རྒྱ་ནག་གཞུང་གིས་འཛམ་གླིང་དམག་ཆེན་གཉིས་པ་མཇུག་སྒྲིལ་ནས་ལོ་ ༧༠ འཁོར་བའི་དུས་སྟོན་རྒྱ་ཆེན་པོ་ཞིག་སྲུང་གཙི་བྱ་རྒྱུ་ཡིན་འདུག
ཁ་སང་རྒྱ་ནག་གཞུང་གིས་གསལ་བསྒྲགས་ཤིག་སྤེལ་ཏེ། འདི་ལོའི་ཕྱ་ཟླ་ ༩ ཚེས་ ༣ ཉིན་པེ་ཅིན་གནམ་བདེ་སྒོ་མོ་ཆེའི་ཐང་ཆེན་དུ་འཛམ་གླིང་དམག་ཆེན་གཉིས་པ་མཇུག་བསྒྲིལ་ནས་ལོ་ ༧༠ འཁོར་བའི་དུས་དྲན་སྲུང་གཙི་དང་འབྲེལ། རྒྱ་ནག་གི་དམག་ཆེན་གཉིས་པའི་སྐབས་ཀྱི་མཐུན་གྲོགས་རྒྱལ་ཁབ་ཁག་གི་སྐུ་ཚབ་མགྲོན་འབོད་ཞུས་ཏེ་གཞི་རྒྱ་ཆེ་བའི་མཛད་སྒོ་ཞིག་འཚོགས་རྒྱུ་ཡིན་པ་དང་། མཛད་སྒོའི་ཐོག་ཨུ་རུ་སུའི་དམག་དཔུང་གིས་དམག་རྩེད་རུ་སྒྲིག་གཏོང་རྒྱུ་ཡིན་སྐོར་ཕྱི་བསྒྲགས་བྱས་ཡོད་སྟབས། ད་ལྟ་རྒྱལ་སྤྱིའི་ཐོག་ནུབ་ཕྱོགས་རྒྱལ་ཁབ་ཁག་གིས་མཛད་སྒོ་དེར་མཉམ་ཞུགས་བྱ་མིན་གྱི་གླེང་སློང་འདྲ་མིན་བྱེད་བཞིན་ཡོད་འདུག
ཨུ་རུ་སུའི་བདེ་སྲུང་བློན་ཆེན་སར་གྷེ་ཤོ་གྷུ་ (Sergei Shoigu) ཡིས་རྒྱལ་སྤྱིའི་དཔལ་འབྱོར་དུས་བབ་ (International Business Times) ཞེས་པའི་ཐོག “རྒྱ་ནག་བདེ་སྲུང་ལྷན་ཁང་གིས་འཛམ་གླིང་དམག་ཆེན་གཉིས་པ་རྒྱལ་ཁའི་ངང་མཇུག་བསྒྲིལ་ནས་ལོ་ ༧༠ འཁོར་བའི་དུས་དྲན་སྲུང་གཙི་ཞུ་སྐབས། དུས་སྟོན་ཐོག་ང་ཚོའི་དམག་དཔུང་ལ་དམག་རྩེད་རུ་སྒྲིག་གཏོང་རྒྱུར་མགྲོན་འབོད་ཞུས་པར་ཐུགས་རྗེ་ཆེ་ཞུ་རྒྱུ་མ་ཟད། མ་འོངས་པར་ཨུ་རུ་སུས་རྒྱལ་ཁབ་གཉིས་བར་དམག་དོན་ཀྱི་ལས་ཀ་གང་ཞིག་བྱས་ཀྱང་མཉམ་འདེགས་ཀྱི་ནུས་པ་འདོན་རྒྱུ་ཡིན།”ཞེས་དང་། རྒྱ་ནག་དམག་དོན་ལྷན་ཚོགས་ཀྱི་ཚོགས་གཞོན་ཧྥན་ཁྲང་ལུང་ (Fan Changlong) གིས་རོའུ་ཌར་དང་དབྱིན་ཡུལ་ཆ་འཕྲིན་ཐོག “ང་ཚོས་ད་ཐེངས་དུས་སྟོན་ཐོག་ཨུ་རུ་སུའི་དམག་སྤྱི་གདན་ཞུ་བྱ་རྒྱུ་མ་ཟད་ཨུ་རུ་སུའི་དམག་དཔུང་གིས་རྒྱ་ནག་དམག་དཔུང་དང་མཉམ་དུ་དམག་རྩེད་རུ་སྒྲིག་གཏོང་བཅུག་སྟེ། རྒྱལ་སྤྱིའི་ཐོག་རྒྱལ་ཁབ་གཉིས་ཀྱི་འབྲེལ་ལམ་གང་འདྲ་ཡོད་མེད་གསལ་སྟོན་ཐུབ་པ་བྱ་རྒྱུ་ཡིན། བདུན་ཕྲག་སྔོན་མའི་རེས་གཟའ་སྤེན་པའི་ཉིན་ཨུ་རུ་སུ་སྲིད་གཞུང་གིས་རྒྱལ་ས་མོ་སི་ཁཱོ་རུ་འཛམ་གླིང་དམག་ཆེན་གཉིས་པའི་སྐབས་ཨུ་རུ་སུར་རྒྱལ་ཁ་ཐོབ་སྟེ་ལོ་ ༧༠ འཁོར་བའི་དུས་དྲན་སྲུང་གཙི་ཞུ་སྐབས་སྲིད་འཛིན་ཞི་ཅིན་ཕིན་སྐུ་མགྲོན་གཙོ་བོར་མགྲོན་འབོད་བྱས་ཡོད་པ་མ་ཟད། རྒྱལ་ཁབ་གཉིས་བར་ཐབས་ཇུས་དང་ཚོང་དོན་གྲོས་མཐུན་ཁག་ ༣༥ བཞག་པ་དེས་འབྲེལ་ལམ་གྱི་སྒོ་མོ་གསར་པ་ཞིག་ཕྱེ་པ་རེད།”ཅེས་བརྗོད་འདུག
དབྱིན་ཡུལ་གྱི་གྷར་ཌིན་དང་ཨེ་ཕེ་གསར་ལམ་ཐོག་གནས་ཚུལ་སྤེལ་དོན་ལྟར་ན། ད་ཐེངས་ཀྱི་དམག་རྩེད་རུ་སྒྲིག་དེ་ནི་ཞི་ཅིན་ཕིན་སྲིད་འཛིན་ཆགས་རྗེས་ཀྱི་དམག་དོན་འགྲེམས་སྟོན་ཞིག་ཡིན་པ་མ་ཟད། ཉི་ཧོང་གོང་དམག་གིས་རྒྱ་ནག་གི་དམག་དཔུང་དང་ཉེས་མེད་མི་སེར་ཁྲི་སྟོང་མང་པོ་དམར་གསོད་གཏོང་བར་བཤག་སྡོམ་བྱ་རྒྱུའི་དུས་ཚིགས་ཤིག་ཀྱང་ཆགས་ཡོད་སྟབས། རྒྱལ་སྤྱིའི་རྒྱལ་ཁབ་དང་མགོ་ཁྲིད་ཚོས་དོ་སྣང་ཆེ་ཤོས་བྱ་ཡུལ་གྱི་དུས་སྟོན་ཞིག་ཆགས་རྒྱུ་རེད། ཟླ་སྔོན་མའི་ནང་སྲིད་འཛིན་ཨོ་བྷ་མའི་ཨེ་ཤ་ཡའི་གནད་དོན་སློབ་སྟོན་པ་ཨི་ཝན་ (Evan Medeiros) གྱིས་རྒྱ་ནག་གཞུང་གིས་དམག་ཆེན་གཉིས་པ་མཇུག་སྒྲིལ་ནས་ལོ་ ༧༠ འཁོར་བའི་དུས་སྟོན་ཉིན་དམག་དཔུང་ཕོན་ཆེས་རྒྱས་ཤོམ་འགྲེམས་སྟོན་བྱ་རྒྱུ་ཐག་གཅོད་བྱས་པ་དེ་ནི། དཀའ་རྙོག་སེལ་ཐབས་བྱས་པ་ཡིན་ནམ་ཡང་ན་ནུབ་ཕྱོགས་རྒྱལ་ཁབ་ཀྱི་བྱ་སྤྱོད་ལ་གཤེ་གཤེ་གཏོང་གི་ཡོད་མེད་གང་ཡིན་ཤོད་ཐུབ་རྒྱུ་ཁག་པོ་རེད་ཅེས་བརྗོད་ཡོད་སྟབས། དེ་རིང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་མ་ཧུའུ་ཁྲང་ཡིང་གིས་ཨ་རིས་གྲང་དམག་སྐབས་ཀྱི་ལྟ་ཕྱོགས་བཟུང་རྒྱུ་མཚམས་བཞག་སྟེ་རྒྱ་ནག་གི་དམག་དོན་སྒྲིག་འཛུགས་འཕེལ་རྒྱས་ཕྱིན་པར་རྒྱུ་མཚན་ལྡན་པའི་ཐོག་ནས་འགྲེལ་བཤད་རྒྱག་དགོས་པ་ལས་ཁག་དཀྲི་བཏགས་ན་ཕྱོགས་གཉིས་ཀར་ཕན་ཐོགས་གང་ཡང་མེད་ཅེས་བརྗོད་འདུག་ཅེས་སོགས་བཀོད་འདུག
དེ་རིང་རོའུ་ཌར་གསར་ལམ་གྱིས་རྒྱ་ནག་གཞུང་གིས་འཛམ་གླིང་དམག་ཆེན་གཉིས་པ་མཇུག་སྒྲིལ་ནས་ལོ་ ༧༠ འཁོར་བའི་དུས་སྟོན་ཉིན། ཡུག་རེན་གནད་དོན་རྐྱེན་པས་ད་ལྟ་ནུབ་ཕྱོགས་རྒྱལ་ཁབ་ཁག་གིས་དགྲ་བོར་འཛིན་བཞིན་ཡོད་པའི་ཨུ་རུ་སུར་བརྩི་མཐོང་བྱས་ཏེ། ཨུ་རུ་སུའི་དམག་དཔུང་གིས་དམག་རྩེད་རུ་སྒྲིག་གཏོང་རྒྱུ་ཐག་གཅོད་བྱས་ཡོད་སྟབས། དུས་སྟོན་ཐོག་ནུབ་ཕྱོགས་རྒྱལ་ཁབ་ཁག་གི་སྐུ་ཚབ་གཏོང་རྒྱུ་ཕྱིར་འཐེན་བྱེད་སྲིད་པ་ཞིག་ཡིན་ཞེས་བཀོད་འདུག
གཏེ་བོ་ཚང་ལ་ལས་རྒྱུ་མང་།