཧྲང་ཧེ་ཚྭ་རླངས་རྫས་འགྱུར་ལས་ཁུངས་ (上海氯碱化工股份有限公司) ཀྱི་འགན་འཛིན་ཧི་ཀོང་ (He Gang) ལ་ཞིབ་བཤེར་དང་། ཟླ་ ༤ ཚེས་ ༡༦ ཉིན་ཧྲང་ཧེ་གྲོང་ཁྱེར་རྒྱལ་ཁབ་བདེ་འཇགས་ལྷན་ཁང་གི་འགན་འཛིན་ཀྲུའུ་ཞོ་ཁྲོ་ (Zhu Xiaochao) གོ་གནས་ནས་ཕབ་པ། ཉིན་དེར། ཧྲང་ཧེ་རྣོ་ལྕགས་ལྷན་ཚོགས་ཀྱི་མཐོ་རིམ་མི་སྣ་ ༣༣ ལ་སྐྱོན་བརྗོད་བྱས་ཏེ། ཞི་ཅིན་ཕིན་གྱི་གཏན་འབེབས་དོན་ཚན་ ༨ ལ་འགལ་བའི་ནག་ཉེས་ཡོད་སྐོར་བསྒྲགས་ཡོད་འདུག
ད་དུང་། ཟླ་སྔོན་མའི་ཚེས་ ༡༠ ཉིན་ཧྲང་ཧེ་སྤུན་གྲོགས་ལས་ཁུངས་ (上海华谊公司) ཀྱི་མགོ་གཙོ་གཞོན་པ་ཟུར་བ་ལི་ཅོན་ (Li Jun) ལ་ཞིབ་བཤེར་དང་། ཕྱི་ཟླ་ ༣ ཚེས་ ༡༧ ཉིན་ཧྲང་ཧེ་གྲོང་ཁྱེར་སྲིད་གཞུང་གི་མགོ་གཙོ་གཞོན་པ་ཏད་ཧེ་པོ་ (Dai Haibo) གོ་གནས་ནས་ཕབ་སྟེ་ཞིབ་བཤེར་བྱེད་བཞིན་པ་གསལ་བསྒྲགས་དང་ ༢༠༡༤ ལོའི་ཟླ་ ༩ ཚེས་ ༢༩ ཉིན་ཁོ་རང་ཧྲང་ཧེ་རང་དབང་ཚོང་འབྲེལ་ཚོད་ལྟའི་རྒྱུན་ལས་འགན་འཛིན་གཞོན་པའི་གོ་གནས་ནས་ཕབ་སོགས་ཀྱི་གནས་ཚུལ་བྱུང་ཡོད།
ཅང་ཙེ་མིན་གྱི་བུ་ཆེ་བ་ཅང་མིན་ཧིན་ཕྱོགས་ཀྱི་ཆབ་སྲིད་དང་དཔལ་འབྱོར་སྡེ་ཚན་གྱི་མཐོ་རིམ་དཔོན་རིགས་ཚོར་གཞུང་གིས་ཞིབ་བཤེར་བྱེད་མགོ་ཚུགས་ཡོད་པ་ནི། ཟླ་སྔོན་མའི་ཚེས་ ༡༧ ཉིན་ལོ་ལྔ་ཡི་སྔོན་ནས་རྒན་ཡོལ་ཞུས་ཟིན་པའི་རྒྱ་ནག་གློག་འཕྲིན་ལས་ཁུངས་ཀྱི་སྤྱི་གཉེར་བ་གཞོན་པ་ཟུར་བ་དང་། ཏང་གི་རྩ་འཛུགས་མགོ་གཙོ་གཞོན་པ་ལིན་རོན་ཆཱན་ཁྲིམས་འགལ་དོགས་གཞིའི་འོག་ཞིབ་བཤེར་བྱེད་པ་ཁྱབ་བསྒྲགས་བྱས་ཡོད་ལ། རྒྱ་ནག་གི་ཚད་ཞིན་དྲ་བའི་གནས་ཚུལ་སྤེལ་བའི་ནང་། ༢༠༠༢ ལོ་ནས་ ༢༠༠༤ ལོའི་བར་དུ་ཅང་མིན་ཧིན་གྱིས་སྟངས་འཛིན་བྱས་པའི་རྒྱ་ནག་དྲ་འབྲེལ་བརྒྱུད་ལམ་གྱི་མགོ་གཙོ་གཞོན་པའི་གོ་གནས་ལིན་རོན་ཆཱན་གྱིས་འགན་ཁུར་ཡོད་པ་དང་། དེའི་རྗེས་ལིན་རོན་ཆཱན་གྱིས་ལིན་ཅི་ཧྭ་ཡི་སྐྱེས་དམན་ཀོ་ལི་ཕིན་དང་ནུ་བོ་ལིན་ཝན་ཁྲིན་སོཊ་ལ་ཚོང་འབྲེལ་བྱས་ཡོད་ཚུལ་བརྗོད་འདུག
ཟླ་སྔོན་མའི་ཚེས་ ༡༦ ཉིན་ལ་རྒྱ་ནག་སྤྱི་བདེ་ལྷན་ཁང་ཚན་རྩལ་བརྡ་འཕྲིན་ལས་ཁུངས་ཀྱི་འགན་འཛིན་གཞོན་པ་མཱ་ཞོ་ཏོན་འཛིན་བཟུང་བྱས་ཡོད་འདུག མཱ་ཞོ་ཏོན་ནི་ ‘གསེར་ཕུབ་ལས་འཆར་’ ཞེས་པའི་ལས་འཆར་འགན་འཛིན་གཙོ་གྲས་ཤིག་ཡིན་འདུག ‘གསེར་ཕུབ་ལས་འཆར’ ནི་རྒྱ་གཞུང་གིས་མང་ཚོགས་ལྟ་སྲུང་སྟངས་འཛིན་བྱེད་པ་དང་། རྒྱ་ནག་ནང་གི་དྲང་བདེན་གྱི་ངོ་བོ་བཀག་སྡོམ་བྱེད་པའི་གསང་བའི་ལས་འཆར་ཞིག་ཡིན་འདུག་ལ་། དེ་རྒྱ་ནག་གི་མགོ་གཙོ་ཅང་ཙེ་མིན་གྱི་བུ་ཅང་མིན་ཧིན་གྱིས་སྟངས་འཛིན་དང་བཟོ་བསྐྲུན་བྱས་པ་ཞིག་ཡིན་འདུག
ན་ནིང་ནས་བཟུང་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས། ཅང་མིན་ཧིན་གྱི་སྟངས་འཛིན་འོག་ཡོད་པའི་རྒྱ་ནག་དབུས་ཁ་པར་འབྲེལ་མཐུད་བརྒྱུད་ལམ་དང་རྒྱ་ནག་དབུས་བརྡ་འཕྲིན་ཁ་པར་འབྲེལ་ལམ། རྒྱ་ནག་ཚན་རིག་ལྷན་ཚོགས་སོགས་ཀྱི་མཐོ་རིམ་དཔོན་རིགས་ཚོ་མུ་མཐུད་དུ་གོ་གནས་ནས་ཕབ་ཡོད་ཅིང་། ལོ་འདིའི་ཕྱི་ཟླ་ ༡ ཚེས་ ༣ ཉིན་ཅང་ཙེ་མིན་གྱི་ནང་མི་རྣམས་ཤར་ཕྱོགས་རི་བོར་བསྐྱོད་པའི་གནས་ཚུལ་ཁྱབ་རྗེས་རྒྱ་ནག་གི་བརྒྱུད་ལམ་ཁག་ཏུ་ཅང་ཙ་མིན་གྱི་ནང་མི་ཚོའི་གནས་ཚུལ་ཡོངས་རྫོགས་ནག་གསུབ་བྱས་པ་དང་། ཟླ་དེའི་ཚེས་ ༦ ཉིན་ལ་ཅང་མིན་ཧིན་རྒྱ་ནག་ཚན་རིག་ལྷན་ཚོགས་ཧྲང་ཧེ་ཡན་ལག་ཁང་གི་འགན་འཛིན་གྱི་གོ་གནས་ནས་ཕབ་ཡོད་འདུག
ཆབ་སྲིད་དབྱེ་ཞིབ་པ་ཀྲུའུ་ཞའོ་ཧོའུ་ (Zhou Xiaohui) ཡིས། རྒྱ་ནག་དབུས་ཁ་པར་འབྲེལ་མཐུད་བརྒྱུད་ལམ་དང་རྒྱ་ནག་བརྡ་འཕྲིན་ཁ་པར་འབྲེལ་ལམ། རྒྱ་ནག་ཚན་རིག་ལྷན་ཚོགས་སོགས་ཀྱི་ཁེ་ཕན་ས་ཆར་རླུང་འཚུབ་གཡུགས་ཏེ། སྔོན་ཆད་ཀྱི་གྱོད་དོན་རྙིང་པ་དག་ཆུའི་ཁ་རུ་ཐོན་པ་ནི་ཅང་མིན་ཧིན་གྱི་གནས་སྟངས་ཇེ་སྡུག་ཏུ་འགྲོ་རྒྱུ་ཡིན་པ་མ་ཟད། ཅང་ཙེ་མིན་གྱི་ཉི་མའང་མགྱོགས་པོར་ནུབ་རྒྱུ་ཡིན་པ་མཚོན་ཐུབ། ཅེས་བརྗོད་འདུག
ཕྱི་ཟླ་ ༤ ཚེས་ ༢༠ ཉིན། རྒྱ་ནག་མི་མང་ཉིན་རེ་གསར་ཤོག་སྟེང་༼མགོ་ཁྲིད་ནང་མིའི་འགྲོ་ལུགས་ནི་སྒེར་གྱི་དོན་དག་མིན༽ཅེས་པའི་རྩོམ་ཡིག་ཅིག་བཀོད་ཡོད་པའི་ནང་། སྟག་རྒན་ཀྲུའུ་ཡོན་ཁཱང་དང་ལིན་ཅི་ཧྭ་སོགས་གོ་གནས་ནས་ལྷུང་པའི་རྒྱབ་ཕྱོགས་སུ་ཁོ་ཚོའི་ནང་མི་དང་ཁྱིམ་རྒྱུད་ཀྱིས་ལྐོག་ཟ་རུལ་སུངས་བྱས་པའི་རྟགས་མཚན་ཞིག་ཀྱང་མངོན་འདུག ཅེས་འཁོད་འདུག
ཆབ་སྲིད་དབྱེ་ཞིབ་པ་ཞཱ་ཞོ་ཆང་གིས། “ཀྲུའུ་ཡོན་ཁཱང་ནི་སྟག་རྒན་ཤི་བོ་ཞིག་རེད། ཁོ་ནི་ཞི་ཅིན་ཕིན་གྱིས་སྟག་ལ་འཐབ་པའི་རུལ་སུངས་རྒོལ་རྡུང་གི་དམིགས་འབེན་དེ་མ་རེད། དེང་སྐབས་ཞི་ཅིན་ཕིན་དཔུང་ཁག་གིས་ཀྲུའུ་ཡོན་ཁཱང་ལ་འདྲི་གཅོད་བྱས་པའི་ཐད་ནས་བཤད་ན། དེའི་གོ་དོན་མང་པོ་ཞིག་དང་དམིགས་འབེན་སོགས་ཅང་ཙེ་མིན་རེད། ཞི་ཅིན་ཕིན་དང་ཝང་ཆི་ཧྲན་གཉིས་ཀྱིས་སྟག་ལ་འཐབ་ལུགས་དེ་ནི། མང་ཆེ་བ་ཕྱི་ཕྱོགས་ནས་བསྐོར་བཅོམ་དང་། ནང་མི་ཚོ་ནས་མགོ་འཛུགས་བཞིན་ཡོད་ལ། ད་ལོ་ནས་ཞི་ཅིན་ཕིན་གྱིས་ཅང་མིན་ཧིན་གྱི་སྟེང་ལ་འགུལ་སྐྱོད་བྱེད་མགོ་བཙུགས་ཡོད། ཅང་མིན་ཧིན་ལ་ཞིབ་བཤེར་གཏིང་ཇེ་ཟབ་ནས་ཇེ་ཟབ་ཏུ་བཏང་སྟེ་རིམ་གྱིས་ཅང་ཙེ་མིན་གྱི་གམ་དུ་བཅར་རྒྱུ་རེད།” ཅེས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
