གཞིས་སྤོར་བ་ ༣༢༨ ལ་སྦྱིན་བདག་མ་རག་པའི་དཀའ་ངལ་འཕྲད་འདུག

ཨ་རུ་ནཱ་ཅཱལ་ནས་བོད་མི་ ༡༠༠༠ ཁེ་ན་ཌར་གཞིས་སྤོར་གཏོང་བའི་ལས་གཞིའི་འོག་ཁྱོན་བོད་མི་ ༣༦༦ ཁེ་ན་ཌའི་ནང་འབྱོར་ཚར་ཡོད་འདུག

རྒྱ་གར་བྱང་ཤར་ཨ་རུ་ནཱ་ཅཱལ་མངའ་སྡེའི་ནང་ཡོད་པའི་བོད་མིའི་གཞིས་ཆགས་ཏི་ཛུ་དང་ཀྲུ་ཀྲིང་། མེའོ། བསྟན་འཛིན་སྒང་བཅས་ནས་བོད་མི་ ༡༠༠༠ ཁེ་ན་ཌར་གཞིས་སྤོར་གཏོང་བའི་ལས་གཞི་དེ་དངོས་སུ་ལག་བསྟར་བྱས་ནས་དུས་ཡུན་གང་འཚམ་ཕྱིན་པ་ལྟར། ད་ལྟའི་བར་ཁྱོན་མི་གྲངས་ ༣༦༦ ཁེ་ན་ཌའི་ནང་འབྱོར་ཟིན་པ་དང་། མི་ ༣༢༨ ལ་ཁེ་ན་ཌའི་གཞུང་ཚབ་ཀྱིས་དྲི་བ་དྲིས་ལན་དང་གཟུགས་པོར་བརྟག་དཔྱད་བྱས་ཚར་ཡོད་ཀྱང་། སྦྱིན་བདག་མ་རག་པའི་དཀའ་ངལ་འཕྲད་དེ་ད་དུང་ཕར་འགྲོ་ཐུབ་མེད་པ་རེད།

ཟླ་འདིའི་ཕྱི་ཚེས་ ༡༢ ཉིན་འདི་གའི་གསར་འགོད་པས་བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་བསོད་ནམས་སྟོབས་རྒྱལ་ལགས་སུ། ད་ལྟ་གཞིས་སྤོར་ལས་གཞི་དེ་གནས་སྟངས་ག་འདྲ་ཆགས་ཡོད་བཀའ་འདྲི་ཞུས་པར་ཁོང་གིས། རྩ་བའི་ཨ་རུ་ན་ཅཱལ་བོད་མིའི་གཞིས་ཆགས་ནས་ཁེ་ན་ཌར་གཞིས་སྤོར་གཏོང་རྒྱུ་དེ་མི་གྲངས་ ༡༠༠༠ གི་འཆར་གཞི་རེད། ཡིན་ནའང་། ལོ་ ༤ ཡི་འཆར་གཞི་ཞིག་ཡིན་དུས་ལོ་ ༤ ཡི་ནང་མི་ཧྲེང་ཧྲེང་ཡོད་པ་ཚོས་ཆང་ས་རྒྱག་པ་དང་། ཕྲུ་གུ་གསར་དུ་སྐྱེས་པ་ཡོང་སྲིད་པས། གནས་ཚུལ་དེ་འདྲ་བྱུང་ན་ནང་མི་ཚང་མ་རིག་རིག་བྱས་ནས་ཕར་འགྲོ་ཐུབ་པའི་ཆེད་དུ་ང་ཚོས་མི་ ༡༠༠ ཡི་ས་མིག་ཟུར་འཇོག་བྱས་ཡོད། བར་ལམ་ང་ཚོས་རྒྱན་བརྒྱབ་སྟེ་མི་ ༩༠༠ གཏན་འཁེལ་ཡོད་པ་དང་། དེའི་ནང་ནས་མི་ ༣༦༦ ཕར་འབྱོར་ཟིན་པ་རེད། འདི་ལོའི་ཕྱི་ཟླ་ ༣ དང་ ༤ ནང་ང་ཚོས་མི་ ༣༢༨ ཞིག་ལ་དྲི་བ་དྲིས་ལན་དང་གཟུགས་པོར་བརྟག་དཔྱད་སོགས་ཀྱི་ལས་གཞི་ཚང་མ་གྲུབ་ཚར་བ་རེད། དངོས་གནས་བྱས་ན་སྨན་ཁང་གི་བརྟག་དཔྱད་དང་དྲི་བ་དྲིས་ལན་ཚར་རྗེས་ལམ་སང་ཕར་འགྲོ་དགོས་ཀྱི་ཡོད་ཀྱང་། ད་ལྟ་ཁོང་ཚོ་འགྲོ་མ་ཐུབ་པར་གནད་འགག་ག་རེ་ཆགས་བསྡད་ཡོད་པ་རེད་ཟེར་ན། ཕར་བསླེབས་རྗེས་སྡོད་ས་དང་སྨན་བཅོས། ལས་ཀ་སོགས་ཚང་མ་གྲ་སྒྲིག་བྱེད་མཁན་གྱི་སྦྱིན་བདག་དགོས་པ་རེད། སྦྱིན་བདག་ཐབས་འཚོལ་བྱེད་པའི་ལས་འགན་གཙོ་བོ་ཕར་ཕྱོགས་ཀྱི་འབྲེལ་མཐུད་པ་ཉི་མ་རྡོ་རྗེ་ལགས་ཀྱིས་འཁུར་གྱི་ཡོད་པ་དང་། ཁོང་གི་འོག་ལ་བོད་ཀྱི་འཆར་འགོད་ཚོགས་པ་(Project Tibet Society)ཡོད་པ་རེད། གཞིས་སྤོར་བ་རྣམས་ཕར་མ་བསླེབ་གོང་ནས་སྦྱིན་བདག་ཐབས་འཚོལ་བྱེད་རྒྱུ་དེ་ཁོ་ཚོའི་ལས་འགན་ཆགས་བསྡད་ཡོད་པ་རེད། རྒྱན་ཐོབ་པ་རྣམས་གཞུང་ཚབ་ཁང་དུ་དྲི་བ་དྲིས་ལན་དང་སྨན་བཅོས་བྱེད་དུ་འཁྲིད་རྒྱུ་དེ་ང་ཚོ་ནང་སྲིད་ལས་ཁུངས་ཀྱི་ལས་འགན་ཆགས་བསྡད་ཡོད་པ་ལྟར། ད་ལྟའི་བར་ལས་ཀ་དེའི་ཐོག་དམིགས་བསལ་གྱི་དཀའ་ངལ་ཅི་ཡང་འཕྲད་མ་སོང་ལ། མ་འོངས་པར་ཡང་ཐོག་མའི་ལས་འཆར་གཞིར་བཟུང་བཙན་བྱོལ་བོད་མིའི་སྒྲིག་འཛུགས་ཀྱི་དགོངས་གཞི་ལྟར་འགྲོ་ཐུབ་པའི་ཆེད་དུ། ང་ཚོ་ནང་སྲིད་ལས་ཁུངས་ཀྱི་ངོས་ནས་གཞུང་ཚབ་ལ་ཐུག་འཕྲད་སོགས་ལས་ཀའི་ཐོག་འཐུས་ཤོར་མ་བཏང་བར་གང་ལ་གང་འཚམ་ཚགས་ཚུད་པོ་ཡོང་བཞིན་ཡོད། ཅེས་དང་།

གལ་སྲིད་སྦྱིན་བདག་གཏན་ནས་མ་རག་པ་ཡིན་ན། ཁེ་ན་ཌ་གཞུང་ངོས་ནས་དམིགས་བསལ་གྱི་གཟིགས་རྟོག་ཡོད་མེད་དྲིས་པར། ལས་གཞི་འདིའི་ལོ་དུས་མཐའ་མ་ཕྱི་ལོ་ ༢༠༡༦ ཟླ་ ༥ ཡིན་སྟབས། དུས་ཡུན་དེའི་ནང་མི་ ༡༠༠༠ དེ་ཆ་ཚང་གཏོང་ཐུབ་དགོས་པ་རེད། གལ་སྲིད་གཏོང་མ་ཐུབ་པའི་གནས་ཚུལ་བྱུང་ན་ལྷག་པ་དེ་ལྷག་པ་རང་རེད་མ་གཏོགས། ད་ལྟའི་བར་ཁེ་ན་ཌ་གཞུང་ནས་ལྷག་པ་ཡིན་ན་ཐབས་ལམ་འདི་འདྲ་ཞིག་བརྒྱུད་དེ་རོགས་པ་བྱེད་ཀྱི་ཡིན་ཞེས་བཀའ་མོལ་གང་ཡང་བྱུང་ཡོད་པ་མ་རེད། ཅེས་བརྗོད་བྱུང་།

གཞིས་སྤོར་བ་གཅིག་ལ་སྦྱིན་བདག་ག་ཚོད་དགོས་མིན་དྲིས་པར་ཁོང་གིས། མི་རེར་སྦྱིན་བདག་གསུམ་བཞི་དེ་འདྲ་མེད་པ་ཡིན་ན། ཕར་ཕྱོགས་ཀྱི་ཁང་གླ་ཞེ་དྲགས་ཆེན་པོ་ཡིན་ལ། གལ་སྲིད་ན་ཚ་འདྲ་བྱུང་བ་ཡིན་ན། རྩ་བའི་ཨ་རི་དང་བསྡུར་ན་སྨན་བཅོས་ཀྱི་མཐུན་རྐྱེན་ཡག་པོ་ཡོད་ཀྱང་སྨན་བཅོས་ཀྱི་འགྲོ་སོང་གང་འཚམ་ཆེན་པོ་རེད། ལུང་པའི་གནས་སྟངས་ཀྱིས་སྤྱི་ཡོངས་ནས་འགྲོ་སོང་གང་ལ་གང་འཚམ་ཆེན་པོ་ཡིན་སྟབས། མི་རེར་སྦྱིན་བདག་གསུམ་བཞི་རེ་མེད་ན་འགྲོ་སོང་ཐོག་རང་བཞིན་གྱིས་དཀའ་ངལ་འཕྲད་སྲིད་པ་ཞིག་ཆགས་བསྡད་ཡོད་ས་རེད། ཡིན་ནའང་། སྦྱིན་བདག་རྒྱུ་ཡག་ལུགས་ཀྱིས་ཁྱད་པར་ཡོད་པ་རེད། སྦྱིན་བདག་རྒྱུ་ཞེ་དྲགས་མེད་མཁན་བཞི་ལྔ་མཉམ་རུབ་ཀྱིས་རོགས་པ་བྱེད་པ་དང་། ཡང་སྦྱིན་བདག་རྒྱུ་ཡག་པོ་ཡོད་མཁན་གཅིག་གིས་དུད་ཁྱིམ་གཉིས་རེར་རོགས་པ་བྱེད་མཁན་དེ་འདྲ་ཡང་ཡོང་གི་འདུག ཅེས་དང་།

ཁེ་ན་ཌའི་ནང་ཡུན་རིང་གནས་སྡོད་བྱས་པའི་བོད་མིའི་ནང་སྦྱིན་བདག་གནང་མཁན་ཡོད་མེད་ཐད་ཁོང་གིས། བོད་པའི་ནང་རོགས་པ་བྱེད་ཀྱི་ཡིན་ཟེར་ནས་སེམས་ཤུགས་ཡོད་མཁན་དཔེ་མང་པོ་འདུག ཡིན་ནའང་། ཁེ་ན་ཌའི་ཁྲིམས་ཀྱི་ནང་ཆ་རྐྱེན་ག་རེ་ཡོད་པ་རེད་ཟེར་ན། སྦྱིན་བདག་བྱེད་མཁན་དེར་དངུལ་ཁང་ནང་དངུལ་གང་འཚམ་ཡོད་པ་དང་། དེ་བཞིན་རང་བདག་གི་ས་ཆ་དང་ཁང་པ་ཡོད་པའི་ཡིག་ཆ་སྟོན་དགོས་ཀྱི་ཡོད་པའི་སྐད་ཆ་གོ་བྱུང་། ཕར་ཕྱོགས་ན་ཡོད་པའི་བོད་མིའི་ནང་ཡིག་ཆ་དེ་འདྲ་ཡོད་མཁན་ཤུགས་ཆེན་པོ་མེད་པའི་རྐྱེན་གྱིས་ཁག་པོ་ཆགས་ཀྱི་ཡོད་ས་རེད། ཡིན་ནའང་། ཕར་བསླེབས་ཚར་བའི་གཞིས་སྤོར་བ་ཚོར་བོད་མི་ཚང་མ་མཉམ་རུབ་ཀྱིས་མཐུན་སྦྱོར་རོགས་རམ་ཧ་ལས་པའི་ཡག་པོ་གནང་གི་འདུག ཅེས་བརྗོད་བྱུང་།

ད་ལྟའི་བར་སྨན་ཁང་གིས་བརྟག་དཔྱད་བྱས་པ་བརྒྱུད་ནད་རིགས་ཚབས་ཆེན་གྱི་རྐྱེན་གྱིས་གཞིས་སྤོར་རྦད་དུ་རྩིས་མེད་བཏང་བ་དེ་འདྲ་བྱུང་ཡོད་མེད་དྲིས་པར་ཁོང་གིས། ལོ་རྒན་པའི་ནང་དེ་འདྲ་ཕྲན་བུ་ཡོང་གི་འདུག དཔེར་ན། གློ་ནད་རིགས་ཡོད་ན་ཁེ་ན་ཌའི་གཞུང་ངོས་ནས་ཅུང་ཉེན་ཁ་ཆེན་པོར་བརྩི་ཡི་འདུག་ལ། ཁོང་ཚོས་ན་ཚའི་རྐྱེན་གྱིས་འགྲོ་མ་ཐུབ་པར་ལྷག་པ་ཡིན་ན་འཕྲོ་བརླག་ཞེ་དྲགས་ཤིག་ཏུ་དགོངས་ཀྱི་ཡོད་པ་ལྟར། ཁེ་ན་ཌའི་གཞུང་ཚབ་དང་ང་ཚོའི་བར་སྔ་རྗེས་སུ་བཀའ་མོལ་བྱུང་སྟེ། ན་ཚ་དེ་རིགས་ཡོད་མཁན་ཚོར་སྔ་ཙམ་ནས་སྨན་བཅོས་བྱས་ཏེ་དྲག་ནས་ཕར་འགྲོ་ཐུབ་ན་ཡག་པོ་འདུག་ཅེས་གསུངས་ཏེ། ད་ལྟ་སྨན་ཁང་གིས་བརྟག་དཔྱད་བྱེད་པའི་དུས་ཚོད་དེ་སྔ་ནུར་བྱས་ཡོད་པ་རེད་ཅེས་ཟེར།

ཁེ་ན་ཌའི་ནང་དུ་འབྱོར་ཟིན་པ་ཚོར་འཚོ་བ་དང་ལས་ཀ་སོགས་ཀྱི་ཐོག་དཀའ་ངལ་འཕྲད་ཀྱི་ཡོད་མེད་བཀའ་འདྲི་ཞུས་པར་ཁོང་གིས། རྩ་བའི་ཁེ་ན་ཌ་གཞུང་རང་གི་ལས་འཆར་ཞིག་ཡིན་པ་དང་། ཕར་བསླེབས་རྗེས་ལས་ཀ་དང་སྨན་བཅོས་ལྟ་སྐྱོང་སོགས་ཀྱི་ཐོག་སོ་སོའི་སྦྱིན་བདག་ཡག་ལུགས་ཀྱིས་ཁྱད་པར་འགྲོ་ཡི་ཡོད་ལ། ཁ་ཤས་ཀྱིས་ཁང་གླ་སྤྲོད་མ་དགོས་པ་དེ་འདྲ་ཡང་ཡོད་པ་རེད། ཕར་འབྱོར་ཟིན་པ་མང་ཆེ་བས་ཨ་རུ་ནཱ་ཅཱལ་གྱི་ནང་དཀའ་ལས་ཤུགས་ཆེན་པོ་བརྒྱབ་ཡོད་དུས། ཁེ་ན་ཌའི་ནང་གི་ལས་ཀ་དེ་ཙམ་གྱིས་དཀའ་ངལ་ཆེན་པོར་རྩི་ཡི་མི་འདུག ཕར་སོང་ནས་སོ་སོས་དཀའ་ལས་བརྒྱབ་པའི་གྲུབ་འབྲས་ལ་བརྟེན་ནས་དཔེར་ན། གཞིས་སྤོར་སྡེ་ཚན་དང་པོའི་ནང་ཕྱིན་པའི་དུད་ཁྱིམ་ཁ་ཤས་ཀྱིས། གཞིས་ཆགས་ནང་གནས་སྡོད་བྱས་ཡོད་པའི་ནང་མི་སྤུན་མཆེད་ཚོར་དངུལ་བཏང་ནས་སྡོད་ཁང་གསར་དུ་བརྒྱབ་པ་སོགས་ཀྱི་གནས་ཚུལ་མང་པོ་ཡོང་གི་འདུག དེ་བཞིན། གཞུང་གི་ཉམ་ཐག་རོགས་རམ་འོག་བུ་ཕྲུག་སློབ་གྲྭར་གཏོང་མཁན་ཁ་ཤས་ཀྱི་ནང་མུ་མཐུད་གཞུང་ནས་རོགས་རམ་ཞུ་རྒྱུ་མིན། དེང་སང་འགྲིག་འགྲོ་ཡི་འདུག་ཅེས་ཟེར་མཁན་ཡོང་གི་ཡོད་པ་རེད། ཅེས་བརྗོད་བྱུང་།

གསར་འགོད་པ། པདྨ་མཚོ།